فيديو: قس يعتذر عن مصافحة بدين في احتفالات الميلاد.. ويصف أعضاء العسكري ب”الظلمة”

* رجل الدين المسيحي يستنكر مخاوف المسيحيين من الإسلاميين:” خايفين من أيه.. يعني هيكونوا أسوء من الحزب الوطني ولا أسوء من مبارك”
* اعتداءات الشرطة العسكرية على المتظاهرين “فُجر”.. و دم الناس دول صارخ لله من الارض
كتب- حسام المغربي :
تداول نشطاء على موقع التواصل الاجتماعي فيسبوك مقطع فيديو تم بثه على اليوتيوب لأحد كهنة الكاتدرائية المرقسية بالعباسية يعتذر فيه إلى أهل الكنيسة علي مصافحته وتقبيله للواء حمدي بدين قائد الشرطة العسكرية أثناء حضور قيادات القوات المسلحة لحفل قداس عيد رأس السنة بالكاتدرائية بالعباسية.
وقال القس في مقطع الفيديو :”الحقيقة قبل ما أبتدي لازم أعتذر لكم علي حاجة يوم ليلة رأس السنة وإحنا بنصلي كانت الساعة 12 إلا ربع والإضاءة خفيفة فوجئت بمجموعة من كبار المجلس العسكري جاءوا، وواحد سلم عليا وقال لي: أنا اللواء حمدي بدين قائد الشرطة العسكرية.. فانا بتأسف أني بوسته وسلمت عليه وبتأسف أني أتصورت معه”.
وأضاف قائلاً :” هما ممكن يكونوا عاملين الحركة دي علشان يحسنوا المنظر وأنتوا لازم تعرفوا إن أبوكم رجل محترم ولازم يقول الحق لان الناس دي ظلمة ومسكين الكراسي والفيديو ده بيتسجل وهينزل علي النت بكره الصبح يعني ممكن متلقونيش”.
وتابع قائلا : “يا جماعة الحق حق والأبيض أبيض والأسود اسود .. الله لا يكيل بمكيالين .. منزعلش علي أولادنا اللي اتهرسوا في ماسبيرو وفي نفس الوقت منزعلش علي ولادنا اللي اتهرسوا في محمد محمود وقدام مجلس الوزراء”، وأضاف مؤكدا :”ظلمة اللي قتلوا هنا وظلمة اللي قتلوا هنا”.
واستنكر القس الخوف المبالغ فيه من الإسلاميين وقال عن هؤلاء المسيحيين المتخوفين من الإسلاميين: ” ويقولك إحنا خايفين من الإسلاميين يمسكوا البلد”، وتابع بلهجة تحمل نفي :”يعني هيكونوا أسوء من الحزب الوطني ولا أسوء من مبارك”، واستكمل حديثه قائلا “إحنا خايفين من أيه .. إحنا بنبص للظروف اللي حولينا مش بنبص لنفسنا”.
وأضاف قائلاً :”حاجة أحرجتني أول أمبارح.. شفت واحد خلال البرامج الحوارية مفكر مسلم قال لازم نحافظ علي الأقباط دول لان الأقباط ملح الأرض.. ها .. ده سمع الموعظة بتاعتي الجمعة اللى فاتت .. احنا ملح الأرض .. وإذا فسد الملح فبماذا يملح”.
وأكد القس خلال الفيديو إنه لن ينصلح حال البلد إلا إذا انصلح حال المسيحيين في مصر، وطالب بعدم الانسياق وراء هذه الدعوة التي تتهم السلفيين بأنهم يكفرون والمسحيين وأنهم سوف يقتلون المسحيين، وأضاف : ” قولت وكررت كذا مرة إن ربنا بنعمته قصقص ريشنا السنة اللي فات خالص ملناش حد نلجئ له خالص .. كله فسد .. كل الرأس سقيم وكل الجسد فسد : قضاء مضروب ، مجلس عسكري متواطئ وفاسد وعايز يقعد في الحكم”، وأضاف متهكماً على الدفاع عن بقاءه قائلاً:”واحنا معلش نفوتله اهو احسن من مفيش .. فين ايام مبارك” واستطرد قائلاً :” أيام مبارك كانت فاسدة .. أكتر عدد من الأحداث الطائفية حصلت أيام مبارك .. وبعد كده يقولك دول بلطجية اللي في التحرير ومحمد محمود”، وأضاف في سؤال استنكاري : “أحمد حرارة بلطجي ؟؟”، وتابع مؤكدا : “اللي ماتوا في محمد محمود ومجلس الوزراء دول ولادنا .. انا مش لابس لبس العيد علشان حزين عليهم”، وقال لمن يقول على من ماتوا في محمد محمود :”يعني ايه كلب ومات .. لا دول شوية عيال يعني”، وقال للحضور :” تخيلوا لو حد منكم كان الأربعين بتاع ابنه اول إمبارح أو بنته هي اللي اتعرت في ميدان التحرير”.
ووصف ما فعله جنود الشرطة العسكرية بتعاملها مع المتظاهرين في أحداث مجلس الوزراء، “بالفٌجّر” قائلا” طيب انا وقعت واحد وضربته وقعته خلاص امسكه .. لكن لأ اضربه وناطط عليه برجلي الاتنين بالبيادة .. اللي بيعملوه ده فٌجّر وربنا مش هينسي الكلام ده.. دم الناس دول صارخ لله من الارض”.
وقال في نهاية المقطع “القادة لازقين في الكورسي زي القادة اللي قبليهم، هتقولوا خايفين علشان يجوا علينا لأحسن يمسكوك يا بونا وفي (س28) هتروح يا بونا ومتشفش النهار ولو شفوك هيوصوا عليك .. وايه يعني انتوا خايفين من ايه.. خايفين من الاستشهاد .. لو انا قسيس مظبوط اجهزكم للسما لو معرفتش اعمل كدا يبقي فشلت في شغتلي اروح اشتغل حاجة تانية احسن”.
شاهد الفيديو: