قال أدمن الصفحة المسربة لامتحانات الثانوية العامة، إن الهدف من تسريب الامتحانات هو مساعدة الطلاب وأهاليهم، موضحًا: «الطلاب وأهاليهم بيتعبوا طول السنة وإحنا لازم نساعدهم»، على حد تعبيره.

وأوضح أدمن الصفحة، في مداخلة هاتفية لبرنامج «مساء جديد»، الذي يعرض على فضائية «التحرير»، إن الصفحة لا تساعد على الغش، وموقفها سليم، قائلا: «إحنا مش بنسرق الامتحانات، والطلاب هما اللي بيصوروها داخل اللجنة، وينزلوها على الهاشتاج وبعض المدرسين بينزلوا الحلول على الهاشتاج وإحنا بنزلها على الصفحة»، حسب قوله.

وأشار إلى أن الصفحة لا تؤذي الطلاب المتفوقين، قائلا: «إحنا ملناش دعوة بالطالب المذاكر، إحنا بس بنساعد الطالب اللي محتاج درجة أو درجتين»، على حد تعبيره.

وردًا على مطالبة الإعلامي جمال عنايت له بإغلاق الصفحة، قال إنه لا يستطيع أن يتخذ هذا القرار بمفرده، قائلا: «أنا معايا فريق عمل كبير في الصفحة، وده مش قراري أنا لوحدي»، على حد قوله.

ورفض الأدمن ذكر اسمه، موضحا أنه طالب في المرحلة الثانوية، وكل هدفه مساعدة الطلاب، على حد تعبيره.

وبدوره أعرب الدكتور محمود أبو النصر وزير التربية والتعليم، عن حزنه؛ بسبب عدم استيعاب الطالب للجريمة التي يقوم بها، قائلا: «الأدمن مش فاهم إن دي جريمة، وأنا حزين جدا إن طالب في المرحلة الثانوية مش فاهم ده»، وفقًا لوصفه.

وتابع: «أنا جالي تعب نفسي مش بسبب الامتحانات أو الغش أو الكلام ده، لكن بسبب الكلمتين اللي الطالب ده قالهم دلوقتي، وأنا هاخد الإجراءات القانونية اللازمة بس مش هعلن عنها دلوقتي»، على حد قوله.