قولوا لمعالى الرئيس

يوماتى هكتب لك
علشان شريكك انا فى الحكم وبحبك
واجب عليه ابلغ شكوتى لمعاليك
وتحس انى كمان قلبى على قلبك
...
قولوا لمعالى الرئيس هتصلى بكره فين ؟
انا عايز اسلم عليك بالقلب قبل العين
ولو انى يعنى الحرس هيذوقنى لبعيد
ومش بعيد فى الزحام اخد كمان قلمين
...
قولوا لمعالى الرئيس انا سنى من سنك
وليلاتى ابات معدتى فاضيه بعيد عنك
ياريت يا باشا تخلى السفرجى بتاعك
ليلاتى يبعت لنا اللى يفيض منك
...
قولوا لمعالى الرئيس انا اصلى مبشفهوش
وكمان حرس حضرته خلونى مادخلوش
قولوا له اهل الصحافه زعلانين منك
ناويين كمان حضرتك بكره مايشتغلوش
قولوا لمعالى الرئيس ازرع لنا الغله
وبلاش بلد اجنبى يمسك لنا زله
واللى ميزرعش طبق الغرامه عليه
واقطع ايدين اللى يزرع لب وفراوله
...
قولوا لمعالى الرئيس (اسلام عفيفى) برئ
ايه يعنى قال كلمتين مثلا فى ساعة ديق
فيه الف جرنال معاك ممكن يردوا عليه
ومفيش لزوم للصحافه نعملوا تحقيق
...
قولوا لمعالى الرئيس وحشنا التحرير
من يوم ما سبنا الميدان بعدنا عنه كتير
ونسينا اهداف كتير طالبنا بيها زمان
ونسينا ان النظام محصلش فيه تغيير