الكلمة غيّة وإنت من زمان غاوى يا عم (سيد) يا حاوى والجراب حاوى نبع الغناوى بيروى الأرض بتقاوى واللى بنى مصر كان فى الأصل بحراوى حافظ حكاوى البلد وبقلب مصراوى صياد فى بحر الكلام والكلمة جنية يا عم (سيد) يا غنوة عشق مصرية غنوة ومتمكنة.. من قلبنا وعقلنا تجرحنا وتداوى يا عم (سيد حجاب) سبعين سنة عدوا وإنت اللى عمرك ماهوش أعوام بيتعدوا إنت اللى عمرك غُنا جوه القلوب بيعيش تجرى السنين مننا والحلم مابيجريش ويجمع الدراويش للحب يتشدوا فنان.. وشاهد عيان على حلم كان ياما كان تفتح بيبان الأمل قبل الطوفان ما يبان وف غنوتك كلمتك بتسجن السجّان وتنور الجاهل.. سبعين سنة معجنة.. مش عُمر بالساهل ولسة واقف بتغزل بالقلم توبها وتعبت ياما وقلت الحلوة تستاهل ولا اشتكيت ولا بصّيت على جيوبها يا عم (سيد) يا محبوبنا ومحبوبها سبعين سنة مننا.. وتعيش يا أستاذنا ويديم عليك الغِنى عن كل جوايزنا مين اللى عجز بقا؟! داحنا إللى عَجّزنا.. وإنت اللى عُكّازنا على حلمنا دلنا ولبكرة جَهّزنا قبل الطوفان الجاى ما يدور يقزقزنا اكتب لنا كلنا غنوة تِبَروِزنا ناويين نغنى معاك.. والرك ع النية.. يا عم (سيد) يا غنوة عشق مصرية