محمد صلاح: يا مساء الخير بيقولوا ان اللي بنى مصر كان في الأصل حلواني بناها حلوة مترتبة نقدر نقول متنسقة معرفش بقى لو الحلواني دا جاي وشوية حنين للي بناه وحب ييجي يتفسح شوية يمكن يغير شغلته يبقى بتاع جهاز التنسيق الحضاري من ساعة ما صدر قانون بتأسيس الجهاز القومي حسينا انه كما لو كان صرخة في البيداء في الصحرا صرخة غريبة محدش سمعها عشان يفهمها او فاهمها لما بيسمعها صرخة بتلخص او المفروض انها تلخص لحتة الرحالة واصحاب الخطط افكار مهندسي العمارة وبناة المدن لمسة بتكحل عينيهم وعينين التاريخ المكتوب بالطوب والحجارة الاعمدة والشرفات في المداخل والبلكونات عمارة شيدها مهندسين عظام فيه منهم مصريين وكمان اجانب فين المحافظة على المدن المصرية وتفاصيلها العريقة ابن بطوطة مثلا قال عن الاسكندرية انها عجيبة الشأن اصيلة في البنيان وبها ما شئت من تحسين وتحصين ومآثر الدنيا والدين كرمت مبانيها ولطفت معانيها ولا نظير لجمالها وبهائها احنا محتاجين نظرة واعية توصل ما بينا وبين العالم المتمدين في اوربا والدول المتقدمة يعني ترحمنا من جحيم المقارنة لما بنسافر ونشوف كانوا هما بيجوا وينبهروا الرحالة الفرنسي جورال جينيبال لما شاف قصر محمد علي في شبرا قال عنه انه جنة الشرق مشي في شارع شبرا وكتب عنه انه لا مثيل له في العالم هو دلوقت لا مثيل له في العالم برضه الفرنسي مونتبار وصف حدائق شبرا بانها شانزليزيه الشرق فين حدائق شبرا دي الرحالة اوغست لاملوف شاف القاهرة عامرة بالمحال الكبيرة والدور العظيمة والعربات الانيقة مكانش فيه توك توك والمارة يتزينون بالملابس النظيفة المهندمة بالظبط زي أي مدينة اوربية الحقيقة كان فيه برضه زمان عشوائية احياء ولاد البلد زي المناطق العشوائية دلوقت كان برضه التنسيق الحضاري زمان متعب للقائمين عليه مكلف للحكومة ساعات الوالي يأمر السكان بدهان بيوتها بالون الابيض او شيل المصاطب من قدام الداكين او يامر بلمبة جاز قدام كل بيت كانت الامور بتمشي مكانش اسمه تنسيق حضاري كانت خطط وتطور عمراني وأعماري دلوقت بقى فيه جهاز للتنسيق الحضاري المطلوب منه انه يلاحق شوارعنا وعمارتنا وكبارينا وانفاقنا واحياءنا مين يكره التنسيق خصوصا لو كان حضاري لكن عمل ايه الجهاز القومي من ساعة ما نشأ من خمس سنين حد يقولي جهاز لوحده ما يسقفش او انه استشاري فقط او ان عمله يتعامل مع كل الوزارات كل المحافظين وكل المخالفين وكل اصحاب المصالح جهاز التنسيق الحضاري رسالته وصلت للناس ايه اللي عمله لغاية دلوقت وايه اللي ماعملوش محتاج ينشر ثقافته بنعومة ولاّ نسن له قوانين بانياب واظافر هيقدر على كل اطلال العشوائية والتشويه والفوضى ولا مش هيقدر تنسيق مصر وتحضرها هيكون لينا عنه النهاردة كلام ....... مسئول فاصل محمد صلاح: رؤية الجمال حاجة تشرح القلب اشجار في شارع عالصفين اعمدة منورة رصيف بمقاسات معينة تمشي عليه شوية من غير ما تروح تركب شريحة لركبتك ولاّ دعامة لقصبة رجلك اعلانات في مكانها المناسب محترمة غير صادمة للذوق مباني تاريخية متجددة مترممة متركز عليها اضاءة بتحكي مجد شعب في العمران اصحابها ما يكونش نِفسهم بقى المبنى يقع ولاّ يتحرق عشان يبيعوا ارضه بالملايين بيوت حديثة لها شكل وملامح تحس ان اللي بانيها مهندسين بحق وحقيق ميدان فيه نافورة ولاّ تماثيل حلوة بلكونة فيها زهور وورود مش عشش فراخ يمكن يكون دا التنسيق الحضاري في ابسط صوره لكن التنسيق ممكن !! يعني لو دا حلم ممكن يتحقق ..؟ رئيس الجهاز القومي للتنسيق الحضاري الاستاذ سمير غريب هيكون لينا معاه النهاردة كلام ...... مسئول ,من كلام الاستاذ سمير غريب "مهمة الجهاز هي تغيير الواقع لكن التنسيق الحضاري في مصر يستحيل ان يكون مهمة جهاز واحد فهو قضية ثقافية وقانونية واجتماعية متداخلة واحنا لو ملايكة مش هنعمل اللي عايزينه الا اذا تعاونت معنا الجهات الاخرى" – "مشكلة التمويل احد العراقيل في طريق عمل الجهاز وانا اعمل في ارض غير ارضي فمن يملك الارض في مصر هم المحليات والمحافظات ولابد من الحصول على تراخيص من تلك الجهات لكي اضع معدات في مكان ما وهذا يتوقف على الشخص الذي اتعامل معه" – "الثورة غيرت المجتمع المصري جذريا فعمارات القاهرة الخديوية مثلا مازالت هي الاجمل ولو استمر انشائها حتى الان لاصبحنا مثل اوربا لكن هذا لم يحدث فمصر شهدت تدهورا في العمران بسبب تغيير نظم الحكم" – "اطالب المحافظين بتفعيل مواد التنسيق الحضاري في قانون البناء الموحد وذلك للحد من الاعلانات العشوائية التي تشوه المظهر الجمالي لشوارع ومباني مصر وتشتت انتباه السائقين على الطرق السريعة والكباري" – "الجهاز يتعامل مع خبرات وكفاءات عالية لانجاز عمله على الوجه الاكمل كما ان لدينا شباب صغير نحاول اكسابه الخبرات من هذه الكفاءات ونرسلهم لبعثات في الخارج وانا لست ضد الخبرات الاجنبية اذا كانت غير متوافرة في مصر"مين بيطرد التاني العملة الجيدة ولاّ العملة الردئية مين اقوى في العدوى الجمال ولاّ القبح مين يقدر على التاني النظام ولاّ الفوضى هنا ممكن نختلف لان كل واحد عنده من تجربته خبراته وجهة نظره بيئته لكن اللي مفيش خلاف عليه اننا اتاخرنا والشغل لازم يبتدي المطلوب كتير الفوضى ساعات بتبقى خلاقة فتخلط تشوهات وعشوائيات في المكان وفي الروح الارض اللي بيشتغل عليها التنسيق الحضاري مليئة بالالغام والمشاكل والمعوقات غياب الراي العام قوة الناس اللي ممكن تكون لقمة العيش تكون رئيس الجهاز القومي للتنسيق الحضاري الاستاذ سمير غريب هيكون لينا معاه كلام ......... مسئول فاصل محمد صلاح: ارحب برئيس الجهاز القومي للتنسيق الحضاري الاستاذ سمير غريب قولي لو شبهنا التنسيق الحضاري بتنسيق الزهور مثلا يبقى التشبيه في محله سمير غريب- رئيس الجهاز القومي للتنسيق الحضاري: اه.. انت جبت حضرتك حاجة جميلة الزهور من اجمل مكونات الحياة فالتنسيق الحضاري هدفه في القرار الجمهوري بتاعه في القانون 19 تحقيق القيم الجمالية في الفراغ العمراني يعني كانك برضه بتحول الفراغ العمراني الى قيم جملية والزهور من اجمل القيم الجمالية محمد صلاح: كم حد في الشعب المصري باستثناء الاجهزة الرسمية طبعا او الادارات اللي بتشتغل مع الجهاز او بيتعاون معاها او في علاقة بشكل او باخر مع الجهاز معاها يعرف عن التنسيق الحضاري يعرف عن الجهاز القومي للتنسيق الحضاري ؟ سمير غريب: والله هو الجهاز مازال يعتبر حديث نسبيا محمد صلاح: 5 سنوات ؟ سمير غريب: ما كملش 5 سنين انما السنادي هيكمل ال5 سنين الاعلان مهم جدا في تعريف المجتمع باي حاجة شغل الجهاز لوحده يمكن ما يعرفش لانه الجهاز مسئول عن مصر كلها عن التنسيق الحضاري في مصر كلها فبالتالي مساحة كبيرة جدا ومجتمع ضخم ومشاكل لا اول لها ولا اخر فبالتالي الاعلام هنا على قد ما الاعلام بيعلن عن الجهاز على قد ما تلقى ناس تعرف الجهاز محمد صلاح: مش ممكن يكون على ما الجهاز مؤثر بيشتغل وبيؤثر وربما بيدخل في محكات او معارك وقراراته او توصياته او جهوده احدثت تغييرات يكون معروف سمير غريب: نفس الكلام مظبوط بس مش لوحده مش نشاط الجهاز لوحده هو اللي يعرف لان نشاط الجهاز ايا كان في نقط معينة هيعرفوها الناس المحيطين بيها انما خارج المحيطين محدش هيعرف غير عن طريق الاعلان يعني ادي لحضرتك مثل انا مثلا دلوقت الجهاز بيشتغل في شبين الكوم الاعلام مجابش أي حاجة عن شبين الكوم عشان الجهاز في شبين الكوم اللي يعرفوا شغل الجهاز في شبين الكوم هما اللي عايشين في شبين الكوم سواء كانوا محيطين في المشروعات محمد صلاح: الجهاز اشتغل في القاهرة ؟ سمير غريب: واشتغل في القاهرة طبعا احنا لينا علاقة بتطوير محطة مصر الواجهات بالذات لولا الاعلام اتكلم عن موقف الجهاز من تطوير محطة مصر مكانش حد عرف العلاقة ما بين الجهاز كان هيفضل المحيطين بالمحطة والعاملين بالمحطة هما بس عارفين محمد صلاح: طب خلينا نعّرف الناس اكتر لانه شفنا عدد كبير على القناة الاولى في مصر وعلى الفضائية المصرية في الخارج هو الجهاز استشاري يعني ولاّ بيصدر قرارات مُلزمة ؟ سمير غريب: الجهاز دلوقت بعد صدور قانون 119 لسنة 2008 بقى ليه إلزام يعني قراراته مُلزمة .. قراراته بتيجي عن طريق ايه عن طريق مواد قانون ومواد اللايحة التنفيذية للقانون اللي موجود في القانون واللايحة التنفيذية الخاصة بالتنسيق الحضاري لابد من تطبيقها فدا اول إلزام تطبيق مواد القانون 119 ولائحته التنفيذية في مجال التنسيق الحضاري القانون هنشوف ايه المجالات الملزمة فيها انما بالاضافة لكده القانون بيحيل حاجة اسمها الادلة الارشادية لأسس ومعاير التنسيق الحضاري احنا مقسمين العمران المصري كل مجال له معايير تتطبق فيه هذه المعايير مكتوبة في دليل زي Guide Book هذا الدليل بيطلعه الجهاز واجب التطبيبق طبقا للقانون محمد صلاح: اوصف لي حالة العمران والتنسيق في مصر خلال السنين اللي فاتت ؟ سمير غريب: لا انما كتبت كتير وقلت كتير ان العمران المصري تدهور منذ حوالي 50 سنة وعلى مدى 50 سنة دي لغاية دلوقت بيزداد التدهور فلك ان تتخيل حجم التدهور الان في الوقت اللي احنا قاعدين فيه يعني في تفصيل احنا مصورين هذا التدهور بعروض على الكمبيوتر تبين للناس وكنت اتمنى ان التليفزيون يوضح انت لما تيجي تشوف الافلام القديمة الحقيقية اللي نتصورة في شوارع وميادين ابتداءا من التلاتينيات والاربعينيات والخمسينيات والسيتينيات انت عارف السينما دي ممكن توثق لك التدهور اللي حصل في العمران غير اللي احنا عايشينه كل هذا بيفرض اعباء فظيعة محمد صلاح: بس واضح ان التدهور شغال برضه في ظل وجود الجهاز ؟ سمير غريب: اه طبعا وانت تفتكر حضرتك ان لما الجهاز يتعمل التدهور هيقف كده على طول الهدم اسهل بكتير من اعادة البناء مش كده التدهور سهل انما وقف التدهور وتصحيح الموقف او الوضع اللي احنا عايشين فيه من اصعب ما يكون لانه انت عندك مشكلة اساسية دلوقت انه التدهور ليه عوامل كتيرة بس من اهمها سلوك الانسان سلوك المواطن..سلوك المواطن دلوقت انت محتاج ثقافة التنسيق الحضاري تخش جواك جوه سلوك المواطن فبالتالي لما تعمل حاجة كويسة المواطن يحافظ عليها محمد صلاح: في اجهزة مسئولة برضه محتاجة الثقافة دي ولاّ ايه رايك ؟ سمير غريب: وهو الاجهزة المسئولة والحكومية خارج المواطن المصري ما هو اللي شغالين فيها مواطنين مصريين محمد صلاح: ليه القانون ما الزمهمش بقى ؟ سمير غريب: لا القانون ملزم بس تطبيق القانون بياخد وقت محمد صلاح: يعني تطبيق القانون يفترض من لحظة اقراره ؟ سمير غريب: اه بس لما حضرتك بتشتغل على مجال صغير لما بتطبق القانون على 100 واحد او 200 واحد هتقدر تحكمهم على 70 مليون صعب دا مش في قرارات التنسيق الحضاري بس في أي قانون محمد صلاح: فاكر قانون المرور الجديد ؟ سمير غريب: نفس الحكاية كنت هاضربه مثل انما استاذ محمد انت فيه قاعدة اساسية مش كل حاجة تتحل بالقانون ..القانون مهم بس ما يحلش كل حاجة محمد صلاح: يبدو الجهاز مثلا لما يكون فيه اعتراض على لون بناية او عمارة مثال في وسط البلد ؟ سمير غريب: دا الاسهل للشغل اه بس التنسيق الحضاري مش مجاله واجهات المباني بس مجال التنسيق الحضاري هو كل العناصر الموجودة في الفراغ اللي بيحصل بينعكس على الفراغ العمراني كل دا لما نقول تحقيق القيم الجمالية في الفراغ العمراني هذا الفراغ مكون منة عناصر مش واجهات مباني بس يعني مثلا مكون من أي حاجة تشغل الفراغ زي الرصيف زي الشارع نفسه اللوحات الارشادية الاعلانات اليفط بانواعها الشجر الزرع بكل اشكاله الاضاءة عواميد الاضاءة شكل العامود قوة الاضاءة لون الاضاءة كل دي عناصر بتشكل الفراغ كل اعمال اللي بنسميها اعمال الفن العام زي النافورات اللي في الميادين اللي بتتحط مجسمة على الحيطان او غيرها كل هذه العناصر بتشغل الفراغ دي كلها مسئولية التنسيق الحضاري مش بس لون الواجهة لون الواجهة دا احد الامثلة غير لون الواجهة على الواجهة نفسها فيه اجهزة تكييف وفيه تركيبات صناعية وعلى السطوح بتاع المباني مفيش فيه عشش فراخ وفيه اوض وفيه زبالة بتتحط كل دا في الفراغ يا استاذ محمد محمد صلاح: انت اصلا كاتب وصحفي وصاحب راي وبترسم ليه مقدرتش تكّون راي عام ضاغط في هذا الاتجاه يساعدك يساعد الجهاز ؟ سمير غريب: في الواقع فيه يعني اولا لما تيجي تبص كده من اول ما اتفتح مقر الجهاز في اواخر 2004 لغاية النهاردة احنا حققنا تقدم في حاجات كتيرة جدا اولا لما فتحنا الجهاز مكانش فيه ولا لايحة تنفيذية ... محمد صلاح: انا عايز على ارض الواقع يا استاذ سمير سمير غريب: ما انا قلت دلوقت الواقع متدهور جدا محمد صلاح: ايه اللي اتحقق في ايقاف جزء من التدهور ؟ سمير غريب: روح حوالين مستشفى امراض سرطان الاطفال نجيب الصور كانت ايه نروح في شبين الكوم نشوف شط النيل في شبين الكوم كان ايه ودلوقت ايه نروح دمياط كانت ايه ودلوقت ايه نروح الاقصر كانت ايه ودلوقت ايه نروح اماكن كتيرة جدا انما اللي عايز اقوله ان هذه المشروعات مش ممكن الجهاز لوحده يغير الواقع يعني لازم تعاون جميع مؤسسات المجتمع واولها الدولة فاللي حصل في دمياط كان بضل المحافظة والمحافظ الدكتور فتحي البرادعي الليي بيحصل في القاهرة داخل فيه جزء كبير منه المحافظ الدكتور عبد العظيم وزير واجهزة المحافظة احنا دلوقت شغالين في وسط البلد وسط القاهرة في ميدان طلعت حرب وشارع رمسيس فيه حاجات بتتغير والناس شايفاها انما ما نقدرش نغير مصر كلها في 4 سنين برضه يعني مثال ايه الموقف من جراج رمسيس اللي اتهد محمد صلاح: انت هديت جراج رمسيس بس انت هديت عبر حملة صحفية انت كتبت في مقالة اسبوعي في الاخبار بشكل دوري ومستمر سمير غريب: بس في نفس الوقت انا رئيس الجهاز القومي للتنسيق الحضاري محمد صلاح: هل الحملة الصحفية هي اللي كانت هدم الجراج ولا لما تلجا لاستخدام الصحافة دا شئ جيد بس تاثير الجهاز هنا كان فين؟ سمير غريب: انا عايز اقول ان تاثير الصحافة مكمل لانه علماء وخبراء الجهاز درسوا وطلعوا دراسة بضرورة هدم الجراج تعاون معاهم اعضاء لجنة العمارة في المجلس الاعلى للثقافة هذه الدراسة راحت لوزير اللثقافة ورئيس الوزرا السيد رئيس الوزرا اقتنع بهذا الموقف واصدر قراره التنفيذي بقرار الجهاز الصحافة ومقالاتي عملت اضاءة عملت spot light زي ما بيقولوا على شغب الجهاز لاني كنت محتاج ان موقف الجهاز يتعرف ما يبقاش داخل دراسات وجلسات مغلقة من اطراف محدودة انما الراي العام يكون هذا الراي العام لما اشتغلنا مثلا في محطة مصر كان فيه راي عام مؤيد لينا انا عايز اقولك من اكتر المواقف المؤيدة للجهاز دلوقت وبتدعم شغله هو رئيس الوزرا نفسه بالاضافة طبعا لوزير الثقافة لانه هو الوزير المسئول عن التنسيق الحضاري لما دلوقت يقولك انه اللي بيحصل في رشيد لتطوير مدينة رشيد لازم الجهاز يقول رايه فيه لما الجهاز يبقى مسئول في اللجنة الوزارية لتطوير وتنمية مدينة الاقصر اللي بيحصل في الاقصر دلوقت الجهاز بيقول رايه فيه ما هي دلوقت كلها منجزات محمد صلاح: استاذ سمير عندي نموذج دلوقت عايز اسالك عليه ليه الجمال بيسبق دايما المسئولين معنى انه المسئول هيروح مكان ما على طول هتتشال الزبالة او القمامة الميكروباصات هتختفي وقصاري زرع بقى بتنزل ما بيستمرش دا على طول هل دا نقص امكانيات ولاّ ثقافة سمير غريب: لا ثقافة علشان كده بقول لحضرتك دي ثقافة الانسان المصري الثقافة العامة ثقافة المناسبات ان احنا نحتفل بالمناسبة ولا نحول معايير المناسبة الى سلوك يومي دائم هو دا اللي حضرتك بتقول عليه احنا محتاجين ثقافة التنسيق الحضاري قبل مشروعات التنسيق الحضاري لما يكون لدى المواطن المصري ثقافة التنسيق الحضاري مش هنحتاج جهاز اسمه الجهاز القومي للتنسيق الحضاري محمد صلاح: عندنا مثلا بتوقف فترة هدم الفيلات في احياء معينة مصر الجديدة جاردن سيتي الزمالك ومع ذلك هتلاقي عندنا العمارات شغالة عندنا قوانين بتحدد او قرارات ادارية بتحدد مدى ارتفاعات الادوار بيطلع البُنا او العمارة لدور معين وبعد كده تسرح ل10 او 15 دور دي برضه ثقافة سمير غريب: مؤكد ان دي ثقافة لانها اولا فيه حاجة اسمها ثقافة احترام القانون لما بتطلعى حضرتك قانون لازم القائمين على القانون نفسه ينفذوه قبل المواطن العادي ساعات ما بيحصلش الكلام دا ساعات القائم على تنفيذ القانون تطبيق القانون ما بيطبقوش هادي مثلا بتطلع في الارتفاعات دي او البناء على اراضي زراعية طب القانون بيجرم ويحرم البناء على ارض زراعية بيبقوا المسئولين عن تطبيق القانون في الحتة دي شايفين المبنى وهو بيتبني عل ارض زراعية وعارفين ان هو مخالف لما ييجي يتسكن ويخلفوا فيه عيال بتيجي الاجهزة تنتبه وتقولك هد المبنى المخالف دا هيبقى عندك مشكلة اقتصادية وسياسية واجتماعية لما يبقى العمارة الرخصة بتاعتها باربع ادوار وبعدين امام المسئولين عن تطبيق القانون ترتفع الى 16 دور وساعات عمارات بتقع نتيجة هذا وتموت الناس اللي فيها طب كانوا فين المسئولين عن تطبيق القانون لما طلعت الادوار المخالفة وليه بعد ما تطلع الادوار يقولك لا دي مخالفة طب ليه ما شافش الدور... محمد صلاح: خليك معانا لسه الكلام مخلصش فاصل محمد صلاح: اتكلم الاستاذ سمير على المواطن استاذ سمير عندنا تقرير فيه اراء المواطنين ايه رايك نشوف راي المواطن فاصل مواطن1: انا معنديش فكرة الصراحة معنديش فكرة خلاص عن الجهاز نفسه مواطن2 : حاجات بتروح مننا اماكننا بتروح مننا اماكن كتير جدا في المحليات فلل بتتهد وبيطلع عماير دي ذكريات امكن لينما مش موجودة ليه عشان تطلع عماير فاحنا بنواجه حاليا مخطط غير حضاري التنسيق الحضاري عنده مهمة خطير جدا لابد الحفاظ عليها هي اعادة الذاكرة البصرية للمصريين مواطن3: انا اسمع عنه بس مقرتش او اعرف عنه حاجة قوي يعني بس اسمع بس مواطن4: يعني ايه جهاز تنسيق حضاري يعني ايه عمله ايه اختصاصه مثلا فاصل محمد صلاح: الراجل محتار ايه جهاز التنسيق الحضاري ايه اللي عمله بتحس بايه لما تسمع كده في الشارع؟ سمير غريب: لا ولا حاجة طبيعي لانه الاعلان زي ما بقول لحضرتك مهم جدا والاعلام حتى يعني برنامج واحد مش كفاية جرنان واحد مش كفاية لانه الناس مش قاعدة قدام اجهزة الاعلام على طول وكلها بتقرا الجرايد محمد صلاح: انت دورك ايه في الحكاية دي يعني تخلي اجهزة الاعلام تجري ورا شغلى الجهاز ؟ سمير غريب: بالشغل كل ما يشتغل الجهاز كل ما الاعلانات تجري معاه كل ما كان فيه اعلام كتير خصوصا في التليفزيون يعني انت عارف حضرتك نسبة الامية نمرة واحد نسبة قراء الصحف معى اللي بيسمعوا الراديو ويشوفوا التليفزيون لا تقارن وبالتالي التليفزيون والراديو هنا مهمين جدا محمد صلاح: استاذ سمير من اهداف الجهاز القومي للتنسيق الحضاري اعداد قاعدة بيانات عن كل المباني التاريخية الموجودة في البلد القاعدة دي اتعملت سمير غريب: اه مادي من ضمن الشغل مثلا في حاجات كتير الشغل الظاهر للناس هو اللي بيتم في الشارع انما الشغل العلمي اللي بيتم في مقر الجهاز دا محدش يحس بيه ومش مطلوب ان حد يحس بيه انما هو في نفس الوقت بيبقى مؤثر عند الحاجة اليه زي ما بتقول حضرتك قاعدة البيانات دي احنا قطعنا شوط كبير فيها في قاعدةة البيانات يعني مثلا ايه القانون بيقولك الجهاز مسئول عن الحفاظ على المناطق التراثية في مصر عشان تحافظ على المناطق التراثية في مصر اولا لازم تحدد ماهي هذه المناطق ومعايير الحفاظ يعني كيف تحافظ يعن منطقة تراثية زي منطقة القاهرة الخديوية ..مبنى ماسبيرو اللي احنا فيه يعتبر جزء منها فبتحدد حدود المنطقة بالشارع وبالزاوية وبالعنوان وبالرقم وبعدين تقول ازاي انا في حدود المنطقة دي اطبق عليها ايه عشان احافظ عليها دا كله شغل علمي بيتم على اجهزة كمبيوتر على خرايط بتتعمل وبيقوموا بيها الخبراء والعلماء رجل الشارع مايعرفش عنها حاجة انما النتيجة هو اللي يعرفها رجل الشارع في النهاية محمد صلاح: طب نتكلم عن الحدائق والجناين والاماكن الخالية مساحات الشوارع حتى الاماكن المخصصة جراجات او اماكن عشان الناس تركن فيها عربياتها مع الوقت تنقرض انتوا بتشتغلوا ازاي على الحكاية دي ؟ سمير غريب: بنشتغل حسب الحالة يعني مثلا فيه مشروع عملناه لمحافظة القاهرة منطقة ممصر الجديدة عايزين يعملوا جراج في منطقة قصاد الميريلاند انما احنا عملنا مشروع للمحافظة هذا الجراج ما يتعملش فوق الارض يتعمل تحت الارض ونعيد صياغة المنطقة اللي قصاده بحيث انها تبقى حديقة عامة مفتوحة غير الحديقة الخاصة بتاعة الميريلاند ، حديقة الميريلاند بتخشها بتذاكر انما الحديقة العامة ماتخشهاش بتذاكر وبالتالي يبقى فيه حديقة قصاد حديقة يردوا على بعض ويخففوا من الاثار البيئية الضارة في المنطقة وفي نفس الوقت نعمل جراج اذا كنتوا عايزين تعملوا محلات تجارية تحت لارض مع الجراج احنا معندناش مانع بحيث انكوا انتوا تعوضوا المصاريف ..عندك في ميدان التحرير نفسه محافظة القاهرة بتعمل جراج تحت الارض ضخم جدا قصاد المتحف المصري في ميدان التحرير دا ليه رد او مردود فوق الجراج هيتعمل تحت الارض فوق الارض هيتعمل ايه الفكرة الاولى انه الجراج يبقى فوق الارض اتلغت هذه الفكرة وبقى تحت الارض وتحت الارض كان المفروض يتعمل جراج ومحلات ومول تجاري فاحنا رفضنا المول التجاري اللي تحت الارض ومحافظ القاهرة وافق وفعلا تقرر انه هذا الجراج يبقى جراج فقط بدون محال تجارية دلوقت بيتنفذ تحت الارض جراج فقط بدون محلات تجارية محمد صلاح: طب ميدان رمسيس من فوق سمير غريب: ميدان رمسيس اتعملت له مسابقة دولية وحصل ضجة برضه على هذه المسابقة الدولية لاعادة التخطيط والتصميم العمراني لميدان رمسيس والمنطقة المحيطة بيه مش الميدان بس واتعملت ضجة برضه عليه هي مسابقة دولية وليه مما تبقاش محلية الخلاصة لجنة التحكيم هتحكم المسابقة في الاسبوع الاول من سبتمبر القادم هنشوف المشروع الفائز بالجايزة الاولى لميدان رمسيس والحكومة تنفذه لما هتنفذه الحكومة وقت ما هيطلع المشروع ارجو من سيادتك انك تعلن للمشروع الفائز ونتكلم عنه لانه المشروع الفائز هيكون وضع حلول للجراج للمناطق الخضرا للمداخل والمخارج لمسارات مرور المشاة ومسارات مرور العربيات للمباني المحيطة بالميدان كل الحركة المرورية لكوبري اكتوبر اللي بيعدي عالميدان فيه حلول نتوقع انها حلول على اعلى مستوى ياتي بها متسابقين فائزين محمد صلاح: بس انا سمعت انه فيه حلول مستحيلة يعني انه من بين المقترحات مثلا تغيير مسار كوبري اكتوبر سمير غريب: وراد جدا انه يكون فيه تغيير لمسار كوبري اكتوبر انا شخصيا من انصار تغيير مسار كوبري اكتوبر من ميدان رمسيس محمد صلاح: هيمشي فين ؟ سمير غريب: دي الحلول بق اللي يقولوها المتسابقين انما عايز اقول لحضرتك مبدا في العمارة وفي العمران ليس هناك مستحيل في مجال العمارة والعمران كل شئ مكن يتم افكر حضرتك معابد فيلة عشان السد العالي اتنقلت مفيش مستحيل ميدان رمسيس دا كله ممكن يتنقل محطة مصر دي كلها ممكن تتشال زي ما بتشيل علبة كبريت وتحطها في حتة تانية انا من المؤمنين ان مصر دولة لديها كل الامكانيات التي تصنع دولة متقدمة محمد صلاح: خليك معانا لسه الكلام مخلصش فاصل محمد صلاح: كلام وردي وجميل ان الواحد يسمع كلام وردي المهم على ارض الواقع ..معانا مداخلة تيجي نسمعها سمير غريب: ايوة بس عايز اقول لحضرتك ان الورد جزء من الواقع محمد صلاح: الورد جزء من الواقع نشوف الدكتور حماد عبد الله فاصل د/ حماد عبد الله- عضو اللجنة الاقتصادية بالحزب الوطني: جهاز التنسيق الحضاري بوضعه الحالي موضوع عليه امال عظيمة جدا نتيجة و رفع العشوائيات اللي موجودة في الشارع على سبيل المثال حضاتكم لو ماشيين على الطريق الدائري هتشوفوا طوب احمر دون تشطيبات معمارية من المفترض ان بعد صدور هذا القانون لا يمكن لاي حاصل على ترخيص مباني ان ينهي المبنى دون استكمال تشطيباته الخارجية بالذات ومش ممكن يبقى فيه تعدي على الواجهات المعمارية ومش ممكن يبقى فيه تعدي على الشارع بوضع لافتات بشكل غير محترم ومش ممكن يبقى فيه تعدي على شارع باحتلال الارصفة ومش ممكن يبقى فيه تعدي على الحدائق باخذ الحدائق العامة لاستخدامها استخدامات فردية او عشوائية انا بعتقد ان جهاز التنسيق الحضاري هي فكرة محترمة شملها قانون البناء الموحد لو استطاع هذا الجهاز ان يكون له انياب بمعنى انه لا يصح ابدا لاي محافظة ان تقوم باعطاء تراخيص او السماح بتراخيص حسب القانون الجديد المكاتب الاستشارية او المكاتب الهندسية التي تقوم بهذا الدور لا يسمح لهم بانهاء اعمالهم الموقف كله تحت الانشاء ومازال فاصل محمد صلاح: دكتور حماد عبد الله شايف ان الجهاز محتاج انياب ..محتاجين انياب واظافر كمان؟ سمير غريب: يعني الدكتور حماد عبد الله كلامه بيعبر عن امال لتصحيح الواقع العمراني اللي احنا فيه بس انا الحقيقة ما بحبش استخدم انياب انا محبش العنف في التعامل مع العمران محمد صلاح: مش عنف ولا حاجة تطبيق القوانين بس سمير غريب: مظبوط.. انا مابعتبرش ان الكلام اللي بتقوله حضرتك محتاج الى انياب فالتفاهم مع المسئولين والتفاهم مع المواطنين ممكن يجيب نتايج افضل بكتير من الانياب محمد صلاح: هي البلد حصل لها ايه في موضوع العشوائية دا يعني الدكتور حماد عبد الله جاب سيرة الطريق الدائري شايف العشوائيات المشكلة انه اه بنصرف وفيه مجهود على معالجة اثار العشوائيات بس كل ما تعالج في منطقة العشوائيات بتضرب في حتة تانية الجهاز اخباره ايه في العشوائيات يا استاذ سمير سمير غريب: اه بس انا عايز طبعا الدكتور حماد عبد الله هو شارك في مناقشة مواد تنسيق قانون التنسيق الحضاري هو حضر العمليات التحضيرية الاولى فهو عارف القانون كويس وعارف اللي فيه وعراف برضه الدكتور حماد انه من ضمن اللي موجود في اللايحة التنفيذية للقانون عدم ترك البيوت بدون تشطيب عدم ترك المباني بدون تشطيب الواجهات الخارجية وبالتالي اللايحة التنفيذية للقانون بيلزم اصحاب جميع المباني سواء اذا كانوا على الطريق الدائري او غير الدائري ان هم يشطبوا الواجهات الخارجية محمد صلاح: اللي حصل العكس سمير غريب: القانون لسه طالع اول امبارح اواخر 2008 لسه طالع الحاجة التانية انه أي قانون في العالم ما بيتنفذش بزرار الحاجة التالتة ان علشان تنفذ القانون لازم توفر وسائل تطبيقه واحد صاحب بيت معندوش فلوس يشطب الواجهة بتاعته هتعمله ايه نموته انما لازم نساعده على تشطيب واجهته هنا الجمعيات الاهلية ممكن تساعد فيه جمعيات اهلية ومؤسسات عمل مدني وقطاع خاص ممكن يتبرعوا تبرعات عينية ومادية بحيث ان احنا نساعد من لا يملك تشطيب واجهة المبنى بتاعه او البيت بتاعه من بره ان احنا نساعده على تشطيبها وفي جانب من شغل الجهاز القومي للتنسيق الحضاري مع المجتمع المدني والجمعيات الاهلية عملنا هذا في القاهرة وعملناه في اسوان يعني فيه شغل مع جمعية اهلية في اسوان وفيه شغل في القاهرة مع جمعيات اهلية في القاهرة .... الى اخره فدي وسائل القانون بينص عليها انما لازم نساعد الناس على تطبيق القانون مش بالعافية محمد صلاح: نتعامل مع روح القانون قصدك طبقا للظروف المحيطة ؟ سمير غريب: العشوائيات مشكلتها كلها احنا السبب فيها يعني المجتمع السبب فيها المسئولين السبب فيها كل منطقة عشوائية كان ممكن ما تبقاش عشوائية إنما بالثقافة المصرية السائدة بقت عشوائية نحن نريد تغيير الثقافة المصرية في المجتمع عشان المجتمع دا يتقدم وعشان التنسيق الحضاري يتحقق محتاج تغيير تفكير وسلوك المواطن العادي ومحتاج أيضا تغيير تفكير وسلوك المسئول نفسه فممكن النتيجة هتبقى اكتر من رائعة محمد صلاح: طيب العشوائيات بنتكلم عن روح القانون وعن وسائل مساعدة المواطن لكي يلتزم بالقانون هنتبع نفس الاسلوب مع التعامل مع فوضى الاعلانات؟ سمير غريب: انا اصلي عندي معايير للاعلانات عارف ان اللي حاصل بيضرب أي معايير في أي حاجة ، مفيش بلد في العالم فيها فوضى وبشاعة اعلانات الا في مصر من كتر ما بنشوف اعلانات ما بنفتكرش حاجة عينك بتختلط فيها الحابل في النابل فالاعلام ما بيأثرش هنا بيصبح غير ذي معنى فوضى ولذلك القانون هنا واللايحة التنفيذية ودليل اسس ومعايير الاعلانات اللي المفروض يناقشه قريب المجلس الاعلى للتخطيط التنمية العمرانية برئاسة الدكتور احمد نظيف كل دا تطبيقه كفيل بازالة كل هذه الفوضى المشكلة انك انت لما هتزيل هذه الفوضى هتواجه باصحاب مصالح مادية حقيقية هنا لما تيجي نتناقش في هذا الموضوع نقول دي اصحاب مصالح عدد محدود من الشركات محمد صلاح: في ناس وقفت ضدك في الاعلانات ؟ سمير غريب: لغاية دلوقت لا .. لاني انا اجتمعت بالطريقة بتاعتي اللي هي مفيهاش انياب اجتمعت مع مجلس ادارة الجمعية المركزية للاعلام فالحقيقة الناس اللي قعدت معاهم كلهم ناس محترمين ومتفاهمين ووصلنا مع بعض الى حاجتين اتفقنا على بشاعة العشوائية في الاعلانات المصرية دلوقت في الواقع وعلى ضرورة التدخل لتهذيبها احنا اتفقنا على هذا انما مجلس ادارة الجمعية المصرية للاعلان ما هماش اصحاب الاعلانات اللي شغالة في مصر فيه عشرات الشركات الاخرين شركات الاعلان اللي موجودة فاللي عايز اقوله ان انا بعتمد على التفاهم بين الجهاز وشركات الاعلان الموجودة على تطبيق القانون محمد صلاح: سؤال محدد لو في اعلان دلوقت انت شايفه انه اعلان ضار بالبيئة بالابعاد البصرية بقوانين المرور حتى تخلي الناس تعمل حوادث وخدت قرار انه انه يتشال بتقدر تشيله ؟ سمير غريب: انا شخصيا ما بشيلوش اللي بيشيلوا بالعقل كده اللي اداله الرخصة لان انا ما اديتش رخصة الاعلان عشان اشيله فبخاطب المحافظ اللي تحت مسئوليته اللي اداله الرخصة نرجع تاني هئية السكة الحديد عايزة تحط اعلانات في اراضيها على شريط القطر في الجيزة فلما بدا الجهاز يسمع في مجال الاعلان وليه كلمة وبيسيطر على الاعلانات في مصر راح رئيس هيئة السكة الحديد رئيس الشركة الخاصة بالموضوع في وزارة النقل بعت لي يقولي ممكن احط اعلان في الحتة دي والحتة دي فدا نرجع تاني لسؤال حضرتك الاولاني عن تاثير الجهاز طب ما دا وجه من اوجه تاثير الجهاز في الواقع انه بداوا اصحاب الجهاز يسالوا قبل ما يعملوا المشروع اللي هما عايزين يعملوه عايز اقولك في الاعلانات برضه قانون صريح واللايحة التنفيذية بتقولك ممنوع تضع اعلانات فوق المباني المتميزة تراثيا والمباني التاريخية محمد صلاح: كل المباني التاريخية في وسط البلد عليها اعلانات ؟ سمير غريب: هتتشال محمد صلاح: طب خليك معايا لسه الكلام مخلصش فاصل محمد صلاح: عندنا وعد انه كل الاعلانات اللي موجودة فوق المباني التاريخية في مصر هتتشال..عندنا مداخلة تانية ..نشوف الاستاذ عبد العظيم درويش فاصل عبد العظيم درويش- مدير تحرير الاهرام: بضمير مرتاح استطيع ان اقول ان على مدى 5 سنوات منذ تاسيس جهاز التنسيق الحضاري انه لم يستطع او يقنع الراي العام المصري باهمية دوره ولم يستطع ان يقنع المواطن المصري البسيط بهذا الدور الذي اعتبره حيوي للغاية ربما هناك العديد من الاسباب التي حالت دون ان يكون التنسيق الحضاري قادرا على هذا لااقناع وربما يكون برضه ان هناك قصور في وسائل الاعلام المختلفة وتبصير المواطن باهمية هذا الجهاز الحيوي بس في الحالة دي ممكن نلقي باللائمة على الجهاز نفسه اللي هو لا يسعى الى الراي العام من خلال وسائل الاعلام والى وسائل الاعلام برضه اضافة الى ان المواطن نفسه يعاني من مشكلات كثيرة يعتقد معها ان مسالة التنسيق الحضاري وان مسالة الاهتمام بالبيئة قضايا رفاهية او ترفيه معندوش المجتمع رفاهية انه يشغل نفسه بمثل هذه القضايا في حين انه لهذا الجهاز اهمية ودور كبير احنا يكفينا بنظرة بسيطة لكل المواقع في مصر هنكتشف ان هناك تشويه متعمد وتلطيخ بالالوان واطوال المباني وشكلها في مختلف المجالات دون ان تمتد اليها يد التطوير في بعض العواصم العالمية وبعض الدول نستطيع ان احنا نرصد ان هناك لون مميز في كافة العمارات السكنية ولا يتغير مثل هذا اللون انما في مصر ان هناك الوان تنافس اشارات المرور الاخضر والاحمر والاصفر وغيرها من هذه الالوان فاصل محمد صلاح: استاذ عبد العظيم درويش بيقول تلطيخ للالوان وتشويه متعمد عندك تعليق ؟ سمير غريب: طبعا استاذ عبد العظيم درويش اولا صديق عزيز وزميل ومدير تحرير الاهرام وكنت اتمنى ان هو يشارك الجهاز في توصيل كلمته للناس اللي هو قال ان الجهاز ما اثرش فيهم انا كان نفسي الاستاذ عبد العظيم درويش نفسه بمكانته الصحفية وبقلمه وبمقالته الاسبوعية كل يوم سبت في الاهرام انه يبقى دعم وسند للجهاز يأثر يبقى هو احد وسائل تاثير الجهاز في المجتمع والمواطن المصري وانا اعتقد ان الاستاذ عبد العظيم لن يتاخر في مساعدة الجهاز محمد صلاح: قولي عشان التاثير اللي بتتكلم عليه دا واتكلم عليه استاذنا عبد العظيم درويش كنت تتمنى ان الجهاز يكون تابع مباشرة لمجلس الوزرا زي جهاز الرياضة وجهاز الشباب ولا تبعيته لوزارة الثقافة تتوافق مع طبيعة عمله وفكرته من الاول ؟ سمير غريب: اولا الجهاز نشأ بقرار جمهوري القرار الجمهوري معناه ان رئيس الجمهورية مقتنع بالفكرة محمد صلاح: انا بتكلم على آليات العمل يا استاذ سمير سمير غريب: ما انا بقولك ثانيا انه افتتحت مقرالجهاز السيدة سوزان مبارك وبترعى اعماله ثالثا رئيس الوزراء نفسه ما بيتاخرش عن أي طلب انما مكان الجهاز في وزارة الثقافة هو مكان مناسب جدا لانه مهمته في تحقيق القيم الجمالية في الفراغ العمراني فدي مسالة ثقافية في الاساس محمد صلاح: انا عارف طبعا انك صديق الدكتور زاهي حواس لكن انتوا اختلفتوا بشدة حول مشروع القلعة ابراج القلعة ايه مدى التعاون والتعارض هنا؟ سمير غريب: يعني في تعاون مفيش تعارض لا يجب ان يكون هناك تعارض بين التنسيق الحضاري والاثار بس انا مجال عملي مختلف عن الاثار هو معني بالمباني الاثرية انا معني بمناطق ومباني التراثية هناك فرق بين التراث والاثر فانا شغال في التراث ومع ذلك فيه تعاون بينا يعني مثلا من مشروعات الجهاز اللي بيعملها دلوقت مشروع تنسيق حضاري لسه ما اتنفذش على الورق يعني في منطقة نزلة السمان مين اللي طلب ان التنسيق الحضاري يخش نزلة السمان الدكتور زاهي حواس وهو ابدى استعداده بموافقة الاستاذ فاروق حسني وزير الثقافة انه الاثار تمول مشروع التنسيق الحضاري في نزلة السمان ..ليه..لان دا مجال مشترك ما بين الاثار والتنسيق الحضاري نزلة السمان دي لازقة في ابو الهول وفي هضبة الهرم وفي منطقة الاهرامات وبالتالي يهم قوي الدكتور زاهي حواس ان هذه المنطقة تبقى فيها تنسيق حضاري لانها مدخل المنطقة السياحية محمد صلاح: بعد كام سنة ممكن نقول ان مصر او المدن المصرية بقت منسقة ؟ سمير غريب: لما يتحول التنسيق الحضاري من مجرد جهاز قومي حكومي الى مشروع قومي معني بيه كل مواطن مصري وليست الحكومة المصرية فقط محمد صلاح: الحد من العشوائية التشبث بالفراغ العمراني البحث عن قيم الجمال سواء في مبنى او في اعلان او حتى في الفراغ مهمة جهاز قومي يعني بالتنسيق الحضاري يأمل القائمين عليه انه يتحول الى مشروع قومي يخص كل مواطن وكل ادارة حكومية ..قال رئيس الجهاز القومي للتنسيق الحضاري الاستاذ سمير غريب كلامه النهاردة كان كلام جميل كلام معقول اكيد كلام ........ مسئول ,خلص الكلام ...سلام نلتقي في الحلقة المقبلة
