مبقتش أتضايق.. ليلى طاهر تعلق على شائعات وفاتها

نفت الفنانة القديرة ليلى طاهر، الشائعات التي انتشرت حول وفاتها، قائلة: "أنا زي الفل بس الناس مش مقتنعة ومش أول مرة يحصل، قبل كده ثلاث أو أربع مرات".
وأضافت "ليلي طاهر" خلال مداخلتها الهاتفية برنامج "كلمة أخيرة" الذي تقدمه الإعلامية لميس الحديدي على شاشة ON: "زمان كنت بتضايق ولكن دلوقتي مبقتش أتضايق..وبقول دول هبل ومش عندهم حاجة يكتبوها.. ف يكتب أخبار وفاة ولو صحفي أو محرر فن المفروض يدقق ويلاقي حاجة يكتبها".
واسترسلت: "لفت نظري حب الناس اللي ماتعرفنيش في الشارع وفي كل مكان وبحثهم عن رقمي عشان يطمنوا علي ولقيت الناس هجموا عليا في نادي الجزيرة وكأنهم شافوني أول مرة قعدوا يحضنوني ويبوسوني ويشتموا في اللي كتب الخبر".
أكملت : عشان حب الناس ليا واحترامهم لي مش هنزل درجة واحدة عنه وعشان تاريخي اللي الناس بتعتز بيه وبالتالي مش عاوزة أعمل حاجة أقل درجة مما قدمته وإلى الآن لم أعثر على شيء يتسق مع ما قدمته خاصة أن المرحلة العمرية اختلفت ونوعية الفن لكن مش هعمل حاجة أقل من اللي قدمته".
وذكرت أنها قدمت باقة متميزة من الأعمال سواء دراما أو مسرحيات أو أفلام قائلة: "أبرز الأدوار المقربة لقلبي فيلم الأيدي الناعمة وصلاح الدين وهامليت وأشياء كثيرة قدمتها مش عارفة أقول إيه ولا إيه".