الأسطي كوكي.. تكسر قيود الصعيد بأكبر ورشه ميكانيكا

بدلا من أن تضع في حقيبتها كل ما يخص الفتيات ويلزمهن من قلم روچ وفرشاة وطلاء أظافر ووضعت مكانها مفك صليبة علي اخر عادة علي كام شريط لحام ( لزوم الشغل ) تركت كل ما تتمناه اي فتاة في عمرها لتكون عونا وعونا لوالدها الميكانيكي في ورشته البسيطة لتكون لقاء الخولي اول واصغر ميكانيكي سيارات في مصر ولم تكتف لقاء بتكريم سيادة الرئيس السيسي لها الا أن ابنة ال 20 عاما وابنة محافظة الاقصر قررت ان تستكمل مشوار كفاحها الرائع بتقديم كورسات لبنات وشباب الصعيد في فنون ميكانيكا السيارات لتكسر حاجز احتكار الرجل لعالم الميكانيكا وتثبت للدنيا انهي اسطي (مجدع) وكان للاخبار هذا الحوار معها لتكون نموذجا مشرفا لكل فتاة مصرية.
في البداية اسطي لقاء ايه حكايتك ؟
عمري 20 سنة ابويا توفي قريبا وكان فاتح ورشة لتصليح السيارات وكان يحلم بالولد الذي لم يرزقه الله به فلدي شقيقتان فقررت أن أثبت له رحمه الله أن البنت رزق ولا تقل اطلاقا عن اي ولد ونزلت اشتغلت في الورشه معاه وعلمني الميكانيكا وأصبحت اكبر ورشة وبقيت انا الاسطي كوكي.
اسطي (كوكي )مش شايفه ان مهنة الميكانيكا دي صعبة علي البنات ؟
كان عمري 7 سنوات وكنت اصغر اخواتي البنات واخترت الورشه اللي هي بالنسبه ليا عالم ساحر كل اللي شغالين فيها بيشقوا ويتعبوا علشان لقمة العيش ومن هنا الشغلانه واخداها بحب وتحدي فبقت سهلة وليا زبون بيجيلي مخصوص لحد الورشة يطلبني بالاسم .
عادات وتقاليد مجتمع الصعيد متشددة علي عمل البنت عموما ما شعرتيش بالخوف؟
واخاف ليه انا مش بعمل حاجة غلط وابويا شجعني وعلمني ماخافش من حاجه ابدا طالما مش بغلط.
والميكانيكا بتشتغليها حب في الشغلانة ولا علشان المكسب المادي؟
حب فيها تماما مش لاي مكاسب مادية اطلاقا.
والمعاكسات اللي من الزبائن ؟
بابا كان معايا طول الوقت ومحدش كان يقدر يعاكسني .
طيب وشغالة في الورشة حتي بعد وفاة والدك؟
قريب ان شاء الله هيبقي عندي مركز صيانة سيارات كبير مش ورشة فقط.
وايه حكاية الكورسات اللي بتقديمها لبنات الصعيد ؟
عندنا في الاقصر جمعية كلموني اشتغل معاهم واعمل كورسات ميكانيكا للبنات والشباب ونجحت والحمد لله.
وما هي اهم المشاكل اللي بتقابل بنات الصعيد؟
لسه البنت في الصعيد مش واخده حقها ومقيدة بعادات وتقاليد قديمه .
وايه احساسك من تكريم السيد الرئيس ؟
منتهي الفخر والعزة كرمني السيد الرئيس بمؤتمر الشباب بأسوان وكان نفسي ابويا رحمه الله يكون موجود علشان يفتخر بابنته لكن الموت كان اسبق من تلك اللحظة.
وايه حلمك ؟
أكبر ورشة ابويا وتكون اكبر مركز صيانة للسيارات في مصر وتدريب كمان.
وايه اكتر المشاكل اللي قابلتك خلال رحلتك مع عالم السيارات؟
أكثر ما أحزنني ولا زلت أذكره هو أنني لم أحظ بالدخول لمدرسة تعليم صناعي، قسم ميكانيكا كي أصقل الهواية بالدراسة ولكن فوجئت بأن مدارس التعليم الصناعي الخاصة بالبنات في البلدة لا يوجد بها قسم ميكانيكا، فقط كانت الخيارات منحصرة في أقسام التريكو والأعمال المنزلية.