كنت بحوش عن أخويا.. اعترافات صاحب محل بلايستيشن قتل شاب بعين شمس

ينشر موقع «صدى البلد»، نص تحقيقات النيابة، مع المتهم بقتل أحد الأشخاص داخل محل البلاي ستيشن الخاص به بمنطقة عين شمس، وذلك بعد حدوث مشادة كلامية تطورت إلى مشاجرة بين الطرفين، وإليكم نص الاعترافات:
شرعت النيابة العامة، في سؤال المتهم، فأجاب:
س: ما اسمك؟
ج: اسمي إسلام محمد محمد أبو عيسي، 28 عاما، صاحب محل بلاي ستيشن.
س: ما قولك فيما هو منسوب إليك من أنك متهم بقتل المجني عليه مايكل نبيل شنوده عمدا من غير سبق إصرار ولا ترصد ، بأن تشاجرت معه على إثر خلافات وقتيه بينكما، حتى سددت له طعنة قوية باستعمال أداة مقص حديدي قاصداً إزهاق روحه وأحدث به الإصابات الموصوفة بالتقرير الطبي المرفق بالأوراق والتي أودت بحياته قاصدا من ذلك قتله؟
ج: محصلش أنا مقتلتش حد ومش قصدي أموته، بس اللي حصل أنا كنت قاعد في محل البلاي ستيشن بتاعي، وكان في طفلين بيلعبوا على جهاز وبعدها دخل مجموعة شباب ولقتهم بيهزروا مع بعض وصوت الشاشة بتاعت التليفزيون بتخبط فأنا روحتلهم وقولتلهم مينفعش هزار هنا، قالي ده ابن عمي قولتله حتى لو ابن عمك هزروا برا علشان في حاجات هنا ممكن تتكسر.
وأضاف: بدأت أقولهم اطلعوا برا وفي نفس الوقت لقيت واحد منهم معرفهوش فيهم ، بيقولي أنت بتكلمنا كدا ليه وزقني حاولت أطلعهم برا المحل ولما خرجنا لقيتهم مسكو فيا من الهدوم فلقيت أخويا طلع من المحل وبيقولهم خلاص خلاص، وفي نفس الوقت لقيت واحد منهم طلع وضربني بالبونية في عيني فتعورت ، وبعدها أنا وأخويا في النص بينهم فدخلت جري جوه المحل وجبت مقص حديد من علي الترابيزة وطلعت جري ليه برا المحل.
وتابع: لما خرجت لقتهم ملمومين على أخويا بيضربوه فأنا بدأت اضرب بالمقص علشان أحوش عن أخويا ، ومكنتش شايف بضرب ازاي ولا في مين وفعلا سابوا أخويا، ورحت علطول قفلت المحل والناس كلها اتلمت وبعدها لقيت ناس تانية تبعهم جم وضربوني وعوروني ، لغاية ما الناس وأهالي المنطقة حاشت ورجعوهم لورا ، والموضوع كان هدي والعيال مشيوا وبعدها الحكومة جت في ميكروباصين أخدوني أنا وأخويا وودونا على القسم وده كل اللي حصل.
وكان قسم عين شمس ، تلقي إشارة من غرفة عمليات النجدة، بوجود بلاغ من أحد المستشفيات بوصول شاب متوفى، إثر إصابته بطعن في الصدر بمقص بمنطقة عين شمس، وعلى الفور انتقل رجال المباحث إلى المكان، وتبين أن مرتكب الواقعة صاحب محل بلاى ستيشن، وتم ضبطه.
وتمكنت الأجهزة الأمنية بوزارة الداخلية من ضبط مالك محل البلاي ستيشن المتهم بقتل الشاب، عقب التعدي عليه بمقص في منطقة عين شمس، بعد الدخول في مشادة كلامية تطورت للتشابك بالأيدي، وتعدى من خلالها المتهم على المجني عليه وتم نقل الجثة إلى المشرحة، وحُرر محضر بالواقعة.