إحم إحم

صلاح الدين وريتشارد قلب الأسد 2015 !

صلاح الدين في خيمته يمسك بالآيفون وتظهر علي الشاشة محادثة له مع باتعة العمشة يلوم نفسه لأنه لم يفهم أنها هي فيرجينيا بشحمها ولحمها
شاهدت في التليفزيون محب الرافعي وزير التعليم يرد علي سؤال لوائل الابراشي حول حذف بعض الدروس التي تتناول قصة الناصر صلاح الدين، حيث قال إنها تركز علي المعارك والسيوف التي قد تؤثر في سلوكيات تلاميذ الابتدائي، وأنه كان الأفضل التركيزعلي قصة علاج صلاح الدين لريتشارد قلب الأسد ملك انجلترا،ومساهمة مني في تطوير المناهج أقدم هذه المعالجة الجديدة للقصة، وفي حالة اقرارها احتفظ لنفسي بكل الحقوق الأدبية والمادية.
المشهد الأول:
الجيوش العربية تتقهقر منكسي الرءوس والسيوف والكاميرا تركز علي عيسي العوام وهو يضرب كفا بكف قائلاً: هو راح فين، ثم يمسك بموبايله ويقول في حسرة: وكمان قافل موبايله انا خايف ليكون جراله حاجة، لكن أحد الجنود يهمس في اذنه بكلام لم نسمعه.
المشهد الثاني:
عيسي العوام يقتحم خيمة الملك ريتشارد قلب الأسد ليجده وقد وضع قدمه في الجبس ويجلس بجواره صلاح الدين وهما يلعبان بلاي استيشن فينظر لصلاح الدين بغضب قائلا: بتعمل ايه هنا ياكبير؟ فيرد دون أن ينظر إليه: تعالي ياعوام العبلك دورمعانا، أصلي كنت باعالج سمو الملك زي ما انت شايف وعزم عليا نلعب دورين وانا غالبه لغاية دلوقتي 3 صفر، عيسي يحاول أن يغمز لصلاح الدين قائلا له: بس كنت عايزك في كلمتين علي جنب. فيقول صلاح الدين مبتسما: طيب روح انت دلوقتي،خمس دقايق واحصلك.
المشهد الثالث:
صلاح الدين يهم بمغادرة الخيمة وريتشارد يستوقفه قائلا:رايح فين يابو الصلح ده لسه الملك آرثر والملك فيليب جايين يلعبوا معانا فيرد:لازم أروح أشوف عايزين ايه فيقول ريتشارد:حتي لوعرفت ان فيرجينيا زعلانة منك؟ فيعود صلاح الدين ليجلس من جديد قائلا:حد يقدر يزعل جميلة الجميلات؟ فيرد ريتشارد: بقي ياراجل الست بعتالك طلب اضافة من شهرين علي الفيس وحاطه صورتها كمان وانت تطنشها كده؟فاندهش صلاح الدين قائلا:انت عارف كل البنات بتحط صور فيرجينيا ولويزا في البروفايل بكتشر لكن مفيش بنت بتكتب اسمها الحقيقي فيقول ريتشارد:أيوه طبعا علشان محدش يعرفها، فيسأله صلاح الدين:قولي اسمها ايه علي الفيس وانا اضيفها فورا:فيرد ريتشارد:باتعة العمشة!
المشهد الرابع:
صلاح الدين في خيمته يمسك بالآيفون وتظهر علي الشاشة محادثة له مع باتعة العمشة يلوم نفسه لأنه لم يفهم أنها هي فيرجينيا بشحمها ولحمها وهي تشكو له من غلاسة ريتشارد اللي مشغول بالبلاي استيشن ثم سألته باتعة: بذمتك قول الحق أنا أحلي ولا لويزا اللي بيحبها صاحبك عيسي العوام؟ فيرد: لويزا مين المعصعصة دي فتقول فيرجينيا:طب ليا عندك طلب ياصلوحتي يوسف شاهين صاحبك هيعمل فيلم كله عنف يسميه الناصر صلاح الدين ياريت ياصاصا تخليه يشيل العنف اللي في الفيلم وكمان يغير اسمه خليه صلاح الدين والأصدقاء التلاتة وماتنساش توصيه يعملنا انا وانت مشهدين تلاتة رومانتيك، وياريت كمان يحطلنا في الفيلم اغنية هيفاء وهبي الجديدة فيقول صلاح حزينا:هيفاء نزلت اغنية جديدة وانا ماعرفش؟آدي إللي أخدناه من الحروب الصليبية،اسمها إيه الأغنية دي فترد فيرجينيا: صلوحة حوش ريتشارد عني!