مسيرك يا ملوخية تيجي تحت المخرطة!

لم أكن أعرف سر حب زوجتي ومنذ أيام الخطوبة لأغنية مسيرك ياملوخية تيجي تحت المخرطة ولم أكن أهتم بأي دلالات لذلك رغم أنها كثيرا ما كانت وهي تدندن بها تنظر لرقبتي نظرة غريبة لكني كنت دائما أفسرها بأنها ربما معجبة برقبتي خاصة أنها كثيرا ما كانت تردد كلاما عن أهمية الرقبة في الحكم علي الرجل ولما لفت نظرها مرة إلي أن الرقبة ربما تصلح للحكم علي جمال المرأة فتحت لي تحقيقا عما إذا كنت أتعمد النظر إلي رقاب أي نساء غيرها فتحسست رقبتي وأنا أؤكد: لا طبعا؟ فسكتت مرتابة، وكانت تلك المرة الأولي التي أسمعها تدندن بإنشودة مسيرك ياملوخية تيجي تحت المخرطة.
المهم أنني دخلت شقتي منذ أيام وأنا اسمع صوت مخرطة الملوخية في المطبخ فمنيت نفسي بأكلة ملوخية بالأرانب قبل أن تخرج لي زوجتي لتستقبلني فور دخولي من باب الشقة وقد أمسكت المخرطة بكلتا يديها وبقايا الملوخية تنزف من علي جانبيها ودار بيننا الحوار التالي:-
- ها عملت إيه في الفكرة إللي قولتلك عليها بالليل؟
- مانتي عارفة ياروحي إن كلام الليل مدهون بزبدة يطلع عليه النهار يسيح!
- واضح إن فيه حاجة تانية النهاردة حاتسيح! مش قولتلك يا راجل فكر تصورلك كام فيديو كده وتنشره ممكن يضرب وننتقل بقي لفيلا ولا قصر من إللي بنشوفهم في الإعلانات !
- قصر إيه إللي انتقله وانا قربت اصلا أنتقل لرحمة الله؟
- بعيد الشرعنك ياحبيبي.
- بعيد الشر إزاي وانتي ماسكالي المخرطة كده؟
- دي للملوخية وللناس إللي مابتسمعش الكلام..ياراجل شوف محمد رمضان كل يوم ينزل فيديو.
- ياستي محمد رمضان ده ممثل وله معجبين كتير لكن أنا لا حاعرف أمثل ولا أغني ولا أرقص.
- يا حبيبي لازم تفكر بره الصندوق شوية..خد عندك مثلا الحمار العادي إللي خططوه علشان يبقي حمار وحشي ويجيب فلوس أكتر..إنت عارف الحمار ده بيكسب كام؟
- ماهو أنا لو ينفع أتخطط كنت إتخططت من زمان !
- إيش جاب لجاب ياراجل؟!
- وضحي كلامك لو سمحتي تقصدي إيه بالظبط؟
- ماقصدش حاجة وحشة ياحبيبي لكن بأضربلك مثل.
- طب بس المخرطة لو ممكن تبعديها شوية لإنها ممكن متاخدش بالها إنك بتضربيلي مثل وألاقيها ضربت رقبتي.
- معقولة يعني الرقبة الحلوة دي تنضرب بالمخرطة؟ دي الواحدة تخنقها بإيدها علشان تستمتع أكتر!
(في هذه اللحظة وضعت يدها اليمني حول رقبتي والثانية لاتزال تمسك بالمخرطة فنطقت الشهادة وقلت في محاولة أخيرة لأثنيها عن قرارها)
- طب ده حتي إللي بيعدموه بيسألوه نفسك في إيه.
- بس كده حاضرنفسك في إيه ياروحي؟
- بصراحة نفسي اعرف انتي إزاي خسيتي كده؟
(في هذه اللحظة أفاقت زوجتي من تقمص دور ريا وسكينة وتركت رقبتي وبربشت بعيونها في رومانسية واضحة ووقعت المخرطة من يدها ووقفت تقول:
- بجد بجد؟ طب إيه رأيك فيا دلوقتي ياحبيبي ؟