طريق النور

سكة سفر..

الدنيا سكة سفر.. فيها البشر ماشيين.. ع الكتف شنطة هدوم.. والقلب شايل هموم.. في الليل يعد النجوم.. والصبح مليان غيوم.. يا حزن يا مكتوم.. هم البشر معلوم.. الخير علي أرضه.. لكنه بات محروم.. بيطلب أمن وأمان.. وصحة مع ستر.. ولقمة وشربة ميه.. تبل الريق من زير إللي صبح مخروم.. وكل ما تعدي ساعة من عمره تجر معاها ألف يوم.. يلقي العمر اتسرق منه.. والموت قدر محتوم.. ولما يسأل نفسه.. يطارده ألف جواب وجواب.. بختم نسر مريض.. باهت ومش مختوم..
ركبنا قطر الدنيا.. وبعد أيام وشهور وسنين.. لقينا روحنا بالملايين.. نازلين في محطة مصر.. الكون سكون.. والهمس أصبح جنون.. والضحكة جابت ظنون.. والدمعة خايفة تهون.. والقلب نازف حنون.. وبصرنا من غير عيون.. دايرين في ساقية شجون.. ولما فاق الخلق.. مع ثورة شايفة الحق.. الحلم خرج م الشق.. وفاق كل الجفون.. والفرحة سرحت بعيد.. تحلم بتحرير العبيد.. من ديابة السكة الحديد.. ومر يوم العيد.. وبعده كام يوم عيد..
وحلمنا بحرية وكلمة صادقة عفية.. الحلم أصبح سراب وبالسواد معجون.. لبسنا توب الحداد.. علي روح كل الشباب.. وكلمة الحق تاهت.. مع كل لسان كداب.. والعلم والإيمان تاه في قلوب مفتوحة الأبواب.. والزيف والفهلوة.. صبحوا عنوان كل صاحب منصب.. والصدق حيران.. مريض.. تعبان.. وعيونه بتدور علي ناس من أولي الألباب.
علمونا في المدارس.. ان مصر حضارة ومنارة.. ومهارة.. وعلمت الدنيا والعالم معني السلام والأمان وحضن دافي حصين.. لكن ده كان زمان. دلوقتي احنا فين.. في ذيل الأمم ماشيين.. الاسم قال مسلمين.. وكل واحد فينا صبح له علم ودين.. بنعبد إله واحد.. ونقول آمين.. لكننا تايهين.. غايبين.. نايمين.. وزمار الحي قاسي القلب.. لا عارف أدب ولا دين.. وماشي بفتاوي وحكاوي.. لا ليها أصل ولا فصل.. ولا فيها سماحة الدين.. ولما جه صوت من بعيد.. يشيل تراب السكة من جوه العيون.. وهم السنين.. ودلنا ع الطريق.. وان مصر بلد الطيبين المسلمين والمسيحيين وأرض طاهرة.. فيها الخير ليوم الدين.. كلنا فرحنا.. وفي حلمنا سرحنا.. وهمنا جرحنا.. وعرفنا مطرحنا.. وسط الأمم.. بين الرموش والعين.. لكن لسه مشوار الألف ميل خطاويه بالملايين..
عريفي عرفني الطريق.. بكلام حلو ورقيق.. وعدد فضائل مصر.. بدون عدد أو حصر.. وقال لكل الخلق.. ان أم الدنيا أقرب صديق.. ومهد العلم والإيمان.. وقبلة الأوطان.. في كل مكان وزمان.. لكنها محتاجة لسواعد ولادنا.. وأحفادنا.. وكل صاحب قلب مليان بعلم ودين.
يا ولاد مصر.. يا طيبين.. بالعلم ح نعرف طريق الدين.. والحلم اللي تاه عنا.. بإيدينا راجع لينا.. لو قسمنا الفرحة بين اتنين.. وكتبنا في كل محطة أسامينا.. وأحلامنا مع أمانينا.. وبالعزم والقوة.. نوصل لبر أمان.. الكل فينا إنسان.. عارف طريقه فين.. وكلمة الحق تطلع من قلب صافي أمين.. حرية مع أغنية.. ترفع رايات الحب في كل قلب وعين.. كلمتنا تتوحد.. وكلنا نوحد.. رب الخلايق.. والحقايق.. وبصدق نوصل بمصر لبر الأمان.. ونعيش بحرية.. مع ثورتنا اللي جاية.. ونقول سلام عليكي يامصر من رب العالمين..