أمجد القهوجي : سيدة في أوان يزيد

زي انطلاق الخيل على صدر الطريق
زي الخماسين و الشجر عريان
زي العطش .. وزي بل الريق
زي الغريب اللي لقاله رفيق
زي الغجر والحب.. والدور تتملي زغاريد
زي .. اشتياقي
.........
ستنا زينب يا زينة
الحجيج قتلوا الخليفة في المدينة
مات ابوكي شهيد
واخوكي شهيد
وانتي مولاتي رزينة
انتي أصل العلم أصلك
أصبح اسمك سيدة .
. والمقام أصبح سفينة
أصبح اسمك سيدة
والرصيف أصبح مدينة
في المدينة
دوشة الفتنة اللعينة
زي أصوات النباح
وكلاب يزيد
بيعضوا اطراف الصباح
وبيغصبوا الشمس البريئة تشوف حقيقة
ياسيدة في أوان يزيد
ما تآخذينيش ..
لو شفتي كلب بيغتصب عصفور على دراع البراح
أنا مش شهيد
أنا اللي سهران بيفكر.. مسجون وعنيد
في برج قلعة وليل
وانتي القمر عارف حالك
والطرحة خضرا ولا يقالك
بنت النبي شبكتهالك في صباح العيد
لو يوم نزلتي الغيط وحدك
يتلفت عباد الشمس
والنخل يدعيلك
ياسيدة في أوان يزيد
أنا مش شهيد
أنا قطر نازل ع الصعيد
كل الضلوع قايدين حريق
أنا حلم منفي بعبّارات
عايش فطيس ميت غريق
أنا فرحة ما فرحهاش نهار
ما طلعلهاش في الراديو حس
أنا دنشواي
وفدائي أعرج م السويس
أنا كل أمس
بحب أفلام البوليس
وبترعب م البوكس
..
مخنوق بكل مشاعري
والصريخ متحاش
والاشارة الحمرا تلمع ع القزاز زي الدموع
والمناديل .. والبكا ممنوع
جوا الاشارة بجنيه حديد
..
ياسيدة في اوان يزيد
انا مش لوحدي اللي وحيد
الغربة عضت كل ايد
..
ياروح مداين مصر مدي رقابك العاليين
والبسي الفجر ابتسامة
وعقد فرح ضنين
طبطبي على وش لما يقرا ربع ياسين
ياروح مداين مصر مدي رقابك العاليين
واسمعي همس المحبة
في الكنيسة طنين
مسلمين والحزن قبطي في الخميس والاربعين