صباح الورد

»عصفورين بحجر واحد«

سأل الملك رمسيس الثاني روكا الحرامي عن جهود الحكومة لحل مشكلة ظهور أسماك القرش المفترسة علي شواطيء شرم الشيخ .
أجاب روكا: لما القرش أكل دراع الست .. الحكومة سألت الخبير وقال لها ماتخافيش. ده قرش صغنون تايه من أمه والمنطقة نضيفة وزي الفل مافيهاش ريحة القرش . الحكومة عجبها الكلام وقالت للسياح : القرش راح لحاله ، بلبطوا في المية براحتكم . وبعد كام يوم ظهر قرش صغنون غير الأولاني وزلط جوز ستات .
قال الشيخ غريب : كان تايه من أبوه !
قال روكا: الحكومة قالت مابدهاش . عملت لجنة سيادتك للبحث والفحص والتقصي ووضع جرجير.
قاطعه الشيخ : قصدك تقرير يا معلم !
قال روكا: اللجنة اجتمعت. وكل ما يخلص الاجتماع تجتمع تاني . وسيادتك ملك قديم وعارف ان حكومتنا بتحب الهداوة . مالهاش في الاستعجال ولا الصربعة . بتحب تطبخ علي نار هادية علشان الطبيخ يطلع طِعِم .
قال الشيخ : ومسبك يا معلم !
قال روكا: ولما آن الأوان اللجنة قالت للحكومة مبروك. وصلنا لحل جهنمي يحمي السياحة ويجيب أجل القرش . وطلبت منها تكهرب البحر ، وكده القرش يموت والسياح يعوموا براحتهم. وزير الكهربا قال لهم اتقوا الله . أجيب كهربة منين تكفي البحر الأحمر . لكن اللجنة مابتغلبش سيادتك . أصل كلها خبرا وعلما ويفهموا في كل حاجة . قالوا للحكومة ما يهمكيش من القرش . ده منظر ع الفاضي . بقه واسع وسنانه زي المفرمة ، ويزلط نفرين في ثانية .. بس جبان ويخاف من خياله . ومادام بيخاف يبقي لازم نضرب ع الوتر المحتاس .
قاطعه الشيخ: قصدك الوتر الحساس يا معلم !
قال روكا: الخبرا قالوا السايح ماينزلش البحر لوحده . لازم ينزل معاه منافق .
قاطعه الشيخ : قصدك مرافق يا معلم !
قال روكا: يستخبي ورا السايح ويستني القرش . وأول ما يبان قدامه يقول له بخ . القرش يتخض ويحط ديله في سنانه ويقول يا فكيك .
قال الملك : هذه حلول لا يقبلها العقل .
رد روكا: انا شايف ان القرش مظلوم يا عم رمسيس . ده برضه طير أخرس يا ولداه . بييجي من آخر الدنيا علي ريحة بياض وحلاوة ونعومية الحريم الروس والطلاينة والألمان .
قال الشيخ : كله مفهومية !
قال روكا : انا عندي حل للمشكلة سيادتك . اللحم الأبيض وارد بلاد برة ماينزلش البحر يومين ما فيش غيرهم .. ونحدف في المية عشرة من الحريم بتوعنا يلعبوا مع القرش . أول ما يشوفهم ح يفلسع ويكره البحر الأحمر .. وابقي قابلني لو ظهر تاني .
سأله الملك : وإذا افترسهم القرش ؟
أجاب روكا: يبقي خير وبركة . احنا نستريح ونعيش حياتنا، والقرش يتسمم ويموت .
قال الشيخ : عصفورين بحجر واحد يا سيد المعلمين !