لخبط لخابيط.. شخبط شخابيط !

مش عارفة مالى كدة متوتر.. متلخبطة حالى انقلب.. كل حاجة من حولى متشخبطة متلخبطة.. ياترى هو ده حالى ولا حال كل المجتمع.. الناس كلها زيي مش عارفه إيه اللى جرى.. جرى إيه فى إيه بالضبط ؟! كلنا مش عارفين مش فاهمين.. ولا كل واحد فينا مكبر الجمجمة !! يقولك يا ابنى وأنا مالى خلينى فى حالى !! أل إيه خلينا نعيش ناكل ونشرب ونحط دماغنا على المخدة.. ننام ونصحى وأدينا عايشين !! أل ايه كده مش ها نفكر ولا نشغل بالنا باللى جرى!! ما المشكلة إن كل واحد فينا متلخبط متشخبط مش فاهم ولاعارف هو إيه بس اللى جرى؟! فهمونى كلمونى قولولى هو ليه الناس كده متغيره ؟! هو انتى مش واخدة بالك من التغيير الكبير، اللى قام فى البلد !! طيب ده تغيير خلانا أحسن ولا جابنا أرض دمرنا ورجعنا لورا.. لا دا كل يوم يمر حالتنا بتشخبطت وتتلخبطت وتجبنا لورا.. وكل ما نبدأ يجى اللى يرجعنا تانى لورا!! وياريتها يا أختى جات على حبة لخبطة وشوية الشخبطة بتاعت كلامهم فى السياسة اللى الناس كلهم بقوا فهيمه وبيتكلموا فيها.. دا اللخبطة والشخبطة وصله لحد بيوتنا دايسه ولا همها.. لخبطة عقول وشخبطة قلوب كلنا فهمنها وعارفنها بس عنها بنعمل مش عارفين.. هو ليه حالنا اتقلب ووصلنا لأسوء ما فى التغيير.. ومش عارفه ليه مستمرين ومكملين.. نخرب بيوتنا وقلوبنا بحكاية كراهية غريبة عنا واحنا نستقبلها ونكبرها جوانا واحنا دارين وعارفين!! دارين بحالنا اللى اتهدم وعاوزين نلمه مش عارفين.. اصلهم باسم الحرية.. بيكلمونى..ويجننونى.. ويشتمونى..يبهدلونى .. ويدمرونى..والمصيبة أننا عارفين وساكتين لا ومستمرين.. هو احنا خلاص اتغيرنا للدرجة دى ولا احنا اللى كنا مش متربين.. نفسى وأنتم أكيد معايا نشيل اللخبطة من جوانا.. نرجع لأدبنا وأخلاقنا.. وسلوكنا الجميل الراقى.. ساعتها هانكون نفسنا ونبعد عن غيرنا اللى بيخربنا واحنا عاملين مش فاهمين.. ونرجع لحياتنا.. وتقاليدنا اللى اتربينا عليها فى بلدنا الجميلة مصر الحبيبة اللى من ترابها اتعلمنا ازاى نكون بنى آدمين!! ونقدر كلنا نمسح الشخبطة اللى عملت اللخبطة ونعيش كلنا مع بعضنا أهل وأحباب.. مخلصين مطمنين.. بس بسرعة يالا نبدأ كلنا نرجع مع بعض لنفسنا نسترد حاجات كتيرة جميلة ضاعت وضيعتنا سنين!