أحمد عفيفي يكتب : وعد بلفور .. العريان !!

الله يرحمك يا بلفور ياللي كان قلبك أحن من " الخساية " على رأى زكية زكريا .. واللي كنت دايما تنده على نجاتييي عشان ينفخ البلالين لعيد ميلاد إسرائيل اللي انت وعدتهم بوطن لهم في فلسطين .. وصدقت في وعدك يا راجل يا طيب ، وزرعت لنا شوكة في قفانا مش عارفين نطلعها لحد دلوقتي .. وبصراحة يابلفور الكلب ، كل ما تيدجي سيرتك نلعن أبو اللي خلفوا أمك .. عشان انت السبب في كل اللي حصل وبيحصل لحد النهاردة في فلسطين.



بس احنا يا بلفور مكناش نعرف انك مخلّف في السر ومن ورانا يا لئيم عيال شياطين زيّك .. وأول مرة اعرف ان الدكتور " عصام العريان " بتاعنا ، ابنك .. خلّفته امتى وازاى وفين مش موضوعنا دلوقتي .. بس الراجل العريان ده الخالق الناطق انت .. " تقولش ابوه بجد " .. نفس حنيّتك وقلبك اللي كمان مرة زي " الخساية " .. وصعبان عليه اليهود اللي دلوقتي في إسرائيل وعايزهم يرجعوا مصر .. مش كلهم طبعا.. اللي كان في مصر يرجع بلده .. واللي كان في اليمن يرجع اليمن واللي شوقه واخده على الكويت يروح الكويت .. كل يهودي من حقه شرعا وقانونا وغصب عن عين اتخن واحد فيكي يابلد من حقه يرجع تاني .. لأ وإيه .. ويطالب بتعويض عن سنين الهجرة والعذاب اللي اتحرم فيها من حبيبته مصر .. مصر هى أمه .. نيلها هو دمه .. شمسها في سماره .. شكلها في ملامحه .. حتى لونه قمحي . لون خيرك يا مصر.


هو ده اليهودي اللي كان على عينه يسيب مصر من كتر ما كان بيحبها .. واللي عصام العريان اصدر وعد زي اللي خلّفه بلفور بعودتهم مرة أخرى إلى البلاد .. عشان ايه بقى ؟ .. اولا عشان ده حقهم .. " ياخي كسر حوقك انت وهما" .. ثانيا عشان دي الوسيلة الوحيدة اللي حنحرر بيها فلسطين ونخلّيها ترجع بلدها معززة مكرمة .. وتزول دولة إسرائيل .. ماهو خلاص مش حيكون فيه ناس في إسرائيل .. كل يهودي إسرائيلي حيرجع بلده اللي أجداده اتولدوا و اتربوا فيها .. وألف مليون مبروك على الفلسطينين الارض كلها .. ومبروك ع البلاد العربية اللي مصر منها طبعا احتلال إسرائيل لها .. يعني نحرر فلسطين ونخلي إسرائيل تحتل كل البلاد العربية التانية .. عشان العريان ينبسط وياخد الجنسية الأمريكية .. حتقوللي وايش دخل امريكا في حكاية العريان واليهود المصريين .. حاقولك ماهو أصل عصام افندي العريان " ملط على طول " كان في امريكا من كام يوم مع الحداد ابن يوسف الثقفي .. وقابلوا هناك عم اوباما وعمتي هيلاري كلينتون وجات سيرة اسرائيل يا حبة عين امها اللي مكروهة من العرب كلهم ، الا الناس بتوع ربنا اللي اسمهم الإخوان المسلمين .. اللي ان شاء ربنا حيرجعوا للإسرائيليين حقهم اللي ضايع في بلاد الله خلق الله .. وعشان محدش يقول لنا طيب ما الفلسطينيين كمان حقهم ضايع .. نقوم نعمل ايه بقى .. نرجع اليهود لبلادهم اللي جم منها ونفضّى تل ابيب وما حولها للفلسطينيين .. يرجعوا بقى .. وشجر اللمون اللي كان دبلان على أرضه حيطلع تاني وراسه في السما .. وشجر الزيتون في يافا وحيفا حيرفرف بأوراقه مبتهجا بالتحرير.


وادعوا بقى لعصام العريان.. اسف عصام بلفور العريان اللي عقد صفقة مع أمريكا لحل المشكلة الفلسطينية حلا نهائيا وخلق مشاكل لاحصر لها لكل البلاد العربية بعد ماتفتح حضنها لاولادها اليهود الحلوين الطعمين اللي العيبة متخرجش منهم.


زمان قالها عبد الناصر عن وعد بلفور : " لقد اعطى من لا يملك لمن لا يستحق " .. بس احنا بقى في 2013 .. "سنة سودا عليك يا عريان وعلى كل اللي معاك " .. احنا في 2013 حنقول وبكل الصدق : لقد أعطى من يملك لمن يستحق .. على اعتبار ان مصر بقت بتاعت العريان والإخوان المسلمين ومرسي وبديع وكل من شافوا حلاوتنا وطعامتنا ولا صلوش ع النبي .. ما خلاص .. هما دلوقتي بيتصرفوا في البلد كأنها بتاعة اللي خلفوهم .. ولسه بكره المستخبي يبان .. بكره تلاقي سيناء ، بعد ما رجعت سالمة لينا قامت وفي غمضة عين بقت بتاعت حماس .. وحماس ياجماعة الخير قبل ما تتخضوا وتندهشوا ناس من الجماعة اللي بتحكم مصر ومدلدلة رجليها .. تدي حتة لحماس .. وتسيب حتة صغنونة لإسرائيل .. وتجيب اليهود المصريين وتطرد أهل كايرو - بما فيهم بلال فضل - كلهم على الصحراء او في داهية تشيلهم .. ويسكن فيها اليهود .. ونهدم المساجد ونبنيها معابد لليهود اللي ظلمناهم زمان ومن حقهم النهارده يرجعوا تاني .


عم العريان بيتكلم في مداخلة مع ريم ماجد عن الموضوع ده وبيدافع عن وجهة نظره .. و" البنيّة " ياعيني اللي اسمها ريم حتتجنن مش مصدقة : انت بتتكلم جد ولا بتهزر .. انت عايز اليهود يرجعوا مصر تاني .. صعبان عليك اليهود أوي .. يا حبيبي يا حنيّن .. طيب ما تشوف الاول المصريين اللي بياكلوا من صناديق الزبالة واللي مش لاقيين مكان يقضوا فيه حاجتهم واللي مش لاقيين هدمة يلبسوها ولا سقف بيت يسترهم .. سيبت كل الناس دي ورايح تدور على حق إسرائيل .. ده انت البعيد " دي من عندي انا مش من على لسان ريم " معندكش دم !


يقوم العريان ابن العريان يرد عليها : يعني اليهود يروحوا فين .. ورا الشمس مثلا ولا ينتحروا .. هما مش بني ادمين ولا ايه .. يا ناس لازم يكون في قلبنا رحمة.


عندك حق ياعريان يا ابن العريان .. لأ .. اليهود ميروحوش ينتحروا .. المفروض اللي ينتحر بعد الكلام الغبي اللي انت قلته هو سعادتك .. بس طبعا عشم ابليس في الجنة .. اللي زيك مينتحرش .. اصل اللي بينتحر بيبقى عنده دم .. وانت وكل الإخوان المسلمين - واذا زعلت مني اتفلق - معندكوش ريحة الدم!