حديث المدينة

مفيد فوزى: أسعد الله مساءكم بكل خير أنا لا أدعى على الإطلاق إننى متخصص فى الإقتصاد ولكنى بكل بساطة قارىء متابع وعلمتنى المهنة الإصغاء الشديد لمن هم أكثر منى علما وأوسع أفقا أدعوكم للإصغاء لرجل أحترمه .. هو خبير إقتصادى دولى وفى نفس الوقت يملك أن يتكلم عن وجع مصر الحقيقى الإقتصادى ولست أدفع بالرجل أبدا أن يسب علان أو أحرضه ليشتم ترتان أو العب معاه لعبة غريبة بتحصل إن أنا أسخنه علشان البرنامج يولع أنا مش عايزه يولع ولا يهبط أنا عايز وجهات نظر حقيقية لأنى مؤمن أن المعرفة هى القوة .
فاصل
مفيد فوزى: دكتور محمود عمارة ضيفى الكريم لو أنا قلتلك إن الإقتصاد المصرى متعافى جدا وزى الفل أبقى بعادى الثورة ؟
د.محمود عمارة: بالعكس دا الأمل اللى إحنا محتاجينه النهاردة الناس محتاجة أمل زى ما حضرتك عارف الشارع المصرى أقدر أقول واقع لو أنا جيت النهاردة قلت أو حضرتك قلت إن الإقتصاد المصرى متعافى دا بيدى أمل للناس فكرة إن إحنا نعمل حساب دا هيزعل ودا هيفكر
مفيد فوزى: أنا قلت فى المقدمة أنا لا هخليلك تشتم حد ولا هخليك تخون حد و لا هدفعك للتحريض ضد حد
د.محمود عمارة: جميل
مفيد فوزى: خلينا نتكلم بنبرة هادئة وبعقل مفتوح بما يقاس إقتصاد بلد ؟ فى عبارة واحدة
د.محمود عمارة: جملة الناتج القومى ونصيب الفرد فى الناتج القومى مش بس فلوس لأ جولة حياة
مفيد فوزى: كم يبلغ الإحتياطى الأن ؟
د.محمود عمارة: دى بقى المشكلة الحقيقية النهاردة السريعة العاجلة اللى عايزة حلول الإحتياطى النقدى كان 36 مليار قبل الثورة بيوم النهاردة وصلنا الى 19 ، 18 لأن اللى بيتقال كله من المشكلات صحيح بمعنى لما يقولى حد من المجلس العسكرى اللى ظهر من شهرين وقال إن فى يناير القادم هيكون عندنا 20 مليار 15 مليار وعليا 5 إلتزامات ويبقى 10 فى الصندوق هذا الكلام غير صحيح والدليل إن إحنا النهاردة بقينا 10 يناير وإحنا لسه 18 أو 17 مليار
مفيد فوزى: كم يبلغ معدل النمو الأن ؟
د.محمود عمارة: كان وصل لى 7% صحيح كان فيه خطأ لأن لا يقاس التقدم بمعدل النمو بس كجملة صماء لازم أعرف بيروح فين ؟ بيتوزع فين ؟ لو كانت ال7% بتروح ل 100 ألف واحد وال70 مليون مش لاقيين ياكلوا يبقى sory طظ فى النمو لو بيتحسن بهذا التقدير النهاردة النمو أتعقد إنوا مايزدش عن نص فى المية أو صفر فى المية
مفيد فوزى: ما سبب الركود الإقتصادى ؟
د.محمود عمارة: لأن إحنا حطينا العربية قدام الحصان لو إحنا مشينا فى الطريق الصحيح سياسيا كنا مشينا بالتوازى إقتصاديا والدليل أنا جاى من فرنسا أول إمبارح وكنت مع مستثمريين فرنساويين الناس كانت بتقف لما الثورة المصرية ظهرت بالمعنى السلمية بالمعنى الحضارى اللى بيناسب الشعب المصرى أو اللى الشعب المصرى كان مؤهل ليه
مفيد فوزى: ما القنوات العاجلة لإصلاح الإقتصاد الأن فى تقديرك كخبير ؟
د.محمود عمارة: أولا رغم إنى كنت ضد الدكتور كمال الجنزورى اللى بيعمله حاليا أنا موافقه.. موافقه ليه ؟ إن محتاجين منضعيش ثانية واحدة من عمر الوطن ده أنا شفته فى أكتر من قطاع قطاع الزراعة عمل إيه ؟ فتح الدفاتر تعال فى الزراعة الفلاحين كذا التأمين كذا كل مجال بدأ يفتح ويخلص إجتماعات وفيه قرارات فورية لو كان كمال الجنزورى مع حبى وإحترامى للدكتور عصام شرف جه من أول الثورة كان بقى حالنا إختلف دا وجهة نظرى إتنين عايز تسأل إزاى أنا مع الدكتور كمال الجنزوى بعد ما كنت ضده أنا مع الجنزورى النهاردة لأنه بيعرف ياخد قرارات وبيعمل إجتماعات وبخلفيته وخبرته القديمة إستفدنا منها
مفيد فوزى: أفتكر إن نظرته للعشوائيات شديد الأهمية وضربه للعشوائيات بيضرب فى العنف علشان يعلم إن العشوائيات هى مشتل البلطجة
د.محمود عمارة: بالتأكيد
مفيد فوزى: خلينا نعمل تعليق بسيط على أخبار مهمة فى حياتنا ولكن أريد إن إنت تخاطب البسطاء تفعيل مشاركة المصريين لدعم الإقتصاد من الخارج
د.محمود عمارة: سهل جدا أنا طول عمرى بقول إنه مازلت مؤمن بهذا الكلام هذه قوة ضاربة 10 مليون مصرى فى الخارج منهم مليون مصرى فى الخارج قعد 20 ، 30 سنة بره وعاوز يرجع هو اللى عاوز يرجع ليه لأسباب مختلفة واحد بنته كبرت عايز يجوزها فى بلده واحد زهق زى حالاتى واحد خلاص عمل الحتة اللى كان عايزها أنا بهاجر ليه ؟ علشان يبقى عندى إمكانيات مادية وعاوز أتعلم الأتنين لما يتحققه أقعد هناك ليه ؟ عاوز يرجع فأحنا عاوزين المليون المصرى مستعدين يرجعوا بكره لو رجعوا وكل واحد معاه 100 ألف يورو حق إستديو فى باريس أو نيويورك أو لندن معملش أى مدخرات خلال ال30 سنة عنده إستديو أوضه وحمام كده تخيل حضرتك 100 ألف يوريو فى مليون تخيل حضرتك المليون مصرى دول وزعتهم على مصر فى الأماكن اللى هما يعرفوا يشتغلوا فيها
مفيد فوزى: مليون مصرى يتركوا الحياة فى الخارج ويأتون إلى مصر ؟
د.محمود عمارة: دول من إمبارح مستعدين مش من النهاردة
مفيد فوزى: أعتقد إن إنت حالة خاصة لأنك إشتغلت فى الزراعة وإشتغلت فى مصر وبالتالى وفقت أوضاعك بشكل صحيح تحمل عقل أوروبى لكن أنت مصرى فى نهاية الأمر أنا أعلم إن الذين يعيشون فى أمريكا وفى المهجر هؤلاء مستعدين للمساعدة المالية لمصر ولكن ليس بالضرورة أن يأتوا إلى مصر
د.محمود عمارة: شوف حضرتك فى 3 أنواع من المصريين فى الخارج أنا كنت بزرع فى أمريكا بمناسبة الزراعة أنا مش خريج زراعة ولا عملت فى الزراعة فقط أنا عملت فى 16 مجال مختلف منها الإنتاج السينمائى إكتشفت موهبتى وحبيت مجال الزراعة جواك كنز عليك تكتشفه أنا إكتشفت الكنز اللى جوايا إن أنا لو إشتغلت فى الزراعة أستطيع أن أفعل الكثير وعملتها
مفيد فوزى: ما رشحتش نفسك ليه رئيس محتمل للجمهورية ؟ أنا أعرف صديق ليا أسمه الدكتور صادق رضوان كان عايش فى المانيا وهو رجل فى التنمية البشرية وقد جاء إلى مصر وفى رأسه مشروع كبير الذى يمكن أن نصل بيه إلى الأسطى فى مصر العلاقة أو الوسط ما بين العامل والمهندس وقد رشح نفسه لرئاسة الجمهورية ولا أدرى كيف يمكن إن الناس فى مصر تتعامل مع الأكثر شهرة والأكثر لمعان أو الأكثر معرفة
د.محمود عمارة: أنا وجهة نظرى ما أنا ممكن أعمل إيه زى ما أنا عامل حاليا أنا بشتغل مع كل مرشحى الرئاسة السيد عمرو موسى السيد أحمد شفيق السيد حمدين صباحى السيد أبو الفتوح
مفيد فوزى: يعنى إيه بتشتغل معاهم ؟
د.محمود عمارة: بعلمهم فى البرنامج الإنتخابى بتاعهم البرنامج الإقتصادى الزراعى ومستقبل الغذاء فى مصر مش أى رئيس من دول المرشحين.. عايز يبقى عنده برنامج يقنع به الناس علشان أفكارى توصل توصل إزاى ؟ لو أنا رحت أقعد مع المشير ماهو ماشى بكره لو أقعد مع الجنزورى ما هو ماشى بكره أقعد مع اللى هيجى بعد كده أنا مش عايز منه حاجة أنا مش عايز وظيفة ولا عايز مادة ولا عايز أى حاجة على الإطلاق ودى اللى الحتة اللى عايز أقولها لحضرتك إن المصريين فى الخارج اللى عاشوا فى الغرب بالذات عندهم ثقافة التطوع إن أنا أعمل الشيىء ومش عايز منه حاجة مجدى يعقوب مفتحش دكانة جنب المستشفى عمل متطوع دى ثقافة أوروربية
مفيد فوزى: ليه الجالية المصرية عفوا دكتور محمود بينتقدوا الإعلام بيقولون إنه بيبالغ قوى فى فكرة إن الإقتصاد المصرى متدنى ؟
د.محمود عمارة: هى فيها جزء حقيقى ولازم نقوله ونعرفه وجزء مبالغ فيه إيه الحقيقة وإيه المبالغ فيه ؟ يعنى مثلا محدش قال لنا إن التصدير فى مصر من الثورة الى الأن زاد 25 مليار جنيه
مفيد فوزى: دى حقيقة
د.محمود عمارة: دا رقم 24,6 مليار يعنى 4 مليار دولار زادت الصادرات المصرية
مفيد فوزى: بس الواردات كانت
د.محمود عمارة: لأ أنا هقول الأتنين هقول أدى يا جماعة السلبيات وأدى الإيجابيات أدى المشاكل عندنا فى ده وأدى الحاجة الميزة علشان أصدق ده لازم تقولى ده أنا هقول الإيجابيات الأول أول إيجابية إن أنا عندى 4 مليار دولار زيادة فى الصادرات إتنين هل تعلم حضرتك إن تحويلات المصريين فى الخارج زادت من 8 مليار لى 12,5 مليار بعد الثورة لأول مرة فى تاريخ المصريين فى الخارج يبقى عندى 12,5 مليار دور تحويلات المصريين يعنى قد دخل قناة السويس 3 مرات
مفيد فوزى: عندك عمال ؟
د.محمود عمارة: كتير
مفيد فوزى: سرحتهم؟
د.محمود عمارة: لأ
مفيد فوزى: بياخدوا فلوس ؟
د.محمود عمارة: بيقبضوا عادى وعلى فكرة أقل عامل عندنا بياخدوا 900 جنيه
مفيد فوزى: عامل إيه ؟
د.محمود عمارة: عامل زراعى ومش لاقيين المزارع بتاعة مصر ناقصاها عمال أى عدد من الناس عايز يشتغل يتفضل يجى بكره تقنى فنى مهندس عنده إستعداد يشتغل يتفضل بكره الصبح هاتلى 300 عامل زراعى أشغلهم بكرة الصبح
فاصل
مفيد فوزى: قولى رأيك إيه فيما أعلنه الجنزورى من شد الحزام فى الفترة القادمة وإيه الأولويات اللى ما نشدش فيها الحزام ؟
د.محمود عمارة: أول حاجة بتصور وأنا عندى دولة فى شهر ثورة دولة يعنى إيه زى ما بدرسها فى القانون ؟ دولة يعنى دستور وعندى مجلس شعب وعندى رئيس الجمهورية دا هيكون تم فى 30/ 6 وأنا عندى دولة المفروض يبقى عندى 3 حاجات فى وقت واحد أول حاجة أنا عايز إيه من مصر فى سنة 2020 بعد 9 سنين من الأن عاوز مصر تبقى ماليزيا والا تبقى الصومال ؟ لو إخترت إن تكون مصر ماليزيا أو تركيا أو البرازيل أحط مصر كده قدامى وأقول أنا عايز أبقى عاشر إقتصاد فى العالم بعد 9 سنوات هل عندى القدرات والإمكانيات إن أنا أعمل ده ؟ مصر فيها موارد وقدرات هائلة ممكن نتكلم فيها إتنين أعملها إزاى ؟ وبكام ؟ ازاى هيجيب الفلوس دى منين ؟ أعمل إيه أول سنة لو أنا اللى بقرر
مفيد فوزى: لاحظ يا إستاذ محمود المواطن المصرى من النوعية اللى بتقول إحيينى النهاردة وموتنى بكرة
د.محمود عمارة: المفروض أعمل إيه من أيام عصام شرف ال12 مليار كانوا راضوا الناس دى ما فات قد فات طب نعمل إيه بكرة ؟ أنا عندى مشروعات بكرة الصبح تفتح فرص عمل وتحسن الدخل للمواطن ده لو أنا إشتغلت بكرة المشروعات اللى مش عايزة إستثمارات من الدولة هدى حضرتك مثال واحد هل تعلم حضرتك إن قناة السويس دى إحنا قاعدين وى العجزة قدام القناة بنمد إيدينا بنقول للمركب تدفع 100 ألف زى الهاى واى كده
مفيد فوزى: هل حصيلتها هى الأفضل ؟
د.محمود عمارة: لأ دا عيب فى حقنا كمصريين دخلها 4,5 مليار المتوسط فى الشهر الدراسة اللى عندنا دراسة الجدوى من غير إستثمارات إستثمار فقط ما هو متاح من كراكات من أوناش موجود تحت إيد العمال توصل لى 12 مليار دولار بعد 18 شهر من الأن كل سنة أنا عندى 11 مشروع تحت إيدى أنا فى مجلس الوزراء فى بنك الأفكار جاهزين منها الأهرام إن السائح يطلع من التحرير فى النيل يروح الهرم فى الميه
مفيد فوزى: هل هذه المشاريع اللى حضرتك بتفكر فيها هى فى بنك الأفكار هل هى مشاريع على المدى البعيد ؟ يعنى إيه دلوقتى ؟
د.محمود عمارة: لايعنى فيه منها جزء فى الخدمات مش محتاج أى حاجة فى خلال 18 شهر هوصلك من 4,5 مليار لى 18 مليار
مفيد فوزى: هل هذه الأوراق اللى حضرتك بتتكلم عليها أمام الدكتور الجنزورى ؟
د.محمود عمارة: مطلبهاش منى
مفيد فوزى: من طلبها فى مصر ؟
د.محمود عمارة: الدكتور عصام شرف الدكتور الجنزورى لسه مبقلهوش كتير ثانيا إتلخم فى 1000 حاجة أعتقد إنه من خلال برنامج حضرتك يسمع إنه يطلب يقول إبعتلولى هذه الدراسات علشان أطبقها لأن هو هيستفيد منها هيستفيد منها فى إيه؟ لأن هو عايز يريح نفسه ويريح مصر فيه حاجة تانية يا أستاذ مفيد هل تعلم إن أنا بدعم القمح المصرى بأرقام خيالية بتتكلم فى 9 مليار جنيه دعم للقمح مش حق القمح طب ما أنا أقدر فى 38 شهر أكتفى بالقمح
مفيد فوزى: الخبراء الزراعيين اللى قابلتهم قالوا إنه رغم كل ما هو موجود فلابد من الإستيراد
د.محمود عمارة: طب ما تجيبوا حضرتك قصادى فى برنامج ونتكلم هقول لحضرتك حاجتين وحد يرد عليا فيهم واحد وزارة الزراعة اللى حضرتك بتستشهد بيها بتقول إنها بتفقد 20% فى عملية النقل والتخزين والتداول صح فى 7 مليون طن قمح بنتجهم و7 بستوردهم يبقى 2,8 مليون طن قمح بنفقدهم فى الشونة اللى الفئران بتاكلها والمطر بينزل عليها ما هو دا سؤال علشان أوفرهم يبقى عندى 50 صومعة فى كل محافظة المصريين يتلموا فى حالة لما يكون فيه مشروع قومى يديهم أمل للمستقبل أو يؤمنوا بيه وفيه قائد معاه أو فى حالة الخطر الشديد لما يبقى فيه خطر شديد على مصر الناس تتلم حصل فى 73 كانت كل الحسابات مينفعش نعدى لكن عدينا بالتالى أنا بشوف النهاردة إن مصر محتاجة حاجتين مش حاجة واحدة أنا عايز واحد عنده تصور عايزه يقنعنى يقولى تعال نعمل خريطة مصر ومستقبلها
مفيد فوزى: بتتكلم عن الرئيس المحتمل ؟
د.محمود عمارة: الرئيس القادم دا لازم إذا ما كنش عنده كاريزما وشخصية وشجاعة وقوة فى إتخاذ القرار وميبقاش على المنصب أنا أعمل دهوأمشى بكره أمشى إيه المشكلة ؟ طالما دا يتعلق بمصلحة مصر أنا النهاردة فى موقف لا أحسد عليه ليه ؟ العالم بيتفرج على أحفاد الفراعنة العالم النهاردة بيتفرج علينا بيشوف العالم أحفاد الفراعنة دول هو فيه إيه ؟ هما راحوا فى سكة تانية ليه ؟ العالم كان واقف على صوابع رجليه فى أول الثورة اللى كان بيسافر زى بره وبيشوف الأجانب كانت الناس مش مبهورة ليه ؟ لأنه أصل مصر دى حاجة فى الكنيسة بتتقال واليهود بتتقال الجامع بتتقال فى المدرسة بتتقال على فكرة يمكن إحنا الشعب الوحيد اللى فى الدنيا اللى ما بيفهمش قيمة مصر
فاصل
مفيد فوزى: تسمح تقولى كيف نستفيد من التجربة السنغافورية ؟
د.محمود عمارة: حضرتك سنغافورة 700 كيلو متر يعنى توصل لمسساحة سينا يعنى لو خد شريط جنب قناة السويس كده 30 كيلو سنغافورة عندها 180 متر فقط شواطىء طول قناة السويس 180 كيلو متر يعنى أنا عندى قناة السويس أد الشواطىء اللى موحودة فى سنغافورة وعندى أكتر عندى 180 كم متر تانى على البحر المتوسط طيب أنا اسأل هخل أنا عندى المقومات اللى موجودة فى سنغافورة وإيه اللى عندى فى الحتة دى ؟ لو أنا أخذت الحتة دى عاوز مشروع دلوقتى أهو قناة السويس بدراسة الجدوى اللى أنا قلتها من شوية اللى توصلنى بعد 5 سنين ل 100مليار دولار سنويا
مفيد فوزى: إنت بتتكلم بالأرقام بسهولة 100 مليار
د.محمود عمارة: 104
مفيد فوزى: 104 فى إيه ؟
د.محمود عمارة: فى خلال 5 سنين
مفيد فوزى: طيب تعال من فضلك نحدد وأنا هكتب تسمح تقولى منذ الغد نبدأ بى إيه ؟
د.محمود عمارة: نبدأ بالتحديات وهو سؤال هقوله ما هى التحديات التى تواجه مصر للوصول إلى العالمية ؟ واحد الإنسان المصرى يحتاج إلى إعادة الإنضباط إلى تعليمه حرفة إلى تعليمه لغة مين اللى عمل كده التجربة الماليزية
مفيد فوزى: دى قضية معنوية إنك أنت تعيد إنسان للإنضباط وان لا يشاغب ولا يحرق إزاى ؟ قولى ماليزيا عملت إيه ؟
د.محمود عمارة: أنا قضيت مع مهاتير محمد بالصدفة فى ماليزيا قولتله عملتاها إزاى ؟ قالى سهل أنا عندى معسكرات الجيش فى ماليزيا دخلت الناس اللى فى سن العمل من سن 18 لى 40 سنة جوا المعسكرات 6 شهور
مفيد فوزى: يعملوا إيه ؟
د.محمود عمارة: يتعلموا الإنضباط الإنضباط يعنى إيه يعنى الساعة 7 الصبح هيصحى بعد شهر مش هيحتاج منبه الساعة البيولوجية هتشتغل هعلموا يكون 7 ونص يكون غسل وإستحم ولبس ووقف فى الطابور زى الجيش بعد 6 شهور لو أنا خرجتوا كل يوم هيشوف أمه بتسرق وأبوه بيسرق
مفيد فوزى: ماليزيا عددها قد إيه يا دكتور ؟
د.محمود عمارة: 3 مليون
مفيد فوزى: يعنى تلت عددنا
د.محمود عمارة: أه بس كان عنده تخلف أبعد بكتير
مفيد فوزى: إنت عندك قد إيه أمية فى مصر يا دكتور عندك قد إيه بطالة فى مصر ؟
د.محمود عمارة: هقول لحضرتك إحنا قدامنا حلين فى التطوير إما هقول أدى مشاكلى أه وينهار إسود مش هينفع وأما أقول أدى مشاكلى أهه وأدى حلولى أهه حلولى أجبه منين ؟ من التجارب علشان مضيعش وقت اللى جرب ده صرف فلوس ومجهود ووقت أنا أخد خلاصة التجربة الدول العربية لما جت تعمل المرور ما أقعدتش فترة تقول هعمل المرور إزاى ؟ أشوف تجربة ناجحة وأعملها بنفس الطريقة ماليزيا علشان أرجع لموضوعى ماليزيا فى الإنضباط الإنسان الماليزى قعده فى معسكرات الجيش 6 شهور يعلموا الإنضباط ودا كلمة كبيرة إتنين أنا عايز أشغله علشان أشغله لازم أعلمه 3 حاجات إنضباط حرفة لغة الإنضباط عرفنا ليه ؟ ما أحوج الشعب المصرى للإنضباط كلنا إتنين حرفة ليه ؟ لأن أنا فى مشروع النهضة اللى أنا هعمله مش هحتاج مليون فى الزراعة ومليون فى السياحة ومليون فى الخدمات طب الناس دى مش النهاردة فى الوقت الميت ده أدخلها أعلمها علشا لما أطلعه أضخه فى السياحة مش جرسون واخد ليسانس حقوق بيدور على شغلة يروح يشتغل فى السياحة فيجبلى الأكل وصباعه فى الطبق متعلمش لكن لو أنا النهاردة رحت علمت نص مليون على النهضة هتحتاج مؤهلين
فاصل
مفيد فوزى: هل يمكن فى يوم من الأيام نفوت على الصحرا تخضر
د.محمود عمارة: طبعا ببساطة شديدة وعلى فكرة فى تجارب ونمازج لو حضرتك بس مشيت على الصحراوى خش 10 كيلو متر فى الصحراشوف اللى حصل جوا إيه متبصش للى 30 واحد هما 32 واحد اللى خالفوا القانون على الطريق الصحراوى وعملوا فلل ومنتجعات 32 واحد وأنا قلتها 100 مرة قلت علقوهم فى ميدان التحرير دى مشكلة لكن أنا ذنبى إيه ؟ أنا اللى إحترمت القانون وزرعت وقلعت صح ما خلفتش أى مخالفة ليه تعذبنى أنا ؟ بحجة إن هما خدوا الأرض أنا مالى أنا ما إحنا 600 ألف واحد علشان دول قرايب جمال وحسن وإبراهيم ما تعدمهم يا أخى أنا دخلى إيه فى الموضوع
مفيد فوزى: إنت بتزرع إيه ؟
د.محمود عمارة: أنا بزرع فاكهة وبزرع شتلات بجيب بذور من برا وبعملها شتلات ليه ؟ لأن أنا كنت عايش برا فى الصادرات يعنى فى الأسواق الخارجية فعارف هناك سوق المستهلك إيه ؟وإحتياجات السوق إيه ؟ أخش أمتى بالمنتج المصرى وأخرج أمتى ؟ شغلتى لعبتى ما أنا عايش عندك باكل زيهم علشان كده المصريين فى الخارج أنا محتاج منهم العقل والخبرة وإبتكاراته لما أعمل نهضة يعنى معناها هعمل إنتاج معناها عايز أسوق هذا الإنتاج العالمى طب مين هيعملهولى يبقى المصرى اللى عايش فى أمريكا أو فى لندن أو فى هولندا اللى فاهم اللى أنا بقوله ده علشان يغزو الأسواق العالمية إذن أنا محتاج كل الناس دى على فكرة نحن لا يننقصنا لا موارد ولا مقومات ولا حاجات من دى على الإطلاق
مفيد فوزى: مشاريعك عملت منها كام نسخة
د.محمود عمارة: 4 نسخ
مفيد فوزى: بعت لمين ولمين ؟
د.محمود عمارة: المشروعات العامة بعت لعصام شرف ومركز دعم وإتخاذ القرار عمرو موسى وموجودة ومتاحة للجميع وكتبتها فى الجرايد أكتر من مره اللى عاوز
مفيد فوزى: الجهات الأربعة دى مفيش حد منهم عمل خطوة واحدة ؟
د.محمود عمارة: عمرو موسى ميقدرش يعمل اللى لما يبقى رئيس لكن الباقيين محدش عمل حاجة مفيش خطوة واحدة
مفيد فوزى: هل بعت نسخة للدكتور كمال الجنزورى ؟
د.محمود عمارة: لأ
مفيد فوزى: ليه؟ هل يجب إن هو يطلبها منك ؟
د.محمود عمارة: مش عارف ممكن يكون تقصير منى ممكن يكون زهق ممكن يكون قرف ممكن يكون مش فاضى هو فأنا مش عايز أقحم عليه حاجة وبما أنى كنت مرشح لأكثر من حاجة وزير الإستثمار ووزير الزراعة والكلام العبيط ده فالبتالى مش عايز يتقال أو يفتكر إن أنا جاى بقدم ده علشان أحط نفسى فى الصورة مش عايز صورة أنا عاوز الأفكار دى تتعمل غيه ؟ إذا كنت سبت باريس والكوراسون وجيت عشت هنا علشان بحب هنا إذا كان المصريين فى الخارج جابوا 12,5 مليار من برا لجوا بعد الثورة والمصريين فى الداخل هربوا 9,5 برا إذن تعظيم سلام للمصريين فى الخارج .