كل يوم جمعة

كشف أثري مهم: العثور علي عضوية »وطني« أنتيكة!

استطاعت احدي بعثات البحث والتنقيب التابعة لهيئة نظافة وتجميل القاهرة العثور علي عضو حزب وطني »خردة« مدفون تحت كراسي مجلس الشعب المنحل كان قد نام اثناء احدي الجلسات ويبدو انه ظل في مكانه شهورا طويلة استطالت فيها لحيته ونسج العنكبوت حولها ثوبا كثيفا واضحا للعيون.. العيون التي في طرفها »بيريسول«!
كانت البعثة قد ذهبت لتجديد المجلس استعدادا للانتخابات القادمة وفي اثناء الكنس والتنظيف اصطدمت »المقشة« بشيء لم يتبينه عامل النظافة عندما شعر بحركة غير عادية طارت علي اثرها شائعة بأن هذه الزبالة فيها ثعبانا من نوع ال »طريشة« ولكن ظهر من البحث والكشف ان اللي »بيخرفش« في الزبالة هو بني ادم عضو سابق في الحزب الوطني اشعث.. أغبر.. زائغ العينين.. شاحب الوجه.. يرتدي اسمالا قذرة مهلهلة وينكمش في نفسه وقد جحظت عيناه.. يبلغ من العمر 05 عاما طويل القامة في الامانة لا نصيب له من الصحة.. له ماض حافل ب»السوابق« يتقن جميع انواع السرقة ابتداء من »المحافظ« في الاتوبيسات و»المحمول« من الموالد حتي الاستيلاء علي اراضي الطريق الصحراوي والطريق الزراعي.. خبرة في تمييز الارض الطيبة والارض الواطية.. فاسد من راسه حتي ساسه بدرجة امتياز وان كان هذا لا يعني ان كل رجال الحزب فاسدون!
بعد عملية تنظيف »الوش« بالمقشات والهدوم بالبنزين خرج العضو اياه من تحت الانقاض يردد قائلا: ماء.. ماء.. ماء وبالفعل قام فرد من افراد البعثة إلي »مطبخ« فتحي سرور القديم واحضر له الماء.
وما ان بلع ريقه حتي سألناه:
اسمك ايه؟
- اسمي »علي بابا« وترتيبي الاول بين الاربعين حرامي!
كنت بتشتغل ايه في المجلس؟!
- با اشتغل »موافقة«!
تقرب ل »سيد قرارة«؟!
- دا ابن خالتي هو والاستاذ »تصفيق حاد«!
لك ابن خالة اسمه »تصفيق حاد«؟!
- ايوه.. وكمان واحد ثاني اسمه »سلق«!
و»سلق« ده كان بيشتغل ايه في المجلس؟!
- دا خبير »سلق« قوانين وتفصيلها علي مقاس مصالحنا الخاصة!
حضرتك حاصل علي مؤهلات؟!
- وجوائز كمان.. الجايزة الاولي في مسابقة »خد الفلوس واجري« دا بخلاف شهادة حسن »السير« في الطريق الصحراوي.. يا سلام وانا بالعربية بتاعتي علي الطريق الصحراوي مصر- اسكندرية والارض علي الصفين في منظر رائع يجري له الريق وتهتف لها الروح »يا حبيبتي يا ارض.. يا حبيبتي يا ارض«!
انت منين بالضبط؟!
- انا من »مصر القديمة« بتاعة حسني مبارك!
اهلا وسهلا.. ودي فين علي الخريطة؟!
- جنب »الصرمة القديمة« بتاعة الوريث!
والمسافة بين »مصر القديمة« و»الصرمة القديمة« تقريبا كام كيلو؟!
- مش بعيد قوي.. يا دوب »فردة جزمة«!
تسمح لي حضرتك بسؤال ثاني؟!
- اتفضل.. اتفضل اسأل مش تتفضل تهزأني!
وبتعمل ايه دلوقتي بعد حل الحزب؟!
- انا حاليا خالي شغل!
طيب ما ترشح نفسك لرئاسة الجمهورية!
- لا يا عم.. دي مش مضمونة.. انا عايز شغلانة ثابتة!
وناوي تعمل ايه في الايام الجاية؟!
- حا اعمل حزب وطني جديد باسم »المحروس«.. المرحوم جدي كان اسمه كده.. والنظام القديم كان دايما حارسه!
وما اهداف هذا الحزب يا تري؟!
- اغلبيتها لتحقيق العدالة الاجتماعية وللقضاء علي مشاكل الغلابة ومحدودي الدخل عمال وفلاحين وافراد عاديين من الشعب الي جانب مسح »الصوف« في حالة عدم وجود »الجوخ« لكل من يتولي حكم البلاد!
اذن ما المكاسب التي ستعود علي الفلاحين مثلا؟!
- اولها لن نبيع لهم الارض بالمتر كما فعل محمد ابراهيم سليمان واحمد المغربي.. ح نبيعها لهم ب »الشوال«.. الشوال البلاستيك المليان »تراب« بجنيه واحد.. وفوق منه »قصرية« زرع مجانا!
وبالنسبة لارباح العمال؟!
- سيعمل الحزب- لما ييجي يحكم- علي توزيعها بس في المشمش.. المشمش خلص اليومين دول.. نستني بقي وعليك الخير المشمش الجاي!
وبالنسبة لازمة المساكن ما الحل؟!
- اما انت عبيط صحيح.. دي حاجة عاوزه سؤال؟!.. سنقوم بحلها فورا وذلك بتوزيع شقتين لكل مواطن.. واحدة فول والثانية طعمية وفوقهم حتتين طرشي!
وبالنسبة لارتفاع اسعار ركوب المواصلات؟!
- بسيطة.. سنقوم بتوزيع ما يقرب من 58 مليون ابونيه مجاني علي افراد الشعب يسمح لحامله بركوب جميع المواصلات مجانا.. طول ما هي واقفة!
قلنا له بقرف شديد: هل لديك أقوال اخري؟! وهل لك طلبات؟!
- أيوة.. فين ثمن الحوار ده؟!
بعد انتهاء الحوار جاءت سيارة مدرعة صغيرة قامت ب »حدف« المذكور بداخلها وعندما همت بالسير سألنا السائق: حاتوديه قصر العيني واللا مقلب زبالة الدويقة؟!
قال وهو يطلق سارينة افساح الطريق: حا ارجعه سجن المزرعة تاني!