كلام مسئول

محمد صلاح: يا مساء الخير غضبنا العشر ايام اللي فاتوا على عدم فوز مرشح مصر وزير الثقافة فاروق حسني بمنصب مدير عام اليونسكو سال حبر كتير عن سقوط ورقة التوت اللي كانت بتستر دعاة الحوار بين الحضارات والثقافات والجسر اللي حيبنية الغرب ولاّ الشمال مع الشرق والجنوب وبدل ما يبنيه هده
اتكلمنا عن المؤامرة والخيانة والقدارت اللوبي اليهودي والصهيونية العالمية على التحكم في اللي بيحصل في العالم وصول صوابعهم الطايلة الى كل شئ والى كل مكان لكن بعد تجفيف الدموع عايزين نذاكر محتاجين نفعهم نستوعب ونعيد التفكير في كل اللي جرى احنا كنا مش واخدين بالنا من الحقائق العملية على خريطة السياسة الدولية نسينا حركات اسرائيل وانصارها في العالم نفوذ امريكا على اوروبا والدول المتقدمة ودول في امريكا اللاتينية واسيا وافريقيا هو احنا كنا معملناش حساب البديهيات دي خالص يعني نسينا إن الوزير الثقافة فاروق حسني بنى شعبيته مع المثقفين المصريين والعرب باتخاذ نفس مواقفهم من التصدي للتطبيع الثقافي مع اسرائيل وعلى مدى 22 سنة معقولة اسرائيل هتصدقه باعتذار أو أسف في اللوموند ولاّ عد انه هيعاملها كمسئول دولي لما يدير اليونسكو عداء اسرائيل لفاروق حسني حتى لو مكانش اتكلم عن حرق كتب اسرائيلية بتهاجم الاسلام لو كانت موجودة في مصر اصلا كان عداء مضمون ده متعملش حسابه من ساعة مابدا حملة ترشيحه طب مقّدرناش كويس مش قوة المناوئين لينا وبس وانما قوة المرشحين المنافسين خصوصا الست البلغارية اللي كسبت وهي امراة وسط توجهات العالم كله بتمكين المراة وهي كمان جاية من الكتلة الشرقية سابقا يعني واللي عايز الغرب يدمجها كليا معاه ليه ما توقعناش فوزها زي ما كنا بنتمنى فوزنا عملنا ايه اتصرفنا ازاي عشان نتفادى الثلاثاء الحزين في باريس طبعا دا مش معناه ان احنا ننكر الرسالة الواضحة والطبخة المسمومة اللي كانت بتتحضر من البداية وشدوا فيها حيلهم قوي لما فاروق حسني بان كمنافس قوي مش رايح ياخد صفر زي صفر المونديال دا كان رايح يكسب وراه مصر بكل ثقلها حصل افتراءات تشويه كذب اتقال معادي للسامية بيمارس الرقابة على الابداع حكاية ممارسة الرقابة على الابداع دي اخر تهمة ممكن نحطها قدام فاروق حسني عموما جرى اللي جرى لكن من المؤكد ان فاروق حسني خاض المعركة بشرف ونافس بقوة اسرار 22 يوم في باريس جوه وحوالين مقر اليونسكو هيكون لينا عنها كلام .... مسئول
فاصل
محمد صلاح: مش هنقول تاني بقى الانتخابات في اليونسكو كانت مُسيسة ما السياسة بتلعب في كل حاجة إحنا كمان رحنا لمنطقتنا المفضلة في العالم العربي اللي قرر ان فاروق حسني هو مرشح العرب هما وزراء الخارجية العرب في اجتماعهم بنيويورك واللي قرر انه مرشح افريقيا هما وزراء خارجية الاتحاد الافريقي في اجتماعهم في سرت في ليبيا لكن حملة فاروق حسني واجهت حاجات كتير جنب التسييس لعب ، حركات ، حملات مضادة ، تربيطات لها ريحة .. الحملة المصرية لترشيح فاروق حسني عملت ايه واتصرفت ازاي لحد اخر لحظة مستشار وزير الثقافة مُنسق حملة مصر في انتخابات اليونسكو الأستاذ حسام نصار هيكون لينا معاه دلوقت حالا كلام ...... مسئول
ومن كلام الأستاذ حسام نصار
هزيمة فاروق حسني في الانتخابات تعود إلى تحالف دول كبرى أرادت ألا يتولى المنصب كنا أمام معركة غير متكافئة ولكننا خضناها بشرف وقوة منذ البداية وحتى النهاية
ما حدث في انتخابات اليونسكو كان اكبر منا بكثير وخضنا حربا غير متكافئة فقد حاول فاروق حسني أن يقيم حوارا للحضارات باختياره كممثل الجنوب لإدارة المنظمة المعنية بخلق السلام في عقول البشر ولكن للأسف الدول العظمى رفضت ذلك ولم تتقبله
دول الجنوب لا تمتلك للأسف قرارها بسبب ضغوط سياسية ووعود اقتصادية والانتخابات شهدت انقساما شديدا داخل المنظمة بين دول تنادي بالحوار وتتشدق به وتفعل عكسه على ارض الواقع
الدول العظمى التي تمتلك الموارد والدول التي لا تمتلك مواردها هي التي حسمت المعركة لغير صالح فاروق حسني
نتيجة الانتخابات ستكون درسا عمليا لكل الأطراف التي تنادي بالحوار بين الشمال والجنوب ودول حوض البحر الأبيض المتوسط في جانبه الأوربي وقفت مع مرشح مصر موقفا مشرفا
حملة المرشح المصري فاروق حسني نجحت في إبقاء فُرصه حتى اللحظة الاخيرة خدت دعم البلد كلها بداية من الرئيس حسني مبارك حتى اعداء الوزير في الداخل اللي قفزوا على خلافاتهم معاه هما رجعوا تاني قلبوا عليه تاني بعد انتهاء الانتخابات دا موضوع تاني لكن العشرة الاخرانية مسيرة الانتخابات مجاتش معانا ..معلش يازهر.. مستشار وزير الثقافة مُنسق حملة مصر في انتخابات اليونسكو الاستاذ حسام نصار هيكون لينا معاه كلام ...... مسئول
فاصل
محمد صلاح: أرحب بمستشار وزير الثقافة مُنسق حملة مصر في انتخابات اليونسكو الأستاذ حسام نصار .. أستاذ حسام هي الحسبة كانت أزاي يعني اعلى score حققه الوزير فاروق حسني اللي هو في الجولة قبل الاخيرة الجولة الرابعة واللي هو أعلى حاجة كانت 29 صوت ده كان أقصى اللي حسبته حملة فاروق حسني قبل ما يسافر يعني
الأستاذ/ حسام نصار - مستشاروزير الثقافة منسق حملة مصر في انتخابات اليونسكو: لا .. هي كانت اقل يعني الحسبة اتعملت تصاعدية بتشوف ايه عندك مجموعة الدول المؤكدة ودول كانوا في حدود 18 دولة وبعدين ال18 دول بيتفعوا فرعين في حاجة اسمها الوعاء شبه الآمن والوعاء الذي لم يحدد موقفه بعد وبعدين فيه الوعاء الافريقي لان احنا كنا مستبعدينه من الاول لان له ظروف خاصة بالتعامل فالترتيب كان 18وبعدين 5 في الوعاء شبه الآمن فكان مجموعهم 23 من غير افريقيا ودا اللي حنا تقريبا حققناه
محمد صلاح: في الجولة التانية ؟
أ/ حسام نصار: الجلة الأولى والجولة التانية لأن كان فيه صوت باطل في الجولة الاولى كان 22 ل 57 الصوت دا جالنا تقريبا في الجولة التانية .. الحسابات بقى التصاعدية بعد كده بتحسب بقى دي كانت التقديرات المتشائمة بتاعتنا اللي هما ال 23 صوت فيه بقى التقدير متوسط التفاؤل دا كان هيطلعك 28 او 29 صوت لو افريقيا حصلت منها على 5 اصوات اضافية لو كنت حصلت على مجال الاصوات الحيوي بتاعك في ظل التاييدات الكتابية والقرارات اللي طلعت انت بتتكلم في 37 او 38 صوت دي الاصوات اللي انت بتتحرك من خلالها احنا قلنا له لو معديناش من الجولة الاولى هيتم استدرجنا لجولة خامسة اخيرة ونهائية وهتبقى احتمالات الخسارة اكبر من احتمالات الفوز
محمد صلاح: يعني بعد الجولة الاولى كنتوا حاسين ان احتمالات الخسارة اكتر من احتمالات الفوز؟
أ/ حسام نصار: لا من قبل مانخش الجولة الاولى قلنا له لو معديناش من الجولة الاولى هيبقى دا يعني ان افريقيا كما هو متوقع ما اديتناش اصواتها هيتم استدراجنا الى جولة نهائية وهتبقى احتمالات الخسارة اكبر من احتمالات المكسب ياهنكسب بصوت ياهنخسر بصوت والكلام دا اتقاله يمكن في الوقت اللي ثار فيه اللغط حوالين الترشحات العديدة في اخر اسبوع كان باين ان فيه مخطط لتفتيت الاصوات في المجموعات الجغرافية وهتتلم في وقت من الاوقات مع حملة اعلامية شرسة ؟
محمد صلاح: يعني كنتوا واعيين للكلام دا ؟
أ/ حسام نصار: اه طبعا..
محمد صلاح: يعني اللي حصل دا مكانش مفاجاة ؟
أ/ حسام نصار: خالص ..
محمد صلاح: امال بان رد فعلنا ليه وكاننا فوجئنا باللي حصل ؟
أ/ حسام نصار: المفاجاة كانت احنا متوقعين معركة انتخابية لكن المفاجاة كانت الدول العظمى نازلة بكل تقلها ودا اللي كان مهواش متوقع لان انت في النهاية بتتكلم على منصب دولي منصب .. ومنصب دولي في منظمة الميزانية بتاعتها 600 مليون على سنتين يعني 300 مليون دولار على سنة يعني ماتجيش في أي مؤسسة امريكية فمكانتش تستاهل الحرب الضروس اللي احنا شفناها
محمد صلاح: هنتكلم في الحرب استاذ حسام لكن خلينا بالمنطق اللي انت بداته في الاول وهو ان احنا نمشي خطوة خطوة في مسالة الاقتراع وهنشوف ملابسات كل اللي حصل وانت معانا ووعدتنا إنك هتكشف كل اللي محدش كان يعرفه .. الخطوة التانية حسبتوها ازاي بعد الجولة الاولى ؟
أ/ حسام نصار: بعد الجولة الاولى اللي اتقال كما يدور في اروقة اليونسكو انهم انه فيه محاولات لانزال ولو صوت واحد عشان يبان أن هو في نزول مش صعود
محمد صلاح: انتوا بتعملوا ايه في الفترة دي بتجيبوا اصوات ازاي ؟
أ/ حسام نصار: مش في اليوم التاني بقى من يوميها بقى التاكيد على الاصوات من بعد الاقتراع على طول بنبتدي نشتغل
محمد صلاح: انتوا عرفتوا مين اللي اداكم ال22 صوت
أ/ حسام نصار: متعرفش ال22 صوت بالظبط لكن انت عارف ال18 المؤكدين اللي هما مافيهمش كلام لو حسبنا على 22 صوت من غير افريقيا قلت ال22 دو هنشيل منهم 10% يبقى جلك على حد اقصى صوت او صوتين من افريقيا وكان فيه صوت مؤكد من افريقيا نسبة تصويت افريقيا في السلة اللي احنا حصلنا عليها في الجولة الولى لا تتعدى صوت او صوتين فعرفنا ان المشكلة في افريقيا ابتدينا نراسل وزارة الخارجية نتصل بالسفراء الافارقة بشكل منفرد اكتر من اللي احنا قابلناهم قبل كده ابتدت وزارة الخارجية تبعت برقيات للدول وعرفنا الاصوات وقتها دي راحت فين لان احنا كنا مقدرين اصوات المنافسين قدرنا اصوات بنيتا فيريرو انها تاخد 7 اصوات وخدت 7 اصوات في الجولة الاولى إيفون باقي قلنا هتاخد 6 خدت 7 فمش فارقة كتير المفاجاة كانت إلينا بوكوفا المرشحة البلغارية والمرشح الروسي خد 7 اصوات فعرفنا ان افريقيا راحت بلغاريا وراحت روسيا احنا كان همنا الحقيقة ان احنا مانخسرش يعني ماننزلش صوت لان دا كان المخطط الاول اللي ابتدينا نكتشف فيه شكل من اشكال النزال داخل اليونسكو ونجحنا في المهمة دي ان احنا ماخسرناش صوت ودي كانت مهمة هما لما حسوا ان احنا خدنا 22 هما كانوا بيلعبوا على ان احنا ناخد 16 او 17
محمد صلاح: مين هما ؟
أ/ حسام نصار: لا هما دول هنسيبهم للمجهول عشان نقسمهم بنتكلم على 8 دول عظمى وتوابعها انما مش هتسمع مني اسم دولة واقفة ضد انما ممكن تسمع مني اسم دول اللي وقفت معانا دول بقى يستحقوا التنويه بما اننا على التليفزيون المصري الجمهور المصري لازم يعرف مين الدول المحترمة جدا اللي وقفت معانا
محمد صلاح: مين الدول المحترمة اللي وقفت معانا ؟
أ/ حسام نصار: البرازيل ، الهند لعبوا ادوار رئيسية
محمد صلاح: من اول جولة لحد أخر جولة؟
أ/ حسام نصار: من اول جولة لحد أخر جولة .. يعني بيعملوا حملة معانا والصين وكوبا وتشيلي في امريكا الجنوبية والمجموعة العربية والمجموعة العربية لها دور رائع يعني وقفة رجل واحد يعني بعض اصوات اوربا اللاتينية بعض اصوات اوروبا الشرقية فاحنا حصلنا تقريبا في اول جولة على 22 صوت من غير افريقيا
محمد صلاح: في الجولة التانية زاد الصوت ماقلش الصوت
أ/ حسام نصار: تمام..
محمد صلاح: لكن المنافسة في طريقها إنها فربت تنتهي فاضل جولتين عملتوا ايه بقى .. لما حصل انسحابات يعني مُلفت للنظر جدا ان بنيتا لما انسحبت طلعت بيان وكان فيه تعليق إيحاء مش صراحة انما مبرر لانسحابها ثم فيه ايحاء بتاييد بوكوفا ليه الجماعة الافارقة والمرشح العربي لما انسحبوا ماطلعوش بيان يكون فيه حتى ايحاء لتأييد فاروق حسني
أ/ حسام نصار: أنت نطيت خطوة هي الخطوة ابتدت بانسحاب الليتوانية والمرشح الروسي وهنا بيديلك فكرة عن تصرف بنيتا بعد كده لان في الجولة التانية ايلينا بوكوفا اصواتها ثبتت عند 8 بنيتا فيريرو طلعت 9 اصوات ايفون باقي طلعت 9 اصوات زيها زي ايرينا بوكوفو فكان فيه على المسرح الاوربي جدل الاتحاد الاوربي اللي هو دوله منقسمة على مجموعتين مجموعة 1 ومجموعة 2 لو طلعنا الولايات المتحدة الامريكية وطلعنا روسيا واذربيجان فبقى عندي اتحاد اوروبي ، الاتحاد الاوربي اجتمع بعد الجولة التانية وقرر ان الليتوانية تنسحب لصالح المرشحة النمساوية لانها حصلت على 9 اصوات فضغطوا على المرشحة البلغارية ان تقبل بهذا فانسحبت الليتوانية بال4 اصوات اللي كانت معاها وانسحب المرشح الروسي لان اصواته ثبتت فعرف انه مش هيتقدم عن كده والاصوات دي ابتدت تبقى مجال تنافس اوربي ومعظمها كانت اصوات اوربية لصالح بنيتا فيريرو او هكذا كان التخيل فدخلوا الاتنين الجولة التالتة احنا طلعنا 25 وهقول ليه ، انما بنيتا فيريرو تقدمت من 9 ل11 إرينا بوكوفا تقدمت من 8 ل 13 خدت جزء من اصوات ليتوانيا وجزء من أصوات روسيا فعرفنا ان افريقيا ان الاصوات دي راحت لايرينا بوكوفا وانا شخصيا تاكدت أن بنيتا فيريرو هيمارس عليها نفس الضغط اللي مورس على ايرينا بوكوفو انها تنسحب لصالح ايرينا بوكوفا وهذا ما حدث لصالح بعدالجولة التالتة وبداية الجولة الرابعة فادي انسحاب بينيتا فاليرو
محمد صلاح: انساب المرشح العام الافريقي؟
أ/ حسام نصار: دي قصة تانية خالص صفر واربع اصفار ورا بعض ديي قصة اخرى نشرحها ورا بعض انما الجزائر كان مرشحها الرسمي فاروق حسني
محمد صلاح: لا طبعا مرشحها الرسمي كان فاروق حسني انا فاكر انا بتكلم عن المرشحين نفسهم المرشح الافريقي والمرشح الجزائري لما انسحبوا حتى معنويا ليه ماطلعوش بيان يناصر فاروق حسني او يدوا ايحاءات بان هما بينسحبوا من اجل فاروق حسني ؟
أ/ حسام نصار: كان فيه مرشحين واحد من دولة في شرق افريقيا وواحد من دولة في غرب افريقيا واحد حصل على صوت والتاني حصل على صوتين انسحبوا في بداية الجولة التالتة وصوتين من عندهم جم ولم يحدث تفاوض بينا وبينهم ولم يعلنوا هما الا شفاهة دولة واحدة اعلنت شفاهة انها بتنسحب لصالح الترشيح المصري
محمد صلاح: هو عيب يعني التفاوض طب ما تفاوض ونكلمهم نقولهم عادي
أ/ حسام نصار: لا ما انا هقولك فيه تفاوضات بالنسبة لنا كانت مرفوضة لان المرشح كان بيمثل افريقيا في اليونسكو وكان مرفوض افريقيا فاحنا رفضنا التفاوض اصلا وبعدين الصوت دا خسرناه في مرحلة لاحقة والمرشح الاخر كان ال CV بتاعته كويسة وهو كان بيشتغل في واحدة من المجالات اليونسكو اللي هي العلوم فقلنا مفيش مانع اذا قبل التجمع الافريقي وكان مشروط ان هو يبقى يشتغل في مجال العلوم وبرضه دا عمل صفقة مزدوجة في الاخر مابين البلغارية والوزير فاروق حسني تقريبا مخدناش الصوتين يعني الصوتين اللي احنا طلعناهم من 23 ل25 هما احد السيناريوهات اللي نزلوا في جولة 29 ل 27 ودا احد السيناريوهات
محمد صلاح: الجولة قبل الاخيرة بقى بتاعة 29 -29
أ/ حسام نصار: النية كما اكتشفناها مبكرا ان بنيتا فيريرو لم تنسحب لصالح ايرينا بوكوفا واللي احنا اتخيلناه انهم هيلعبوا بايفون باقي بحيث ان هما يخلوها في السبق وياخدوا اصواتها اللي المفروض كانت تروح لايرينا بوكوفا في حالة انسحابها ويودوها لايرينا بوكوفا ويخلوا اصواتها اللي كان المفروض تجيلنا في حالة انسحابها هتصوت لايفون باقي لأنها مازلت داخل الانتخابات فاحنا اكتشفنا هذا الكلام ومهدنا من خلال سفيرنا ناصر كامل كان معانا في اليونسكو
محمد صلاح: سفير مصر في باريس
أ/ حسام نصار: اه كان معانا في اليونسكو اسبوع كامل مهدنا هذا الكلام قال الكلام منطقي ويدور كتير في الاروقة فابتدى يبعت برقيات لوزارة الخارجية تعاملنا مع الدول اللي كان المفروض تجيلنا ووصلنا يوم الجولة الرابعة الصبح بيقولولنا إحنا معاكم سواء ايفون باقي في السباق او في غير السباق ..ايفون باقي اتصلت بينا بعد كده وقعدنا معاها انا والدكتور هاني هلال والسفير ناصر داخل اليونسكو وبعدين رجعت اتصلت بالوزير فاروق حسني وكانت لها طلب انها مش عايزة حاجة في اليونسكو خالص انما عايزة تعمل منظمة مجتمع مدني معنية بالحوار العربي اللاتيني فالوزير رحب جدا فيه تجمع اسمه العربي اللاتيني وبيهم مصر والعالم العربي انه ينمي العلاقات مع المجموعة اللاتينية ففي النهاية انسحبت 6.10 ضد رغبة الاطراف الاخرى اللي كانت بتحاول تبقيها في السباق عشان تسحب اصوات ويخلصوا في هذه الجولة فاحنا خدنا صوتين من اصواتها والرئيس حسني مبارك لما شاف العملية افراد بتحارب دول عظمى ابتدى يتدخل شخصيا في محادثات مع مجموعة مع الرؤساء في شتى قارات العالم وحصل بالفعل على صوتين ..الصوتين دول هما اللي نجحونا في ان احنا نتعادل 29-29 وهما اصابهم خيبة امل كبيرة جدا لان هما كانوا عايزين يتفادوا اولا انها تبقى جولة حاسمة ونهائية يحصل فيها استقطاب ما بين الشمال والجنوب ويبقى شكلهم مش لطيف عشان كده حافظوا على المرشح الكمبودي لغاية الجولة الرابعة لو كنا وصلنا للتعادل واحنا الاتنين بس في الجولة الرابعة مكانش معانا المرشح الكمبودي بدجاوي صفر لغلية الجولة الرابعة عملوا قرعة ساعتها فوجود المرشح الكمبودي اجل الحسم وتشوف بقى وجوههم لما طلعت النتيجة مش مصدقين هما كانوا متخيلين هيخلصوها 31 -27 في الجولة الرابعة عشان كده وانا خارج من اليونسكو قلت احنا النهاردة انتصرنا بغض النظر عن النتيجة بكرة احنا كنا عارفين ان هما هينزلوا بتقلهم انما احنا برضه تعاملنا في اليوم الخامس وفيه سيناريو تاني خالص وخسرنا اكتر من صوتين وطلعنا يمكن دولتين اوتلاتة ونزلنا اكتر من صوتين
محمد صلاح: دا في جولة الحسم بقى ؟
أ/ حسام نصار: في جولة الحسم
محمد صلاح: ايه اللي حصل بقى في جولة الحسم دي ؟
أ/ حسام نصار: جولة الحسم انت محدد مجموعة من أصوات الدول لم تحدد موقفها بعد وهما دول اللي كانوا بيلعبوا عليها وهما دول اللي كنا بنلعب عليهم
محمد صلاح: مش كله كان حاسم موقفهم في ال29 -29 كان كله اتحدد
أ/ حسام نصار: لا لا .. دا في الاقتراع السري اقصد فيه دول لم تحدد موقفها علنا لا مع هنا ولا مع هنا بدليل سفراء دول احنا عارفين انها ما اديتناش في 29-29 وكان فيه صوتين صعب جدا حتى في حالة انسحابات احنا مستبعدينها في التحليل انهم يجولنا لولا تدخل الرئيس منهم دولة اوربية كان صعب جدا انها تديلنا لدرجة ان السفير بتاعها اللي بيصوت في اول 3 جولات جه تعليمات ان نائب السفير هو اللي يصوت في الجولة الرابعة فعرفنا ان التدخل الرئاسي نجح السفير واعلن موقفه تماما انه ضد فاروق حسني فاحنا ابتدينا برضه نتعمل مع الدول التي لم تحدد موقفها بعد وجالنا فعلا 3 سفراء في صباح الجولة الخامسة وقالنا احنا جالنا تعليمات ان احنا نصوت لمصر فدا سيناريو تاني انك انت ممكن تكون زدت من 29 ل 32 وخسرت 5 اصوات منهم صوتين افريقيين اللي احنا عرافينهم من 23 ل25 ..ال3 اصوات الاخرى في علم الغيب او مش في علم الغيب لكن واضح انه حصل حاجة في الجمعية العامة للامم المتحدة في نيويورك لان هما اصيبوا بالتجهم الشديد لغاية لساعة 3,30 قبل الجلسة الاخيرة ب3 ساعات خسرانين ناس خسرانة لانهم عرفوا تماما ان فيه اصوات جاتلنا من عندهم فابتدوا الخسارة باينة على وشهم بعدها بساعة ابتدت تيجي مكالمات من نيويورك وابتدى يطلع اشاعات ان فيه بعض الاصوات الاوربية تراجعت في يوميها إحنا بنستبعد هذا الكلام
محمد صلاح: طيب افهم من كلامك ان في اجواء الانتخابات مفيش بقى معايير تتعلق بان دا مرشح ارض الحضارات وان احنا بنطرح تراث انساني وبنسعى الى تحقيق التواصل بين الشمال والجنوب وتحقيق حوار بين الحضارات بين الشرق وبين الغرب والمسالة بقت تربيطات انتخابية زي انتخابات مجلس الشعب ، انتخابات اتحادات الطلاب يعني بقت هي المسالة كده
أ/ حسام نصار: الاجابة اه ولا لان ما تنساش ان انت حصلت على 29 صوت تقريبا من غير اصوات افريقيا وكلهم اصوات في المعظم الاعم اصوات من الجنوب فالجنوب يعي تماما الرسالة اللي كان بيحملها فاروق حسني كممثل لثقافات وحضارات الجنوب انما البعض الاخر ومش كل الغرب عشان وبرضه ماناخدهاش بشكل عاطفي لان في النهاية بنتكلم سياسة انما السياسة تحولت الى شكل سافر في الاداء عندك مرشح او مجموعة من المرشحين بتقيمهم طبقا لل CV بتاعهم ولادائهم ولبرامجهم وفي النهاية اللي يكسب او يخسر مش قضية انما دول عظمى تمارس ضغوط على دول لكي لا تؤيد فاروق حسني هو دا اللي ايه مش عايز اقول نهاية حوار الحضارات انما عمل صدع في حوار الحضارات ، حوار الحضارات انا بعتبره حتمية لا يمكن الفكاك منها لان انت العالم الاقتصادي بيتشابك التكنولوجيا بتتطور وبتتيح مجالات للتعاون الارضية الثقافية لازم تبقى جاهزة لهذا الكلام الارضية الثقافية ثقافات متعددة يا إما هيحصل تنافر يا اما هيحصل تنوع خلاق مصر كرسالة وكفكرة بتشجع هذا التنوع ومعاها دول كتيرة جدا من دول الجنوب فيه البعض في الغربي متاثرا ببعض الدوائر الاعلامية عايز يحتفظ بالصورة النمطية بالعربي والعربي هنا مش بالضرورة يكون العربي المسلم انما العربي المسلم او المسيحي لان انت في النهاية النسيج الثقافي نسيج واحد عايز يحتفظ بان كل عربي هو بن لادن
محمد صلاح: طب احنا ليه في اطار الحديث عن تربيطات الانتخابية مالجاناش لاسلوب مختلف في اطار الحملة اقول للعرب الاصدقاء اللي أنا ضامن اصواتهم الدول الاخرى في الإطار اللي انا ضامنه ماتديونيش في اول جولة بحيث أني ابدو وكاني زي باظبط الست بوكوفا اللي جابت في اول جولة رقم طلعت في النهاية هي الفائزة
أ/ حسام نصار: لا دا كلام مالوش علاقة بالانتخابات
محمد صلاح: لا بيعملوه في انتخابات اتحادات الطلاب وبينجحوا وبيعملوه في مجلس الشعب وبينجحوا ؟
أ/ حسام نصار: الانتخابات الدولية انت بتخش كل جولة كانها الجولة النهائية وبعدين ايرينا بوكوفا او بنيتا فيريرو او المرشحة الاكوادورية ايفون باقي هما حصلواعلى حجم اصواتهم الحقيقي وما يمثلونه في اول جولة 8 اصوات 7 اصوات ال3 على بعض ماجابوش ال22 صوت بتوع فاروق حسني
محمد صلاح: اه بس واضح من كلام حضرتك يعني ان فيه 36 صوت مش معانا
أ/ حسام نصار: وهو فيه انتخابات هتاخد ال58 صوت مستحيل
محمد صلاح: لا مش 58 لكن فيه 36 صوت ضدي انا معايا 22 صوت وفيه 36 صوت مش معايا
أ/ حسام نصار: بحسبتك طب ما هو فيه 44 صوت ولا 50 صوت مش مع ايرينا بوكوفا اللي كسبت
محمد صلاح: اه بس الشرح اللي شرحته نفسك يدي ايحاءات ان هما بقى بيلعبوا على النقطة دي انهم هيضغطوا على فلانة وتمشي ودا اللي حصل ويتجمعوا على علان وتمشي لغاية لما اتجمعت عندهم كتلة تصويتية مكنتهم من الفوز بالأغلبية
أ/ حسام نصار: بس لازم ما ننساش ان الكلام دا لا يعكس الوضع الحقيقي للمرشحين الكلام دا كان هيحصل مع أي مرشح وهما بيلعبوا على 3 مرشحات فالاول كانوا موزعين جهدهم مع ايفون باقي بنيتا فيريرو وايرينا بوكوفا كانت بره خالص فهما لا يعنيهم مين اللي يكسب هما يعنيهم مين يخسر
محمد صلاح: هو لو كان مرشح مصري اخر غير فاروق حسني كانت الظروف أتغيرت ؟
أ/ حسام نصار: القضية دي القضية الرمزية اولا قبولهم ان فيه عربي بيراس منظمة ثقافية تربوية معناها ان الصورة النمطية بتروج للعالم كله انتفت لان فيه واحد في عربي بيراس منظمة ثقافية تربوية دي نمرة واحد، نمرة اتنين ان مصر كمان لها دور في الموضوع دا مصر بتجهز نفسها انها تتنافس على ال10 اصوات اللي هتتفتح في توسيعات مجلس الامن مجرد وجود مصري في منظمة زي اليونسكو لها وهج كبير بغض النظر عن القيمة لها وهج كبير بعد منظمة الامم المتحدة وهي في منظومة الامم المتحدة بيضيف لرصيد مصر في التنافس الكلام دا لا يعجب البعض لا يرضي البعض
محمد صلاح: مين الي خذلنا افريقيا ولا اوروبا ؟
أ/ حسام نصار: لا افريقيا في المجمل لانها كتلة كبيرة جدا 13 صوت لو كنا خدنا نصف عدد الاصوات بتاعة افريقيا كنا عدينا من الجولة الأولى
محمد صلاح: وبالنسبة لاوروبا اللي توقعناه كان هو هو ؟
أ/ حسام نصار: تقريبا فما عدا الصوت الاضافي اللي حصل عليه السيد الرئيس دا كان غير متوقع تماما
محمد صلاح: طب خليك معايا لسه الكلام مخلصش
فاصل
محمد صلاح: قبل ما يسافر الوزير فاروق حسني الى باريس ليخوض غمار حملته ومساعديه كان معانا في نفس الاستوديو والتقيناه وسالناه عن توقعاته وعن خطته في المنافسة في الانتخابات ..تيجي نشوف فاروق حسني لما كان معانا قال ايه
أ/ حسام نصار: ياريت..
محمد صلاح: نشوف وزيرالثقافة قبل اليونسكو قال إيه ؟
فاصل "جزء من لقاء مُسجل مع وزير الثقافة في 30 / 7 / 2009"
فاروق حسني- وزير الثقافة: طبعا هي معركة شرسة واحنا 8 على نفس الموقع طبعا مفيش شك انه وانت داخل معركة ضد اوربيين ومن امريكا اللاتينية ومن افريقيا فلازم تبقى حساباتها تبقى حسابات دقيقة للغاية احنا دايما بنحسب على الاسواء ، كل دولة لها مصالحها مع الدول المرشحين بالعكس اوروبا معانا ، معانا دول قوية جدا في اوروبا فيه 3 من اوربا ومن الاتحاد الاوروبي وواحد من روسيا ، انا بشوف انه اخدنا الاصوات اللي علاقتنا بيهم كويسة جدا وباقي الاصوات اللي سيتقاسموها انا في اعتقادي ان احتمال يدونا واحتمال ما يدوناش لكن احنا معانا دول هامة جدا ولها تاثير كبير في المنظمة واخدنا جزء كبير من التورتة الاوربية ، الاجماع الحقيقي من العالم العربي ودا بالفعل مؤثر الى ابعد حدود ودا عمل هزة كبيرة جدا داخل المنظمة لما حصل اجماع عربي احتمالات كانوا متصورين ان دا مش هيتم وتمت عملية تخريب بين المنطقة العربية الحقيقة لكن الحمد لله لم تنجح ايضا المؤتمر الاسلامي دا مفيش شك انت عندك دول اسلامية غير عربية وبالتالي المؤتمر لما يديك كمان اجماع دا في حد ذاته قوى كبيرة جدا ، افريقيا احنا اخدنا اجماع لكن احنا عارفين في أفريفيا بتحصل نوع من انواع الانفلاتات ففيه دولتين خرجوا عن الاجماع ومعرفش الدخول معناه ايه، طبعا لازم يبقى عندنا علم بكل اللي بيدور ان احنا بنشوف نفسنا فين انا بقرا ان موقف فرنسا يعني انا بحسبها حسابات شخصية علاقة الرئيس بالرئيس ساركوزي وعلاقة فرنسا بمصر بالذات في الاثار وفي الثقافة من ايام نابليون من 200 سنة علاقات مستمرة في المجال بتاعنا عموما انا مش خايف من فرنسا ، لازم نعرف ان المعركة دي معركة الجنوب جنوب الكرة الارضية ان طول الوقت شمال الكرة الارضية كان بيتحكم في المنظمة دي اهم منظمة موجودة لها تاثير كبير جدا وبيعتبروها جوهرة الامم المتحدة هما من سنوات طويلة مسيطر عليها من الشمال النهاردة الجنوب من حقه وبالذات العالم العربي لان الدورات الجغرافية في المجموعات الجغرافية كلها خدوا إلا العالم العربي ، شرف عظيم جدا مفيش اعلى منه ان تكون وزيرا لثقافة هذا الوطن
فاصل
محمد صلاح: ورجع الوزير فاروق حسني ولسه وزير لثقافة هذا الوطن هاخد من كلام الوزير فاروق حسني معانا قبل ما يسافر الى باريس كام نقطة هاسالك فيهم انت سافرت معاه ورجعت واللي حصل حصل يعني اولا فيه سؤال محدد حول موقف فرنسا وموقف ايطاليا لان فيه اعلام داخل لمصر تحدث عن ان الدولتين خذلونا دا اول حاجة تاني حاجة واضح ان حسابات الوزير فاروق حسني حول افريقيا لم تكن صحيحة او سليمة لأنه تحدث عن انه يمكن ان يفلت دولتين لكن من الواضح انه فلت اكتر من دولتين الشئ الاخر يتحدث هو اتكلم فيه بشكل اكثر صراحة بعد رجوعه عن تسييس الانتخابات هو نفسه اتكلم عن السياسة الوزير فاروق حسني لانه الجامعة العربية هي اللي اكدت على العرب ضرورة انتخاب فاروق حسني الاتحاد الافريقي في اجتماعه في سرت في ليبيا هو اللي اقر ترشيح فاروق حسني وإن كان لم تلتزم الدول الافريقية تحدث ايضا عن الدول الاسلامية عن منظمة المؤتمر الاسلامي وزراء الخارجية العرب اقروا في اجتماعهم إنه الدول العربية اعضاء اللجنة التنفيذية ينتخبوا فاروق حسني يعني السياسة شغالة من الاول دول ال3 نقط اللي جاوبنا عليهم
أ/ حسام نصار: أجاوبك الاول عن فرنسا وايطاليا
محمد صلاح: لأن ده سؤال لسّه الإعلام المصري لحد الآن بيعطي إيحاءات بإن فرنسا خذلت مصر وإيطاليا
أ/ حسام نصار: الإعلام المصري مقلش الكلام ده من نفسه الحقيقية الكلام على ما اعتقد اتكتب في إل Newsweek وأتكتب في Lemond فالإعلام بيكتب الكلان ده نقلا عن نقل إنما أنا بأستبعد حدوث هذا الكلام تماما لأن فرنسا وإيطاليا دورهم من الأول للأخر كان مع الوزير فاروق حسني فدي الإجابة على سؤالك ومعاهم اسبانيا واليونان
محمد صلاح: الرئيس مبارك تحدث مع الملك خوان كارلوس قبل الجولة الأخيرة بيوم ؟
أ/ حسام نصار: آه وده كان تثبيت وطلب مساعدة منه لبعض دول أمريكا اللاتينية .. السؤال التاني بيتعلق بأفريقيا هو قال إنه حصل انفلات في الخروج على قرار القمة
محمد صلاح: لا هو الوزير فاروق حسني مسجل معانا قبل الانتخابات ومقلش إنه حصل قال إنه ربما يحدث انفلات
أ/ حسام نصار: لا هو بيقصد هنا المرشحين اللي نزلوا من أفريقيا بعد قراريّ سِِرت وأديس أبابا قبلها إنما قال أفريقيا لها ظروف خاصة وحسابات خاصة خلينا نشرحها للناس علشان ما نظلمش أفريقيا وما ناخدش الأمور بشكل عاطفي التحليل الجيوبلوتيكي لأفريقيا .. أفريقيا قارة منقسمة على نفسها رأسيا فرنساوي وانجليزي وأفقيا إسلام ومسيحية شويه سواحيلي في شرق أفريقيا المئات من اللهجات المحلية والعقائد المحلية ما تقدرش تتعامل معاها ككتلة حضارية متسقة ، نفوذك التثويري التحرري اللي كان في فترة الستينات مش موجود لأن أفريقيا تحررت فلم يبق لك إلا التأثير الاقتصادي أو التأثير الثقافي
محمد صلاح: محدش بيحمل الجميل حتى..
أ/ حسام نصار: إحنا بنتكلم سياسة .. السياسة لغة مصالح مشتركة تأثيرك إيه في أفريقيا تأثير اقتصادي أنت دولة بتمر بمرحلة تحولات اقتصادية وبتحاول على معدلات نمو عشان توصل لمصاف الدول المتقدمة فصعب جدا انك تتنافس اقتصاديا مع دول عظمى بتحول أفريقيا إلى ساحة للسجال الدولي ، التأثير الثقافي لو يتعمل حاجة ممكن يتعمل في هذا المجال كان حيتم الاهتمام بأفريقيا من هذه الجهة إنما برضة فيه مثل بالانجليزي بيقول It takes you to tango يعني أنا ما ينفعش إن أنا أقرب من أفريقيا ، أفريقيا ما تقربليش حتى لو مجازا حنعتبر موضوع الجميل مفيش جمايل ما بين الدول إنما في النهاية أفريقيا لازم تبحث عن هويتها الأفريقية وتعرف إن دول شمال أفريقيا اللي منهم مصر هي دول أفريقية في المقام الأول ، الحضارة الفرعونية حضارة في معظمها حامي
محمد صلاح: يعني في الانتخابات مكنش ده حاصل ؟
أ/ حسام نصار: أصل الانتخابات دي بتعكس أوضاع الجيوبولوتيكا بتتكلم وبعدين بتترجم في الانتخابات أمّال إحنا استبعدنا ليه أفريقيا لأن إحنا في حساباتنا مستبعدين أفريقيا وواخدين قرارين للقمة إنما مكنش يمكن أن نعّول على أفريقيا
محمد صلاح: السؤال التالت عن تسييس الانتخابات ؟
أ/ حسام نصار: السياسة في كل حاجة في رغيف العيش اللي إحنا بناكله إنما السياسة لازم تبقى في إطار ، أنا في إطار منظمة ميزانيتها محدودة مش دخلين معركة فإن أنا أحولها إلى ساحة للعراك الدولي وتؤدي إلى حالة من حالات الانقسام المعنوي للشمال والجنوب
محمد صلاح: ليه العراك هم كانوا بيعملوا جبهات بيقولوا للمرشحة الفلانيه انسحبي المفروض إن الفريق الأخر بيعمل نفس القصة ؟
أ/ حسام نصار: لا إحنا مش دخلين نعمل نفس القصة أولا التلات دول عظمى اللي كانت ضدنا ملهمش مصلحة مباشرة مع المرشحين لأن مفيش ولا مرشح من دولهم دي نمرة واحد ، نمرة أتنين مصالحهم الإستراتيجية والاقتصادية والسياسية مع دول المرشحين مهياش أكبر من مصالحهم مع مصر اللي هي في قلب حوار الحضارات وبعدين مفيش حتى استقرار محدد على شخصية المرشح عمالين بيتنقلوا من مرشح لمرشح
محمد صلاح: المهم فاروق حسني ما يفوزش
أ/ حسام نصار: بالظبط كده هنا بيسموها العنوه يعني أنت بتعني إن الرجل ده ما يكسبش ، ما يكسبش بقى عشان فاروق حسني ده كلام ساذج إنما ما يكسبش عشان هو بيمثل ثقافة مصرية عربية إسلامية متوسطية مرفوض في الوقت الحالي على الأقل إن حد يعتلي منظمة ثقافية هو ده الكلام السياسي
محمد صلاح: أمّال السنغالي مختار أومبو مسك المنظمة دورتين ورا بعض
أ/ حسام نصار: مختار أومبو أفريقي مسِك المنظمة في السبعينات وتم إسقاطه
محمد صلاح: بس نجح في دورتين
أ/ حسام نصار: بس أسقطوه
محمد صلاح: أقصد في دول تانية مسكت المنظمة.
أ/ حسام نصار: العرب حاجه تانية خالص غير أفريقيا ما نخلطش حابل بنابل
محمد صلاح: أنا بتكلم على شمال وجنوب.
أ/ حسام نصار: الشمال والجنوب متقّسم هنتنجتون في صدام الحضارات لما قسّم العالم لكتل سياسية ثقافية متسقة استبعد أفريقيا تماما لأن أفريقيا مهياش كتلة حضارية متسقة فحد يجي من السنغال حد يجي من كينيا حد يجي من جنوب أفريقيا القضية لا تعنيه إنما العالم العربي الإسلامي طبقا لتقسيم صدام الحضارات موجود وفي الساحة إما أنك تجيب حد من هذه المنطقة اللي عليها تنميط كبير جدا في بعض الدوائر الغربية وقول لها خلاص أنا قبلت أنك تيجي تمسكي منظمة اليونسكو معناها أنك نفيت تماما الشبهة وأظهرت نماذج عربية معتدلة بتلبس بدل وكرفتات وبتتكلم لغات
محمد صلاح: يعني عشان الناس اللي بتسمعنا الناس دي ما حسبتهاش إنه المرشحة النمساوية والبلغارية أقل سنا من فاروق حسني مثلا والنمساوية اشتغلت في اليونسكو فترة طويلة والأخرى ممثلة للإتحاد الأوربي وبالتالي لو بصوا حتى لل CV من وجهة نظرهم وبعدين الست اللي فازت من أوربا الشرقية سابقا اللي أوربا عايزها تندمج تماما فيها ويبقوا كتلة واحدة الأهم كمان إنها امرأة والعالم يبحث عن تمكين المرأة وإعطائها حقوقها مش المقارنة هنا ممكن تغري بعض الدول إنها ممكن ترشح للست دي وما تديش لراجل سنه كذا وال CV بتاعتة مختلفة عن ال CV بتاعة الست دي في كذا وكذا
أ/ حسام نصار: كلام جميل بس ده أسمه ازواق يعني أنا ممكن أخد قرار وأزوقه بكده أنا عايز امرأة عايز حد فاهم اليونسكو طب ما أنا ممكن أرد عليك وأقولك الأمرأة دي لم تنتخب ليه في الدول العظمى نفسها يعني حُجه مردود عليها
محمد صلاح: يعني إيه لم تنتخب في الدول العظمى نفسها ؟
أ/ حسام نصار: الدول اللي كانت ضدنا مفيهمش امرأة فمتروجش لحاجة أنت معملتهاش كدولة نمرة أتنين لو أنت بتتكلم على السن طب ما رونالد ريجان مسك أول مرة في أول فترة كان عنده 70 سنه وقعد فترتين يعني خرج من الرئاسة عنده 78 سنه فالقضية مردود عليها فكون واحد فيها من اليونسكو فدا أدعى إن أنا أبص لها من وجهة نظر تانية إن المنظمة تحولت إلى منظمة بيروقراطية محتاجه رؤيا مختلفة تتعامل مع حوار الحضارات فأنت عايز حد يبص من بره مش بالضرورة يكون من جوه يبقى راجل دبلوماسي يبقى فاهم المنظومة الثقافية انت بتتكلم عن وزير ثقافة مصر ووزير ثقافة مصر بمثابة وزير ثقافة العالم لأن كل الحضارات مرت على مصر فكل الكلام ده مردود عليه إنما استُخدِم في الزواق لو كانت الدول دي أدت ايرينا بوكوفا أو بنيتا فيريرو أصواتهم اللي يستحقوها من أول جولة إنما مفيش حد منهم عدى العشر أصوات من أول جولة كلهم شخصيات محترمة إنما بالمقارنة بال CV وحجم الانجاز والقدرة على التأثير والفعل من فاروق حسني مفيش وجه مقارنة
محمد صلاح: طلعت تصريحات كتير أثناء وجودكم في باريس على الدور اللي لعبة السفير الأمريكي لدى اليونسكو هو الراجل ده متعملش حسابه ولاّ أيه ؟
أ/ حسام نصار: بعيدا عن العواطف نتكلم تاريخ ، التاريخ بيقول إن مصر علاقتها بأي دولة عظمى على مدار التاريخ علاقة دائما متوترة بمعنى لا بحبك ولا بقدر على بُعدك لأن مصر دائما بتمثل مشروع جاهز لإقامة دولة عظمى في أي وقت فأي دولة عظمى قامت في التاريخ من الفُرس لفرنسا لانجلترا لأمريكا حيبقى فيه علاقة لازم تحافظ على مصر لأنها كيان كبير جدا وتأثير ثقافي وحضاري غير عادي وفي نفس الوقت بتخاف من دورها أو تعمل له حساب فحتفضل فعلاقة حيببقى فيها دايما هات وخد فلا يجب إن إحنا نتعامل معاها بشكل عاطفي لأن السياسة بتقول إن لغة المصالح اللي بتتحكم ، مصر دولة عظمى بأيه - وكانت دولة عظمى على مدار التاريخ كتير جدا - مش بالفتح ولا بالاستعمار ولا بالاقتصاد كانت دولة عظمى بثقافتها إيزيس كانت بتُعبد في اسكتلندا اليونان اللي عملوا حضارة ما تزدش عن 200 سنه الرونق بتاعها ما أبتداش يظهر غير في إسكندرية وأبتدت تظهر الحضارة الهلمستية تزاوجت مع الفلسفة اليونانية اللي طالعة إرهاصاتها من مصر وعملوا المذهب الفارسي
محمد صلاح: أنا معاك في كل حاجة أنا بتكلم في اللي حصل دلوقتي في باريس في موضوع اليونسكو
أ/ حسام نصار: ما أنا بقول لك أي دولة عظمى مع مصر علاقة خاصة جدا ولا يجب أن تحسب بشكل عاطفي وما ينفعش أقول هم كانوا ضدنا في الحاجة دي يبقى هم ضدنا على طول أو معانا في الحاجة دي يبقى معانا على طول الأمور بتتحسب حسبة مختلفة في النهاية معركة انتخابية خسرناها أتفض المولد أبتدينا نركز في اللي جاي ما نتكلمش على دول مش دورنا إن إحنا نتكلم على دولة وحتى لو أتكلمنا على دولة بالتمويه يجب أن نعلم أن الدول العظمى في العالم كله بتملكنا معاهم مصالح إستراتيجية لا يجب التفريط فيها مننساش بس نسامح لأن مصر فكرة ورسالة وطول عمرها بتتكلم على لغة تسامح ما ننساش بس نسامح
محمد صلاح: طب خليك معانا لسّه الكلام ما خلصش
فاصل
محمد صلاح: أتكلم مستشار وزير الثقافة مُنسق حملة مصر في اليونسكو الأستاذ حسام نصار على التسامح كان عندنا هنا من فترة الرئيس الأمريكي أوباما واختار القاهرة لكي يوجه منها كلمة إلى العالم الإسلامي مجملها التسامح تيجي نسترجع كده كلمة الرئيس أوباما ونشوف حصل تسامح ولا ما حصلش؟
أ/ حسام نصار: ياريت
محمد صلاح: نشوف كلمة الرئيس أوباما من القاهرة
فاصل "جزء من كلمة الرئيس أوباما من جامعة القاهرة 4 / 6 / 2009"
باراك أوباما – الرئيس الأمريكي: نلتقي في أوقات توتر تجري بين الولايات المتحدة والمجتمعات الإسلامية حول العالم توتر تمتد جذوره لقوى تاريخية تتخطى أي جدار سياسي حالي العلاقة بين الإسلام والغرب شملت قرونا من التعايش والتعاون لكنها شملت أيضا صراعات وحروب دينية مؤخرا التوتر غزاه الاستعمار الذي أنكر حقوقا وفرصا على العديد من المسلمين ثم غزته حرب باردة كثيرا ما تم التعامل مع الدول ذات الأكثرية الإسلامية على أنها دول تابعة بدون اعتبار لطموحاتهم إضافة إلى ذلك فإن التغيير الجارف الذي ترافق مع الحداثة والعولمة جعل الكثير من المسلمين ينظرون للغرب على إنها معاد لتقاليد الإسلام ، لقد جئت إلى هنا إلى القاهرة ساعيا لبداية جديدة بين الولايات المتحدة والمسلمون حول العالم مبنية على الاحترام المتبادل والمصلحة المتبادلة بداية مبنية على أن الحقيقة أن أمريكا والإسلام لا يقصي أحدهما الأخر ولا حاجة للتنافس بينهما بل على العكس فأنهما متداخلان يتقسمان بينهما المبادئ المشتركة مبادئ العدل والتقدم والتسامح وكرامة البشر أجمعين.
فاصل
محمد صلاح: ده كلام الرئيس أوباما من قلب القاهرة عن التسامح إحنا ليه اعتبرناها صراع حضارات بين الغرب والشرق أو بين الشمال والجنوب عبر التصريحات طبعا اللي صدرت عن الوزير فاروق حسني وبعض اللي صاحبوه في باريس ما اعتبرناش ليه إنها منافسة حامية بين الشمال والجنوب أو بين الغرب وبين الشرق ؟
أ/ حسام نصار: منافسة أزاي
محمد صلاح: إحنا عايزين نفوز وأنتوا عايزين تفوزوا أنت بتستخدم الأدوات اللي متاحة ليك وأنا بستخدم الأدوات اللي متاحة عندي
أ/ حسام نصار: هم ما فازوش بشخوصهم ما فازوش بدول بتمثلهم هم خسّروا مرشح من الجنوب فالقضية هنا مفيهاش منافسة القضية هنا فيها تعمد وبعدين إحنا ما قلناش صراع حضارات قلنا حصل صدع لأن حصل انقسام العالم كله أبتدا يتابع اليونسكو كأنه بيتابع حرب العراق أنا طلعت على أل CNNيعني مين أنا عشان أطلع على أل CNN أنا أقصد إن القضية أخدت أكبر من حجمها فثار جدل زيي ما ثار جدل عندنا بيثور جدل في الغرب بعض الأقلام الكبيرة جدا في الغرب قالت إن الكلام ده كان يجب إنه لا يحدث خصوصا إن الدور على العرب في إنهم يمسكوا المنظمة دي فإذا كانت تحولت إلى شكل من أشكال التبارز السافر ماشي بنغفر ومرحلة وعدت ولا نتوقف عن الحوار لأن إحنا دولة دور مينفعش تتخاى عن دورك
محمد صلاح: بكل صراحة أد أيه تصريح الوزير فاروق حسني عم حرق الكتب الإسرائيلية – هو كان معانا وقال إنه كان عابر وتم أصتياده فيه واعتذر عنه في مقاله في الليموند – هل هذا التصريح استُخدِم ضد فاروق حسني بشكل أطاح بعدد من الأصوات كان يمكن أن يحصل عليها أم أنه أستُخدِم في الإيحاء للناس بان هذا المرشح لا يصلح لهذه المنظمة؟
أ/ حسام نصار: الأتنين بنفس المعنى هو أستُخدِم استخدام خاطئ للإيحاء بأنه هو رجل مُغاير على ما هو
محمد صلاح: الأسف في الليموند مش الاعتذار لم يكن كافيا ؟
أ/ حسام نصار: لا أنا حقول لك ليه المقالة بتنزل بتتقري من حيز والحيز التاني ما بقرهاش إنما يُشار إليها في بعض الحوارات الأخرى
محمد صلاح: ليه الحملة ما أشتغلتش على كده؟
أ/ حسام نصار: مين قالك إن إحنا ما أشتغلناش ومين قالك إن إحنا ما حاولناش نشتغل
محمد صلاح: طب عملتوا أيه؟
أ/ حسام نصار: هنا برضه هنرجع لأسلوب التغني بحريّة الرأي والتعبير
محمد صلاح: مين يتغنى؟
أ/ حسام نصار: بعض الدوائر الغربية تتغنى بحريّة الرأي والتعبير اللي عندها وبتهاجمنا إن إحنا معندناش حريّة رأي وتعبير بره إحنا بنشحت عشان ننزل مقالة تم إيقاف كل حاجه إيجابية طالعة من نحيتنا
محمد صلاح: اللوبيهات اشتغلت عشان تمنع؟
أ/ حسام نصار: فيه ناس اشتغلت وشغالة من أبريل 2008 عشان ما ينزلش حاجة .. واحد من هنا من مصر في برنامج تليفزيوني قال إن المقالة بتاعة ليموند اللي نزّلها الوزير مقالة مدفوعة الأجر
محمد صلاح: أنت مستشار وزير الثقافة ومُنسق حملة مصر لليونسكو خلاص مفيش يونسكو هتعمل أيه بقى؟
أ/ حسام نصار: أنا مستشار وزير الثقافة
محمد صلاح: لأيه؟
أ/ حسام نصار: أنا أصلا مستشارة للعلاقات الخارجية وهو دلوقتي بيفكر إن هو يعمل شكل من أشكال التخطيط الاستراتيجي عشان يبص على المشروعات الكبرى ودراسة أوجه القصور في الوزارة وعمل شكل من أشكال التناغم لسّه الوصف الوظيفي ما نزلش علشان أقول لك إنما ما صرح به بيشي بحاجه لها علاقة بوزارة الثقافة
محمد صلاح: بالتوفيق إن شاء الله ، كنا على أبواب النصر لمنظمة دولية كنا نتمنى أن يتبوأها مصري كما تبوأ مصري من قبل موقع السكرتير العام للأمم المتحدة ورئاسة الوكالة الدولية للطاقة الذرية بالإضافة إلى جوائز نوبل ولكن في الموضوع ده العشرة متر الأخير ما جتش معانا المهم أستفدنا أكيد من الدرس قال مستشار وزير الثقافة مُنسق حملة مصر لانتخابات اليونسكو الأستاذ حسام نصار كلامه كان كلام جميل كلام معقول أكيد كان كلام صريح ..... ومسئول .. خلص الكلام سلام