إحم إحم

أنا وأمي و«نيدو» و«مرتجي منصور» !

- ياولدي أنا مش باتكلم علي سد النهضة أنا باتكلم علي هضبة الجابون اللي اسمه إيفونا إللي جاب فيكم الجون الأولاني امبارح.
مكالمة من أمي في البلد
- صباح الخير ياولدي معلش تعيشوا وتاخدوا غيرها.
- معلش يامه الموضوع لسه ماخلصش ولو اثيوبيا مش فاهمة خطورة إللي بتعمله إحنا لينا تصرف تاني.
- أثيوبية إيه ياولدي قصدك الجابون الجابون.
- جابون إيه يامه،سد النهضة ده في اثيوبيا مش الجابون.
- ياولدي أنا مش باتكلم علي سد النهضة أنا باتكلم علي هضبة الجابون اللي اسمه إيفونا إللي جاب فيكم الجون الأولاني امبارح.
- ههههههه الله يحفظك يامه هو انتي طالباني علشان الماتش ماشي يامه مقبولة منك ومبروك عليكي وعلي أبويا.
- خسارة تعبي فيك بعد ماشيلتك 9 شهور في بطني تطلع زملكاوي.
- نصيب يامه ثم انتي لسه فيكي نفس تتفرجي علي الماتشات يامه..إذا كنت أنا بطلت أتفرج علي الكورة أصلا.
- قصدك إيه ياقليل الأدب هو انتي فاكرني عجزت زيك ولا إيه ولا إكمني يعني الزمالك اتغلب؟
- وإيه الجديد يامه ماهو ده العادي واحنا أخدنا علي كده خلاص.
- ده ذنب الراجل الطيب إللي الزمالك كرشه علشان يجيب نيدو.
- ههههههه قصدك ميدو يامه ميدو.
- معلش ياولدي أصلي كل ماباشوفه بافتكر العيال المتختخة إللي بتيجي صورها علي علب لبن الأطفال. ألا هو نيدو ده بيشتغل إيه بالظبط؟
- مدرب يامه مدرب.
- مدرب بكرش؟ ده أنا كل مانتفرج علي ماتش للزمالك اقول لأبوك إن شكله ماينفعش يدرب حد..
- إزاي بس يامه ده كان لاعب كبير بره وشاف الأجانب بيلعبوا إزاي وحتي شعره ناعم ومربيه زيهم بالظبط.
- لو علي الشعر الناعم الطويل كان أبوك في شبابه بقي كابتن العالم، يابني مش كل واحد ركب الطيارة وسافر بره بقي لعيب وإذا كان علي ماتشات الأجانب إللي شافها نيدو فأبوك مش بيقوم من قدام الدوري الايطالي والفرنساوي فهل معني كده ينفع يدرب الأهلي؟
- عندك حق يامه الزمالك محتاج مدرب أجنبي بقي.
- تاني أجنبي ماكان موجود فيريرا وكان زي الفل وكان واخد دوري وكاس لغاية ما مرتجي منصور مشاه.
- ههههههه مرتضي يامه اسمه مرتضي لكن مرتجي ده كان زمان رئيس الأهلي مش الزمالك خدي بالك الله يكرمك لحسن فيه فرق كبيييير.
- فكرك فيريرا الغلبان سكت علي حقه؟ تلاقيه نزل من الطيارة علي مقام سيدي كارلوس البرتغالي وكشف راسه ودعا علي مرتضي ومش بعيد يكون جاب حجاب عكوسات يمنع عن الزمالك أي انتصارات.
- أشتاتا أشتوت يامه يجعل كلامنا خفيف عليهم هو احنا حنلاقيها من جامايكا ولا من كرامات كارلوس البرتغالي..ألا يامه لو كان سره باتع احنا نسافر البرتغال نجيب حجاب ونحل مشكلة سد النهضة.
- لا ياولدي حاجة واحدة ممكن تمنع المصيبة دي،ماتخليش نيدو ده يطلع تاني في التليفزيون.
- وإيه دخل ميدو يامه بسد النهضة؟
- ماهو أكيد الجماعة اللي في اثيوبيا كل مايشوفوا منظره يقولوا ده لوحده شافط نص حصة مصر من نهر النيل.
- ههههه حاضر يامه هابلغ نيدو بطلبك ده.
- كويس إنك فكرتني ابقي هات معاك من مصر علبتين نيدو لحسن أبرار بنت اختك مش لاقيينلها لبن هنا!