لمبه حمرا

قديماً قالت لي أمي: إن جالك الغصب أعمله بجميله . يعني لو حاجه هتعملها غصب عنك يبقي تكبر دماغك وتعملها بمزاجك أحسن وتبقي كأنك عملت جميل جامد جداً يتحسب لك بدل ما يتحسب عليك، مثلاً لو أخوك الكبير عايز يلبس قميصك الجديد وانت عارف كويس قوي أنه هيلبسه يعني هيلبسه ، مهما أنت أعترضت ولا حتي خبطت دماغك في الحيطه، يبقي في الحاله دي تروح لأخوك وانت شايل قميصك علي إيدك وتقوله أتفضل، أنت أخويا وانت الكبير والقميص ما يحلاش إلا إذا لبسته أنت الأول، وبكده اللي كنت هتعمله غصب عنك تبقي عملته بمزاجك وتبقي جاملت أخوك الكبير وكسبته في صفك ووفرت عليه وعلي نفسك وعلي القميص المشاكل والبهدله. هذه المقولة التي أهدتها لي أمي بالأمس ، أهديها اليوم للسيد عمر سليمان.