الأقوال المستباحة في النقد والصراحة

إلي رئيس الوزراء الدكتور عصام شرف
علي رأي خالتي سيدة
إذا كان أمن الدولة
حصل فيه كل ده..!!!
يبقي كويس قوي ياخويا
إن البلد اتسرقت بالشكل ده..!!!
إلي المشير طنطاوي القائد الأعلي للقوات المسلحة
بيقولك المعلم أبوسمرة
إللي ساكن في غمرة
مدام فيه مؤامرة ع الثورة
كان لازم من الأول نبين للحرامية
والبلطجية العين الحمرة..!!
إلي الإعلامي توفيق عكاشة صحب قناة الفراعين
اللي حصل حصل
وبيقولوا في المثل
بوس الأيادي
ضحك ع الزبون.!!
لا يشفع في مجلس
ولا ينفع في تليفزيون..!!
إلي شاعر الشعب بيرم التونسي
لو كنت عايش يا عمنا
وشفت ثورة الشباب
وعزيمة الرجالة
والفساد.. والخراب..!!
والخيانة والندالة..!!
كنت قلت قواله..!!
إلي عبداللطيف المناوي رئيس قطاع الأخبار بالتليفزيون
علي رأي محمد عبدالمطلب
ودع هواك وانساه وانساني
عمر إللي فات ما حيرجع تاني..!!
إلي سيف الإسلام القذافي
ما تسمعش كلام إللي بيشجعوك
وفي الزعامة بيطمعوك
حتي لو كان القذافي أبوك..!
وإن مكنتش مصدقني
خدلك عبرة من إللي سبقوك!!
إلي جمل موقعة الجمل ميدان التحرير
مين اللي قالك روح الميدان
ياحضرة الجمل..
وعملت إللي اتعمل..
هل هوّه م الإخوان
واللا ّم الحزب إللي كان
واللاّ من حزب العمل.. انطق يا جمل..؟..!!
إلي الصحفي الكبير الأستاذ سليمان جودة
عطشان يابو جودة
وجايين لك فرحانين
والميه في التلاجة
واحنا شرقانين..!!
ده مفيش في الدنيا ميه..
بتفوت علي عطشانين..!!
إلي المستشار جودت الملط
رئيس الجهاز المركزي للمحاسبات
بيقولك الحاج عبدالتواب
إللي يحاسب الحيتان والذئاب
ويحاسب خفافيش الخراب
يدخل الجنة يوم القيامة
من غير حساب..!!
إلي الإعلامي تامر أمين
بيقولك سعيد ابن البلد
الأمين ابن الأمين
يفضل أمين إلي الأبد
كلام صريح
بلسان فصيح ويعتمد
بأن هذا الشبل..
من ذاك الأسد..!!
إلي الموسيقار د. جمال سلامة نقيب الموسيقيين بالنيابة
إللي عايز ربنا يكفيه
شر الديابة
يعمّر الخرابة..!!
ويخللي باله من النقابة
علشان خاطر الأرامل والغلابة..!!
إلي الدكتور محمد البرادعي مرشح الرئاسة
عايز أقولك
واللاّ أقولك
مش حقولك؟..!
م انت عارف قصدي إيه
من غير م أقولك..؟
إلي مبني ماسبيرو
منبر التنوير..!!
إللي يتعرض للنهب والتزوير..!!
وبعلم رئيس الاتحاد والوزير..!!
بعد ثورة التحرير
ربنا حيعوض صبرنا خير..!!
إلي الموسيقار محمد عبدالوهاب
إلي الآن فنك موجود
في كل مكان
وعلي كل لسان
وماركة مسجلة
وممنوع من النسيان
إلي السيدة سوزان مبارك الهانم سابقا
قالوا زمان في الودع
ما طار طير وارتفع
إلا كما طار وقع..!!