مع اقتراب موعد امتحانات الثانوية العامة.. غضب بين الطلاب بسبب ترتيب الجدول.. ويردون على الأهالى: "كل حاجة بالخناق إلا المذاكرة بالاتفاق".. ويؤكدون:أول يوم امتحان ده حمادة واللى بعده حمادة تانى خالص

مع اقتراب امتحانات الثانوية العامة والذى يمثل كابوسا لجميع الطلاب فى المرحلة الثانوية، دشن عدد من النشطاء بموقع التواصل الاجتماعى "تويتر" هاشتاج يحمل اسم "الثانوية العامة" وذلك لرصد أهم أجواء وتقوس ما قبل الامتحانات.
وتبادل الطلاب بعض المقولات والصور المضحكة والعبارات الساخرة للتعبير عن خوفهم من اقتراب مواعيد الامتحانات، فيما تبادل آخرون بعض المواقف والذكريات التى حدثت لهم أثناء الامتحانات، كما تبادلوا بعض النصائح للطلاب الجدد فى الثانوية العامة.
وأعرب النشطاء عن خوفهم من اقتراب مواعيد الامتحان مستخدمين الأسلوب الساخر، قائلين "الشكوى لغير الله مذلة بس الامتحانات قربت ومذكرتش"، "نفسى أشوف اللى بيحط الامتحانات بتاعة الثانوية العامة عشان أقوله كلمة واحدة بس حسبى الله ونعم الوكيل"، "الواحد أول ما بيشوف ورقة الامتحان بيحس إنه خلاص مش قادر يتنفس"، "أول ما بسمع أن النتيجة طلعت بعمل نفسى ميت يمكن محدش يهزقنى".
بينما قام بعض الطلاب باحتساب الوقت المتبقى على قدوم الامتحانات، قائلين "باقى من الزمن أقل من 50 يوما"، "كل ما افتكر إن الامتحان قرب بحس إنى مش على بعضى"، "خلاص باقى أقل من 50 يوم ونتبهدل فى الامتحانات والمذكرة".
وتبادل الطلاب بعض المواقف والذكريات فى أوقات الامتحانات، قائلين "أول يوم فى الامتحانات ده حمادة.. واللى هيحصل فينا بعد الامتحانات. حمادة تانى خالص"، "الواحد قبل ما يجى الامتحان بيفضل يلطم على اللى هايحصل فيه بعد الامتحان وأول ما الامتحان يتخلص يفضل يلطم أكتر من الأول عشان النتيجة"، "أنا بمسك الورقة من هنا وبنزل ضحك من هنا على خبتى طبعا".
وتساءل بعض الطلاب عن أسباب تأجيل المذاكرة قبل الامتحانات قائلين: "هو ليه الواحد مبيذاكرش غير على الوقت الضائع وفى الآخر نرجع نزعل من النتيجة ما احنا اللى فضلنا نلعب"، "طول ما هاتفضل تقول هابدأ بكره وهاذاكر بكره، بكره مش هاييجى بأمان, نصيحة حلوة هاعمل بيها من بكرة".
وتبادل الطلاب عدد من المقولات المضحكة والعبارات الساخرة، معربين خوفهم من اقتراب الامتحان، قائلين "لو لقيت حد جى بيطمنك وبيقولك لسه فى وقت وذاكر اقتله بسرعة عشان ده عفريت وجاى يلبسك"، "وفجأة أتزنقنا زنقة سودة أول ما عرفنا موعيد الامتحانات"، "لسه بحلم بالامتحان لغاية دلوقتى وبصحى بجرى فى الشقة أيام سودا ربنا ما يعودها"، "الكيمياء هتموتنى ناقص عمر أمته هاخلص منها بقا".
بينما أبدى بعض الطلاب استيائهم من جداول الامتحانات، موضحين بأن ترتيب المواد يأتى دون تنسيق، قائلين "جدول الامتحانات دة لا يتحمله بشر ولا بنى آدمين"، "تملى جداول الامتحانات بتيجى غريبة والمواد مبتكنش منظمة بيجيبوا كل المواد الصعبة مرة وحدة"، "جدول الامتحانات بتاع الثانوية العامة أول ما بشوفه بدخل فى غيبوبة وأخرج منها أدخل فى حالة ذهول عميق مفقش غير آخر يوم فى الامتحانات"، "يا أنا مش عارف من غير جدول الامتحانات الزفت ده كنت هصيف إزاى يعنى أول يوم جبر..وتانى يوم إنجليزى..الغوث الغوث".
وتابع الطلاب سخرياتهم قائلين "يعنى كل حاجة بالخناق إلا المذاكرة بالاتفاق"، "أنا بعرف العيال بتوع ثانوية عامة وهما ماشين ف الشارع والله بلاقيهم مشيين ووشهم فى الأرض، متعاطفة معاكوا جدا، كلها كام سنة وتخلصوا من قرف الامتحانات".