كلمات ليست كالكلمات

آه يا بلد.. نفسى فى ولد.. يكون كلامه معتمد.. وكل أفعاله بجد.. يحط يوم للظلم حد.. ويفيض بعدله زى سد.. يقطع إيدين الظالمين لو يوم تمد.. على الغلابة الشقيانين لما تمد.. ويقف قصاد المجرمين لما تهد.. ويخربوا كل البلد.. آه يا بلد.. عايزة ولد.. قوليلى امتى يتولد.. علشان خلاص صبرى نفد.. حاسس بأنى عايش كأنى غريب وأنا فى قلب البلد.. آه يا بلد.
محمد عبدالفتاح إبراهيم
القناطر - القليوبية
كله تمام وعال العال.. أوامر سيادتك ماتعرف محال.. يا حارس وفارس ورمز النضال.. واسأل سعادتك حمامة السلام.. لا يهمك أعادى ولا كلام العوام.. وشلوت سعادتك دا أجمل وسام.. يخلينا دايمًا نسير للأمام.. ونكيد المعارضة اللى عايزنها فوضى وعايزين المذيعة تتحجب كمان..
وناقص تقولى اتوضى وصلى ومترفعش ايدك جوه البرلمان.. بالذمة سعادتك دا اسمه كلام.. دى غلطة سيادتك لما سيبت اللجام.. دى ناس جعانة ما بتشبع كلام.. والاستيكة جاهزة ودكتور السنان.. خد اشطب بايدك حقد الأعادى وكلام العوام.. ونضف سنانك من سوس المعارضة وحشو الكلام.. يا حارس وفارس ورمز النضال.. واسأل سعادتك حمامة السلام.
مصطفى السرتى
مين اللىّ خرّم الوطن ومين سبب قهره؟.. مين اشترى له الكفن ومين دفع مهره؟.. اقرأ تاريخ العروبة قديمه وجديده.. هات لى رئيس أو ملك ماطلعشى على ضهره!
شفيق سلوم
ابنى الحبيب.. أنا لم أمت.. رغم أن الموت يقطن ساحتى.. أنا لم أمت.. رغم أن سلاسل السجان.. أدمت معصمى.. وضعوا الكمائم فى فمى.. أنا لم أمت.. رغم أن المعاول تهدم كل يوم.. دارًا من ديارى.. والذئاب تنهش كل يوم.. طفلاً من صغارى.. والنار تأكل بستانى.. أنا لم أمت.. سرقوا ثيابى.. سرقوا طعامى.. غيروا لون مائى.. لون أرضى وسمائى.. سرقوا شبابى.. أنا لم أمت.. طعنونى ألف مرة.. صلبونى ألف مرة.. سجنونى ألف مرة.. صفوا دمائى.. لم أمت.. ولن أموت.
عبداللطيف فايز
abdu_fayez@hotmail.com
تعبت منك يا مصر ومن بلاويكى.. بحبك أيوه بحبك وبأكره حبنا ليكى.. شايف بعينى يا عينى اللى عراكى.. لا قادر أسكت ولا قادر أغطيكى.. شاريه اللى بايعك وبتبيعى اللى شاريينك.. حبه اللى كارهك وبتحىّ اللى كارهيينك.. طارده اللى دمه بيجرى فى شرايينك.. ومستعد يضحى لجل يحميكى!
محمد أبو عصفور
أى رئيس وف أى مكان لازم يكون جواه إنسان.. بس يحاط ليه بالدبان ويسكه عليه شبابيك وبيبان.. وكل باب وعليه سجان وعامل فيها إنسان الغاب.. وإزاى أشوفه وهو بعيد وكل أبوابه حصن حديد..
وكل يوم فيه حصن جديد ونفسى أفتح فيهم باب.. وأفتحه إزاى وعليه بواب بيحكم فيه بقانون الغاب.. وبيعاملنا كأنا كلاب وبقت عيشتنا عذاب ف عذاب.. وصل الود كده مقطوع وعايز أسأله على ميت موضوع.. وأى وضع أنا بيه موجوع ح أستنى يكون للحق رجوع.. وإزاى وأبوابه ساددها بتوع - والواحد منها بتاع مفقوع.. بس ح أشوفه وبكره يبان لما أقطع يوم رأس التعبان.
نبيل عبدالعزيز