ما الشوارع إنتَ .. و احنا .. نُصّها لحظة بُكانا .. نُصّها لحظة فرحنا الشوارع : هيّ روحنا ..
يبقى فين الكدب .. فين؟
بُصّ حَقّق ..
اللي شاف فيك الأبوّه .. أو ملامح م النبوّه من سنه ..
شايفك أهوّه واخد المركب لمزنَق .. بين صخور .. مستني إيه .. مستنّي نغرق ؟ و لاّ مستني الحانوتي ؟
مش حكايه .. الوصيّه ؟ أحمد الله العظيم .. ميراثي (كلمه)
كلمتي تاجي .. و تابوتي واللي راشقه ف كُلّ مللي من يقيني .. من بداية التهتهه ف طفولتي .. حتّى وقت موتي ليه ؟ لأنّي م البدايه شُفت (فيديو) اللحظه ديّا شُفت كُلّ الناس و هيّا جوّه خندق ...
وانت ماسك شوبّ ( نسكافيه) مِحندَق .. والإدين ترجُف .. تدلدق ع (القضيّه) و انت بتقزقز في (بُندق) من عظام شُبّان نقاوه .. من زمان (فردوسي) جايّه شايله ف إديها اليمين من مصر روحها و الشمال : فيها الوصيّه
اللي شدّوك م ( التقاعُد) و لا شلّوت (العريس) قصدي : ( الوريث) بيطوّحك .. من صقور الكِتف ..و سيوفُه ... لخيّه للكراسي ( السُلطانيّه) .. كانوا شايفينك نبيل .. زيّ المُهنّد عمرهُم لحظه ماشكّوا تو ما تقعد زيّ ( أسلافك) هتلزَق
مسرحيّه بارده جِدّاً و انت مُخرج و انت مُنتج كُلّ خيط ف إديك بينهج و العرايس .. ؟ من خشب على (صوص) معصّج !! مين هياكُل ف النهايه طبخه حامضه .. غيرنا بعقولنا الذكيّه
و المعاهده م البدايه واضحه جِدّاً (زيتنا في دقيقنا ) و لكن : زيتنا صَنّن و اللي كان و الأرض بور بذره .. و نور
مسجون يا صَهيَنْ و اللي سلّم ضهرُه ليهم عمرُه كان ساتر مخبّيهم ..
و فيهم عينُه ... أو أيامُه ضاعوا .. أو دراعُه ع البيبان .. خبّط بيهرب من رصاص الأمن و لاّ البلطجيّه سكتت الأصوات شويّه بعدّها زيّ الكورال قالت : ( يحنّنْ) ....
في الضلام راجع بيعرج .. ديك نطوح و الحاجات تصرُخ يا (لوح) .. روح ( لمالطه) فيها أدّن ..
ضمّ عودُه .. و اللي فاضل من وعودُه .. ف شنطِتُه و حلمُه الملوّن لفُّه في ( التويفل) وقف لحظه في الأوراق يدوّن و اتسند على حيطه مايله من بُناها و هيّ آيله للسقوط حجارتها : (ملبن) إسمها ( الشّعب ) .. المُعلِّم .. اتسند ... و قعد يدندن ..
" شعب ( أونو) " يا شعب ( أونو) م البدايه و انتَ ( بونو) و احنا شِلّه (بانجاويّه) بينادونا : ثورجيّه .. و القضيّه ..
ما فيش قضيّه
إنت فاهم مِنّا أحسن ...
كُلّ حاجه : قاريها ( غيباً) باللُغات .. أموات ... و حَيّه .. إنت (بونو) و احنا ( نونو) و اللي قال عنّك : ( مُعلِّم) مش باقول في القوله نافِق بالأمانه إمّا عاشق لك .. يا إمّا ... كان مبرشِم .. ربّنا وحدُه اللي يعلَم ..
إنت طلسم .. زيّ ألغاز الفراعنَه ..
إنت بلسم و لاّ لعنه .. ..
ربّنا وحدُه اللي يعلم
جنب أيّامك بتقعد عين بتبكي .. و عين بترقُد و اللسان شغّال بيشكي إيد ماددها ... و توب مهربِد
كُلّ كون الله مخاصمك كُلّ شيء في الدنيا ظالمك م البعوضه .. للمَجرّه .. كُلّ شيء عامل مؤامره ..
واللي يسخن لك في مرّه عند أوّل زغره م الكرباج تبيعُه لا العنين تبكي .. عليه أو تحسّ ف ثانيه حسره
كلب حيّ تكون .. و لكن سبع ميّت ... إستحالَه !! هيّا فارقه معاك نداله النداله تروح بحجّه .. و لاّ عُمره .. يا بو شال ابيض على جلابيّه صفره يا بن ( خضرَه)
إبن مين في (مصر ) أنتَ ؟ إبن (خوفو) و لاّ خوفك ؟ إبن ( أحمس) ؟ قول لي بس ف مين أشوفك ؟ إبن ( مينا) و لاّ ( مرقُص ) ؟ و لاّ ضِلّ ( لعمرو ) حتّى ... نفسي أعرف إيه ظروفَك ؟
