ردود فعل غاضبة على تويتر وفيسبوك ضد بيان المجلس العسكري.. “يعني كده رجعنا أجندات وتمويل تاني “

* أحد التعليقات على إلقاء الفنجري للبيان: برافووو عليهم حرقوا الشخص اللي كانت الناس بتحبه
* تعليق : الرجل الذي ألقى تحية الشهداء يتعهد بأنه سوف يلقى التحية مرة أخرى على المزيد منهم
* تعليق أخر : البيان يؤكد أن نظام مبارك لازال يحكم.. نفس القواعد ونفس التعالي على الشعب ..وعدم الانحياز لمصالح الناس
كتب إسلام الكلحى ومحمد كساب:
قابل النشطاء على موقعى فيسبوك وتويتر ، بيان المجلس العسكري الذي ألقاه اللواء محسن الفنجري، بمزيد من التعليقات الساخرة والغاضبة، ووصفوا الخطاب بالتهديدى واشاروا إلى صوت اللواء الفنجري المرتفع أثناء إلقائه البيان على شاشة التليفزيون المصرى. ويعتزم أعضاء بالمجلس العسكرى عقد مؤتمر صحفى بعد قليل، ما يبدو أنه أول رد فعل عكسى من المجلس إزاء ما لمسه من انتقادات واسعة النطاق لما ذكره الفنجرى.
ورفض النشطاء اللهجة التهديدية التى ألقى الفنجرى بها البيان،وقال أحد المعلقين ”رد الفعل على الخطاب كان هيبقى أقل حدة لو البيان ده كان مكتوب. المجلس الأعلى لازم يفرق بين الخطاب الموجه للشعب وبين الخطاب الموجه للمجندين”، حسب أحد المستخدمين.
فى حين قال الفنان عمرو واكد على حسابه الشخصى ب “تويتر”: لماذا يدعي المجلس العسكري أن الشعب انتخبه في الإستفتاء؟ كيف وصلوا لهذا الخيال؟..
ومن أبرز “التويتات” التى كتبها النشطاء على تويتر:
نهيب بالشرفاء ان يذهبوا بجمالهم و خيولهم الى الميدان لاخلاء لانه يعيق ان تعود الحياة الى طبيعتها
الرجل الذى القى تحية الشهداء يتعهد بأن سوف يلقى التحية مرة اخرى على المزيد منهم
أبشركم بقدوم الحرب الأهلية.. المجلس العسكري بيخطط ويدفع لها.. وجماعات المتأسلمين وحزب الكنبة والبلطجية هيبدأوها مع المعتصمين
مجلس ياعسكري:أوعي يغرك جسمك
- برافووو عليهم حرقوا الشخص اللي كانت الناس بتحبه
بيان المجلس العسكرى يؤكد أن نظام مبارك لازال يحكم ..نفس القواعد ونفس التعالى على الشعب ..وعدم الانحياز لمصالح الناس
اطلع من دول يا مجلس...عليا النعمة انت اتخضيت
اختيار الفنجرى للبيان ده بالذات مش من فراغ , ده عشان الشعب يفتكر له التحية العسكرية اللى ثبتت شعب بحاله ويقول الراجل ده راجل كبارة وطيب )
هو ليه اللواء الفنجري بيطلع يزعق فينا ويهزأنا بالطريقة ده؟ إيه اللهجة التهددية ده؟ وليه صعب ان يطلع يرد على مطالب الثوار؟ ليه بيتكلم في حاجة تانية؟
ملخص بيان الفنجرى: تسمع الكلام هتبقى صاحبى وحبيبى وشباب الثورة ، مش هتتلزم هتبقى أجندة وتمويل وهحرض الناس عليك ومحاكمات عسكرية
الفنجري: هنضطر نضحي بالشعب عشان الجيش يعيش
الفنجرى بيقول ندعو المواطنين الشرفاء للتصدى لتجاوز الشرعية والقفز على السلطة ، يعنى رجعنا أجندات وتمويل تانى
ربنا يستر والناس بتوع الاستكرار والعجله ماينزلوش يضربوا المعتصمين والثوار
بيان المجلس العسكري نفهم منه حاجة مهمة واحدة: هجوم ضخم حيحصل على الميدان قريب جدا
نزول التحرير الآن فرض عين..المجلس باعت رساله بيقول فضو الاعتصام بالزوق ورجعوا الحياه لطبيعتها أو نفضه احنا. ووسائلهم كتير, انزلوا
صوتك العالي دليل على ضعف موقفك