اختراق

عمرو الليثى : بسم الله الرحمن الرحيم مساء الخير الملكة نازلى أمضت 17 عاما من حياتها سجينة زواجها بالملك فؤاد وعرفت معنى الاستقرار خلال أقل من 4 سنوات بعد زواجها من أحمد حسنين باشا رئيس الديوان الملكى غيرأنها أمضت 32 عاما من حياتها فى الغربة تسير وراء غرائزها وعواطفها بعد الفاصل ماذا حدث فى حياة الملكة نازلى بعد خروجها من مصر فى عام 1946
فاصل
عمرو الليثى : فى صيف عام 1946 بدأت نازلى رحلة الخروج على المألوف بعد وفاة أحمد حسنين باشا وغادرت مصر بعد أن جمعت أموالها فى سرية تامة وسمح لها الملك فاروق بالسفر للخارج للعلاج من آلام الكلى واصطحبت معها ابنتيها فائقة وفتحية وفى مارسيليا كان اللقاء الأول الذى جمعهما برياض غالى أمين المحفوظات فى قنصليتنا هناك فقلب حياتهم رأسا على عقب كما يقولون
فاصل
د / لطيفة سالم : لما سافرت نازلى خدت بناتها سنة 46 كانت مسافرة للعلاج لإن هى كانت مريضة بالكلى كانت الكلى عاملة لها مشاكل كثيرة قوى لدرجة إن الدكاترة فى مصر قالوا إنها مش هتعيش كثير يعنى فنصحوها إن هى تسافر للخارج وخصوصا هى سافرت بعد ما فقدت أحمد حسنين اللى هو كان بالنسبة لها شئ كبير قوى
راوية راشد : وفاروق بناء على إلحاح من الأطباء المصريين سافرت إلى سويسرا ومن سويسرا إلى مارسيليا إلى فرنسا هى سافرت معاها البنتين وأخدت أكبر قدر ممكن من الفلوس والمجوهرات لأنها كانت عارفة إنها مش عايزة ترجع وعارفة إن فاروق الملك فاروق إن عاجلا أو آجلا هيمنع عنها المخصصات أو لو عرف إنها مش هترجع
د / لطيفة سالم : هناك تصادف إن كان فيه حد من القنصلية المصرية فى مارسيليا كان إسمه رياض غالى وهو شاب يعنى أقدر أقول عليه إيه يعنى هو ناصح ومتفتح أو واعى طبعا أبدىولاء بالطاعة والخدمة والمجاملات اللى فوق الحد بالنسبة للملكة والبنتين اللى معاها
راوية راشد : لما فاروق سحب الحاشية إضطرت الملكة نازلى إنها تجيب ناس ومنهم رياض غالى تعتمد عليه ما هى ما عندهاش حيلة أخرى وبالتالى فتحت الباب أو الأحداث تداعت ففتحت الباب بصراحة باب جهنم على بنتها
فاصل تقريرى
أميمة إبراهيم : رياض غالى من مواليد شبرا فى عام 1919 درس حتى مرحلة الابتدائية فقط غير أنه تمكن من الالتحاق بوظيفة إدارية بالسلك الدبلوماسى تزوج فتحية فؤاد شقيقة الملك فاروق بعد أن تعرف عليها فى رحلة علاج الملكة نازلى فى حدث هز أرجاء العرش والأسرة المالكة وظل حديث الساعة لسنوات
أ / صلاح عيسى : رياض غالى فى الواقع شخصية يعنى تتميز بمجموعة من المزايا اللى كانت ممكن أن تؤهله أن يلعب الدورالذى لعبه فى بلاط الملكة نازلى لما تركت مصر فى عام 1946 ومكثت عدة شهور تتنقل بين عدة دول أوروبية قبل أن تستقر بعد ذلك فى الولايات المتحدة الأمريكية هو فى الحقيقة شاب كان ينتمى للجيل بنسميه جيل ما بين الثورتين والده كان من المتعاطفين مع الوفد وده اللى مكنه بعد تخرجه بفترة من إن هو يلتحق بوزارة الخارجية هى وزارة الخارجية ودته سكرتير ثالث فى الكونغو فلم تعجبه الحياة هناك فهو فكر فى إن هو يستقيل من عمله إلى أن أرسل إلى مارسيليا
د / عاصم الدسوقى : هو كان راجل ملحق دبلوماسى سكرتير أول سكرتير ثالث وهى أول درجة فى نظام الملحقين الدبلوماسيين فده معنى السكرتير الثالث ده السفارة خلته مسئول عنهم فى أول رحلة فلما اتعامل معاهم كويس وبيزور والكلام من ده فخدته معاهم لما هو كان فى إيطاليا خدته معاها إلى باريس
راوية راشد : لما الملك فاروق شدد الرقابة على الملكة نازلى وسحب بعض المقربين لها من الحاشية الملكية ما كانش أدامها حل لقت ده بيجيب وبيودى هو طبعا شاطر وذكى ولجئت بقى الحاشية اللى موجودة القلة القليلة من الحاشية يعنى مش واخدين بالهم منها فكانت بتجيبه سرا يروح يعمل لها بعض الأشياء الخاصة ممكن يكون بيسحب فلوس من البنك ممكن سرا بياخد البنات يفسحهم يشترى لهم حاجة الموضوع كان بمنتهى البساطة كده ولهذا قدر يكسب ثقتها
فاصل
عمرو الليثى : أمضت الملكة نازلى 10 أشهر فى فرنسا تتردد على عيادات الأطباء للعلاج فى الوقت الذى تخلت فيه تماما عن القيود الملكية كانت التقاريرالواردة للقصر الملكى فى مصر تحمل أنباء منها التصاق الملكة الأم برياض غالى دون أى كلفة وأنه أصبح أهم شخصية فى الحاشية الملكية .
أ / صلاح عيسى : بعد فترة من الزمن بدأت السفارة المصرية فى بون وهى عاصمة سويسرا فى ذلك الحين تعترض على سفر رياض المستمر على وجوده تطالب بعودته مرة أخرى إلى عمله فى قنصلية مارسيليا الملكة نازلى تمسكت به وأصرت على إنه يظل فى خدمتها و إنها لا تستغنى عنه وده بقى عامل زى الأرنبة بيتغير الخادم الذى يشعر السادة بأنهم لا يستطيعون الاستغناء عنه ودى كانت النقطة الأخرى التى تسلل منها رياض غالى إلى نفس الملكة نازلى فبالتالى أصرت على أن يبقى وبعد ذلك فى مرحلة متقدمة لما بدأت تقارير كاذبة ترد إلى السرايا بأنه على علاقة بالملكة وإنه بيخرج معاها وبيرقص معاها فى الأماكن العامة وإلى آخره فقررت وزارة الخارجية من باب الضغط عليه أن تفصله من عمله ففصلته فعلا من عمله فى الوقت ده وكانت النتيجة إن الملكة نازلى عينته فى وظيفة مضحكة جدا فى ذلك الحين وهو المستشار السياسى لجلالة الملكة
راوية راشد : فى الوقت ده الملك فاروق سحب الحاشية كاملة لما جاءت له تقارير أن هناك اقتراب عاطفى بين الأميرة فتحية وبين رياض غالى وبدأ سلسلة من العنف والعنف المضاد بين الملك فاروق هنا والملكة نازلى هناك
فاصل
عمروالليثى : فشلت كل محاولات الضغط على الملكة الأم لإقناعها بالعودة إلى القاهرة وإمعانا فى التحدى سافرت الملكة إلى أمريكا وبدأ التجريح العلنى بين الأم نازلى والإبن فاروق حتى أن نازلى قالت لو أنها خيرت بين صداقتها لرياض غالى وبين ابنها الملك فاروق لاختارت رياض غالى
راوية راشد : كان الملك فاروق متصور إنها هيبعتها فرنسا فالدكاترة هيقولوا لها مفيش أمل فهترجع وتموت فى مصر وخلاص وتنتهى القصة لكن إصرارها على الحياة وسفرها بالبنات إلى الولايات المتحدة يعنى أثار حفيزة الملك فاروق خاصة وإن هو كان حاطط عليها بعض الجواسيس والمراقبين وبعدين سحب الحاشية منها وهى فى باريس ورفض إن هو يعنى يدعمها وما كانش بيتصل بها يعنى كان بيكتفى إنه كان بيسمع التقارير الطبية من الأطباء ده حز فى نفسها قوى وده خلاها تتصرف بردود أفعال عنيفة
أ / صلاح عيسى : الملك فاروق كان يقدس والده الملك فؤاد ويحترمه احتراما بالغا ويجل ذكراه وربما إشكالية العلاقات المتعددة التى قامت بها الملكة نازلى ثم زواجها من أحمد حسنين عملت له نوع من الإشكالية النفسية فيما أظن أنا فيه فبدأ تحولت هذه إلى كراهية شديدة جدا لوالدته يعنى التى خانت ذكرى والده فدخل معها فى عناد وفى وسط هذه العملية كان رياض غالى يتصرف مع الملكة نازلى بمشاعر الإبن المخلص الودود الذى يسعى إلى إرضائها بأقصى درجة يصور لها أنه يبذل كل جهده من أجل راحتها وسعادتها هى والأميرتين الصغيرتين فطبعا من هذه الزاوية تسلل رياض غالى إلى نفس الملكة وفى الواقع حل محل الإبن العاق ولكن الثنائية التى تفكر بها نازلى الإبن العاق والإبن الوفى
راوية راشد : لما راحت أمريكا أصرت على انتقاله معها وعينته سكرتير خاص احنا بنتكلم على يعنى هى عندها سلطة تعيينه برجع أقول إنها صاحبة جلالة بمرسوم ملكى وبالتالى لها أوامر ملكية وأصدرت أمر بإنه يسافر معاها الولايات المتحدة وأصدرت أمر أن يكون سكرتيرها الخاص وده أزعج الحاشية وأزعج الملك فاروق لكن ما كانش فاهم طب هى ليه مصرة على ده سيبوه خلوه يروح دون أن يدرى أنه الذئب الذى يعنى يدخلها حديقة الطيور يعنى زى ما بنقول انت بتحط ذئب فى وسط دواجن ألفية وبدأت المأساة بعد خروج الملكة نازلى من المارى كلينيك لإنها قعدت 3 شهور شبه فاقدة الوعى طبعا بتشوف البنات بس فإذن فيه بنتين صغيرين مع ناس ماهماش أهل ثقة
فاصل
عمروالليثى : كانت لجنة مصرية لتقصى الحقائق تتحدث فى تقاريرها عن الدور المريب الذى يلعبه رياض غالى مع الملكة نازلى وأنه يستنزف أموالها وأنه نصاب يحترف إغواء النساء العجائز دون أن تنبه هذه التقارير أن غالى يحاول أن يتسلل لقلب الأميرة الصغيرة فتحية ويتقرب من الملكة الأم نازلى
أ / صلاح عيسى : فتحية ولدت سنة 1938 حين غادرت مصر فى عام 1946 كان عندها 16 سنة كانت طفلة يعنى مراهقة صغيرة جدا وهى طبعا كانت أكثر بنات الملكة نازلى ارتباطا بها ، فتحية لما مات الملك فؤاد كانت عندها 6 سنين الملك فؤاد حتى لما بدأ يمرض لإنه بدأ يمرض فى 34 ولذلك هى البنت الوحيدة للملكة نازلى التى تمتعت نازلى بأمومتها بالفعل أصبحت تنام معها فى نفس الغرفة أصبحت تشرف عليها ارتخت يد الملك فؤاد الصلبة عن السلطة فى القصر وبالتالى أتيح لفتحية إن هى تتيح لنازلى أن تتمتع بأمومتها أكثر من أى إبن آخر أو بنت من بناتها وبالتالى كانت مرتبطة بأمها ارتباطا شديدا انتقل الإعجاب والتقدير والدهشة بالأبناء بما يسمى رياض غالى ده من الأم إلى البنتين وبالذات إلى فتحية التى بدأت تنظر إليه باعتباره شخص يعنى يفتح الأبواب المغلقة يحل جميع المشاكل التى تتصور هى إنها يصعب حلها فانتقل هذا إليها
د/ عاصم الدسوقى : هو دلوقتى مناسب لهم هو بيراعى مصالحهم وبعدين هو شاب وهى شابة يعنى وصلت الحكاية لاستلطاف فى هذا الوسط الضائع إنه يهمها إيه هى قالت إن ممكن إيه ما دام البنت مستلطفاه وممكن يتجوزها خلاص لما وصل برضه الخبر للملك فاروق فكان الاحتمال اللى كان باعته لها إزاى ده وهو مسيحى
فاصل
راوية راشد : الملك فاروق طبعا أزعجه هو مين ده شعر كأخ أكبر أن إخواته البنات راحوا ناحية إمرأة ماهياش حكيمة للدرجة الكافية وكان عاوز يرجعهم بأى طريقة سافرن للولايات المتحدة فى ذلك الوقت وحاول يعمل مباحثات وضغوط سياسية ضخمة وصل الأمر إلى إنه تم إيقاف جوازات السفر الدبلوماسية للملكة وبناتها ومحاولة انتقال الحكومة الأمريكية لترحيلهم ما هم خلاص ما عندهمش جوازات سفر يبقى لازم يترحلوا وتم إيقاف الفيزا بتاعتهم ولكن من خلال اتصالات الملكة نازلى بأعضاء الكونجرس الأمريكى أجلوا الترحيل علشان القانون بيقول لك اعمل التماس علشان توضح موقفك وفعلا جاكو فيتلى ده محامى شهير تقدم للمحكمة وعرض المسألة وأخد حق إقامة مؤقت مش اللجوء السياسى حق إقامة مؤقت للملكة نازلى
عمرو الليثى : رد فعل الملك فاروق كان إيه؟
راوية راشد : رد فعل الملكة نازلى أنها عجلت بالزواج
عمرو الليثى : فى سان فرانسيسكو فى الولايات المتحدة الأمريكية تزوج رياض غالى من الأميرة فتحية فى 25 مايو عام 1950 وقيل أنه أشهر إسلامه وجرت محاولات عديدة من جانب القصر الملكى لمنع هذا الزواج وأرسلت إليه نازلى قائلة إن عاطفة الأمومة لديها تفوق كل اعتبار وقالت نازلى وأنا لا يهمنى إلا أن تكون ابنتى سعيدة ولو مع شحات
أ / صلاح عيسى : كان موقف غريب جدا من الملك وده فى تقديرى أنا جزء من مشاعر الحب والكراهية التى كان يمارس بها علاقته بأمه الملكة نازلى ونوع من العناد مع الملكة نازلى وليس مع فتحية ولا رياض غالى لأنه أولا الأسرة المالكة المصرية ما كانتش من الأسر التى تؤمن بنقاء الدماء أو التحويل دون زواج أفرادها من أبناء الشعب والملكة نازلى نفسها ضربت مثال لذلك لإنها اتجوزت الملك فؤاد وهى إبنة من أبناء الشعب المصرى والدها كان مجرد مدير مديرية المنوفية فكان هو وافق على زواج فوقية من أفندى ولكن تعنت فى موضوع رياض غالى ليس لأنه أفندى ولكن الاعتراض الثانى كان لأنه قبطى
د / عاصم الدسوقى : قيل بقى إن هو أسلم مش تزوجها وهو مسيحى قيل إن هو أسلم وأسلم على يد شيخ مسجد فى سكراميتو ؛ سكراميتو دية يعنى زى مركز جنب كاليفورنيا ومليان يعنى فيه عدد من العرب عرب لبنان الشام يعنى اللى هم مهاجرين ده برضه من ضمن الكلام إن هى لم تتزوجه وهو مسيحى
د / لطيفة سالم : كانت فتحية الصغيرة كانت صغيرة جدا لسة اتعلقت بهذا الفؤاد وطبعا كان صعب إن هم يتجوزوا لخلاف الدين فهو أبدى إن هو يحول دينه ويعتنق الإسلام وفعلا لعب بالورقة دى كويس قوى وأنا بقول نعم وأنا متأكدة من هذه الكلمة لإن بعد فترة هو إتغير ساب الإسلام وبدأ هو قبطى أورثوكسى فراح عمل نفسه قبطى راح اعتنق المذهب الكاثوليكى
فاصل
عمرو الليثى : وصلت الأمور لطريق مسدود وإلى الملكة الأم نازلى والملك فاروق وبأمر من فاروق اجتمع مجلس البلاط الملكى ليصدر قرارته بالتفريق بين فتحية ورياض غالى وتجريدها من لقب أميرة لأنه اشترط عودتها إلى مصر وحرمان نازلى من لقب الملكة الأم ومنع الملكة من التصرف فى أموالها ووقف وصايتها على إبنتيها .
د / لطيفة سالم : الملك فاروق فى مصر لما عرف القصة الخاصة بالزواج ثار إلى أقصى درجة واجتمع حاجة يعنى الملك فؤاد لما اتأسست الملكية عمل نظام حاجة اسمها مجلس البلاط إيه مجلس البلاط ده الملك يكون رئيسه الروحى أويعنى المعنوى وبعدين أقدم أمير فى الأسرة المالكة يبقى رئيس هذا المجلس ، المجلس ده يتكون من مين يتكون من شيخ الأزهر ومفتى الديار المصرية ورئيس مجلس الشيوخ والمستشار أكبر مستشار رئيس محكمة الاستئناف وبعض الشخصيات اللى هى هامة جدا علشان حتى اختصاصه إن هو يحكم فى الأحوال الشخصية الخاصة بالأمراء والنبيلات والنبلاء طبعا
أ / صلاح عيسى : فلما جاء هيكل باشا كان رئيس مجلس الشيوخ عشان يتولى رئاسة مجلس البلاط مجلس البلاط ده كان أشبه بمحكمة للأسرة المالكة تحكم فى قضايا الأحوال الشخصية فلما جاء هيكل يرؤس مجلس البلاط وده قانون مجلس البلاط إن يرؤسه رئيس مجلس الشيوخ أو أحد أمراء الأسرة المالكة رفض وقال له انت يا موالاى تضعنى فى موضع لأؤيد يعنى عقوق إبن لأمه واللى أنا بنصح جلالتك إنك تقبل هذا الزواج وتقبل زواج هذا الفتى كما فعل شاه إيران وأن ندعو الملكة وندعو الأميرة وندعو زوجها وندعو غيرها لكى يعودوا إلى مصر جميعا بدلا من أن نصتنع ضجة ستغوص بالعرش و تسيئ إليه وفى نفس الوقت هذه أمك وهؤلاء أخواتك وهذا التصرف معهم حتى لو صح أن هذا الشاب شاب سيئ فأنت بذلك تلقى بهم بين براثنه فأنا لا أوافق على إن أنا أرؤس مجلس البلاط فى هذا وفعلا الملك فاروق سابه وقال أياميها هاتوا الأمير محمد على وهو ما كانش بيحبه الأمير محمد على ابن الخديوى توفيق وده كان ابن عمه وكان ولى العهد فى ذلك الحين لأنه لم يكن قد رزق بأولاد قال هاتوا الأمير محمد على نار الفرنسى محمد على ولا جنة الكاتب
راوية راشد : رد فعل الملك فاروق كان عنيف جدا ولا أحد يعلم كان لماذا هذا العنف
عمرو الليثى : عمل إيه؟
راوية راشد : ما هو مجلس البلاط اجتمع برئاسة الأمير محمد على وتم خلع الألقاب والتفريق بين الأميرة فتحية وزوجها رياض غالى ومصادرة جميع ممتلكات الأميرة فتحية والملكة نازلى ويعنى لما نرجع إلى الأحداث حضور شريف باشا صبرى أخو الملكة نازلى يعنى أجبر على الموافقة ويقال أنه بعدها هو بعدها بشهورقليلة أصيب بذبحة صدرية لأنه عار أن يتم خلع اللقب عن الملكة الأم
فاصل
د / عاصم الدسوقى : قرروا رفع الوصاية عن بناتها لإنها لاتصلح كأم يعنى وهى برة وما كانتش بتسأل
أ / صلاح عيسى : الملكة نازلى قالت هذا اللقب لا يهمنى فى شئ لأنه لم يجلب لى إلا التعاسة أدلت بتصريحات بكده وأنا لا أريد إلا سعادة إبنتى وطبعا كان لديها إحساس بإن كل ذلك كل تلك إجراءات من الممكن أن تكون مؤقتة من الممكن مع الوقت يتم العدول عنها يعنى لكن هى ما اهتمتش ولم يهددها ذلك ولم يدفعها لأن القرارات فى الأول كانت قرارات مشروطة بمعنى إن هى إذا لم تعد وتعمل كذا وكذا وكذا فستصدر هذه القرارات يعنى ده كان يشبه الإنذار وكان قد وجه لها إنذار قبل ذلك إن هذه الإجراءات العنيفة ستؤخذ ولكنها لم تهتز هى كانت قررت أنا لن أجلب التعاسة لابنتى
د / عاصم الدسوقى : فرضت على الملك فاروق أن يبارك زواج أخته ولكنه رفض إن هو كان معترض على الزواج ومجلس البلاط رفض الزواج ورفع الوصاية وقرر الحجر عليها فكل اللى طلبته كل ده يتم التراجع عنه فى سبيل بناتها ومع ذلك ما جاتش ولم يحدث أن تغير موقف الملك فاروق
فاصل
عمروالليثى : خلال سنوات قليلة بدأت حقيقة رياض غالى تظهر حتى انه طرد الأم وبناتها وأبنائه الثلاثة من بيته الذى قام برهنه بعد أن خسر رياض كل الأموال فى استثماراته الفاشلة فأعلنت نازلى إفلاسها فى عام 1974 وأقامت فى شقة متواضعة فى حى شعبى يسكنه الفقراء
د/ عاصم الدسوقى : فهنا بقى هى سلمت نفسها لرياض غالى بقى هو المسئول عن العيلة دى الحاجات اللى كانت معاها مجوهرات وكلام من ده اتباعت واشترت بيت واشترت بعض عقارات وبدأ هو يضارب فى البورصة والأموال دى
د/ لطيفة سالم : فتمكن إن هو ياخد توكيل من الملكة نازلى والتوكيل ده كان توكيل فى كل حاجة فهى فقدت مجوهراتها وفقدت أملاكها وفقدت كل شئ والدخول فى مشروعات فاشلة وفى الآخر ما بقاش حيلتهم أى حاجة القصر الكبيراللى كانوا عايشين فيه كانت شارياه الملكة نازلى ابتدوا يتحولوا إلى شقة صغيرة
أ / صلاح عيسى : هوكان عنده انتزاعات استثمارية منذ شبابه يعنى يتاجر ويبيع ويعمل فى المزارع فده أغراه طبعا الملكة نازلى كانت عايزة تعمل بلاط عملت بلاط ملوكى يعنى كانت محتفظة بلقبها شاله منها مش مهم محتفظة بلقبها كانت واخدة معاها لما سافرت سنة 46 مجوهراتها معاها مجوهرات كان له قيمة عالية جدا فكانت بتاخد طبعا إعانات من الروس ومن الأسرة المالكة وبالذات فى السعودية والأسرة المالكة الإيرانية لأن الشاه الإيرانى كان بيعتبر نفسه أنه ما زال صهرا لهذه الأسرة وعلى أساس إن الأميرة فوزية كانت أم بنته فهو ده غرضه كان عايز ياخد الأموال ويستثمرها
راوية راشد : فكانت مدية له توكيل توكيل خاص مش فى كل الممتلكات خاص بسحب أموال وتسديد فواتير أشار عليه أحد الأشخاص إنه بموجب التوكيل المالى اللى معاه يقدر يجيب فلوس إزاى فيه حاجة واحدة يملكها التوكيل ومجوهرات الملكة فى البنك بموجب هذا التوكيل تقدم إلى أحد البنوك الأمريكية البنك اللى موجود فيه المجوهرات بتاعت الملكة بطلب قرض
عمرو الليثى : بضمان المجوهرات؟
راوية راشد : بضمان المجوهرات وبموجب هذا التوكيل وخد الاثنين مليون دول وراح فكر يستثمر فى حقول بترول طبعا الفلوس طارت لأنه بعد كده اكتشف إن الشركة وهمية وإن المجموعة اللى حواليه دهية غررت به وضاع كل شئ ولما عرفوا وهم فى هاواى بالمصيبة اللى حصلت رجعوا على لوس أنجلوس الحقيقة الأميرة فتحية يعنى جاهدت بضراوة علشان تفصل ذمتها المالية عن ذمة رياض غالى وطبعا فى صلاحية هذا التوكيل لكن القانون الأميريكى زى أى قانون لا يحمى المغفلين لأن صلاحية التوكيل تمتد إلى الاقتراض فحكمت المحكمة بالتضامن بين الملكة نازلى وبين رياض غالى وبالتالى تم إشهار إفلاسها تم تحديد جلسة لبيع المجوهرات وبيع الممتلكات
فاصل
د / عاصم الدسوقى : فى 74 نتيجة المضاربات اللى كان شغال بها رياض غالى أفلست نازلى وأشهرت إفلاسها سنة 74 فيه قانون أمريكى يعنى إذا انت أعلنت إفلاسك الحكومة هتساعدك دى حاجات مأخوذة من النظام الرأسمالى زى كده ما حصل سنة 8 أزمة البورصة بتاعت سنة 8 الحكومة بتساعد ذوى النظام الرأسمالى عشان لا تسقط الرأسمالية بس الشرط إنك انت تعلن إنك انت أفلست يعنى فهى أشهرت إفلاسها استفادة من هذا القانون
أ / صلاح عيسى : بدأت الخسارة والخسارة دفعته للعب القمار لعب القمار دفعه لمزيد من الخسارة الاثنين دفعوه لإدمان الخمور فتحول من شاب رقيق كان بينحنى رقم 8 بين يدى جلالة الملكة يخاطبها باعتبارها جلالة الملكة يخاطب زوجته باعتبارها البرنسيس إلى شخص متوحش وبدأ يطيح فى الاثنين ضربا ويشتمهم وتحول إلى وحش
راوية راشد : فبدأ يتعامل معاهم بقى بطريقة وحشية ضاق به الخناق تحول إلى رجل مصرى عادى يعنى بكل عنفه وبكل ردود أفعاله وهنا هى طلبت الطلاق الأميرة فتحية طلبت الطلاق طلبت الطلاق سنة 65 ورفض ولم توفق لإن الطلاق بيتم من خلال محكمة وهو أدمن الخمر وزى ما تقول سلوكه بقى انجرف مع جماعات معينة هى غير راضية عنها زى أى زوجة بترفض إن زوجها يتعامل مع ناس معينة وده ولد نوع من العنف فى العلاقة فقررإنها تسيب لوس أنجلوس وتروح تعيش فى هاواى تاخد أمها وأولادها الثلاثة من وراه هربت وراحت هاواى عاشت 5 سنين فى هاواى وهو ما كانش بيشوف الأولاد شافهم مرة واحدةوالملكة رفضت إنه ييجى
فاصل
أ / صلاح عيسى : نتج بعد ذلك إنه لما حدثت هذه المشكلة لما حدثت مشاكل الخسارات المتوالية دية وبدأ يسوء فى المعاملة اضطرت الأميرة فتحية إنها تنزل تشتغل فى أعمال غير ملائمة يعنى نادل فى نايت كلاب جرسونة يعنى وحاجات من هذا النوع
راوية راشد : هى فضلت بأمها فى هذا البيت الصغير مع بنتها رانيا لإنها كانت صغيرة وقتها وهتعيش إزاى هتصرف إزاى فاضطرت للعمل الحقيقة ده مفيهش أى تشويه أنا معايا نص حوار للأميرة فوزية فى صحيفة لوس أنجلوس
عمرو الليثى : فوزية
راوية راشد : الأميرة فتحية فى صحيفة لوس أنجلوس بتاريخ 19 سبتمبر 1976 يعنى قبل مقتلها ب 3 أشهر
عمرو الليثى : قالت فيه إيه
راوية راشد : إسمح لى أقرأ الحوار after all effort between mss Ghaly and her husband said an when he stopped making support payment to her in 1972 she turned to dimes tic work to help support to family domes tic work بمعنى يعنى خادمة do at that time هى بتقول having no culling back rand she said إذن إحنا أمام إمرأة يعنى مش خجلانة إنها
عمرو الليثى : يعنى ما معناه إن هو بعد انفصالها وبعد ما توقف عن الانفاق عليها فاضطرت إن هى
راوية راشد : هو عمره ما أنفق عليها
عمرو الليثى : تعمل
راوية راشد : بس شوف
عمرو الليثى : domes tic أعتقد إن معناها خادمة
راوية راشد : domes tic يعنى خادمة
عمرو الليثى : هو المفهوم هنا إنها اشتغلت خادمة وللا اشتغلت فى شركة للنظافة يعنى هنا برضه التفسير مطلوب
رواية راشد : هى اشتغلت فى شركة للنظافة لإن فى أمريكا محدش كده بيخبط على الباب وينظف دى شركات والشركات دى بتتولى نظافة قصور ، نظافة أوتيل
عمرو الليثى : هى اشتغلت فى أى نوع من الشركات دى
راوية راشد : اشتغلت فى شركة من هذه الشركات وكانت الحقيقة بتشتغل فى الفترة الأولى هى اشتغلت 6 شهور بس فى أوتيل هيلتون فى بفرلى هيلز واشتغلت فى بعض القصور وتحت اسم مستعار محدش كان يعلم حتى أمها وبنتها ما كانوش يعلموا إنها بتشتغل هذه المهنة
عمرو الليثى : أنا عاوز أقول لك حاجة طبعا فى هذا الحوار هناك بعض أعضاء الأسرة المالكة شككوا فى أن الأميرة فتحية قد عملت خادمة وإن لازم الملك عشان يعمل تعقيب على ده
راوية راشد : هى عاملة حوار بصورتها ونشر ده كلامها قبل 3 شهور يعنى ده مش حد بيختلقه أو حد بيدعيه
فاصل
د / عاصم الدسوقى : الأمور فى نفس الساعة بتاعت 74 دى بقى اللى هى أشهرت إفلاسها نجحت فتحية فى الطلاق من رياض غالى
عمرو الليثى : حصلت فتحية على الطلاق من زوجها رياض غالى فى عام 1974 بعد انفصالها عنه منذ عام 1965 وفى عام 1975 بدأت أولى خطوات رحلة العودة إلى مصر حيث طلبت الأميرة فتحية من الدكتور لويس عوض أن يتوسط للرئيس السادات لإعادة جواز سفرها وعندما علم رياض غالى طلب منها زيارته للمرة الأخيرة لينتهى حلم العودة إلى مصر بعد إطلاقه الرصاص عليها وفى عام 1976 كانت أول محاولة انتحار لرياض غالى
أ / صلاح عيسى : رياض غالى كان فى ذلك الوقت فى أسوأ أحواله النفسية طبعا إفلاس مشاكل مع فتحية مشاكل مع الملكة نازلى إدمان للقمار الديانة يطاردونه وإلى آخره فجاءت حكاية وفاة والدته لكى تصيبه بحالة من الاكتئاب الحاد
راوية راشد : بعض الأصدقاء المصريين دعموا الأميرة فتحية فى الاتصال بالرئيس السادات أعتقد أنه الأستاذ الكاتب الكبير المرحوم الأستاذ لويس عوض تدخل ونقل رسالة شفهية للرئيس السادات والرئيس السادات أمر بعمل جوازات سفر مصرية من خلال القنصلية بتاعتنا فى سان فرانسيسكو وده كان الأمل الوحيد للخروج من الأزمة الطاحنة وبدأت تعمل اتصالات لإن الحل الوحيد هو العودة إلى مصر خاصة إن الملكة نازلى كانت أمنية حياتها وده نقلا عن شهود عيان إنها تدفن إلى جوار أبوها وأشقاءها فى مصر
عمرو الليثى : عبد الرحيم باشا صبرى وشريف باشا صبرى
راوية راشد : بالضبط فطبعا حصلت اتصالات واستطاعت الأميرة فتحية إن هى تحصل على جواز سفر مصرى لها ولأمها ولبنتها رانيا العلاقة بقى كانت بينها وبين رياض غالى كانت شبه متوقفة بعد هذه الحوادث الضارية مفيش شك طب هى ليه قالت له إنها راجعة مصر هى خدت الباسبورات والكلام ده كان فى أوائل ديسمبر وحجزت تذاكر طيران على مصر للطيران بتاريخ 15 يناير ده موثق إيه اللى خلاها تقول له كل ده رجل يائس ، رجل شايف إن هو أصبح حطام وأن المرأة التى أحبها خلاص مش هيبقى لها وجود فى الحياة معاه عمل جهود كبيرة قوى علشان يعنى
عمرو الليثى : ترجع عن هذا القرار؟
راوية راشد : ترجع عن هذا القرار وولادها قالوا لها قالوا لها ما تروحيلوش ده هو مش عايز إنك تسافرى مصر لأنه ما يعرفش حد غيرها وهى الوحيدة برضه اللى بتشفق عليه إلى أن جاء يوم 8 ديسمبر
أ / صلاح عيسى : اتصلت به قال لها تعالى لإن الحقائب بتاعت والدته كانت عنده فى شقته كان ساكن فى شقة عبارة عن صالة وأوضة والحقائب بتاعت والدته كانت موجودة هناك فقال لها تعالى هى كانت بتستعد إنها تسافر لمصر بعد عيد الميلاد قال لها تعالى عشان تاخدى الشنط توديها للأسرة فى مصر بقية إخواته وخالاته وإلى آخره فذهبت لكى تزوره
راوية راشد : وقال لها بالحرف الواحد ما تحطيش العربية أدام البناية اللى هو ساكن فيها خليها من الباب الخلفى عشان الحقيبة دى ثقيلة نقدر ننزلها على العربية على طول من ناحية الجراج تخطيط مرعب كلمها ساعتين فى التليفون وبنتها قالت لها ما تروحيش لكن هى راحت كان مستنيها بالمسدس وصلت بالضبط الساعة 7 ونص مساء يوم 8 ديسمبر 1978 وهو سامع خطوات رجلها وهى طالعة فتحت الباب كان قاعد فى الضلمة على كرسى جنب النافذة جنب الشباك ومعاه المسدس قبل ما تولع النور أو تتكلم معاه كان ضرب 5 رصاصات
فاصل
عبارة عن مشهد تمثيلى لمقتل الأميرة فتحية
راوية راشد : انتهت ماتت وحاول يقتل نفسه ما قدرش ما عرفش دراميا رجل قتل امرأة أحبها الاثنين حطموا بعض تصور إنه هيقتلها على طريقة روميو وجولييت وهيقتل نفسه بكى ، صرخ حس إن هو عمل مصيبة مش قادر يحلها فضل قاعد طول الوقت مش عارف يعمل حاجة
فاصل
أ / صلاح عيسى : وبعدين اختفت ساعة ساعتين ثلاثة أربعة خمسة ستة عشرة ما جاتش فبقت الملكة نازلى تتصل بالتليفون فأول مرة رد عليها رياض غالى وقال لها دى نزلت فلما ما جاتش فرجعوا ثانى يتصلوا به قال لها لا دى مش موجودة وبعد كده ما بدأش يرد على التليفون
راوية راشد : البنت قلقت على أمها راحت تدور عليها كانت الشنطة دى اللىفيها الهدوم موجودة وسمع بنته فتح الباب ما رضيش يدخلها فالبنت دخلت قالت له ماما ما جاتش وكده الساعة بقت 11 بالليل خايفة تكلم إخواتها فى سانتا مونيكا تقول لهم فجت تدور عليها كان هو بقى فتح الشنطة وحط كل الهدوم اللى فى الشنطة على جثتها فالبنت حاولت تدخل قال لها لا ده البيت فى حالة صعبة قالت له هى فين قال لها آه هى جاءت ومشيت علشان تجيب شنطة كبيرة تاخد الهدوم دى أقوال رانيا فى المحكمة بنتها فالبنت استغربت جدا إن أمها العربية مش واقفة تحت فرجعت فى الآخر الساعة واحدة بالليل اتصلت تقول لإخواتها إخواتها جاؤوا جرى من سانتا مونيكا
أ/ صلاح عيسى : إبنها الكبيرلما رجع الملكة نازلى كانت قلقة جدا فقالت له روح إسأل أبوك يعنى راحت فين فراح ما لقاش طلع فوق خبط سأل مدير البناية فقال له آه كان فيه واحدة ست كانت جاءت الصبح ومش عارف إيه خرجت وللا ما خرجتش قال له أنا ما أعرفش أنا الحقيقة ما كنتش بقعد كثير فممكن تكون خرجت وأنا ما كنتش موجود راح قعد يخبط على الباب محدش رد فقال يجوز اصطلحوا وخدوا بعض وسافروا على سويسرا ليتزلجوا على الجليد كما كانوا يحلموا ويعيدوا أيام العسل والحاجات دى وهو نازل هداه تفكيره إنه يلف من الشارع المجاور ففوجئ بعربية أمه واقفة فى العمارة حد نقلها من أدام باب العمارة إلى الخلف فرجع ثانى يخبط فاتفتح الباب لقى أبوه نايم فى الصالة كسر إزاز كده فى الشقة وفتح الباب ودخل لقاه نايم على الشيزلونج والدم عمال سايح منه وضارب نفسه برصاصة وجنبه إزازة فودكا فارغة دخلوا فى الأوضة بتاعت الشقة لقوها نايمة ما بين الكوميدينو والسرير والحيطة وفيه وشها كله يعنى طارت ملامحه وتبين بعد ذلك إنه أطلق عليها 3 رصاصات جاءت على وشها
راوية راشد : طبعا مشهد يعنى أنا ما أتصورش إن فيه أى كاتب مهما بلغ خياله ممكن يصور مشهد زى ده حاجة حصلت فى الحياة وحقيقية أم مقتولة أكثر من 12 ساعة وجثتها مغطاة بملابس قديمة وأب سمعوا طلقات الرصاص قبل ما يدخلوا عليه بينتحر طبعا مأساة
فاصل
عمرو الليثى : فى صباح الأربعاء 15 ديسمبر عام 1976 وبعد 6 أيام من مصرع الأميرة فتحية أقيم القداس على روحها فى كنيسة سان بول قبل يومين من عيد ميلادها ال46 وفى 11 إبريل كان رياض غالى عجوزا فى الستين ينزل من عربة السجن على كرسى متحرك لتحكم عليه المحكمة بالسجن لمدة تتراوح ما بين 5 سنوات و15 سنة وبعد 6 أسابيع من صدور الحكم ماتت الملكة نازلى فى أول يونيو عام 1978 ودفنت إلى جوار إبنتها بمدافن الكاثيوليك وبعد 3 سنوات مات رياض غالى فى السجن
د / عاصم الدسوقى : فيه روايات قالت محدش عارف مدى صحتها إنها حتى تهرب من هذه الضغوط وهذه الحقائق اعتنقت الكاثيوليكية دى برضه واحدة من الروايات اللى بتتقال ودفنت فى كاليفورنيا فى مقابر المسيحيين
عمرو الليثى : قيل أنها اعتنقت المسيحية قبل وفاتها؟
راوية راشد : مش قبل وفاتها هى لما نرجع لسنة 46 ، سنة 46 هى كانت على شفا الموت فقررت إنها لو نجت من عمليات الكلى اللى كانت بتعملها فى مايوكلينيك إنها هترجع لدين آباءها وأجدادها طبعا بتشير إلى إن جدها سليمان باشا الفرنساوى ده كاثيوليكى وفرنسى فهى تصورت إن هى زى النذور نذرت إنها لو نجت هتعتنق المسيحية
عمرو الليثى : الملكة نازلى عادت إلى المسيحية بعد عام 46؟
راوية راشد : بالضبط
عمرو الليثى : هل فيه وثائق تؤكد إنها تحولت إلى المسيحية؟
راوية راشد : فيه لانها أعلنت ده فى الصحف والمجلات وسمت نفسها حتى مكتوب كده she called herself Mary Elithabis ببساطة كانت بتقول أنا إسمى مارى إليزابيث وكانت بتقدم فى المجتمعات مسز إليزابيث مسز مارى إليزابيث ؛ مارى الملكة مارى إليزابيث أكبر ملكة فى التاريخ الانجليزى فحتى هى ضمت الإسمين دليل على إنها عايزة تبقى بقوة الملكتين مارى وإليزابيث
عمرو الليثى : لما توفيت الملكة نازلى دفنت فى مقابر المسلمين أم فى مقابر المسيحيين؟
راوية راشد : مفيش فى كالفير سيتى حاجة اسمها مقابر مسلمين دى سيتى
عمرو الليثى : الطقوس الدينية اللى تم اتباعها بعد كده يعنى هل صلوا عليها صلاة المسلمين وللا صلاة المسيحين؟
راوية راشد : لا صلاة المسيحيين لأن الأولاد مسيحيين لأن الأولاد اتربوا فى مجتمع مسيحى فى مجتمع أمريكى
عمرو الليثى : أولاد مين؟
راوية راشد : أولاد الأميرة فتحية
عمرو الليثى : وفتحية كانت مسلمة ولا مسيحية ؟
راوية راشد : ما هو الدين ده بينك وبين ربنا
عمرو الليثى : يعنى احنا قلنا إن رياض غالى أشهر إسلامه........
راوية راشد : لم يمارس لا طقوس مسيحية ولا طقوس إسلامية لكن ناس عايشين فى مجتمع أمريكى
عمرو الليثى : لكن فتحية هل كانت مسيحية ولا كانت .....؟
راوية راشد : لا الأميرة فتحية أميرة مسلمة
عمرو الليثى : لكن المعلومة المؤكدة أن .......
راوية راشد : الملكة نازلى فى نيويورك راحت فعلا الكنيسة الكاثيوليكية وأعلنت نفسها مارى إليزابيث ده موثق
فاصل
عمرو الليثى : يعتبرالبعض أن الملكة نازلى لعبت دورا كبيرا فى تخفيض شعبية الملك فاروق خاصة بعد خروجها من مصر عام 1946 وفى عام 1951 خرجت المظاهرات تقول من لا يستطيع أن يحكم أمه لا يستطيع أن يحكم أمة كانت هذه العبارات قاسية فى حق الملك فاروق ولكن بالتأكيد لعبت نازلى دورا كبيرا فى إنهاء عهد فاروق وتحطيمه نفسيا ومعنويا شكرا لكم وتابعونا فى حلقات قادمة إن شاء الله