طريق النور

فوضتك نفسي..

يا مصر.. يا جميلة.. يا ست الحسن.. يا أصيلة.. طول عمرك يا بلدي منحوسة.. حتي وإنتي عروسة.. وحسادك كتير.. وعوازلك عايزينك تمللي موكوسة.. حتي لما عملتي ثورة.. سرقها شوية تجار دين.. لعبوا بيكي شيش يك.. وزنقوكي في خانة اليك.. لكنها جت معاهم دوسة.. وأيامهم بقت حوسة.
ولما جالها الأمل مع العسكر.. وباسم الشعب والأمة قالت ح اتستر وفرحتها.. خلاص بعد ما داقت المر.. بكرة ح تاكل السكر.. وباسم الشعب.. والأمة.. جاني حبيبي السيسي.. وقال كلمته.. وعزل مرسي وشاله من ع الكرسي.. وغزل توبي ورواني بالحب والورد المعطر.. وبعدها بشوية لاقيت أهلي وناسي كلهم فرحانين.. بطلته.. وبهيئته.. وبطلعته.. وقالوا هو ده صاحب النصيب والقسمة.. اللي ج يستتني ويهنيني.. ويحميني من تجار الدين والدنيا واليهود والأمريكان.. ويقولهم بعلو الصوت كان غيركم أشطر.. وساعة ما طلب ايديا.. قال أنا محتاج تفويض.. من الكل.. قلت في عقل بالي تفويض ليه وعلشان ايه.. ما هو كل شيء في إيديه الحق.. والقانون.. والقلب الحنون وأهلي وناسي اللي شايلني من أول لحظة جوه نن عينيه وقالوا كلهم اخترناك.. وفوضناك.. والطبل والزمر اشتغل.. والكل رقص.. وهلل.. ورفع صوته للسما وسهر للصبح مع الضحك والفرح والسهر.
إنما أنا فضلت حزينة.. حاسة بالخوف.. هو اللي عايز يحميني.. يطلب من أهلي وناسي ينزلوا في الميادين.. ويحاربوا كل الإرهابيين وكأن اخواتهم التانيين فجأة طلعوا كلهم كفار ومشركين.. طيب فين دينا الإسلامي الجميل اللي علمنا نجادل بالتي هي أحسن.. وعلمنا ننصر اخونا ظالم أو مظلوم زي ما قال نبينا المصطفي محمد.. وان كان فيه شوية راكبين دماغهم فالكل عارفهم.. المرشد والبلتاجي.. وحجازي.. والعريان.. اللي حرمهم ربنا من الجاه والسلطان علشان طمعهم وجشعهم وحبهم للدنيا التنظيم الدولي للإخوان.. رغم اني طول عمري عايشة في سلام والأزهر الشريف كان دايما العنوان.. وعمري ما كنت بحب أفكار الإخوان ولا العريان. اللي كان عايز يبعني لكل جبان.
وعلشان أنا مصر قبلة الأنبياء والأديان عمري ما فرقت بين البشر والكل كان عايش علي أرضي في أمان.. حتي ولادي من الاخوان.. إنما أعمل إيه والحيرة قتلتني.. ابني وابن بطني قسم وسطي ومن يوم أهلي وناسي ما قالوا كلمتهم ونزلوا وقالو فوضناك والدم نازف من عروقي وشراييني والهم والغم لسه بيطاردني.. خايفة ييجي اليوم وأحس ان اللي حصل ليه ولناسي وأهلي الثوريين والعلمانيين والمتمردين وغيرهم من التايهين، انه سيناريو ومرسوم وارجع تاني أتجوز أبو نسر ودبورة وأعيش في ظل الانضباط والخوف.. بعد ما تكون خلاص الفأس وقعت في الرأس.. وكل شيء صبح معروف ومعلوم.. ومفيش غير ان أقول لحبيب القلب.. الفارس الجديد زوجتك نفسي.. فوضتك نفسي.. وده عمري ما كان في بالي ولا في نفسي إنما ده كله كان البخت والحظ والمقسوم.. والسيسي يصبح هو الوعد والسعد والمقدر.. والدم يفضل هم سنين عمري.. وعايشاه كل ساعة وكل يوم.