موقع الإخوان يضطر لحذف خبر عن صفقة مشبوهة لتمويل رافضي التعديلات بعد هجوم قراء الموقع

* الخبر يتهم معارضي التعديلات بتلقي تمويلات من أمريكا .. والقراء يتهمونهم بأنهم مثل نظام مبارك والوطني
* قارئ إخواني :حرام عليكم انتوا كده بتشوهوا صورة الإخوان .. وآخر : مصر حرة إلا من الإخوان وفلول الوطني
كتب – محمد العريان
حذف موقع الاخوان المسلمين خبر عن صفقة مشبوهة لتمويل رافضي التعديلات علي موقعها الرسمي ” إخوان أون لاين ” بعد هجوم حاد شنه قراء الموقع اتهموهم خلاله بتكرار ممارسات الحزب الوطني ضد معارضيه ، الخبر جاء تحت عنوان “حملة مشبوهة للترويج لرفض ” التعديلات “! تحدث عن تورَّط عدد من الرافضين للتعديلات الدستورية في اللعب برأس مال أمريكي لتمويل حملة معارضة التعديلات الدستورية وأنهم دشَّنوا حملات إعلانات مدفوعة الأجر؛ للترويج لرفض التعديلات ، من خلال بعض الصحف والمنظمات الحقوقية .. المثير أن الموقع حذف الخبر ولم يحذف تعليقات القراء .
ورفض معظم القراء في تعليقاتهم تشويه صورة المعارضين ، واعتبر بعضهم الخبر المنشور هو إعادة لنفس نهج نظام مبارك المخلوع ،
وقال احد التعليقات حراااااااااااام عليكم انتوا كده بتشوهوا صورة الاخوان ...اللي كتب الخبر ده واللي سمح له بالنشر لازم يتحاسبوا ، وقال اخر مصر الحرة الا من فلول النظام البائد والأخوان ، اتقوا الله يا قوم نعم ايه بس الى انتوا بتقولوا عليها عشتوا سنين طويله تحلموا بربع ديمقراطيه و اليوم اللى ربنا كرمنا كلنا بيها عايزين تخطفوها انتوا معايا ان ما فيش حد صح طول الوقت ليه عايزين لما تغلطوا ما تلقوش اللى يصحح الخطأ ليه مش عايزين يبقا ليكم شركاء ليه دايما بتقرروا وتنفزوا قرراتكم وانتوا متخيلين انها صح الصح وان النيه كفايه مهما كانت النتيجه
وقال تعليق ثالث “بطلوا انتم افك بأه ده انتم اللى حملتكم مشبوهة لأنكم لا تختلفو علي الاطلاق عن النظام البائد ولأنكم الكتلة الوحيدة اللى واضحة دلوقتي فمن مصلحتكم انكم تقولو اه للتخريب ( تعديل الدستور المسقط ) علشان يبقي ليكم مقاعد كتيرة فى المجلس وتعملوا دستور متقصل عليكم والكل عارف انكم مش بتوع ديموقراطية او تداول سلطة.
فيما قال رابع ” عيب يا اخوانا الكلام اللي بتقولوه ده... ما يصحش دي مش مهنية خالص... إنتو كده بترجعونا لأيام الحزب الوطني اللي كانوا بيتهموا الرأي الآخر بتبني أجندات أجنبية.... ما تحجروش على رأي الآخرين ولا تسفهوا من آرائهم
تعليق خامس قال “يا جماعة.. يا إخوانا.. مفيش داعي للتخوين.. وبعدين فيها إيه لما يدفع في اتجاه رأي لأ.. طيب ما الإخوان وغيرهمم ممن يعتقدون أن نعم هي الأصح (وأنا منهم) بيدفعوا بكل قوة في هذا الاتجاه.. نترك كل واحد يعبر عن رأيه ويدعو له (ما دام هذا لا يتعارض مع قطعيات الشرع.. والرأي في الآخر للشعب
وتساءل سادس “حرام عليكم انتو بتقولو اللي بيرفضوا التعديلات بيستخدموا راس المال امال انتو بتعملو ايه بتستخدمو لغة الاشارة اتقو الله و بلاش تنشرو اكاذيب زي النظام السابق
وتساءل عدد من القراء عن الأدلة التي لدى الموقع وقال احد أصحاب التعليقات “الاخ الصحفي الكريم لا يجوز التخوين وذكر التمويل الامريكي في الموضوع يمكن انتقاد استخدام رؤوس الاموال في الموضوع بدون تخوين الاخر لاننا كم اتهمنا من غيرنا بذلك فلا بد ان نكون احرص الناس ولا نتهم غيرنا الا بدليل ناصع كضوء الشمس او اكثر ولا يكون الاتهام الا بعد التقدم للقضاء بما معنا من مستندات وادلة.” ..فيما طالب أخرون الموقع بتقديم أدلة واضحة على ما يقولون وإلا فليصموتوا. وقال ” ما الدليل ؟”
ولم يخل الأمر من بعض التعليقات الموافقة قبل أن يتم حذف الخبر” اللعب . امريكا فى الموضوع ؟ ياناس الله يصلح حالكم فوقوا وافهموا بقى”
http://www.mujaz.me/coverages/703092/%D8%AD%D9%85%D9%84%D8%A9-%D9%85%D8%B4%D8%A8%D9%88%D9%87%D8%A9-%D9%84%D9%84%D8%AA%D8%B1%D9%88%D9%8A%D8%AC-%D9%84%D8%B1%D9%81%D8%B6-%D8%A7%D9%84%D8%AA%D8%B9%D8%AF%D9%8A%D9%84%D8%A7%D8%AA
http://www.ikhwanonline.com/new/Article.aspx?ArtID=80796&SecID=230