-1-
ساب عطره في كفوفك..
روح ملاك..
يبعث إليكي كل يوم من غير رسالة..
بيبوس كفوفك..
ويلتفت مشتاق..
غنى ورقصلي..
وابتسملي وقال..
من فينا يكدب في اللقا..
بيبقى أصدق في الفراق..
-2-
أنا وانت جوز جناحات لطير واحد..
لو حد فينا انكسر..
تلقى الشقيق بيميل..
من يوم خدودك ما جفت..
وانا قلبي بايت مشقق..
وعنيا نيل..
معرفش قلبي الخوف..
غير خوف عليكي..
كنت أضعف من عروق الورد قدامك..
وإن مس قلبك شر..
كنتي انتزاع الفتيل..
-3-
هدل الحمام سكران..
وهي..
بتقلب الأبراج كاسات..
وتنفض البيت م النجوم..
الشمس واخدة مساحة م الأوضة..
ممكن تقول النص في الصالة..
حاضر..
هملا الفراغ في النص بالشجر اللي جف..
وهلم كام غابة في ايديا وأقوم..
-4-
قالت..
بعد الوعود بالقلب والعين والإيدين..
ممكن تكون لي صديق؟..
قلت..
هل ينفع البحر اللي شايل فوق جبينه الشمس..
بعد ابتسامتك ليه علشان تقول الله..
لحظة ما ترفع عنيك..
يوشم عنيك بالضيق..
-5-
قالت: ينفع تكون لي صديق؟..
قلت: هل ينفع انه يدوس على الروح والفؤاد..
ويبصلك عادي وتطيبك..
معلش..
ازاي هشوفك وابتسم في ثبات..
وانتي اللي لو طليتي ع البحر الغويط..
عين السمك من طلتك ترمش..
-6-
قال..
بلاش تصدق إنها سابت عشانك..
تمسك خناق اللفظ..
وترفض المفهوم..
هل ينفع أرمل..
تبيع شرفها في الليالي السود..
وتجيب قرص في النور..
على رحمة المرحوم؟..
-7-
البحر..
خاتم فضة مش متجاب..
ودموع حنين..
مين اللي قال..
الحب مش هيكون حب من غيرك..
والبحر..
بعد بين شطين..
-8-
شلتك في عيني..
لكني خفت من البكا..
تخوني مرة دموعي فتفارقي العيون..
كان نفسي اقولك بحب..
والحب زي الشعر..
والشعر ما بيملاش بطون..
-9-
كان يومها تجهل عيوني..
النسمة فارقة من هنا على فين..
أنا قولت يومها أكيد..
فيه عين بتستنى الرجوع..
وأنا..
لو قشة نايمة في حضن ريح..
سكنت عيوني..
تلقى الدموع مش من وجع..
لكن..
يصعب علينا نفرق الوليفين..
-10-
ولأن قلبي إنسان طبيعي..
فعادي لما النور طرف عنيه عماه..
ولأنه..
مكانش جاب الدبلتين..
وقت الفراق..
قلع صباعه ورماه.