قصيدة وشاعر| «مدنة» لخلف جابر

خلف جابر.. شاعر عامية سويفي ساهم بشكل كبير في إثراء وتقدم القصيدة العامية، ويمكن المشاركة أيضا في إثراء الفصحى، إذا قرأ له أحد الشعراء الذين يستطيعون توظيف ما يأتي به من صور هو أول من مسها.
صدر ديوانه الأول في 2015 بمعرض القاهرة للكتاب تحت عنوان "عجلة خشب"، وفاز ديوانه بجائزة أحمد فؤاد نجم "ساويرس"، كما كتب للفنانة فيروز كراوية بعض أغان منها، حسدو الغجر، قلب زينه، واليوم يطل علينا بقصيدته الجديدة "مدنة" من ديوانه الثاني "أربعاء أيوب" الذي سيصدر في معرض الكتاب المقبل.
ساب عطره في كفوفك
روح ملاك..
يبعث إليكي كل يوم من غير رسالة
بيبوس كفوفك
ويلتفت مشتاق
غنى ورقصلي
وابتسملي وقال
من فينا يكدب في اللقا
بيبقى أصدق في الفراق
…
أنا وانت
جوز جناحات لطير واحد
لو حد فينا انكسر
تلقى الشقيق بيميل
من يوم خدودك ماجفت
وأنا قلبي بايت مشقق
وعنيا نيل
ما عرفش قلبي الخوف
غير خوف عليكي
كنت أضعف من عروق الورد قدامك
وإن مس قلبك شر
كنتي انتزاع الفتيل
…
هدل الحمام سكران
وهي.. بتقلب الابراج كاسات
وتنفض البيت م النجوم
الشمس واخدة مساحة م الاوضة
ممكن تقول النص في الصالة
حاضر..
هملى الفراغ في النص بالشجر اللي جف
وهلم كام غابة في ايديا وأقوم
…
قالت
بعد الوعود بالقلب والعين والايدين
ممكن تكون لي صديق؟
قلت:
هل ينفع البحر اللي شايل فوق جبينه الشمس
بعد ابتسامتك ليه علشان تقول الله
لحظة ما ترفع عنيك
يوشم عنيك بالضيق
…
قالت: ينفع تكون لي صديق؟
قولت: هل ينفع أنه يدوس على الروح والفؤاد
ويبصلك عادي وتطيبك.. معلش
إزاي هشوفك وأبتسم في ثبات
وانتي اللي لو طليتي ع البحر الغويط
عين السمك من طلتك ترمش
…
قال:
بلاش تصدق انها سابت عشانك
تمسك خناق اللفظ
وترفض المفهوم
هل ينفع ارمل
تبيع شرفها في الليالى السود
وتجيب قرص في النور
على رحمة المرحوم؟!
…
البحر..
خاتم فضة مش متجاب
ودموع حنين
مين اللي قال
الحب مش هيكون حب من غيرك!
والبحر..
بعد بين شطين
…
شلتك في عيني
لكني خفت من البكا
تخوني مرة دموعي فتفارقي العيون
كان نفسي اقولك بحب
والحب زي الشعر
والشعر ما بيملاش بطون
…
كان يومها تجهل عيوني
النسمة فارقة من هنا على فين
انا قولت يومها أكيد
فيه عين بتستنى الرجوع
وأنا
لو قشة نايمة في حضن ريح
سكنت عيوني
تلقى الدموع مش من وجع
لكن..
يصعب علينا نفرق الوليفين
…
ولأن قلبي انسان طبيعي
فعادي لما النور طرف عنيه عماه
ولأنه
ما كانش جاب الدبلتين
وقت الفراق
قلع صباعه ورماه