أيمن يوسف : أمانة عليك يا عم جلال

أمانة عليك يا عم جلال .. تسلم لي علي دانيال..
وقول للشيخ عماد عفت .. ولادك شيالين أحمال ..
امانة عليك تناديهم تقبل نور اياديهم .. وخليهم يسامحونا عن الحلم اللي في عنيهم
عن الحلم اللي ضاع منا .. عن الشهدا اللي في الجنة .. وصبايا بتتحني بحب الارض والاوطان
يا طيبة يام شال ابيض .. بتتوضا في سمار النيل
بتغزل م الامل مووايل ..
وعن ثوار بتحرر.... من القضبان من العسكر
ومن سوس العيدان والخوف...... هتتحرر هنتحرر
امانة تقلهم واحنا مافارقانا مطارحنا
وطايرة مننا الاحلام يسامحونا وسامحنا ..
تقيلة الخطوة في الميادين ومن دفنة شهيد راجعين .
. ومن نقرة لدحديره بنصمد بس مش قادرين ..
نكمل ايوة هنكمل...
نعيد الثورة م الاول
هنتمرد علي الاسوار ....ونوصل باليالي نهار
يصحي الحلم في عنيكم.. بنتونس ساعات بيكم ...وبيكم تكمل الصورة ..ويبقي الحال
خلاف الحال امانة عليك يا عم جلال