خارج المستطيل الأخضر القمة بآراء جريئة

مباراة الاهلي والزمالك.. ليست كأي مباراة عادية في بطولة الدوري المصري.. رغم انها رقميا لا تساوي غير ثلاث نقاط فقط.. فإنها تشغل دائما كل الجماهير من المحيط إلي الخليج.. كما انها تظل المادة الخصبة لنجوم الغناء وأهل الفن.. فمنذ ان تغنت الشحرورة صباح في السبعينيات من كلمات الشاعر حسين السيد والحان الموسيقار محمد عبدالوهاب بين الاهلي والزمالك محتارة والله حب الاهلي والزمالك حيرني والله.. انت اهلاوي انت زملكاوي.. الاثنين حلوين الاتنين جامدين الاتنين هايلين محتارة اشجع مين ولا اشيل من جوه عيوني.
الاخبار صرحت ان تغرد معكم خارج الصندوق. ورصدنا اجواء نجوم الادب والشعر والسياسة والفن.
مباراة القمة رقم 114 بين الأهلي والزمالك علي ستاد برج العرب.. المفخرة العسكرية الحضارية.. دخلت الاستاد قبل الماتش باربع ساعات.. حسيت انني طالع المريخ وجوايا ناقد رياضي زملكاوي مرعوب من الهزيمة والشماريخ والزلط والطوب وكان بجواري بمدرج الحرافيش صديقي عبدالله البشير الشاويش كابتن الدراويش في السيدة زينب وسيدنا الحسين..واللي في الزحمة واحنا داخلين ستاد برج العرب ماسكني من »دراعي»‬ واعتبرته في الماتش المرشد الرياضي بتاعي وكل شوية يقولي ربنا مع المنكسرين جابر يجبر خاطرنا وينصرنا علي الاهلاوية.. حتي لو بجول من ضربة جزاء وكل شوية رافع ايدية للسما.. قلت له وطي يا عبدالله ليسمعوك الناس اللي حوالينا.. ونلاقي نفسنا في الصحراء بندور علي اهالينا. ببص لقيت الاستاد مليان »‬وفلنات» حمره اكتر من 70 الف وهجمة أهلاوية علي مرمي الزملكاوية وجس نبض شمال ويمين من الجانبين.. ولمحت من بعيد هجمة منظمة من عند حسام عاشور وعبدالله السعيد.. ودفاع زملكاوي جامد من الونش وطارق حامد زي مايكون بيقولوا اللي يفوت يموت.. بالمطرقة بس بعيد عن المنطقة،.. عبدالله غمزلي وقالي باظ الماتش يا معلم.. وده مكنش في الحسبان أن الزمالك في أول ربع ساعة يكون كسبان.. 20 دقيقة الشياطين الحمر في الملعب زي الجان ماسكين كورة وضاغطين علي الزمالك عايزين يتعادلوا قبل نهاية أول شوط.. سمعت صوت جمهوري من ورايا.. دي تبقي قلة ادب وندالة لما البطل يتقلب يا رجالة.. رد عليه واحد جنبه.. قاله استحالة.. شوية وعدي بياع البسكوت عبدالله قاله معاك بسكوت سادة.. قاله معايا بسكوت سادة وبسكوت شكولاتة ومعايا بسكوت بالبطيخ عايز اجبلك ايه ؟ قاله عايز بسكوووووووت بالبطيخ ميل عليه البياع قاله عايزه سادة ولا بالشماريخ بكام قاله للأهلاوية 30 جنيه والزملكاوية 20 جنيه عبدالله قاله ياخبر ابيض بسكوت بالشماريخ.. قاله يا استاذ وطي صوتك احنا بنبيع ممنوعات عبدالله قاله هات واحد بسكوت بالشماريخ.. وصل الماتش لنصف ساعه الاهلي حابس الزمالك في نصف ملعبه.. والزمالك راجع كله وحافظ علي مكسبه اللي مكنش في الحسبان.. الاهلي ضاع منه تلات فرص كانوا اجوان لو عبقرية الواد فانلة عمر صلاح اللي كانت امه »‬دعياله» في ليلة القدر
عبدالله غمزلي في كتفي وقالي الأهلي ضاغط يا فنان الاهلي ضاع منه ثلاث اجوان.. الزمالك بعد الجون نام واتغطي.. وربنا يستر.. قلت له خليه نايم لسة 6 دقايق ويخلص أول تايم.. التايم التاني ربنا يفرجها شيكابالا يعمل واحدة يغطي الجون.. لقيت عبدالله ضحك وطلعلي لسانه.. الزمالك حط الجون زي الجعان جاله رغيف وهو جعان مسك فيه بايده وسنانه وراح مطلع باكو بسكوت من جيبه وراح ضارب شمروخ عشانه..لقيت عبدالله مش في مكانه اتاريه كان بيدوخ من دخان الشماريخ.. وبعد ما فاق وكل شكولاتة.. قالي التايم التاني الاهلي هينصب سيرك عشان يتعادل.. جايز يكسب ولو كسب الأهلي فين هنروح.. قولت هنروح فين.. قالي نروح نبات عند حماتي.. أم مراتي اللي في مطروح قولتله سيبك.. قالي حبيبك ابتدي تاني تايم فعلا الاهلي مسك كورة واحدة من معلول.. للسولية.. لمؤمن زكريا ونطلع فوق العارضة بياردة وكورة مرتدة زملكاوية من معروف لايمن حفني لشيكابالا يريحها ورفعها من رفعاته في الصندوق شالها شريف إكرامي بطراطيف صوابعه طلعت فوق والأهلي واصل ضغطه عايز يتعادل يا حضرات.. والزمالك قافل المساحات وخط النص فايق جامد صامد مفيش حد يفوت من طارق حامد وهجمة الزمالك تطلع أوت وهجوم اهلاوي شديد وعنيف زي حر فصل الصيف ودفاع زملكاوي من الونش واقف زي الونش عبدالله قالي أنا خايف يغلط غلطة اهلي طرابلس وفجأة جات كورة يستلمها عمرو جمال وياخد ويدي مع صالح جمعة بمنتهي السرعة اللي لسة نازل حامي ويشوط واحدة زي السهم مسكها عمرو صلاح بثبات وفات من التايم التاني نصه والزملكاوية في الساعات اولفات بيحيوا والاهلي ضاغط راجع والزمالك كله بيدافع.. والمرتدات علي الأهلي مابتكملش.. ويشيل كورة خطيرة الونش وكورة هنا والتانية هناك والزمالك كسبان جون.. والبنزين شطب من الفريقين والباقي هما يدوب دقيقتين.. وكورة منقولة تلات نقلات توصل عند مؤمن زكريا يشوطها من 30 ياردة ولا شمشون في الزمالك تدخل جون.. لاقيت عبدالله صديقي وقف وزعق باعلي صوته جون التعادل يا رجالة امال فين بركة شيكابالا. واحنا خارجين بعد الماتش لقيت عبد الله بيخبط علي كتفي ويقول.. ماتقوليش ما تعدليش.. كلها كورة أكل عيش
نقطة للأهلي ونقطة للزمالك أحسن من مافيش.. فجأة لقيتني واقع من الكنبة اللي في الصالة.. صحيت من النوم مفزوع هموت من العطش والجوع فرحان وزعلان ان التعادل كان قفلة الموضوع.