جدع وغلبان..ماذا قال محمود الليثي عن عصام صاصا في تحقيقات التزوير؟

تضمنت التحقيقات في اتهام عصام صاصا وشقيقه و2 اخرين بتزوير محرر رسمي عدة اسماء من مطربي المهرجانات اصدقاء عصام صاصا من بينهم مطرب المهرجانات محمود الليثي الذي ادلى باقواله في الواقعة كما ورد اسمي مطربي المهرجانات حمو بيكا وساسو على لسان مدير اعمال عصام صاصا حول سفرهما معه إلى دبي.
وقال مدير أعمال عصام صاصا خلال تحقيقات النيابة في قضية التزوير: "اللي حصل أن عصام صاصا اتصل بيا يوم ما عمل الحادثة وبعدها روحت له مكان الحادثة وروحت معاه قسم الطالبية وقعدت معاه الفترة اللي كان موجود فيها في القسم والنيابة، وساعتها كان معاه محامية وخدت مني فلوس الكفالة 30 ألف جنيه وخدت اتعابها وعصام قالي أنها خدت منه فلوس تاني".
وتابع مدير أعمال عصام صاصا: قالي أن في محامي كبير اسمه محمد حمودة وكان عنده قضية زي دي والمتهم خد فيها براءة، وساعتها العيلة كلها كانت متجمعة واصحابنا كلهم كانوا بيتناقشوا في موضوع المحامية وعصام قالي اتفق مع محمد حمودة أنا بقولك هو اللي هيمسك القضية، وساعتها قال للمحامية كدة وحصلت بينهم مشادة وساعتها عرفت أنه لغى التوكيل اللي كان عاملة ليها.
واستكمل مدير أعمال عصام صاصا، خلال التحقيقات: بعدها عصام كان عنده حفلة بعد الحادثة ب 3 أيام وسافرنا أنا وهو وسارة خليفة وحمو بيكا واسلام ساسو وجهاد مراته ومحمد أخو سارة وركبنا طيارة واحدة وسافرنا دبي وأنا في دبي عرفت من عصام أن محمد أخوه ومحمود الليثي وسيد الصعيدي راحوا للمحامي واتفقوا معاه وأن الليثي دفع مليون جنيه ومحمد أخو عصام دفع المليون التانية.
قبل أولى جلسات محاكمتهم.. نص محادثات عصام صاصا وشقيقه عن التوكيل المزور
حبس 6 أشهر.. هل يلقى أحمد فتوح مصير عصام صاصا؟
وقال محمود الليثي في أقواله ضمن تحقيقات قضية عصام صاصا: اللي حصل في حادث عصام أني كنت لسه مخلص حفلة واتصل بيا حد في المجال وقالي الحق عصام صاصا عامل حادثة وخبط واحد وجريت عليه على الدائري، ولما وصلت لقيت الراجل متوفي وعصام واقف وعربية الشرطة واقفة وعصام كان منهار وبيقول حق الراجل في رقبتي ليوم الدين.
وتابع الليثي في أقواله: عصام صاصا قالي حق الراجل وعياله في رقبتي ومرديش يمشي وشيلنا المتوفي في الإسعاف وروحنا قسم الطالبية ولما روحنا عصام اتعرض على النيابة وخد إخلاء سبيل من القسم وكان عنده حفلة في دبي في الإمارات يوم 9 مايو وسافر بعد ما خرج من القسم عشان الحفلة دي.
واستكمل محمود الليثي في أقواله: بعدها بيومين معاذ مدير أعمال عصام صاصا كلمني وقالي أنه في محامي اسمه محمد حمودة وعايزين نعرف اتعابه كام عشان عصام، وروحت لمكتب محمد حمودة فعلا وقعدت معاه أنا وصاحبي سيد واتفقنا على الأتعاب حوالي 2 مليون جنيه وبعدها مشيت وكلمت معاذ وقولت له خلاص الأمور تمام.
وأضاف محمود الليثي في تحقيقات قضية عصام صاصا: عصام صاحبي من 2023 اتعرفت عليه في فيلم وهو واد جدع وغلبان، وقعدنا في مكتب المحامي ربع ساعة عشان نتفق على الأتعاب وبعدها مشيت ومعرفش هو المحامي اللي عصام عمل له التوكيل من برا ولا لا، ومكنش معايا اي مستندات وأنا رايح، ولا أعرف حاجة عن التوكيل المزور بتاع عصام، وكل القصة أني كنت وسيط بس.