قصيدة نقدية بعنوان ' عايزين مشروع محلي'

عايزين مشروع محلي يحلي مرار المواصلات
يخفف من علينا الأحمال ويحل أزمة من الازمات
ارحمونا من استغلال سواقين الميكروباصات
يارب المسؤل يسمعنا وياخد الحكمة في القرارات
ويكون لينا نصيب ويستجيب ويقصر المسافات
عايزين مشاريع ركاب لكل المناطق الشعبية
شبعنا استغلال من ولاد الحلال والبلطجية
أصعب كلام يتقال للغلبان في الرايحة والجاية
مش عاجبك الكلام انزل من العربية
عايزين الحكومة ياناس تهتم بينا شوية
ياريت المسؤلين يفكروا في المشاريع المحلية
ونلاقي الأجرة تتناسب مع المرتب والمهية
ده اللي معاه أربع عيال محتاج لمعونة دولية
أكل وشرب ومواصلات ودروس خصوصية
بالذمة مش يبقي حرام ولسة النور والغاز والمية
شوفولنا حل.. ده الوسط اتحل.. واه من الأيام الجاية