حديث المدينة

مفيد فوزى : أسعد الله أوقاتكم هذا الرجل صعد السلم من أوله يعنى كان مدير محطة وبعدين بقى ضابط حركة وبعدين بقى مدير إقليمى وبعدين بقى وزير للطيران المدنى وزير تقنى مهنى فاهم الملعب كله لم يهبط على الإطلاق بطائرة هليوكوبتر على وزارة الطيران المدنى بإيجاز شديد يقلع بطائرة الحوار معا أنا وسمير امبابى وزير الطيران المدنى الوزير سمير امبابى ما كلمة السر فى نجاح موسم الحج هذا العام
سمير امبابى : أولا أحب أرحب بك يا أستاذ مفيد انت وفريق العمل فى وزارة الطيران المدنى وبشكرك على المقدمة القيمة اللى حضرتك قلتها طبعا بالنسبة لموسم الحج أنا أحب أحيى شركة مصر للطيران لإنها شركة محترفة جدا فى عمليات نقل الحج الحمد لله احنا بنخطط لموسم الحج من قبله ب 3 ، 4 أشهر قبل ما يخلص الموسم بنخطط للموسم اللى بعده
مفيد فوزى : كام موسم حج حضرته ؟
سمير امبابى : ده ال 22
مفيد فوزى : ال22
سمير امبابى : آه
مفيد فوزى : أد إيه دور الجانب السعودى
سمير امبابى : والله الإخوة فى السعودية أنا شخصيا علاقتى بهم طيبة جدا
مفيد فوزى : والسنة دى عمرها أد إيه
سمير امبابى : عمرها حوالى 30 سنة وأكثر
مفيد فوزى : لا ده أنت مواطن نصف مصرى ونصف سعودى
سمير امبابى : أنا قضيت فترة كبيرة فى السعودية والحقيقة إن الإخوة السعوديين بيتميزوا إن هم بيحفظوا الود دايما
مفيد فوزى : عدد عفوا الوفيات هذا العام كبيرة لا أدرى السبب فى الحج
سمير امبابى : أنا واخد بالى يا فندم مفيش سبب غير الناس كبر سنهم والرحلة بتبقى شاقة جدا عليهم فربنا بيرحمهم إن هم يموتوا فى الرحلة المقدسة دى وصدقنى عدد كبير بيبقى طالع وفى دماغه وبيقول يا ريت أموت وأدفن هناك أنا بشفق عليهم شعور شخصى عندى نسبة كبيرة وربنا بيكرمهم ويحقق لهم بس هو على فكرة النسبة قليلة مش زيادة السنة دى ولا حاجة يمكن التركيز عليها شوية لكن هى النسبة المعتادة كل سنة
مفيد فوزى :يعنى فى مثل هذا الموسم يحدث وفيات من هذا النوع
سمير امبابى : آه الرحلة شاقة وغالبا بيبقوا كبار فى السن
مفيد فوزى :حضرتك كنت بتقول لى قبل ما نسجل إن كل واحد محوش فلوس
سمير امبابى : رحلة عمرة يا فندم بيقعد يحوش فيها طول عمره لما بيطلعوا التذاكر بيطلعوا عملات انقرضت لإن بتبقى رحلة عمرة بيقعد طول عمره يحوش فيها عشان يعملوا رحلة
مفيد فوزى : وهى تستحق
سمير امبابى : تستحق طبعا
مفيد فوزى : عايز أسألك إن مطار زى مطار دبى مطار زى مطار فرانكفورت بانكوك إن الطيارة تجيه يطلق عليها وأنت تدرى جيدا مطارات محورية حيث إن أكثر من شركة طيران بتجرى وراء الراكب هل مصر مطار محورى
سمير امبابى : هو مطار القاهرة طبعا طول عمره مطار محورى يمكن قبل المطارات اللى حضرتك بتقول عليها دى ومطار القاهرة كان بيمثل نقطة تجميع وتوزيع للحجاج بالذات من القارة الإفريقية يمكن احنا تراجع دورنا خلال الفترة اللى فاتت بسبب المطارات الجديدة اللى حضرتك بتقول عليها وعوامل الجذب الشديدة اللى موجودة فى المطارات دى واحنا دلوقتى بنحاول إن احنا نلحق الراجل ده
مفيد فوزى :يعنى أنت فى الطريق لتطوير المطار
سمير امبابى : آه
مفيد فوزى : من فضلك وضح للناس يعنى إيه محورى عشان يبقوا معاك فى الصورة
سمير امبابى : المطار المحورى اللى هو بيبقى نقطة ارتكاز بالنسبة لحركة الطيران الناس تجى له وبعدين تتوزع منه كإن فيه تذكرتين بتستفيد بهم مصر للطيران يعنى الركاب بييجوا المطار محورى ويتوزعوا منه على عدة مطارات ييجوا لكذا نقطة ويتوزعوا لكذا نقطة
مفيد فوزى : طيب أنا كنت عايز أسألك على طقم الضيافة فى فترة من الفترات عملوا إضراب حضرتك قابلت الإضراب واستطعت إنك تحتويه وكان لهم 23 مطلب حضرتك حققت 22 مطلب والمطلب ال23 لم يتحقق أظن إن هو المطلب المادى
سمير امبابى : آه يا فندم
مفيد فوزى : المطلب المادى هل تقبلوا الفكر ببساطة
سمير امبابى : هو طبعا الموضوع تطور لدرجة أنا ما كنتش أحب إنه يتطور لها يعنى أنا عايز أقول لحضرتك إن احنا كنا قعدنا واتفقنا واتكلمنا وكان فيه حاجات هم كان لهم حق فيها لإن هم تراكمات إدارية على مدى سنوات طويلة
مفيد فوزى : زى إيه يا فندم
سمير امبابى : يعنى اتكلموا مثلا نظام معين فى ساعات التشغيل بتاعتهم المفروض إن هم كانوا بياخدوه بالشهر فبيتأخر عليهم بالسنتين ما يقبضوهوش يعنى حاجات زى دى
مفيد فوزى : كل ده كان متراكم
سمير امبابى : كان متراكم فعلا
مفيد فوزى : واضح إن حصلت انفجارة
سمير امبابى : ممكن نوصفها بكدة آه
مفيد فوزى :طيب المطلب ال23 اللى هو المطلب المادى قبلوا ازاى تأجيله هو التأجيل وللا إيه بالضبط والله حضرتك قلت إيه
سمير امبابى : ممكن نقول تأجيل مش هم بس اللى طالبوا الناس كلها بتطالب بتحسين أوضاعها لكن الأسلوب اللى احنا منتهجينه فى الحقيقة
مفيد فوزى : حتى الطيارين
سمير امبابى : حتى الطيارين
مفيد فوزى : بس علاقة الطيارين يا معالى الوزير إلى حد كبير يعنى متفاهمين أكثر أقدر أقول كده
سمير امبابى : آه طبعا بالتأكيد
مفيد فوزى : أكثر من أطقم الضيافة
سمير امبابى : لا مش هنحدد بس دول أكثر من غيرهم طبعا لأن أسلوب إعداد الطيار وخلفياته الدراسية والكلام ده بنقدر نقول إن دول شريحة معينة
مفيد فوزى : أنا بسألك لاقترابك كعشرة على مدى العمر كام سنة تقريبا
سمير امبابى : 37 سنة
مفيد فوزى : 37 سنة أمسك الخشب طيب أنا عايز أسألك لما تبقى فى أطقم الضيافة عاوزين يبقوا قطاع مستقل ويبقى فيه رجل مسئول عن أطقم الضيافة والطيار مسئول عن الطيارة بأطقم الضيافة ألا تشعر بأن هناك ازدواجية فى القيادة
سمير امبابى : لا
مفيد فوزى : ليه
سمير امبابى : لإن التيار طول ما هو على طيارته هو القائد وهو المدير بتاع الرحلة وكل ناس تابعين له طول ما هو فى الجو أو على الطيارة والطيارة واقفة على الأرض لكن غير كده الحاجات الإدارية والكلام ده يعنى أنا كنت مع إنشاء قطاع للضيافة
مفيد فوزى : ويبقى مسئول عنه شخص معين
سمير امبابى : ويبقى مسئول عنهم شخص معين ده بيختلف عن لما بيبقى على الطيارة يا فندم
مفيد فوزى :هو حضرتك بتعمل إعلانات عن مصر للطيران فى السى إن إن
سمير امبابى : بنعمل كله
مفيد فوزى : ألا يمكن إن ده تلام عليه
سمير امبابى : ليه يا فندم
مفيد فوزى : معرفش أنا بسألك
سمير امبابى : شوف حضرتك شركات الطيران المنافسة لنا بتعمل إعلاناتها فين بتشترى ملاعب كورة وبتعمل إعلاناتها بملايين الملايين احنا الbudget بتاعنا بتاع الإعلانات متواضع جدا يعنى
مفيد فوزى : أنا حبيت أسألك لشرح وجهة نظرك إذن كونك بتعمل إعلانات فى السى إن إن لا تقابل بأى نوع من اللوم لإن ده إعلان لطيران البلد
سمير امبابى : طبعا يا فندم احنا الزبون بتاعنا مش مصرى احنا بنستقبل شريحة خارجية يمكن أكثر من المصريين مع احترامى طبعا إن احنا أساسا شركة مصرية لكن بنستهدف شرائح من كل أنحاء العالم يعنى
مفيد فوزى :طيب حضرتك عندك أراضى كبيرة جرداء لمصر للطيران وبيحدث لها عملية استثمار أنا أعرف حالات لحد بيعمل أوتيل وأوتيل خرافى وعظيم وترك المسألة لأنها باستمرار محل تساؤل ومحل اتهام ما التعليق
سمير امبابى : أنا طبعا عارف الحالة اللى حضرتك تقصدها يعنى والمستثمر العربى اللى سحب فلوسه من البلد الحقيقة بعد الثورة حصل نوع من ال...
مفيد فوزى :سحب أد إيه يا فندم
سمير امبابى : كل استثماره تقريبا اللى كان حاطتها فى المشروع ده تقريبا سحبها من غير أرقام يعنى بس هو سحب استثماراته كلها
مفيد فوزى : هل تشعر بحزن
سمير امبابى : بالتأكيد
مفيد فوزى : طيب وأنت وزير للطيران كيف يمكن إنك انت تحافظ وتحتوى من يأتى لاستثمار قطعة أرض جرداء من أراضى مصر للطيران
سمير امبابى : أنا عايز أقول لحضرتك واقع يعنى أنا مرة وأنا فى جدة نزلت فتحت المكتب بالليل وجبت موظفين عشان نبيع تذكرة
مفيد فوزى :عشان تبيع تذكرة
سمير امبابى : آه والله
مفيد فوزى : فما بالك
سمير امبابى : باستثمارات بالمليارات يعنى تأكد حضرتك إن أى حد بيجى لنا بمشروع جادى وفيه مصلحة البلد احنا اللى بنجرى وراه
مفيد فوزى : أصل أنا رنت فى ودنى قوى كلمة وسحب فلوسه
سمير امبابى : سحب استثماراته فعلا ما أنا بقول لحضرتك الظروف اللى حصلت بعد الثورة
مفيد فوزى :سحبها ليه يعنى فهمنى برضه عشان أفهم
سمير امبابى : بعد الثورة حصل نوع من القلق العام وعدم الاستقرار فى الاستثمارات وفى الإدارات وبالتأكيد ده بالطبع على مخاوف عند المستثمر الأجنبى والعربى
مفيد فوزى : فشعر إنه مقدم على أشياء غير مأمونة
سمير امبابى : آه فقال لك أحسن أسحب استثماراتى وسحبها
مفيد فوزى : كم من الوقت تستمر هذه المسألة
سمير امبابى : والله انت عارف حضرتك احنا صناعة هاشة جدا سواء فى الاستثمار أو فى غيره أو حتى الراكب نفسه اللى بييجى مصر فلما الأمور تستقر واحنا ابتدينا فعلا نسترد الاستثمارات أنا أحب إن أنا أبشر حضرتك إن احنا ابتدينا نسترد الاستثمارات
مفيد فوزى : كام فى المائة من عافية مصر اللى استرد بأمانة
سمير امبابى : 65%
فاصل إعلانى
مفيد فوزى : إيه الخطوط اللى توقفت وحتى الآن متوقفة
سمير امبابى : احنا كنا بنعمل 10 رحلات فى الأسبوع لليابان
مفيد فوزى : لليابان
سمير امبابى : طوكيو وأوزاكا
مفيد فوزى : دلوقتى بقت كام
سمير امبابى : دلوقتى احنا شغالين ب 4 بس
مفيد فوزى : 4
سمير امبابى : آه لكن أوزاكا هتبتدى من أول ديسمبر
مفيد فوزى : فيه خط ديسيندوف يا فندم
سمير امبابى : متوقف حاليا يا فندم
مفيد فوزى : واقف ليه
سمير امبابى : كنا قللنا تشغيل نيويورك
مفيد فوزى : قبل كده كان كام رحلة
سمير امبابى : كان كبير يا فندم
مفيد فوزى : كان كثير
سمير امبابى : وكان عندنا خطة طموحة إن احنا نفتح واشنطن ونفتح ترونتو وكل ده توقف بسبب أحداث الثورة
مفيد فوزى : هل عندك خطة ثانية لعودة هذه الخطوط
سمير امبابى : بالتأكيد يا فندم وإن شاء الله فى الصيف القادم هيبقى فيه نقط جديدة هتتفتح أبشرك يعنى
مفيد فوزى : هسألك سؤال شخصى بحت مالوش علاقة أبدا بالطيران وانت قاعد جنبى فى طيارة طهواى الناس اللى فى المليونيات اللى بتتعمل المعلومات دى تفيدهم اللى حضرتك بتقوله ده إن الخط الفلانى وقف إن الخط الفلانى ما اشتغلش إن الخط الفلانى كان عندنا 10 طيارات بتسافر بقت طيارة واحدة هل الناس عندها
سمير امبابى : بالتأكيد لا
مفيد فوزى : بالتأكيد لا
سمير امبابى : وفيه أساليب كثيرة قوى للتعبير عن الرفض غير إن احنا نبين إن البلد فى حالة عدم استقرار اللى بتبان دى
مفيد فوزى : هى دى يا فندم الجملة اللى أنا كنت بدور عليها مبين البلد فى حالة عدم استقرار وأظن هو ده اللى خلى الراجل راح سحب فلوسه
سمير امبابى : بالتأكيد يا فندم
مفيد فوزى : أنا عرفت القصة طبعا بدليل إنى سألتك السؤال وحزنت لهذا لأن هذا المستثمر أو غيره
سمير امبابى : لا هو كمان بدون ذكر اسمه هو من أكبر المستثمرين العرب يعنى يشرف أى حتة يستثمر فيها
مفيد فوزى : حضرتك بتمضى على قرارات وللا خايف خلينى أقول العبارة من غدر غير متوقع
سمير امبابى : لا أنا بمضى يا فندم
مفيد فوزى : بتمضى
سمير امبابى : آه
مفيد فوزى : يعنى بتمضى على قرارات بتمضى إيه بدرجة من الشجاعة الأدبية يعنى إيه حلل لى مسكك للقلم بتمضى من منطق الشجاعة الأدبية أو من منطق القناعة ما هو فيه ناس مضوا ما انت عارف إن فيه ناس مضت وبعد ما مضوا حدثت عمليات ولذلك ...
سمير امبابى : بالتأكيد يا فندم واللى يقول غير كده يبقى غلطان يعنى بس أنا برضه أحب أرجع للموضوع كنوع من الاحترافية
مفيد فوزى : آه يعنى اللى بيخليك تمضى هو الاحترافية
سمير امبابى : تمام يا فندم
مفيد فوزى : بالمناسبة مطار غرب القاهرة ألا يمكن من باب السيولة المرورية تحويله إلى مطار مدنى أنا أعلم إن مطار الغردقة مثلا مطار عسكرى ، مطار سيوة مطار عسكرى
سمير امبابى : أغلب مطاراتنا كانت فى الأصل مطارات عسكرية حتى برج العرب
مفيد فوزى : حتى برج العرب
سمير امبابى : آه واتغير التشغيل بتاعها
مفيد فوزى : طب مطار غرب القاهرة ده ليه ما اتحولش يعمل سيولة
سمير امبابى : أنا هقول لحضرتك ليه بالنسبة لغرب القاهرة احنا حاليا بصدد خطة لإنشاء مطار جديد فى 6 أكتوبر هو حاليا موجود مطار صغير بيستعمل فى التدريبات لطلبة الأكاديمية المدنية اللى تبع الوزارة واحنا بندرس حاليا مع بيوت خبرة عالمية على مستوى عالى جدا إن احنا نعمل المطار ده مطار محورى نعمله
مفيد فوزى : مطار 6 أكتوبر
سمير امبابى : مطار 6 أكتوبر
مفيد فوزى :ده ياخد وقت أد إيه
سمير امبابى : يعنى نأمل إن شاء الله أنا مستعجل إن احنا نبدأ الإجراءات فيه حوالى سنتين تقريبا
مفيد فوزى : هل لأنك وزير احترافى صعب الاستغناء عنك خلينى أسأل كده بوضوح
سمير امبابى : لا طبعا
مفيد فوزى : بمعنى إيه يا فندم
سمير امبابى : لأن أنا بشتغل
مفيد فوزى : ده ليه لأن حضرتك رجل محترف
سمير امبابى : والله يا فندم أنا بشتغل اللى أنا شايفه فى صالح البلد واللى أنا شايف إن أى حد هييجى مكانى هيكمل فى نفس الخط ده أنا أو غيرى احنا بنعمل مشروعات كبيرة بتخدم الاقتصاد القومى بتاع البلد وما بنعملش حاجة فيها أى رؤية شخصية ولا أى حاجة وده أعتقد إن هو منهج لازم أى حد يمشى عليه
مفيد فوزى : هل توقعت أن تكون وزيرا كنت آخر منصب لك مدير إقليمى مش كده
سمير امبابى : أنا كنت وكيل وزارة لمدة 8 سنين
مفيد فوزى : وكيل وزارة لمدة 8 سنوات ، هل كنت تتوقع هذا المنصب
سمير امبابى : لا
مفيد فوزى : كان إيه شعورك لما كلفت به
سمير امبابى : والله أنا طبعا بالتأكيد فرحت لكن برضه المسئولية ولما يكون الناس حاطين ثقتك فيهم فيك ومدى استعدادك انك انت ترد الثقة دى للناس بتبقى حاجة صعبة جدا
مفيد فوزى : هو حضرتك قابلت رئيس الحكومة فترة
سمير امبابى : لا ثانى يوم على طول من التكليف
مفيد فوزى : ثانى يوم كان إيه النقاش اللى دار بينك وبينه
سمير امبابى : والله هو سألنى عن مشاكل معينة موجودة فى وزارة الطيران المدنى وكيفية علاجها
مفيد فوزى : زى إيه يا فندم قل لى بالضبط هى أسرار إنك تقول لى إيه اللى حصل بينك وبين رئيس الوزراء
سمير امبابى : لا مش أسرار
مفيد فوزى : لا يعنى فهمنى إذا كانت أسرار أسكت لأن آداب الحوار تقتضى هذا تقول لى دى أسرار
سمير امبابى : لا
مفيد فوزى : أروح أنا حاطط لسانى فى بقى تقول لى ممكن أقولها أديك ودانى
سمير امبابى : لا طبعا معالى رئيس الوزراء كان عنده صورة عن مشاكل الطيران المدنى لإنه قابل ناس قبلى
مفيد فوزى : أقدر أعرف قابل مين قبلك
سمير امبابى : قابل ناس كثير حضرتك يمكن 5 أو 6
مفيد فوزى : حضرتك تعرف على الأقل واحد بس منهم
سمير امبابى : أعرفهم كلهم
مفيد فوزى : زى مين يا فندم
سمير امبابى : يعنى مفيش داعى لذكر أسماء
مفيد فوزى : ليه
سمير امبابى : عشان ما نزعلش حد بس
مفيد فوزى : عشان ما نزعلش حد
سمير امبابى : آه
مفيد فوزى : آه يعتبر إن هو قابل ناس ومع ذلك اختار حضرتك من على الناس دول شفت أنا مهذب ازاى قلت لك حاضر يا فندم أنا موافق مش هفرض عليك
سمير امبابى : فمن ضمن الأسئلة بتاعت رئيس الوزراء إن احنا هنضع مصر للطيران ونرجعها ثانى للخط الصحيح وحاجات كثير متعلقة بالطيران المدنى يعنى الموظفين وأحوالهم وطلباتهم الفئوية
مفيد فوزى : كم نصيب مصر من السماوات المفتوحة
سمير امبابى : والله حضرتك كلمة سماوات مفتوحة دى كلمة باطل يراد بها حق يعنى
مفيد فوزى : هى باطل يراد بها حق
سمير امبابى : لا مش باطل على طول
مفيد فوزى : تسمح توضح لى
سمير امبابى : مش باطل على طول حضرتك
مفيد فوزى : وضح لى
سمير امبابى : يعنى احنا فيه مثلا بيننا وبين السعودية اتفاقية سماوات مفتوحة لما عملنا الاتفاقية دى
مفيد فوزى : بيننا وبين السعودية
سمير امبابى : آه الحركة زادت بيننا وبين بلاد ثانية لو طبقنا نظام السماوات المفتوحة هنضر بالشركة الوطنية بتاعتنا فيه ناس عندها استثمارات ضخمة جدا حطها فى مجال الطيران المدنى وبلدهم ما تستحملش الاستثمارات الضخمة دى فأكبر بلد فى المنطقة بيبقى عينهم عليها هى مصر وعايز ينزل عندى هنا بنظام السماوات المفتوحة مش عشان يجيب لى سواح أو يجيب لى ... لا عشان يسرق ركاب الشركة الوطنية بتاعتنا
مفيد فوزى : يعنى انت ضد فكرة السماوات المفتوحة
سمير امبابى : لا
مفيد فوزى : للحفاظ على ...
سمير امبابى : أنا مش ضدها
مفيد فوزى : مش ضدها
سمير امبابى : لا بس لازم تكون لها ضوابطها يعنى حضرتك تعالى قل لهم مثلا أنا عايز أنزل فى انجلترا آخد رحلة زيادة فى انجلترا ممكن تقعد حضرتك مستنى 10 سنين احنا فى اليابان عشان نزود رحلاتنا فى طوكيو من 4 ل 6 قعدنا 15 سنة
مفيد فوزى : 15 سنة
سمير امبابى : آه
مفيد فوزى : كان عندك ناس كثير بتسافر اليابان
سمير امبابى : الطيارات مليانة على طول
مفيد فوزى : الطيارات ربما ده عشان العيد الطيران الداخلى حسيت إنه مليان جدا
سمير امبابى : ما هو الحمد لله إن فيه حركة
مفيد فوزى : وانتوا كبرتوا البزنس شوية
سمير امبابى : آه عشان نستوعب الرغبات
مفيد فوزى : هل صحيح إن بعض الشركات قالت إنها ما تحبش تنزل طياراتها فى مطار سوهاج لأنه ضد قواعد السلامة صارحنى
سمير امبابى : لا أنا أول مرة أسمع الكلام ده
مفيد فوزى : أول مرة تسمع الكلام ده هل مطار سوهاج بالمناسبة وفق منطق السلامة الكامل
سمير امبابى : احنا حضرتك عندنا سلطة طيران مدنى بتراقب كل المطارات بشكل دورى وفيه مفتشين بيروحوا يراجعوا ويشوفوا هل المطارات الشروط الواجب توافرها فيها موجودة وللا لا وبالتالى بياخد تشغيل المطار ما بياخدش تشغيل إلا بموافقة سلطة الطيران المدنى
مفيد فوزى : طيب فيه طراز من طيارات مصر للطيران غير مسموح لها بالنزول فى مطارات أوروبا
سمير امبابى : لا بس هو حضرتك انت عارف دلوقتى بيطلع تفتيش على الطيارات على طول فى أوروبا
مفيد فوزى : لا فيه طراز ما معين يقال إنه مش مسموح له قوى بالنزول فى مطارات أوروبا
سمير امبابى : لا كل الطيارات مصر للطيران أبروفد فى أى مكان فى العالم لكن فيه طيارات بيبقى فيها مشاكل كثير شوية
مفيد فوزى : أنا لاحظت كده إن فيه إطراءة خدت بالضبط 4 ثوانى وأنا واخد بالى حصل وللا لا
سمير امبابى : حصل
مفيد فوزى : فكرت فى إيه فيها انك عايز انت طبعا مؤكد فى حوار مفتوح يذاع على الشاشات من المؤكد إنك يهمك كوزير طيران يهمك إنك تقول إن الضيفة المصرية ميت فل وعشرة لكن من الأمانة هل لديها من الأخطاء المعينة فى المظهر ، فى الشكل ، فى السلوك يعنى قل لى لإن أنا عشت زمن مضيفات فى بداية العمر وعشت المضيفة عايدة خالد اللى راحت بعيد عنك فى حادث طوكيو حادث الطيران فشفت يعنى الإبهار زى المضيفات اللى بنشوفهم فى كل حته بالمناسبة هل حجاب المضيفات عاد سلبا على بعض الشركات اللى حضرتك بينك وبينها خلاف
سمير امبابى : لا مفيش أى حاجة زى دى
مفيد فوزى :خالص
سمير امبابى : لا مفيش حاجة
مفيد فوزى : ولا ملاحظة ولا أى شئ
سمير امبابى : لا إطلاقا
مفيد فوزى : طب أرجع للسؤال
سمير امبابى : والله أنا اللى أحبه إن أسلوب الضيافة عندنا فى الطيارة يبقى أحسن من كده يتحسن واحنا بصدد إن شاء الله إن هو
مفيد فوزى : حضرتك بتشتغل فى وزارة الخارجية
سمير امبابى : ليه يا فندم
مفيد فوزى : لأنك بترد ردود قنصل مصر العام فى بنغازى ما اعرفش اشمعنى بنغازى يعنى لإنك قلت إيه كنت أتمنى أن تكون الضيافة أفضل من كده أفضل ليه
سمير امبابى : أفضل من كل النواحى اللى حضرتك ذكرتها يعنى احنا عندنا مضيفات يابانيات مثلا أيام ما كنت فى اليابان شغالين على خط طوكيو نفسى حضرتك تشوف مستوى الخدمة اللى بيقدموها عاملة ازاى هم مصر للطيران يعنى بيقدموا خدمة مميزة للغاية يعنى فنفسى برضه المضيفات المصريات يبقوا على المستوى ده من الأداء
مفيد فوزى : هل معظم شركات الطيران اللى هى بتبقى منافسة بتحس إن فيها شئ ينقص مصر للطيران
سمير امبابى : أنا لما بطلع على طيارة وأروح مطار والكلام ده على فكرة طول عمرى قبل ما أبقى وزير يعنى أشوف الحاجات الحلوة اللى عند الناس وأبقى متضايق جدا إنه موجود عندهم ومش موجود عندنا
مفيد فوزى : فى إيه
سمير امبابى : الانتظام مظهر الطيارة مظهر الكابينة من جوه الوجبة الخدمات المقدمة يعنى بحب إن أنا أروح المطار بدرى لما أكون مسافر عشان أشوف الناس غيرنا بيعملوا إيه بنستفيد
مفيد فوزى : يعنى أنا عايز أقول إن قدر الاستفادة من شركات الطيران الأخرى مهمة فبالتالى سألتك ليه
سمير امبابى : أنا عايز أقول لحضرتك حاجة برضه على النقطة دى مصر للطيران شركة رائدة فى المنطقة وأحب أؤكد لك إن فيه شركات طيران كثيرة جدا فى المنطقة استفادت من الخبرات المتنوعة اللى موجودة فى مصر للطيران
مفيد فوزى : هو مش قبل كده كان حصل نوع من الهيكلة لمصر للطيران
سمير امبابى : يعنى
مفيد فوزى : لماذا يعاد الآن هيكلة مع استشارى جديد
سمير امبابى : هو الهيكلة اللى كانت حصلت قبل كده يا فندم كانت قسمت مصر للطيران لشركات بدرجة ربحية إن كل شركة يبقى لها ربحيتها التجربة دى فيها حاجات نجحت وفيها حاجات مانجحتش وأدت إلى إن فيه شركات بتخسر فاحنا بنعيد تقييم التجربة على أساس إن الشركات اللى بتخسر دى نحاول إن احنا نرجعها ثانى من ضمن شركة أو أكثر بغرض إن احنا يعنى الخسائر دى نقللها ونرجع الشركات دى للربحية ثانى
مفيد فوزى : ألا يعتبر تجربة استشارى مرة أخرى نوع من الهدر
سمير امبابى : ما هو احنا
مفيد فوزى : يعنى دى رؤية أنا بكلمك عن رؤية بعض الناس أنها هدر لمال عام مسألة إعادة استشارى آخر بين الهيكلة الأولى والثانية أد إيه
سمير امبابى : حوالى 10 سنين
مفيد فوزى : 10 سنين
سمير امبابى : آه
مفيد فوزى : هل برضه للفهم هل من الطبيعى
سمير امبابى : طبيعى جدا
مفيد فوزى : من الطبيعى جدا إنك تعيد الهيكلة كل 10 سنوات
سمير امبابى : آه دورة شركات ثانية
مفيد فوزى : اسمها دورة شركات طيران
سمير امبابى : آه كل 10 سنين
مفيد فوزى : كيف يكون التعاون الأمثل بينك وبين وزير السياحة من أجل يعنى إن السياحة أقول لك إيه تنهض يعنى ده العبارة اللى جاية على راسى تنهض
سمير امبابى : والله حضرتك نقول نسترجع معدلات السياحة
مفيد فوزى : حاضر يا فندم أنا هشطب تنهض وأوافق على كلمة تسترجع
سمير امبابى : تسترجع وتنهض برضه ما هو احنا مش عايزين نرجع للمعدلات اللى كنا فيها سنة 2010 اللى هى سنة القياس بتاع مصر لا احنا عايزين نضاعف الأعداد دى وكل اللى احنا عايزينه الناس بس تهدى شوية واحنا بنوعدهم إن السياحة والطيران بيفتحوا بيوت كثيرة جدا يا فندم يعنى كل سائح بيشغل 6 أنفار
مفيد فوزى : ده قاعدة
سمير امبابى : قاعدة فاحنا محتاجين نشغل بيوت كثيرة محتاجين ال12 مليون بتوعنا دول
مفيد فوزى : فيه نسبة بطالة فى مصر للطيران
سمير امبابى : طبعا
مفيد فوزى : عندك
سمير امبابى : عندنا طبعا
مفيد فوزى : أد إيه
سمير امبابى : يعنى ممكن أشتغل بنص العدد اللى موجود
مفيد فوزى : ممكن تشتغل بنص العدد اللى موجود
سمير امبابى : تمام
مفيد فوزى : بتقول الكلام ده يا فندم كوزير احترافى
سمير امبابى : بالتأكيد يا فندم معدلات عالمية والنص ده كمان ده رقم فيه مجاملة كثير
مفيد فوزى : تعتقد إن ده عامل لك صداع
سمير امبابى : لا مأثر على الربحية بالتأكيد لما يكون انت مثلا عندك شركات المرتبات بتوصل فيها ل 80 % من الدخل
مفيد فوزى : صحيح بتلتهم رقم ضخم
سمير امبابى : بالتأكيد
مفيد فوزى : آه العامل فى مصر للطيران
سمير امبابى : حضرتك مركز مع مصر للطيران
مفيد فوزى : لأنه هى شركة الدولة يعنى الشركة الوطنية يعنى مش هكلمك مثلا على شركات ثانية يعنى مش قادر أنطقها لإنى تليفزيون الدولة يقول لك بيعمل دعاية لشركات أخرى غير الدولة فأنا مراعى
سمير امبابى : ما تقوليش حضرتك انت وزير مصر للطيران أهه انت اللى بتسأل
مفيد فوزى : لا ما أنا بسألك لماذا يقال إنك وزير مصر للطيران زى بالضبط لما اتقال إن وزير الإعلام هو وزير التليفزيون وهذا غير حقيقى
سمير امبابى : أنا يشرفنى طبعا إن اسمى مرتبط بمصر للطيران طبعا أنا ابن مصر للطيران أولا وأخيرا
مفيد فوزى : مين حل محلك فى عملك تعرفه
سمير امبابى : فى القاهرة وللا بره
مفيد فوزى : فى القاهرة
سمير امبابى : فى القاهرة طبعا أعرفه
مفيد فوزى : الناس اللى انت استلمتهم حضرتك فى الشغل معاك كلهم ناس تعرفهم قبل كده
سمير امبابى : طبعا الفريق اللى أنا جبته معايا أنا أعرفهم بالكامل لكن كان فيه ناس موجودة هنا محترفين بيؤدوا شغلهم بشكل طيب أنا استبقيت عليهم رغم إن أنا ما اعرفهمش
مفيد فوزى : يعنى أفهم من كده إنك انت ما عملتش أى إقصاء لأى كفاءة داخل مصر للطيران
سمير امبابى : لا مش إقصاء ، إقصاء دى كلمة صعبة شوية لكن حضرتك عملنا يمكن إعادة توزيع للأدوار
مفيد فوزى : إعادة توزيع للأدوار هل إعادة التوزيع دى حضرتك كنت شايفها وانت بره
سمير امبابى : بالتأكيد
مفيد فوزى : هو انت كنت قاعد بتراقب من بعيد
سمير امبابى : لا أنا على مدى سنين طويلة
مفيد فوزى : بتراقب يعنى بتشوف مصر للطيران
سمير امبابى : بالتأكيد
مفيد فوزى : بشكل أوضح 100 %
سمير امبابى : بالتأكيد حضرتك بعد سنين معينة من الخبرة بيتكون عندك رأى فى إيه اللى ممكن يحسن إيه اللى ممكن يتغير حتى لو انت مش فى موقع المسئولية لكن يبقى لك رأيك ازاى المنظومة دى تقوم ازاى الحتة دى تقوم نعمل إيه عشان ... يمكن فى قعداتنا الخاصة بنقعد نتكلم ليه ما نعملش كذا ليه الناس المسئولة ما تعملش كذا فالحمد لله إن أنا كان عندى الفرصة وعندى تصور
مفيد فوزى : كل من يعمل الآن مديرين مكتب مصر للطيران كلهم اختيار دقيق بمعايير دقيقة
سمير امبابى : لا فيه اختيارات ثانية بخش فى الاعتبار
مفيد فوزى : لكن انت مش راضى عن كل مديرى مكتب مصر للطيران
سمير امبابى : بالتأكيد لا فيه ناس كويسة جدا
مفيد فوزى : وفيه ناس
سمير امبابى : وفيه ناس ما بتقومش بالدور اللى هى المفروض تقوم به
مفيد فوزى : هبطت طائرة الحوار إلى أرض المطار وعلى أرض مطار المحبة إن صحت العبارة أسألك هل أنت رجل إخوانى أم وزير احترافى
سمير امبابى : أنا بالتأكيد وزير احترافى يا فندم
مفيد فوزى : هل أنت قريب لقيادة إخوانية
سمير امبابى : بالتأكيد لا
مفيد فوزى : هل اقتربت بحكم العمل من قيادى بارز فى الحرية والعدالة
سمير امبابى : بالتأكيد آه