عبد الرحمن حجاج يكتب: الشويتين بتوع الحلم

بحب جدا قبل النوم كل يوم إني اقعد مع نفسي كده شوية واختار أحلامي، أو علي الأقل يعني أتمني إني أحلم بشوية حاجات معينة لعل وعسي أنها تيجي في المنام فتصبح النومة مليانة انشكاح وسعادة وشخير عميق يدل علي نوم أعمق.
أحلامي في العموم بتتقسم لنوعين من الأحلام وهي الأحلام البعيدة والأحلام القريبة السهل تحقيقها سواء علي المدي القريب لو تعبت نفسي شوية او علي المدي القريب لو فضلت نفس ذلك الإنسان الكسول الي الأبد.
في القسم الأول من الاحلام ، اللي هي الأحلام البعيدة، بحلم دايما إنى شخص عازب (هو انا كده كده عازب بس ببقي عازب اكبر شوية في السن ) وصاحب ثروة ملهاش اول من آخر، بيت عملاق من اللي بيقولوا عليه يموت القطر لو لف في حماه لفة ، يبقي عندي مكتبة عملاقة شبه المكتبة بتاعة فيلم الجميلة و الوحش اللي هي عمري يخلص وانا لسه مخلصتش ربع الكتب اللي فيها، ويبقي عندي مرسم فيه كل الألوان الغالية اللي شكلها يخض وفي الأغلب لما بتشوفها في المكتبة بتخاف حتي تبص علي سعرها عشان قلبك المسكين مايتجرحش.
في الأحلام البعيدة أنا شخص معاه باسبور مليان تأشيرات لكل البلاد،بسافر كل اسبوع بلد مختلفة و ليا مخزون من مغامرات عن كل بلد منهم عشان احكيها لأحفادي لما أعجز ده في حالة اني مفضلتش عازب.
في الأحلام البعيدة ، بحلم اني لسه بمتهن الشغلانة اللي بحبها اللي هي طبعا الكتابة ، ادخل اي مكتبة الاقي الناس بتسأل عن كتبي و كل يوم تقريبا يستوقفني ما لا يقل عن خمس اشخاص عشان يتناقشوا معايا في آخر مقال قروه ليا او للاستفسار عن شيء غير مفهوم في رواية من رواياتي و اكون انا منشكح جدا و انا حاسس اني اديب في نفسي بقي.
في الاحلام البعيدة ايضا اتلقي مكالمة هاتفية في نص الليل من رقم مجهول و ارد و انا شبه نايم فا الاقي ان المتصلة هي اصالة بتطلب مني اكتبلها اغاني الالبوم الجديد كلها و تسألني لو حابب اجرب الحنلها كمان و رغم ان قلبي ساعتها هيبقي بيرقص من السعادة هسألها بكل تناكة " هتدفعي كام يا صولا؟" . في الاحلام البعيدة ،مروان حامد او شريف عرفة يعجبوا برواية من رواياتي و يقرروا يحولوها لفيلم سينما،في الاحلام البعيدة هتكلم لغة كل الحيوانات و هيبقي صوتي حلو و هبدأ بأتخاذ قرارات صح لاول مرة في حياتي .
اما في القسم التاني لأحلامي ، اللي هي الاحلام القريبة و رغم انها في الاغلب احلام سهلة الا اني برضه مش بعملها ، هكلم الأشخاص اللي بقالي فترة مش بكلمهم و اقولهم انهم بجد وحشوني و اقولهم اني بجد بحبهم ، هقول للناس اللي مش بحبهم عيوبهم في وشهم ، هقول لده انه كداب و اقول لده انه منافق و مش هضحك ابدا في وش حد انا مش عايز اضحك في وشه . في احلامي القريبة هبطل امسك الموبايل في ايدي 24 ساعة و ارجع تاني امسك الكتب اكتر زي زمان ، هنزل اتمشي علي البحر يوميا و اكتب عن الناس اللي بقابلهم و اتخيل قصة كل شخص فيهم ، هتفرج اكتر علي الافلام و القنوات اللي بتفرحني و مش هفضل اتفلسف و احلل كل حاجة بتفرج عليها ، هنام وقت اطول و ابطل استسهل اني اضيع الصداع بالبانادول بدل ما ادي لنفي وقت اطول اني ارتاح .
في الاحلام القريبة هطبع صور بحجم كبير لكل الاشخاص اللي اثروا فيا و بيلهموني زي حميد الشاعري ، محمد منير ، نجيب محفوظ و غيرهم و اعلق صورهم برا شباك اوضتي عشان يكونوا مصدر الهام للي رايح و اللي جاي في الشارع . في الاحلام القريبة هبدأ اتخانق بجد مع اي سواق تاكسي يطلب 5 جنيه زيادة و انا عارف انه مايستحقهاش ، مش هسمح للراجل بتاع الكشك اللي جنب البيت يديني بالباقي لبان او بسكوت غير معلوم المصدر ، هعمل مشروع ال 365 صورة اللي كل مرة بأجله او اكسل اعمله ، هبطل اصلا موضوع الكسل اللي اصبح مسيطر علي حياتي كلها ، في الاحلام القريبة هقرب اكتر من ربنا اللي مفروض اشكره علي حاجات كتير بنسي اشكره عليها،ههتم اكتر بعلاقتي مع البشر و اهتم اكتر اني اصبح شخص احسن .
المهم بقي في الاخر اني بصحي من النوم بعد شويتين الحلم عندي نفس الإصرار اني احقق كل الاحلام دي بس في الاخر مش بيحصل منها اي حاجة ، و في الاغلب مش هيحصل اي حاجة غير اما اقرر من جوايا اني لازم اعمل حاجة و ان الحاجات دي كلها حرام تفضل حلم و بس.