الحياة إرادة

حكايات زمان في زمن الإخوان 10

محيى عبدالرحمن
وصفوا لي الصبر لقيته خيال وكلام في الوهم، علي منصة في مليونية يدوب يتقال، اهرب من غلبي اروح علي فين، وقفاتنا الاحتجاجية في كل مكان، ثورتنا الحلوة من سنتين، قلبناها فوضي وبلطجه ووقف حال، وملينا الدنيا جدل وخصام، عيني يا عيني علي الغلبانين، حياري مطحونين، علي الفقر مش قادرين، واللقمة مش لاقيين، يسمعوا عن مليونية يجروا متفائلين، يقولوا يمكن يكونوا دول ناس صالحين، في الميدان يتنبح صوتهم، وآخر النهار مروحين، دموعهم علي خدودهم، من اللي مات واللي انكتب اسمه في كشوف المصابين، في اول مليونيه قالوا حرية عدالة وعيش للجعانين، والشعب يريد اسقاط نظام الظلم والفاسدين، سقط النظام بحاله، ورموزه بقوا في سجن طرة متجمعين، وفي المليونية التانية قالوا الدستور اولا يا مصريين، ده حصن امان للملايين، علي ضوئه تمشوا مطمئنين، خرج من بينهم اللي قال ابدا.. الانتخابات اولا، احنا مش نايمين، احنا ثورجية وفاهمين، وبصراحة لحكم العسكر مش مطمنين، خلوا بالكوا يا مجروحين، اوعوا يضحكوا عليكم بكلمتين ناعمين، ويلبسوكم عمم وافاطين، وتلاقوا نفسكم متكلبشين، احتاروا الطيبين وتاهوا المستبشرين
واختلفت اراء المحللين، وانفتحت في الفضائيات برابخ المتفلسفين، وزادت البلة طين، ووقفوا الحكما عاجزين، عن اقناع الملايين المسالمين، اللي في البيوت وعلي المصاطب قاعدين ونايمين، مع كل طلعة شمس يفركوا عينيهم متسائلين، فين الامن فين المليارات الخير فين ؟! علي الوضع ده مش صابرين، دا الصبر عاوز صبر لوحده، ما اقدرش علي بعد سريري، انا ليا مين الا سريري.. ومين قال اللي فات مات والايام مخبية بلاوي، ولسه يا ما في الجراب يا حاوي، والبحر غدار وامواجه عتيه وللحديث ان شاء الله بقية .