بالفيديو.. والدة أطفال ظهروا في التليفزيون كمتهمين في مجلس الوزراء تكشف تلفيق القضية

* أمنة : الشرطة قبضت عليهما قبلها بيومين من المنزل والنيابة حبستهم في قضية تانية
* الضباط اقتحموا المنزل مرتين للقبض عليهما وكسروا الأبواب وسبوا بنتي .. وشتموني وقالوا لي يا سوسن
كتب- خالد البلشي والسيد سالمان:
كشفت آمنة محمود ياسين والدة كل من محمد و سيد جراده اللذين ظهرا في فيديو بثه التليفزيون المصري لمن وصفهم بالمتهمين بالتورط في الهجوم على مجلس الوزراء إن الشرطة ألقت القبض على أولادها يوم الأربعاء الفائت قبل الاحداث بيومين , مشيرة إلى قيام ضباط وأفراد الشرطة باقتحام المنزل مرتين وإطلاق النار على أحد أبنائها.
وقالت آمنة في مقطع فيديو صورته معها البديل إن:” الحكومة جت “الثلاثاء” الساعة 1 صباحا “ليلة الأربعاء” وأخدوا واحد من عيالي بعد ما جريوا وراه وضربوه بالنار ووقع، وبعدها بثلاث ساعات حوالي الساعة خمسة الصبح فوجئت بناس بيفتحوا فى الجنزير بتاع الباب فقمت بقول مين بره فمحدش رد عليه فنورت النور وطلعت افتح الباب، وسألت تانى مين بره، فحد رد عليه قالي” إفتحى ياسوسن” ففتحت الباب لقيتهم دخلوا و كانت حكومة كتير واقفين بره الباب وواقفين فى الدور الاول و الثانى من البيت، فقالولى فين ولادك يا سوسن قولتله ولادى ايه هو ايه اللى حصل بالظبط، فقالى لفظ مش كويس، فبنتى جايه ترد عليه و تشتمه ضربت بنتى علشان خفت انه يضربها.
وأضافت:” المهم راحوا كسروا الباب في أول دور وخدوا ابني، بقولهم هو عمل إيه حرام عليكم اللى بتعملوه فينا ده، لقيتهم خدوه بره و قالولى هنكلمه وهنسيبه بصيت لقيتهم طلعوا الدور الثاني وكسروا الباب وكانت بنتي و زوجة ابنى نايمين فى الأوضة اللى جنبهم، بنتى فتحت الباب فخافت وبتقول فيه ايه بتعملوا كده ليه، ابنى قال لاخته جيبى بنطلون، الضابط قالها هتدخلى و سب الدين، راحت بنتى دخلت و قافلة الباب، وطلعوا على جار فى الدور الثالث و سألوه انت علاقتك ايه بجراده، فقالهم انا ساكن هنا بس، ونزلوا على الدور الثانى كسروا غرفة واحد خص موجود حاليا بالسعودية”. المهم بعدها بكام يوم لقيتهم في التليفزيون بيقولوا عليهم كانوا عند مجلس الوزراء مع انهم كانوا واخدينهم في قضية تانية .
يذكر أن المحامي الحقوقي طارق العوضي مدير مركز دولة سيادة القانون تقدم اليوم ببلاغ للنائب العام لإثبات أن ثلاثة من الأطفال المتهمين في الهجوم على مجلس الوزراء وهم محمد صالح وشهرته محمد جرادة، وسيد صالح وشهرته سيد جرادة، و كريم الهوارى تم القبض عليهم يوم الأربعاء 14 ديسمبر.
وأرفق المحامي أرقام المحاضر وقرارات النيابة والتي تكشف أن عددا من الأطفال الذين ظهروا في فيديو التليفزيون المصري بوصفهم بلطجية شاركوا في أحداث مجلس الوزراء تم القبض عليهم قبل اندلاع الأحداث بيومين وصدرت قرارات من النيابة بحبسهم 4 أيام على ذمة التحقيق في القضية رقم 12664 لسنة 2011 جنايات الحدائق.
وقال العوضي محامي الأطفال في تصريحات للبديل أنه عندما رأي موكليه على شاشة التليفزيون وأمامهم أسلحة بيضاء وسنج وزجاجات مولوتوف بزعم أنهم في التحرير توجه للقسم والنيابة للحصول على ما يفيد حبسهم على ذمة قضايا أخرى ليفاجئ بأن هناك ملف يتضمن مئات الحالات لأطفال تم حبسهم بنفس الطريقة, محذرا من استخدامهم في تلفيق قضايا أخرى للنشطاء .
وأضاف أن الأطفال محمد صالح وشهرته محمد جرادة، وسيد صالح وشهرته سيد جرادة، و كريم الهواري تم القبض عليهم يوم الأربعاء 14 ديسمبر وتم عرضهم على النيابة في القضية 12664 لسنة 2011 جنايات الحدائق ووجهت لهم النيابة تهم الشروع في القتل وحيازة سلاح ناري وأصدرت في نفس اليوم قرار بحبسهم 4 أيام على ذمة التحقيق وتم عرضهم للمرة الثانية على قاضي المعارضات الذي أمر بتأجيل نظر التجديد ليوم 24 ديسمبر أي أنهم كانوا محبوسين على ذمة قضية أخرى وقت اندلاع أحداث مجلس الوزراء.
شاهد الفيديو: