شارلي إبدو وحادث العريش...والرد الشعبي

حينما حدثت واقعة شارلي إبدو...نزل الشعب الفرنسي كله في مظاهرة قومية من 3 ملايين شخص ليتحدوا الإرهاب ويقفوا وراء الدولة. نحن أيضا يجب ألا ندع حادث العريش يمر دون وقفة شعبية وموقف وطني قوي ومن هنا كان اقتراحي بالذهاب إلي العريش وعمل سلسلة بشرية من رموز المجتمع تمتد علي طول موقع حادث العريش في ترابط وتحد لكي نعلن أننا كلنا نتحدي هذا الإرهاب وسوف نتصدي له وأننا لسنا خائفين...و سأكون في مقدمة الحاضرين في هذا الجمع المشرف.من المهم جدا أن يعرف المتآمرون أنه لا جدوي من عملهم هذا وأن الشعب المصري لن يركع ولا يخاف. كما أنه من المهم جدا أن تعرف أسر الشهداء أننا تألمنا لمصابهم وأنه أيضا مصابنا وأننا معهم في حزنهم وغضبهم.
إليكم معظم التعليقات التي جاءتني بعد عرض هذا الاقتراح علي حسابي علي تويتر :
طيب وانت هتروح ولا حضرتك معندكش وقت
شوف هتطلع امتي علي هناك واحنا وراك
ما انتوا المفروض يا رجال الأعمال والاقتصاد تشدوا حيلكم معانا شوية عشان البلد تفضل في أحسن حال
أعتقد أنك هتبقي أنت الوحيد اللي هيروح
اعتقد ان سيناء محتاجة حلول مجتمعية ودعم منا افضل من وقفة في موقع الاعتداء أهل سيناء محتاجين الدعم من شرفاء مصر
فكرة حلوة. يلا روح بنفسك بقي مش كلام وبس
اقتراح رائع يا هندسه.كنت لسه امبارح بقوله لاحد الاعلاميين
انا مش موافق علي الفكرة يا نجيب. خالص يعني
صباح الخير عليك وعلي المصريين الوطنيين المخلصين الشرفاء.. من فضلك يا باشمهندس خليكم معانا في ضهر السيسي وساندوه بكل قوتكم
ابدأ في الدعوة لها والاحسن من استشهدوا منهم من كان عكاز اهله ياريت لو من اخوته من يصلح للعمل توظفوه تمام يا فندم
اعمل انت مشاريع في سينا ورجال الاعمال كمان دي احسن من السلسلة البشرية / تحياتي
قبل اي حاجه عاوزين نعرف اللي عملها الاول هو مش اي كلام هيتقال نصدقه
وهوبا واحد امبليه ونبقي خلصنا من رموز الوطن فكرة جبارة
كلام من ذهب لكني اعتقد ان احدي اهم ايديولوجيات الارهابيين، هي انهم يرون الناس كفار يجب قتلهم، ف مش هيفرق معاهم اذا كنا نتحد
اعتقد ان ده عبء ع الجيش والشرطة
الكلام دا ينفع في مجتمع يملك رفاهية ثقافية تخليه يتأثر بحاجه زي دي مش عندنا
يشرفني ان أكون هناك
المصريين من الشعوب اللی بتجری ناحية الانفجارات مش بعيد عنها وهما الشعب اللی بيقف يتفرج عل القنبلة والخبير بيبطل مفعولها
رموز الوطن دول اصلا ولا هما متوحدين في المواجهة ولا هما شجعان
كلام جميل وفكرة أجمل... بس مواجهة الارهاب مش بالواقفات يا استاذ نجيب لازم نفكر شويه بره الصندوق لازم يكون في حل جذري
علي اساس ان الارهابيين هايخافوا زي ما اتفزعوا من فيديو الفنانين المرعب؟
يا بشمهندس اللي في سيناء عمره ما هيخلص إلا لما احنا كمصريين نتفق لازم يبقي في مصالحة وطنية ده لو عايزين نبني بلدنا بجد
وهما الإرهابيين ها يهمهم رموز الوطن ولا تفرق معاهم ده يمكن يقولوا فرصة نخلص من الناس دي مره واحده مع بعض
المهم انك تبقي في مقدمة الصف ومايبقاش في حاجة تأمنكم وابقي ابعتلنا صورتك وانت هناك
ايه الحلول الرومانسية، لا ما ناخد شوية كمان ونطلع بيهم علي ابو بكر البغدادي ؟
كما ترون فقد تراوحت التعليقات بين خفة الدم المصرية وبين تعليقات لا تتفق مع جلال الحدث....بين مؤيدين ومعارضين...المهم هو ألا نقف ساكتين دون رد فعل قوي وان نطالب بضرورة تبني استراتيجية حاسمة لمواجهة الارهاب ومنع تكرار هذا الحادث مرة أخري.