معلش يا شعب أنت السبب!!

أنت اللي صغّرت الكبير .. أنت اللي فخّمت المدير.. أنت اللي انتخبته نايب والبيه قرايبه اتظبطوا ومعديين..
أنت اللي أخدت ميراث أخوك وهنت أمك وضربت أبوك.. أنت اللي ماشي في الشوارع تشحت يا بيه ومعاك فلوس.. أنت اللي زودت البقالة وماشي ترمي في الزبالة.. "ما تفوق يا بيه".
ماشي بتفتي في كل حاجة وأنت يا دوب.. عاملي فاهم كل حاجة وأنت يا دوب.. الحكاية مش فهلوة .. الحكاية أكبر يا سيدي .. الحكاية شخص ماشي ع الغلط وشعب عاوز يتظبط.. "اظبط يا بيه".
أنت يا عم يا شحات.. ماشي تقول صلوا عليه.. بنتي مريضة وابني مريض والنبي يا بيه اديني حتى ربع جنيه.. وجنيه ورا جنيه أنت خلاص بقيت بيه.. كفاية خلاص لكن الطمع خلاك جبان.. ماشي بتشحت في الشوارع يا جبان.. تاخد فلوس من ناس فقيرة ممعهاش.. ترضاها لنفسك.. ارضاها.. بس شوف لما تقابل ربنا هتعمل ايه.. "كوش يا بيه".
وأنت يا تاجر عمال تزود في الأسعار.. مفيش رقابة وللا ايه.. يا بتوع الرقابة فين الرقابة.. مفيش خلاص ميهمنيش .. هدفع وهمشي.. حقي هييجي وأنا عارف إنه هييجي.. فيه مولى كبير عدل عظيم.."حرام يا بيه".
بيضة بكام وجبنة بكام لحمة بكام فرخة بكام وزيت كمان .. بلاقي تاجر يبيع بنص وجنبه واحد بأغلى نص ومحل تالت ييجي يبص على الأسعار.. عشان يحدد هيبيع بكام.. المهم ياخد فلوس ومش مهم الغلبان.. واملا كرشك يا جبان.. "كرشك يا بيه".
وأنت يا باشا يا سواق.. الأجرة عندك ب 2 جنيه علطول تزود نص جنيه وكمان جنيه وتقول يا صاحبي هي كدا الأجرة كدا.. كداب يا شيخ... "حاسب يا بيه".
سيادة الموظف .. مش أنت برضه بترتشي .. وأما تفكر تشتغل ساعتين تلاتة بتشتغلهم في السنة من غير ضمير .. مش كله طبعا لكن كتير من غير ضمير.. شغل مفيش .. كلام كتير وفهلوة .. وإن حد جه عدل عليك تغضب تثور وكمان تقول ما توحدوه .. أنت اللي لازم توحده قبل المصيبة قصدى المصايب الكتير... "وحد يا بيه".
سيادة المدير مش برضه أنت اللي ظلمت .. عليت قريب ظبطت صاحبك وولاد أخوك .. جالك مثقف فاهم وواعي خبرة سنين.. رفضته ليه علشان قريب من غير شهادة ومعرفة وخسرت باع في المفهومية والمعرفة.. "اعدل يا بيه".
وأنت يا نايب مش قلت برضه هتنطفي كل مشاكل الزبون اللي انتخبني.. طب فين وعودك وكمان عهودك .. النفحة منك لولاد أخوك وعمام أبوك .. كل اللي همك منصبك وفلوس سيادتك في البرلمان.. خايف يقلوا.. "نفحة يا بيه".
يا شعب ليه الفهلوة.. طابوركم ماشي بالفهلوة.. صفين يمين واتنين شمال بعشوائية وهرجلة .. لو حد عاتب تردوا فورا متعصبين خليك في حالك يا مرجلة لحسن هسب وهفرجك البهدلة.. ماشي يا سيدي حقك عليا خليك كدا .. حتى الطريق ما سبتهوش ماشي بترمي في الشوارع ومفيش موانع .. مش فارقة معاك.. زبالة ماشي خضار كمان حتى العصير تشرب كانات ترمي "أزايز" يا معلمة.. "اهدا يا بيه".
وأنتي يا أبلة طلابنا ماشيين بالطبلة بتعلموهم الفرتكة والسكسكة والبهرجة.. أستاذنا يا محترم الولاد ميعرفوش تاريخ الهرم ولا الصحابة.. بس الرسول يعرفوا إنه نبي.. وموسى نبي وعيسى نبي .. "علّم يا بيه".
العيال راحوا خلاص .. بالفلوس اتعلموا تعليم ضعيف أعلى ما فيه إيه يا شبح.. صبّح يا سيدي نهارنا فل.. أستاذنا فل يلا يا أخويا ع المدرسة نلعب ونجري نقعد ونهري.. حصصنا خلصت يا معلمة.. مفيش رقيب الحكاية سبهللة.. " راقب يا بيه".
سبنا الأصول وخلاص بقينا مجرد صور.. ومفيش معانا غير الصور.. وياريتها نافعة.. ياريت نصلح نفسنا قبل ماييجي اليوم اللي نقابل ربنا.. هنقوله إيه.. دا كان وكان .. وكان كان.
أنت يا بابا وأنتي يا ماما سيبتم ولادكم في الفهلوة.. روحي يا بنتي المهم تجيبي راجل تتجوزيه وتعالى يا بني بمزة حلوة صغيرة.. مبسوطين .. "ربّي يا بيه".
المهم والأهم من كل دا نعرف غلطنا ونصلحه.. نحب بعض.. نبني نعلي.. نقرا كتير ونربي أحسن من كدا.. ونسيبنا فورا م الفهلوة.. ساعتها بس هنبقى شعب راقي وفاهم ناضج وواعي للمسألة.. "فاهم يا بيه"