محمد الشرقاوي يكتب: حكومات "الخطة الإستراتيجية بالخلطة السحرية"

مين فينا مسمعش أن عندنا "خطة إستراتيجية" في كل الوزارات والهيئات الحكومية بس اللي بنسمعه غير اللي بنشوفه من كل مسئول بيتولي المسئولية، واضح إن الجملة لما بتتكرر كتير بتبقي موضة بس بتبقي بايخة لما بتطول، وكل مسئول يزايد فيها ويعلي النغمة أكتر وأكتر عن اللي قبله بنفس "الجملة" على أنه صاحب "الخلطة السحرية" اللي هتحل مشاكل البلد بحالها بخطته الإستراتيجية.
مش كدة وبس لا بقينا بنشوف وبيتكرر على شاشات التليفزيون خبراء إستراتيجيين في كل المجالات ومحدش يعرف إنجازتهم إيه على الأرض، ولا حد فاهم ليه الدولة ما بتنفذش كلامهم ؟ ياتري عشان هما بيقولوا كلام وبس ! ولا عشان الدولة معندهاش استعداد تغير المنظومة في اختيارتها لمسئولين ووزراء ومحافظين محدش فاهم لحد دلوقتي معيار اختيارهم في مناصبهم كان علي اي اساس !
وزارة النقل عندها خطة استراتيجية رغم ان خطوط السكة الحديد زي ما هي من ايام الاحتلال ؟؟ وزارة البترول عندها خطة استراتيجية رغم ان مفيش اكتشاف بيتم الا عن طريق شركات ومعدات اجنبية ؟؟ وزارة السياحة عندها خطة استراتيجية رغم ان الاهمال والسرقة وانعدام خبرة التسويق هي الطابع الغالب ؟؟ وزارة الثقافة عندها خطة استراتيجية رغم ان مفيش حد بيشتري كتب غير من معرض الكتاب كل سنة وكأنه حدث تاريخي وبقينا شعب ثقافته معدومة ؟؟
وزارة الشباب والرياضة عندها خطة استراتيجية رغم ان اكتر فجوة موجودة دلوقتي بين الدولة والشباب ؟؟ وزارة التموين عندها خطة استراتيجية رغم انها في الاساس وزارة حرب مش موجوده في العالم كله بس وجودها عندنا اكيد عشان الكروت الذكية الفكرة العبقرية ؟؟ وزارة التخطيط عندها خطة استراتيجية رغم ان مشكلتها في قانون الخدمة المدنية اللي بتحارب عشان يطبق علي قطاعات وقطاعات تانية لا , وده طبعاً يخلينا نطمن ان التخطيط ماشي في نفس الطريق ؟؟ وزارة الزراعة عندها خطة استراتيجية رغم اننا بقينا بنستورد عشان نكفي احتياجتنا وكل يوم نسمع عن أسمدة وأكل مسرطن ؟؟
وزارة التجارة والصناعة عندها خطة استراتيجية رغم ان مفيش صناعة واحدة مميزين بيها في العالم كله يعني محدش هيتأثر بوجودنا او غيابنا "المعني كبير" ؟؟ وزارة الاستثمار عندها خطة استراتيجية رغم ان كل مشاكلها في قوانين تعوق الاستثمار ؟؟ وزارة الاثار عندها خطة استراتيجية رغم ان مفيش اهتمام ولا رعاية كافية لحمايتها ولا من تغيير طقس ولا حتي العاملين فيها ولا من سرقتها ؟؟ وزارة الاسكان عندها خطة استراتيجية رغم ان اسكان متوسطي الدخل كان تكلفته علي الموظف من نفس الفئة اكبر بكتير من الدخل اللي يتقضاه ؟؟ وزارة الكهرباء عندها خطة استراتيجية رغم ان شبكات الكهرباء زي ما هيه مفيش تجديد ولا تغيير , واننا لسه في 2016 وبنفكر نستغل طاقة الرياح والطاقة الشمسية ؟؟ وزارة البيئة عندها خطة استراتيجية رغم ان مفيش اكتر من تلوث البيئة سواء في الهواء او المياه ولسه لحد النهاردة بنفكر نستفيد من قش الارز اللي بيتهدر سنوياً ؟؟ وزارة الصحة عندها خطة استراتيجية رغم ان مفيش حاجة تذكر ليها , ده غير ان المسئول الكبير في الدولة لما بيتعب بيروح المانيا يتعالج ؟؟ وزارة الاوقاف عندها خطة استراتيجية رغم اني عمري ما شوفت ليها دور غير اختيار خطبة الجمعة وقفل مساجد وفتحها والمفروض الرقابة عليها
بس فعلا ناس كتير متعرفش الفرق في الاختصاصات بينها وبين الازهر ودار الافتاء ومجمع البحوث وياتري بيكملوا بعض ولا كل حاجة فيهم مستقلة بذاتها ؟؟ وزارة التنمية المحلية عندها خطة استراتيجية رغم ان المحافظين محدش يعرف اختيارهم بيكون ازاي !! ولا المحليات دورها ايه غير ان الفساد طلع منها ؟؟ وزارة التربية والتعليم وكمان التعليم العالي عندهم خطة استراتيجية رغم ان مستقبلنا واولويتنا هي التعليم , بس للأسف مفيش اسوء من جيل بيسلم جيل اتعلم في منظومة اساسها الحفظ والتلقين وعشان كدة بقينا بلد شهادات وبس ؟؟ وزارة العدل عندها خطة استراتيجية رغم ان مفهوم العدل اللي اتربينا عليه هو "العدل اساس الملك" بس للأسف طول الوقت حاسين بالظلم في غياب العدل زي وكلاء النيابة اللي اترفض تعيينهم عشان اهلهم ولحد النهاردة رافضينهم ؟؟ وزارة الخارجية والتعاون الدولي عندهم خطة استراتيجية رغم ان كتير ميعرفش الفرق في اختصاصات كل واحدة فيهم , وسفارتنا في كل دول العالم وجودها بالنسبة للمواطن المصري أقل تواجد بالنسبة لأي مواطن لأي دولة تانية ؟؟ وزارة المالية عندها خطة استراتيجية رغم ان الموازنة كتير مننا مش فاهم بتتعمل ازاي وايه النتيجة اللي بنوصلها لما بتزيد او بتقل علي حسب تقسيمها , وان الجنية المصري بقا كل يوم في النازل ؟؟
وزارة الري عندها خطة استراتيجية رغم ان النيل مع مياه الصرف بقا طبيعي اختلاطهم مع بعض , والزرع بقا بيتروي بمياه مصارف زيه زي السمك اللي عايش في مزارع بنفس الميه ؟؟
ويبقي السؤال .. هو احنا بنحاسب اي مسئول مش قد المسئولية , ولا للأسف ده بقا حال اغلب من يقومون بإدارة مؤسسات الدولة واللي منهم كان المفروض عنده "خطة استراتيجية" كانت سبب في انه يبقي الحال كما هو عليه ومن يأتي بعده يكمل نفس المسيرة بدون نتيجة , ويبقي السؤال اللي معرفش اجابة ليه "المسئول بيتم اختياره ازاي وليه وعمل ايه يتحاسب عليه وكل ده تحت بند الشفافية , حلم شاب عايز يشوف بلده بتتغير !!