مساحة للراى

سحر ناجى : تحية لكل المشاهدين للى بيتابعونا فى حلقة جديدة من برنامج مساحة للرأى نتناول فيها النهاردة موضوعات كثيرة طالعتنا بها أعمدة الصحف من ضمنها كان قرار التبكير بانتخابات الرئاسة وموضوع آخر تقييم أداء البرلمان وعلى رأس كل هذه الموضوعات كانت قضية التمويل الخارجى والعلاقة ما بين مصر وواشنطن وما شابها أو ما يشوبها حاليا من توتر وهل الأمر مؤامرة دولية تحاك ضد مصر أو أمر آخر ، ضيفنا النهاردة هنتناول معه كل هذه القضايا الكاتب الصحفى الأستاذ محمد أمين مشهود له بآراء كثيرة فى المصرى اليوم ، أستاذ محمد خلينا نبدأ بالقضية الرئيسية ولسة منذ قليل كان مذاع مؤتمر صحفى لقضاة التحقيق فى قضية التمويل الخارجى لبعض منظمات المجتمع المدنى فى مصر الحقيقة أن هناك من استبعد الأمر وقال فى جريدة المساء الأستاذ مؤمن الهباء " مصر واقعة فى فخ مؤامرة دولية تستهدف أمنها واستقرارها " هل ترى الأمر كذلك أم هو أكبر من ذلك
أ. محمد أمين: لا هو استهداف الأمن واستهداف مصر بشكل عام لا مصر دولة كبيرة جدا ، دولة محورية لازم تبقى تحت الميكروسكوب لكن الناس عايزة تعمل زعزعة أمن واستقرار مصر أنا لا أعتقد وأن يكون أمريكا هى اللى بتعمل كده أى قلق فى مصر هيعمل مشكلة كبيرة جدا فى الشرق الأوسط
سحر ناجى : لكن فى اعتقاد حضرتك التمويل الخارجى للمنظمات كان بيستهدف إيه ؟
أ. محمد أمين: ما هو أنا هقول لحضرتك أهه هو التمويل أصله مش احنا اكتشفناه دلوقتى هو التمويل طول عمره موجود وفى النظام الفاسد السابق موجود لكن هو زاد شوية لما الوزيرة فايزة أبو النجا اتكلمت فى موضوع التمويل قالت إنه هى مش بتلوم على موضوع التمويل لا دى كانت بتقول هو كان 60 مليون دولار خلال أد كدة لكن هو بعد الثورة بس بقى 175 مليون دولار يعنى هى مستغربة من موضوع الرقم هى كانت بتتكلم عن السيادة والكرامة ، السيادة المصرية والأمن القومى طب ما هو ده كان موجود فى ظل النظام القديم وما كانش فيه حد بيتكلم عن السيادة ولا الأمن القومى ولا حاجة أنا برضه بقول دى معركة ، معركة كبيرة جدا ودى قضية الساعة وهى اللى مانشيتات الصحف بكرة فى مصر ، مصر وأمريكا يعنى القاهرة وواشنطن علاقتهم مش علاقة تخش فى صدام مش هيحصل هذا الصدام لكن كل واحد منهم فيهم دلوقتى يتمسك بموقف وده وارد أن يحصل مد وجذر فى العلاقات بين البلدين بالذات فيه ثورة مش عارفين مين الرئيس اللى جاى ، البرلمان ده هيشتغل بأنهى كيفية ، تأثير الموقف السياسى على خريطة المنطقة .
سحر ناجى : التلويح بقطع المساعدات عن مصر
أ. محمد أمين: دى بقى خلينى أنا أقولك لما الوفد العسكرى المصرى رجع ما رجعش من نفسه ، رجع بقرار أو بأمر من السلطة العليا اللى موجودة دلوقتى وقال له إرجع ده معناه إن الموقف هناك دلوقتى مش على مستوى الحظة اللى احنا فيها لا مستوى الثورة اللى احنا فيها هم هناك بيهددوا بقطع المعونة الأمريكية أنا شخصيا فى مواقفى وفى كتاباتى كنت بقول يغوروا بالمعونة بتاعتهم ده موقف يتسق مع الموقف اللى خده الوفد المصرى ورجع احنا مش هيكون ده قيد ولا سيفا على رقبتنا إن هو بيهددوا بالمعونة الأمريكية لكن أنا أعتقد إن أمريكا هترتكب خطيئة كبرى لو هى حبت تخنق مصر فى اللحظة دى من ناحيتها إنها تخنق مصر أو تسلط عليها دول من الخليج تخنق مصر وما تقدمش لها مساعدات ودى هتبقى كارثة كبرى
سحر ناجى : يعنى النهاردة فى المؤتمر الصحفى لقضاة هذه القضية فندوا كل شئ بدقة شديدة جدا بقدر المستطاع
أ. محمد أمين: بقى فيه شفافية
سحر ناجى : لأن القضية لسة محل بحث برضه ولسة هيحكم فيها ولكن مدركين إن فيه أصوات هتخرج وتقول لماذا لم تكتشف هذه القضية أثناء النظام السابق كان فيه أصل تمويل أجنبى ما أوجه الاختلاف ما بين ده وده ؟
أ. محمد أمين: احنا ما نقدرش نسأل السؤال ده فى ظل النظام السابق ، النظام السابق كان كله متواطئ منبطح ، نظام سيئ فاسد ركع مصر ورجعنا للوراء مئات السنين يهنى لما آجى أنا أسترد كرامتى بثورة وأنا النهاردة أقول إيه اللى لى وإيه اللى على محدش يقول طب ليه ما اتعملش الكلام ده قبل كده لكن أنا عايز أقول إن فيه دور كبير بعبته السفيرة الأمريكية آنى ترسون دور سيئ جدا إنها تدى حد وما تديش حد تضخ فلوس بهذه الضخامة انتى عارفة 175 مليون دولار يعنى إيه بالمصرى المليارات دى لإن هى فوق المليار
سحر ناجى : من ضمن ما قيل إن هى رفضت الإدلاء عن المؤسسات التى تم إعطائها هذه المبالغ
أ. محمد أمين: هى أولا ما كشفتش عن مين خد ومين ما خدش هى دلوقتى فى حالة استخدام للمال الزائد لإن فيه مال زائد فى مصر ، فيه مال سياسى كثير حصل فى الفترة اللى فاتت يا إما من أمريكا يا إما من الخليج أنا بس قبل ما يهرب منى الموضوع عايز أقول لك إنها ارتكبت خطيئة وحماقة كبرى إنها توجه خطابات رسمية إلى قضاة تحقيق أو إلى وزير العدل وأنا كنت كاتب من كام يوم من ثلاثة أو أربعة أيام لما وزير العدل أعلن عن هذا الخطاب رفض إنها تتدخل فى الشأن الداخلي ده بقى تدخل فى الشأن الداخلى كان يجب أن السفارة الأمريكية تعتذر لإن هى راحت فعلا ملا هو لفت نظرها وقال لها ده ما يصحش إنها تتدخل فى مجرى التحقيق فقدمت اعتذار رسمى
سحر ناجى : خرجت عن نطاق أو عن دور سفير دولة أجنبية فى دولة ما
أ. محمد أمين: تتدخل كإن احنا دولة بقى يعنى وأنا يمكن أيامها سألت أسئلة كثيرة جدا هل احنا مصر فى أضعف حالاتها الآن بعد الثورة وللا المفروض إن مصر الآن الثورة تمثل نقطة قوة لا نقطة ضعف احنا صحيح نثأر لكرامتنا الوقف اللى خده الوفد العسكرى المصرى لما رجع دى خطوة مهمة يجب نحييهم عليه ، الموقف اللى خده وزير العدل نحييه عليه ، الموقف اللى بياخده رئيس محكمة النقض نرفض التدخل من أى جهة حتى من مصر لا يجرؤ واحد أيا كان موقعه لا محلى ولا أجنبى لا سلطة ولا شعب أنه يتدخل فى إجراءات تحقيق أو فى سير تحقيقات أو إجراءات التقاضى كمان
سحر ناجى : طب أستاذ محمد خلينا نتابع الموضوعات الأخرى اللى جاءت فى الصحف فى هذا التقرير ونعود ثانى لتحليلها نتابع مع بعض
فاصل
مذيعة : بعد قرار التبكير بانتخابات الرئاسة يرى الدكتور عمرو الشوبكى فى المصرى اليوم أن طبيعة النظام السياسى الذى سيأتى على قمته هذا الرئيس سيكون أمر أساسى فمصر بحاجة إلى نظام رئاسى ديمقراطى والنظام البرلمانى سيكون كارثة حقيقية على مصر لأنه سيكون انعكاسا لحال الأحزاب ، ومحمد الشبة فى نهضة مصر يطالب البرلمان برعاية مصالح الشعب واحترام القانون والدستور بدلا من المكلمة التى يتابعها الناس لساعات ، وعلى العكس من هذا فإن مراد عز العرب فى الأهرام المسائى يرى أن مؤشرات أداء المجلس تحت القبة تؤكد على أن مجلس الشعب سيكون علامة مضيئة فى تجربة الديمقراطية إلا أن آمال عبد السلام فى الأخبار تطالب بإلغاء بث الجلسات على الهواء حتى لا يصاب الناس بخيبة أمل لافتقاد الديمقراطية بين أعضائه وسيطرة الحوار الممزوج بالمزايدة والشو الإعلامى ، وائل عبد الفتاح فى التحرير يرى أن مشوار الإخوان فى الثورة كان قصيرا جدا وبه وصلوا إلى البرلمان ووقعوا فى نفس الفخ الذى يحول البرلمان إلى أداة فى يد الديكتاتور المتسلط ، وعن الأحداث التى تشهدها مصر حاليا يرى مؤمن الهباء فى جريدة المساء من خلال قضية التمويل الخارجى أن مصر واقعة فى فخ مؤامرة دولية تستهدف أمنها واستقرارها وفى الأهرام يطالب محمد إبراهيم الدسوقى الضرب بيد من حديد على أباطرة النظام السابق والتوقف عن عشوائية الاعتصامات وقطع الطرق ، اليوم السابع يقول أكرم القصاص القضية ليست من حمى الثورة بل من يحمى أهدافها التى تتوه وسط الصراعات والجدل الكثير
سحر ناجى : نرجع ثانى لقرار فتح باب الترشح لانتخابات الرئاسة والتعجيل بموعدها الحقيقة خرجت أصوات منها كان فى المصرى اليوم مقال عن طبيعة النظام السياسى الذى سيأتى على قمته الرئيس أمر أساسى وارتئ هذا الرأى أن النظام البرلمانى سيكون كارثة حقيقية على مصر أستاذ محمد رأيك إيه فى هذا الأمر ؟
أ. محمد أمين: أنا أتفق دلوقتى فى اللحظة دى مع الرأى اللى بيقول إن مصر ما ينفعش فيها نظام برلمانى دلوقتى
سحر ناجى : ليه عشان الناس تفهم
أ. محمد أمين: هقول لحضرتك احنا محتاجين نظام رئاسى وعشان كده رفضنا يكون فيه نظام برلمانى طب هل هو السيناريوهات إما نظام رئاسى أو نظام برلمانى أو ممكن نظام مختلط ما بين الرئاسى والبرلمانى ، النظام البرلمانى دلوقتى احنا عارفين إن انتخابات مجلس الشعب أفرزت تيار واحد وحيد
سحر ناجى : لا نقول أغلبية هى مش تيار واحد بس أغلبية
أ. محمد أمين: إنما تقريبا هو اللى له الكلمة العليا فى مصر كلها فماينفعش تدى لحد ده عشان كده برضه لما نيجى نعمل الدستور لازم يكون دستور يمثل كل الأطياف والتوجهات والأحزاب وحتى الناس اللى مش داخل الأحزاب معروف إن مصر كلها كانت خارج البرلمان فى النظام السابق ، مصر لسة التجربة الحزبية بالشكل الثورى الجديد أو بالشكل الليبرالى لسه برضه غير مفهوم ويمكن ده كان أحد أسباب إن الناس تقول لك نأجل الانتخابات نبدأ بالدستور
سحر ناجى : بس طلعت لنا أصوات فى الآخر الرئيس الأول وبعدين الدستور الحقيقة الأمر محير
أ. محمد أمين: خريطة الطريق حطت برنامج وحددت شوية حاجات هنعمل انتخابات شعب ، شوى ، الناس تتخوف فى أن يكون فيه دستور فى ظل حكم العسكر أنا بقى لما نيجى نتكلم الأول على الرياسة احنا قلنا النظام الرئاسى هو الأساس إن الرئيس القادم صلاحياته هتبقى أقل ما هواش الفرعون يعنى مش هنعمل فرعون ثانى
سحر ناجى : الصلاحيات الأكثر هتبقى لرئيس الحكومة
أ. محمد أمين: هتبقى للبرلمان الحكومة هتبقى هى اللى بتنفذ يعنى هى السلطة التنفيذية ، رئيس الحكومة هيبقى منتخب ويمثل التيار الكبير اللى هو موجود يعنى البرلمان هو اللى يقدر يقيل حكومته أو يجب حكومة مش رئيس الجمهورية هو اللى يشيل ويحط يعنى انتظام البرلمان مثلا لما نيجى نقول بقى التبكير خطة التبكير دى خطوة مهمة جدا وكويسة جدا لكن لما نيجى نقول هل هى كانت اللى احنا عايزينه برضه لا ، أنا كنت بقول إيه السيناريوهات التى كانت موجودة قبل صدور قرار فتح باب الترشح لانتخابات الرئاسة فى 10 مارس السيناريو اللى كان مطروح المجلس العسكرى هيسلم السلطة فى أول يوليو لما الأحداث حصلت والثورة والمظاهرات وكده احنا كان لنا طلب إنه يسلم السلطة فورا والمجلس الاستشارى يشوف المرشحين المحتملين يشوفوا سيناريو ، حزب الوفد كان طلع سيناريو إن اللى هو كان تقصير الفترة الانتقالية قصرها بهر بدلا من أن يسلمها يوليو يسلمها فى يونيو
سحر ناجى : وده لأسباب عشان نكون انتهينا من ...
أ. محمد أمين: آه عشان ...
سحر ناجى : مجلس الشورى
أ. محمد أمين: انتخابات مجلس الشورى والدستور وكله هيقول لك ديه بقى احنا مش هنعمل ممكن عمرو موسى طلع بيان قال لك يسلم بفتح باب الترشيحات للرئاسة فى واحد مارس المجلس الاستشارى قال فى 23 فبراير يعنى كان كلام كثير جدا أنا كان لى مقال امبارح اللى أنا عايز أوصلك له فى النهاية إنه كان يوم آخر للتنحى يكون يوم 11 فبراير هى اللى يبقى بداية فتح باب الترشح لانتخابات الرئاسة 11 فبراير من 11 أو 10 مارس اللى جاى بحيث أنا كان عندى يوم لماذا 11 فبراير لإن ده كان يوم التنحى بتاع مبارك اليوم اللى سلم فيه السلطة للمجلس العسكرى لإ، ده هيبقى يوم تاريخى فى حياة المصريين وبرضه كان يبقى هدفه إن المجلس قعد سنة واحدة من 11 فبراير 2011 إلى 11 فبراير 2012 بفتح باب الترشيح ويسلم وقتها السلطة
سحر ناجى : هل ترى ذلك على أرض الواقع بكل متطلباته يصلح تطبيقه وللا لا
أ. محمد أمين: أنا ما كنتش بقول إن هو يسلم السلطة يوم 11 فبراير كنت بقول إن هو يفتح باب الترشح للانتخابات للرئاسة فى هذا اليوم وبيقى أنا عندى إن 11 فبراير ده كان يوم تاريخ تنحى و 11 فبراير برضه كان تاريخ تنحى بشكل آخر إن هو يبقى فتح باب الترشيح لانتخابات الرئاسة ، المجلس العسكرى قعد سنة زى ما هو قال ، هو كان بيقول 6 شهور
سحر ناجى : هو الفرق شهر بس من 11 فبراير إلى 10مارس
أ. محمد أمين: الفترة اللى باقية أولا عن آخر ما هياش كبيرة ولا حاجة لكن أنا خايف من أن نظل فى وضع ملتهب بهذا الشكل آديكى شايفة إن فيه دعوات فى الفترة اللى جاية إن الناس تعمل حالة عصيان مدنى
سحر ناجى : فيه كثيرون لا يفهمون هذه الدعوات إن مثلا زى ما حضرتك ذكرت الفترة قصيرة جدا شهر واحد وننتظر نشوف هنرسى على إيه
أ. محمد أمين: هى مش هتفرق أنا كان يهمنى فى الأول وفى الآخر إن المجلس العسكرى بيبعت رسالة لطمأنة الرأى العام والشعب المصرى ويقول له أنا فعلا ماشى وإن ده مش التفاف الناس طول الوقت تتذكر أزمة مارس 54 وأنا عايز أقول لك على حاجة خوفت الناس أكثر لما حصلت أحداث بورسعيد إن دلوقتى بقت فيه حالة فوضى بقت الفوضى مش ثورة اللى بيحصل دلوقتى ده المجزرة اللى حصلت فى بورسعيد وبعدين حاصل أحداث فى محمد محمود وبعدين حالات سطو مسلح فى كل الأماكن على البنوك وعلى مراكز مالية مش عارف الحالة دى ممكن توصلنا لإيه الناس كانت خايفة يحصل حالة من الأحكام العرفية وإن الجيش يستمر الحقيقة أنا بقول ارجعوا إلى ثكناتكم لماذا عشان تظل الصورة المشرقة للجيش فى عنينا يظل الجيش والشعب إيد واحدة أنا حزين جدا ، حزين جدا إن الجيش اللى كانت الناس بتاخده بالأحضان فى 25 ينير إلى 13 فبراير إلى ما بعد كده إى قبل ما يحدث حوادث احتكاك وكده الناس بتقابل العسكر وتاخدهم بالحضن ليس حبا فى العسكر إنما هذا العسكر الذى وفر الحماية أنا كنت بقول إن احنا لازم نرحع إلى هذه الحالة مرة ثانية ونحط إيدينا فى إيدين جيشنا لإن أنا ضد إهانة الجيش وإهانة الشرطة وبالمناسبة مش الجيش آه والشرطة لا الاثنين مؤسسات مصرية وطنية الناس لازم تفهم إن الجيش اللى كان أداة قمع اللى هم شايفينه أداة قمع العسكر لأن الجيش له مكانة عندنا
سحر ناجى : الجيش عمره ما كان أداة قمع
أ. محمد أمين: الشرطة أداة قمع والكلام ده الشرطة تغيرت دلوقتى تخشى قسم شرطة وتلاقى أمين الشرطة أو الضابط اللى موجود بيقابلك يبتذك أو يدخلك فى البتاع أو يفرض عليكى تصرفات معينة بس أنا مش عايز إن الثورة تعمل لنا تدنى حرية وتدينى حقوق من إن أنا بطلع منها وأنا بستعمل حتى دوة
سحر ناجى : لا احنا عاوزين بقى الحرية المسئولة
أ. محمد أمين: عشان أنا خدت حريتى وأنا بخش قسم الشرطة وللا بعمل ده فأنا أخش أسيئ التصرف
سحر ناجى : أستاذ محمد من منطلق كلمة الحرية المسئولة كثير من الأعمدة قيمت أداء البرلمان البعض رأى البرلمان وصفه بالمكلمة ، البعض الآخر قال إن البرلمان يعنى طالب بمنع بث الجلسات على الهواء حتى لا يصاب الناس بخيبة أمل لافتقاد الناس الديمقراطية بين أعضائه ، سيطرة الحوار الممزوج بالمزايدة والشو الإعلامى ده طبقا لآراء الكتاب فى جريدة الأخبار بالتحديد وهناك رأى واحد هو اللى أثنى على البرلمان وقال إنه علامة مضيئة فى تجربة الديمقراطية حضرتك شايف تقييم أداؤه تجاه المشكلات المختلفة اللى وجهته فى الفترة القصيرة منذ بدايته
أ. محمد أمين: هقول لحضرتك هو عمر البرلمان لسة أيام يعنى من المبكر جدا أنا حقيقى أحب أكون شايف الأمور بشكل كويس يعنى ما ينفعش أبقى متطرف يمين ومتطرف شمال أنا الحقيقة أحب أخضع كل الأشياء للدراسة والتحليل المضبوط من المبكر جدا إن أنا أحكم على المجلس ده
سحر ناجى : طول الفترة الزمنية أد إيه؟
أ. محمد أمين: فيه يعنى لما يبقى خلال أسبوع أقول إن المجلس ده فاشل أو أقول إن المجلس ده حاجة فارقة فى تاريخ مصر المعاصر يعنى سهل إن أنا أقول دول ولا ينفعوا بتعريفة طب بس أنا بقول إن أنا غرقان وانتى النهاردة لو قريتى الكلام اللى قايلينه فى الصحف المرشحين المحتملين لرئاسة الجمهورية بيقولوا مصر بتغرق وأنا لما مصر بتغرق وحضرتك بتمدى لى إيديكى أنا بغرق بلاش مصر بعد الشر عليها ومصر بتغرق وأنا بغرق وبتمدى لى إيديكى أمد إيدى لكى تاخدينى تطلعينى وللا أقول لك لا أنا مش بحبك مش همد لك إيدى معاكى دلوقتى يهمنا مصر اللى يحب مصر يحافظ عليها يعنى ممكن الكلام ده يبقى كلام إنشائي لكن المجلس بقى أداؤه كويس وللا لا ، لا أداؤه مش كويس إذا بصيت له فى اللحظة دى أداؤه مش كويس فى اللحظة دى النائب المؤذن اللى يطلع يؤذن وقطع كلمة النائب ويطلع يؤذن آذان العصر كامل ملا يمنعه أحد ولا يقاطعه أحد صحيح الدكتور سعد الكتاتنى قال له لا تزايد علينا لو انت عايز تؤذن روح المسجد إنما ده هناك مكان برلمان مصالح الناس ونحن نؤدى عبادة أيضا حين نبحث مصالح الناس أنا شايف إن فيه أمور اختلطت وأنا كاتب مقال على بدعة الآذان تحت القبة أن هو لما شاف الناس كلها قاعدة تخطب زى خطبة الجمعة هو قام أذن هو كمان لما لقاهم كل اللى قاعدين كل الكلمات تشبه خطبة الجمعة أذن وبعدين أنا بعت له قلت له أقف وقت الآذان فماردش على وما اهتمش بى ممدوح إسماعيل بيقول أنا ليه عملت كده اللى أنا عاوز أقوله إن النائب عمل كده وأثار الذعر مرة ثانية فى قلوب الناس لإن هو إدانى مؤشر إن هم ماشيين ثانى فى سكة إن هم يعملوا دولة إسلامية ، الثورة عايزة دولة مدنية وكان ده الهتاف الحقيقى والهتاف الأصيل لا دينية ولا عسكرية مدنية .. مدنية الآذان اللى عمله النائب ممدوح إسماعيل ده بيخلينا نقول ثانى ده فيه إشارة إلى إن هم ماشيين فى سكة الدولة أو إسلامية الدولة حاول الإخوان إن هم يغطوا هذا البتاع الآن ممدوح إسماعيل كشف الغطاء وقال لهم لا احنا أهه
سحر ناجى : طيب هل نحن نتغافل عن مشاكل الناس ونبحث الآن عن مزايدات
أ. محمد أمين: والله لو احنا قيمنا هانقول ده فرض أداء فرض ، أداء واحد إنما فيه مزايدات آه فيه تيار كل تيار عايز يقول لنفسه ...
سحر ناجى : هل فيه حاجات ما بتستشعرهاش فى فرجتك على جلسات مجلس الشعب أيا كانت القضايا اللى بتنظر
أ. محمد أمين: أقول لحضرتك على حاجة لو رحتى أى مكان دلوقتى هتلاقى الناس فاتحة التليفزيونات على مجلس الشعب أعلى نسبة مشاهدة دلوقتى هى مشاهدة جلسات البرلمان
سحر ناجى : طيب شعورك مش هقول شعورك كصحفى ولك قلم شعورك كمتفرج وهم يتناقشوا فى أى قضايا هل تستشعر مزايدات من قبل الأعضاء
أ. محمد أمين: فيه مزايدات ، فيه كمان إنعدام الخبرة عند النواب فيه ناس كثير فعلا فيهم هم لا يدعوا إن عندهم هذه الخبرة السياسية هم كلهم بيقولوا نفسهم احنا لسة حديثى على السياسة لسة أول مرة نمارس ، لسة أول مرة نعمل ، لغة الخطاب لغة دينية خطابة ، لغة النائب هتلاقيها أقرب إلى الخطابة منها إلى نائب فى مجلس الشعب فيه ملاحظات كثيرة جدا لكن أنا بقول أكيد هيحصل فيه مراجعة وده لازم يتغير أكيد هم هيشوفوا كل ملاحظاتنا كل الانتقادات دية وهيغيروا الأداء لكن كده ، كده هم موجودين هم اللى هيشموا فيه نوايا حسنة إن هم يعملوا ويقدموا والشعب اللى اختارهم أنا كراجل بميل للديمقراطية بقول إن الديمقراطية هى اللى أفرزت ده بقول إن هم لازم ياخدوا فرصة علشان بعد كده إما هم يتحرقوا تماما ما يبقاش لهم وجود فى أى انتخابات جاية أو إن هم يقدروا يقدموا ومصر محتاجة اللى يقدم لها أى حاجة
سحر ناجى : طيب نيجى لخارطة الطريق التى وضعت وإصرار البعض بشتى الطرق على تمزيقها نقول هل ده تراه فى المصلحة الآن أم أنه فى غير المصلحة ومؤخرا الدعوة للعصيان المدنى فى أى وقت من أوقاتها ونحن شعب كثر من 35 مليون ، شعب يعنى هقولها بالبلدى على أد حالنا يعنى أنا بتكلم عن النواحى المالية
أ. محمد أمين: النواحى المالية مصر خيرها كثير
سحر ناجى : الخوف إنه ينقص
أ. محمد أمين: لكن الخير الكثير ده للأسف كان فيه سوء استخدام وسوء استثمار وسوء توجيه للموارد ، مصر كانت بتتسرق وبتتنهب طول الوقت
سحر ناجى : طب هل احنا كده مش بنزوده
أ. محمد أمين: المصريين بقى ...
سحر ناجى : مش بنزود الدعوات دى
أ. محمد أمين: أنا بقول آن الأوان إن احنا نعمل ، آن الأوان إن احنا ننتج ، آن الأوان الثورة تتحول من الميدان إلى المصنع فيه كلام أهه إن خلاص الجيش بيمشى إنما الانتخابات اللى جاية هيبقى فيه رئيس جاى وهو اللى هيستلم السلطة احنا بقى نقول ازاى نبنى بلدنا
سحر ناجى : للأسف محدش بيخرج يقول لنا كده
أ. محمد أمين:هقول لحضرتك
سحر ناجى : إذا كان من الشعب أو من المسئولين
أ. محمد أمين: أنا هقول لحضرتك السبب فى المشكلة دى ، السبب فى المشكلة إن المجلس العسكرى وحتى هذه اللحظة ما كانش واضح جدا وفيه غموض شديد جدا ما كانش حد عارف الفترة دى هتنتهى امتى فى الأول قال أنا قاعد 6 شهور وماشى بعد شوية ال6 شهور بقى عليهم 6 شهور احنا قاعدين دلوقتى بقى لنا سنة معاهم كمان ال6 شهور مكملة إلى يوليو فده اللى خلى الناس خرجت فى الشارع ثانى وده اللى حصل إن الناس هتنزل الميدان وكان الخول من 25 يناير اللى فات إن الناس هتنزل الميدان وتعتصم مش هنمشى إلا لما هو يمشى على طريقة مش هنمشى هو يمشى ثانى وكان لازم يبقى فيه رحيل عشان كده أنا كنت بقول مصر أولى إن احنا نقف جنبها ، ومصر أولى إن احنا ننافقها ، لإن فيه ناس بتنافق المجلس العسكرى وناس بتنافق البرلمان وفيه ناس بتنافق الثوار وأكثرهم بينافقوا الثوار دلوقتى يعنى لو حضرتك رحتى أى برنامج يبقى المهم إنك تمشى فى السكة دى مش فى السكة دى
سحر ناجى : ما أنا بسمع وبشوف
أ. محمد أمين: أنا كمان أقدر أقول كل هذا الكلام بقول مصر أولى أن ننافقها ، مصر أولى أن نقف إلى جوارها
سحر ناجى : طب ما ننافقهاش نصارحها ونعمل من أجلها
أ. محمد أمين: أقصد إن أنا أقف جنبها
سحر ناجى : لإن النفاق كلمة سلبية عامة
أ. محمد أمين: إذا كان فيه منافقين يعنى المنافقين فى كل مكان يبقى مصر هى الأولى إن أنا أقف معاها ، مصر هى الأولى إن أنا أنافقها ، مصر هى الأولى إن أنا أبكى عليها هى ده الأصل لكن أنا بقول عايزين مصارحة لأنه كما قال لك فتح باب الترشيح للانتخابات ما اتقالش الانتخابات هتتعمل امتى ، لما قال احنا هنعمل دستور أكيد فيه دستور بعد كده دستور ما احناش عارفين هل الدستور فى ظل وجود العسكر وللا هم هيمشوا والرئيس القادم بعد كده هو اللى هيعمل الدستور لازم فيه بيان يطلع من المجلس العسكرى أرجو إن رسالتى دى تبقى واصلة لهم إن احنا محتاجين مصارحة وأنا أعتقد إن اللى هم عملوه النهاردة فى المؤتمر الصحفى بتاع قضية التمويل والكلام ده يقول كل شئ على الناس خدوا بالكم آدى واحد اثنين ثلاثة أربعة حد يطلع لنا بيان ، يطلع بيان المجلس العسكرى وأنا ما اعرفش ليه بياناتهم توقفت مع إن أنا كنت بقول نحن فى انتظار البيان الجديد للمجلس العسكرى لازم بيان يطلع يقول ردا على كل التساؤلات كل حاجة ، كل علامات الاستفهام اللى موجودة عند الناس خدوا بالكم احنا ماشيين احنا بنقول لكن احنا قلبنا على مصر المرحلة اللى جاية هى مرحلة انتخاب الرئيس ، الانتخاب هيتم وبعدين الدستور ، الرئيس الحديد هو اللى هيعمله مش هيتعمل تحت حكم العسكر زى ما انتوا بتقولوا أو زى ما انتوا خايفين
سحر ناجى : هنشوف ما ستأتى به الأيام ، أستاذ محمد الكاتب الصحفى فى جريدة المصرى اليوم بشكرك
أ. محمد أمين: أشكرك
سحر ناجى : غدا مساحة أخرى للرأى وموضوعات أخرى على رأس أعمدة الصحف تتابعونها معنا شكر لكم .