مساحة للرأى

رانيا هاشم: اهلا بكم في مساحة للراي .. حول الاستفتاء على دستور مصر يدور موضوع الحلقة مع ضيفي اللواء محمود شرف مساعد اول وزير لقوات الامن سابقا نتكلم عن الاجراءات الامنية والناس خايفة خاصة انه فيه تصريحات من مصدر امني في جريدة الوطن حط خريطة للاخوان الارهابيين بيقولوا انهم عاملين خطة دقيقة لافشال الدستور وتفجيرات في اللجان ووقوع عدد كبير جدا من الضحايا
اللواء / محمود شرف: بسم الله الرحمن الرحيم.. هو طبعا المحاولات مستميته لافشال خارطة الطريق ولكن اعتفقد ان اصرار الشعب على تحقيق ذاتع وان بلده تبقى احسن بلد في الدنيا محدش هيقدر يفشلها ولا يعطلها .. جهاز الامن جهاز قوي وبدأ يتعافى والدليل الحوادث الاخيرة من التفجيرات الجهاز جابها وأمن حاجات كتيرة رجال الشرطة وطنيين بيحبوا بلدهم والدليل على كده عدد رجال الشرطة اللي سقطوا عدد كبير من الظباط والمجندين وغير الافراد وغير الاصابات وكل دا بيخلي جهاز الشرطة يصر انه يقدر يحقق الامن للمواطن المصري
رانيا هاشم: بس الناس بتنتظر من جهازالشرطة انه بيمنع وقوع الجريمة او التفجيرات مش ان هو يقبض على الناس
اللواء / محمود شرف: مظبوط بس في الظروف اللي احنا فيها ازم يكون فيه بعض الحوادث ولكن حتى لما تقع جريمة الحمد لله رب العالمين بننجح في الوصول اليها بسرعة وكل جهاز الشرطة يصل الليل بالنهار
رانيا هاشم: عشان نطمن اكتر دلوقت انا داخلة اللجنة ازاي ضامنة 100 % انه اللجنة دي مفيهاش مفرقعات ولا عبوات ناسفة ايه الحدود الامنية اللي تخليني اطمن
اللواء / محمود شرف: اللجان جهاز الشرطة بيأمنها قبل المدة دي بمراحل والكلاب بتكشف على المفرقعات غير ان الأمن بيأمنها بعد كده وبيقعد عليها حراسة والقوات المسلحة مشاركة معانا في التامين ومحيط اللجنة بتؤمن بالكامل وتفتش بالكامل
رانيا هاشم:امبارح وزارة الدفاع اذاعت تقرير عن استعدادات القوات المسلحة لتامين اللجان لكن مشفناش حاجة من الداخلية لغاية دلوقت .. ليه..؟
اللواء / محمود شرف: يعني نذيع الخطة ونعمل فيلم..!! احنا خطتنا موجودة من زمان وفيه خطط بديلة والوزير قاعد طول النهار وفيه شغل على مستوى لا تتخيليه حضرتك
رانيا هاشم: منذ عدة ايام كان فيه محاولة لهروب عدد من المساجين والاخوة الاقباط كانوا بيحتفلوا بالعيد فقلت لمدير الامن هو ليه حصل كده قال دا بس النهاردة عشان قوات الامن اتجهت لتامين الكنائس فتقريبا القوات الموجودة لتامين الكنائس فتقريبا القوات بتاعة الاقسام كانت قليلة ترد ازاي على الموضوع دا
اللواء / محمود شرف: كل حاجة في العالم الشرطي لازم تتاخد بحساب ومحاولات هروب من حجوزات الاقسام على طول كل يوم في كل اسبوع انما مش حكاية اني اخد القوات هنا اوديها على هنا وانا لا أذيع سرا اننا بنرحل المساجين لما يبقى فيه حدث جلل زي الاستفتاء وبنرحلهم على السجون العمومية ..
رانيا هاشم: من ضمن الحاجات اللي قالقة الناس اللي هي تصويت الوافدين في اللجان الانتخابية ايه الضوابط اللي ممكن تكون موجودة عشان الوافد ما يصوتش اكتر من مرة
اللواء / محمود شرف: في العملية الانتخابية بتشوفي ناس تروح تنتخب وخلاص.. دي بتاخد مجهود فظيع من مدير الادارة العامة للانتخابات اللواء سيد ماهر ومساعد الوزير والتنسيق مع اللجنة العليا للانتخابات.. والحبر السري تم تصنيعه في وزارة الصناعة
رانيا هاشم: الخطة البديلة للتنظيم الارهابي بيقول انه هيعملوا تصويت على اكتر من فرد في كل لجنة بحيث انه يبقى في طعن وانه في تزوير في الانتخابات وربما يصل حجم الاستفتاء الى عدد كبير فبداوا يتم الطعن على انه رقم مبالغ فيه
اللواء / محمود شرف: لا ارى قلق لانه هناك جهد من الشرطة والقوات المسلحة لتامين هذه الانتخابات وهناك مواد تدرس عن طريق اكاديمية الشرطة وهناك 18 معهد تدريبي للظباط فالتدريب المستمر هام جدا في العملية الانتخابية والمشكلة في ربط التدريب بالواقع الامني والواقع دلوقت نتغير عن الواقع من سنة وسنتين ..وهذه المعاهد يدرس فيهم تامين الانتخابات والعملية الانتخابية من وهو طالب في كلية الشرطة
رانيا هاشم: م ضمن الحاجات اللي بتتقال انه تنظيم الاخوان انه اللي هيقول نعم للدستور معناه انه مرسي هيرجع وقالوا الصعيد خط احمر دا صحيح عشان التار
اللواء / محمود شرف: الصعايدة بيتعاملوا بموروثات الشرف والكلمة ويمكن دا احد الاسباب وانما الصعيد هينزل الاستفتاء واعتقد انه هيكون نسبة كبيرة هناك
رانيا هاشم: صحيفة النيويورك تايمز اعتبرت الاستفتاء مؤشر على الرفض الشعبي لجماعة الاخوان الارهابية صح ولا غلط
اللواء / محمود شرف: هما عارفين كويس انه من يوم 30 فيه رفض شعبي وهفكر حضرتك انه هيبقى عرس ديموقراطي
رانيا هاشم: فيه عقوبة على كل من لم يشارك في التصويت
اللواء / محمود شرف: اه فيه 500 جنيه
رانيا هاشم: ازاي هتتعمل
اللواء / محمود شرف: كل دي اجراءات وتحديد العقوبة من اللجنة العليا للانتخابات وبيبقى مساعد الوزير بيبقى عضو في اللجنة العليا للانتخابات وكل ضوابطها بتتنفذ عن طريق انه بيوصلوها للوزارة والوزير لا يتوانى عن اي حاجة في مصلحة بلده
رانيا هاشم: شكرا لك والى اللقاء