أفكار متنوعة ل «اللانش بوكس» في العام الدراسي الجديد

اقترب العام الدراسي الجديد وتفصلنا فقط ايام معدودة عن بدايته،وتحتار الأمهات في بداية كل عام دراسي خاصة الامهات اللاتي يدخل أطفالهن المدارس لاول مرة في إعداد وجبة طعام متوازنة وصحية لأطفالهن ويصبح شغل الامهات الشاغل هو »عايزة أفكار جديدة للانش بوكس»‬.
وفي السطور القادمة نتعرف علي شيف شيماء محسن وشيف رحاب المليجي »‬حوبا الاروبة» وتقدم كل منهما مجموعة من الأفكار للأمهات وطرق صحية في إعداد طعام يقبل عليه الاطفال بل والكبار ايضا،فالطعام الصحي المعد في المنزل يقوي مناعتك ويحافظ علي صحتك ونشاطك ويعطي أطفالك الطاقة لاستذكار دروسهم ويحميك من الأمراض المختلفة خاصة مع اقتراب فصل الشتاء وانتشار الأمراض.
وصفات لافتة
تقول الشيف شيماء محسن مؤسسة صفحة »‬very easy recipes with Shimaa” انها من خلال صفحتها تحرص علي تصوير الوصفات وكتابتها خطوة خطوة حتي يتسني علي المتابعين تطبيقها وحفظها،ولمست منذ ذلك الوقت إقبال السيدات والفتيات علي صفحتها وتشجيعها وتصوير تطبيقهم لوصفاتها والحرص علي شكرها وهو ما دفعها للاستمرار وتجربة المزيد من الوصفات لافتة إلي ان من اصعب المواقف التي واجهتها كان السطو علي الحساب الشخصي لها علي الفيس بوك وإغلاق صفحتها وشعورها بانها لن تستطيع الوصول لمتابعيها ومساعدتهم الا انها فوجئت بتطوع بعض محبيها المتخصصين في المواقع الالكترونية وعودة الحساب الالكتروني لها وصفحتها.
وتقول الشيف شيماء محسن »‬لو هتكلم بقي عن اكل التيك اواي رغم انه سهل ولذيذ جداً الا انه مضر فعلا غير اننا ممكن ننفذه في البيت بطريقه كويسه وهيديني 90٪ من الطعم اللي بيعجبنا بره طبعا ده غير الحاجات اللي هنبقي احنا ضمننها وده احسن كتير من اني اروح ادفع فلوس وكمان في حاجه مش مضمونه،نيجي بقي لمشكلة الامهات وهي اللانش بوكس انا مش شايفه فيها مشكلة خالص بس انا ضد فكرة الناجتس والمقليات للطفل في المدرسه يكفي السندوتشات وفي انواع جبن كتير جداً لذيذه ومفيده للاطفال مع الفاكهه والعصير وممكن الكب كيك مع العصير وممكن كمان الكوكيز بالشوفان وده صحي جداً وخفيف.»
وتقدم الشيف شيماء محسن مقادير طريقة الكوكيز أو البسكوت بالشوفان وهي كوب ونص شوفان ونصف كوب دقيق ونصف كوب زبدة ونصف كوب سكر بني ومعلقه صغيرة بيكنج بودر و2 كيس فانيليا وبيضة،أما الطريقه فهي هنضرب الزبدة مع السكر بعد كدة هنضيف البيضه والفانليا نضربهم كويس جداً ونضيف عليهم الشوفان والبيكنج بودر وهندهن الصينيه زيت ونرص الكور اللي شكلناها ونبططها بأدينا علشان تدينا شكل حلو وبيدخل الفرن متوسط الحراره لمدة 10 دقايق وتضيف انه من الوصفات اللذيذه والسهله اللي ممكن ان تعدها الامهات لأطفالهن في البيت هي الكب كيك ومقاديره ربع كوب زيت و2 بيضه و4/3 كوب لبن ورشه فانليا ورشه ملح،اما الطريقة فهي هنضرب الزيت والبيض واللبن بالمضرب كويس جداً بعد كده هنضيف عليهم كوب ونص دقيق معلقه صغيره بيكنج بودر كوب سكر ونضربهم كويس جداً وهنصبهم في قوالب الكب كيك لحد نص القالب وندخلهم الفرن لمده تلت ساعه.
طريقة مبسطه
وتقول شيف رحاب المليجي أو »‬حوبا الاروبة» والتي تملك صفحة علي الفيس بوك تحمل نفس الاسم :زوجي هو من علمني فن الطهي وظللت أعوام اتعلم حتي اتقنت إعداد الطعام التقليدي وتكمل »‬انا لما عملت صفحة خواطر حوبة الاروبة كان الغرض منها اني اكتب فيها خواطري ومغامراتي في بلاد الفرنجه لاني عايشة في لندن مع زوجي وبعد ما انجبت كنت بكتب عن الامومه خواطر كوميديه ولما حبيت المطبخ قررت اعمل البوم بوصفاتي بطريقة مبسطه بنية اني اساعد البنات انهم يحبوا المطبخ هما كمان، وعلي قد ما بعرف بكتب تكات كل وصفه بحيث الأخطاء اللي وقعت فيها وانا بعمل الوصفه ميقعوش هما فيها وتنجح معاهم من أول مرة».
وتطلب الشيف رحاب المليجي من كل سيدة وفتاة ان لا تيأس وتحاول مرارا وتكرارا حتي تنجح في تعلم الطهي،لافتة إلي انه رغم انتشار وصفاتها وإقبال السيدات علي تطبيقها الا انها في بداية تعلمها للطهي كانت في بعض الاحيان تفشل الا انها لم تستسلم حتي اصبحت خبيرة في الطهي وخاصة إعداد الحلوي.
وتقول »‬أنا من الناس اللي مش بتحب خالص كتر التيك اواي حتي بناتي بيحبوا ياكلوا من ايدي اكتر والاستسهال في الاكل من بره ده وجع بطن وغير مفيد بالمره خصوصا للاطفال عشان التلوث بقي حولينا ف كل مكان ومش هتفرق جوه مصر ولا بره كله تلوث،كمان من الحاجات اللي بتشجع الأطفال انهم ياكلوا اكل البيت واللي بعملها دايما مع بنتي الكبيره ف اعدادي اني بعمل لها ولأصحابها ف الفصل زي الميني بيتزا، الكب كيك بالشيكولاته، وده بيخليها تفتخر بأكلي خصوصا لما تلاقي اصحابها عاجبهم الأكل وطالبين منها حاجات تانيه وعلي قد ما اقدر اعملهم اللي بيطلبوه فبيشجعوا بعض انهم ياكلوا اكل نضيف معمول ف البيت».
وتقدم الشيف رحاب المليجي بعض الوصفات البسيطة المناسبة للاطفال لوضعها في اللانش بوكس وهي ماربل كب كيك فنقوم بالمضرب الكهربا أو ف الخلاط نضرب 3 بيضات بدرجة حرارة الغرفه ومعلقة صغيرة فانيليا سايله وكوب سكر نضربهم كويس ونضيف كوب لبن حليب وكوب زيت ونضرب تاني ونضيف 2 كوب وربع دقيق منخول مضاف اليه معلقة صغيره بيكنج بودر ونقلب كويس بالمضرب اليدوي لحد ما كله يمتزج،ثم نقسم الخليط علي طبقين بالتساوي وفي طبق منهم نضيف معلقتين كبار كاكاو ونقلب كويس ثم في صينية كب كيك نحط فيها الورق أو ندهنها زيت خفيف وبمعلقه صغيره نضع بعض من الخليط اللي من غير كاكاو وبمعلقه تانيه صغيره نحط فوقه شوية من الخليط اللي فيه كاكاو وهكذا لحد النص بس مانملاش للاخر عشان بينفش ف الفرن وتدخل الصينية فرن سخن علي حرارة 180 درجة من 20 دقيقه إلي 30 دقيقة علي حسب الفرن ولما يستوي نطلعه يبرد وبالهنا.
سكر بُني
وتضيف ان الكوكيز من الأطعمة التي يعشقها الاطفال ولإعداده في المنزل بالمضرب الكهربائي نضرب كوب زبده لينه بدرجة حرارة الغرفه مع كوب سكر بُني ولما يمتزجوا نضيف نصف كوب سكر ابيض ورشة فانيليا سائلة بيضتين ونضرب جيدا وفي طبق اخر نضع 2 كوب دقيق ونصف كوب شوفان ومعلقة صغيرة بيكنج بودر ونصف معلقة صغيره بيكنج صودا (بيكربناتو) ورشة ملح وكوب شيكولاته شيبس ونقلبهم جيدا ثم نضيفهم علي خليط الزبده ونقلب كله بالمعلقه لحد الامتزاج،وعلي صاج عليه ورقة زبده نضع من الخليط قليل مش كتير بمعلقة أو بولة ايس كريم ونترك مسافات بينهم لان الكوكيز بينفش ف الفرن وندخله فرن سخن علي حرارة 180 درجة لمدة 12 دقيقة لما ياخد اللون الدهبي نطلعه من الفرن وبيكون طري لما يبرد بينشف وبالهنا
ورقة زبده
وتقول ان العسل مهم جدا لرفع مناعة أطفالك واذا كان أطفالك لا يحبون اخذه اصنعي لهم بسكويت العسل والقرفه فقومي بالمضرب الكهربا بضرب نصف كوب زيت ونصف كوب سكر وبيضه ورشة فانيليا ثم نضيف 2 كوب دقيق ومعلقة صغيرة بيكنج بودر ومعلقتين كبار عسل ابيض (بديل للسكر) ومعلقة كبيرة قرفه أو كاكاو (اختياري)،ثم علي صاج نضع ورقة زبده أو ندهن الصاج زيت خفيف وناخد جزء صغيرة من العجينه ونشكلها بإيدينا ونرصهم ف الصاج ونضغط عليها بظهر الشوكه بحيث انها تاخد شكل الشوكه،وفي طبق فيه بيضه مخفوقه مضاف اليها معلقتين كبار لبن حليب ورشة فانيليا ونقلبهم وندهن بهم سطح البسكويت و ندخله فرن سخن علي حرارة 180 درجة لمدة ربع ساعه لحد ما سطحه يحمر ونطفي ونطلعه يبرد وبالهنا.