رحاب إبراهيم : وطن ...إيجار جديد

زي أمير مهزوم
جدرانه المتهدمة بيتقشر من عليها التاريخ كل يوم
ماكانش فارس بس كان وجيه
اتجمع جواه كل نبلاء المدينة
والعشاق ..غسلوا قلوبهم بالموج اللي بيضرب في شبابيكه
جزاؤه بعدها كان انه يترمي لوحده
ولا حد يسأل فيه غير الفيران اللي اتلمت عليه من كل ناحيةعشان تقرض التاريخ!
لما باعوه .. الفيران نفسها رفضت تتباع معاه
جريت في كل حتة وسببت مشاكل كبيرة جدا
جايز أكبر كتير من المشاكل اللي سببها المثقفين لما وقفوا
يصرخوا ويدبدبوا برجليهم في الأرض
علشان مايتباعش
وفعلا..قامت الدنيا بس قعدت بسرعة
وكمان حطت رجل علي رجل
لما جيوبها اتملت !
دلوقتي واقف من تاني
بس خلاص معدش عارف هو مين بالظبط
بيقزقز في تاريخه ويرمي القشر في البحر