احمد عفيفي يكتب: مين يقاضي مين ... يا " غجر "؟!!

فوجئت بزميل يتصل بي في الثانية صباحا ويقول لي : قناة الفراعين حترفع عليك قضية سب وقذف وقاعدين دلوقتي يقطّعوا في فروتك .. والمذيع اللي انت قلت عليه احمد وزة " مبرّق عينيه " وناوي لك ع الشر .. حوّلت على الفراعين ، فإذا بالافندي " وزة " يتحدث مع محامي تطوّع عن رضا وطيب خاطر للدفاع عن الفراعين ، بعد ان قرأ مقالي في الدستور الأصلي وكان عنوانه " اسفخس على دي قناة " ..
وباستعباط شديد يسأله "وزة ": إيه اللي خلاك تتطوع للدفاع عن مذيعي القناة.. فالأستاذ الصحفي اللي اسمه احمد عفيفي مش وراه حد غيرنا .. ومش سايب حد الا وبيسخر منه ويستهزأ به .. فرد المحامي الغيور زيّهم على مصلحة مصر : الحقيقة انا قرأت المقال واستفزني جدا ، من السب العلني والتطاول والألفاظ القبيحة اللي قالها الأخ الصحفي ، لذلك أعددت مذكرة من 10 ورقات أتناول فيها دوافع بلاغي ، متناولا كل لفظ خارج وجارح يدخل تحت بند القذف الصريح ، وسوف أتقدم بهذا البلاغ إلى النائب العام ضد هذا الصحفي وضد رئيس تحرير الجريدة كمسئول مسئولية مباشرة عن كل ما يُنشر في جريدته. وشكره أخونا الوزة على حماسه المفرط ومصريته الأصيلة التي تأبى أن ينال أعداء الوطن – اللي انا منهم – أن يقضوا عليه مع بتوع التحرير . ولم ينس احمد افندي وزة ان يضم معه في البلاغ أخونا التاني هيثم طوالة الصحفي الذي لا اعرفه بجريدة الجمهورية. وقد سبق أن كتبت مقالا منذ اسبوعين تقريبا بهذا العنوان الذي استفزهم وحرّك مصرية عمنا المحامي المتطوع .. واعتبرني واحدا من أعداء الوطن ..
وهذا المقال - لمن لم يقرأه - كتبته بعد حلقة رأيتها بالصدفة البحتة في الفراعين ، فيها من السب والقذف العلني وهتك الأعراض ما يستوجب على هذا المحامي " الدكر " الغيور على مصلحة مصر ، أن يرفع قضية على كل من المذيع احمد عبد العزيز " الوزة " والمذيعة سوزان والاخ الصحفي هيثم طوالة ، فقد قال الثلاثة في " فتاة العباية " ما لم يقله مالك في الخمر .. منتهى الوقاحة وقلة الأدب .. " سب تاني أهو لو تحب تضمه لملف القضية " .. أشاروا بوضوح إلى أنها لم تكن في التحرير بغرض الثورة والتظاهر ، وإنما - والله اعلم - ربما لأشياء أخرى ، والدليل - والكلام هنا على لسان الست سوزان - أنها كانت لابسه العباية على اللحم ، وبكباسين مش بزراير .. ثم يسمحوا بمنتهى الوقاحة أيضا لمتصل على الهواء يسب الفتاة سبا علنيا في شرفها ، ويؤكد لهم وهم في غاية السعادة ان ربنا نصرهم وأظهر الحق عن طريق هذا المتصل الوضيع الذي قال: البت أم عباية جابوها من خيمة كانت فيها مع واحد ، وكانوا لا مؤاخذة بيعملوا حاجات قبيحة .. عشان كده الضابط المصري الأصيل غار على مصر وشرف مصر ، فجرّها من شعرها وضربها بالجزمة عشان يعلّمها الأدب .. والحاجات الوسخة دي تعمليها في بيتكم ، وانت قافلة الباب عليكي انت واللي معاكي ، إنما في الشارع وفي ميدان التحرير.. ميدان الثورة والثوار الشرفاء .. لأ ياروح امك .. والف لأ كمان. تخيّلوا ان مثل هذا الكلام " النتن " - وسامحوني في اللفظ - يُقال في مداخلة على الهواء ، ولا يثير إلا ابتسامات بلهاء غبية من الثلاثة في الاستوديو " وزة وسوزان وطوالة افندي " .. والله لو كان باستطاعتي لاتصلت بنفسي ومسحت بكرامة الثلاثة الأرض على هذا العفن الذي رأيته وسمعته عن فتاة هي أشرف منهم كلهم. .. قال انا اللي حيرفعوا عليّا قضية .. " ونبي تتحطوا " وتداروا وشكم بمنخل ولا أى هباب ازرق، لما ينزل مستواكم إلى هذا الحضيض ، وكأني أشاهد حلقة من ماسورة مجاري " معفنة " شممت رائحتها وانا في الكويت ، والثلاثة " جوّه " الماسورة نفسها ، في القاهرة ومش شامين حاجة .. لأ وإيه .. مبسوطين كمان! أما سي هيثم اللي زعلان أوي إني قلت عليه قبل أن يظهر في الفراعين ، انه قال لامه وخالته وعمته وقال لابنه يقول لاصحابه في المدرسة أبويا حيطلع في الفراعين النهارده .. هيثم افندي االلي حينضم كطرف مجني عليه في القضية اللي انا الجاني والمتهم فيها .. قال عن جماعة 6 ابريل بالحرف " دول عايزين ضرب الجزمة .. والبت أسماء محفوظ اللي ابوها فاتح كشك سجاير .. اللي كانت بتخرج بشبشب .. دلوقتي راكبة عربية بالشىء الفلاني " .. وفي النص برضه قال كلمتين على " فتاة العباية " إرضاء لمن تعطّفوا عليه واستضافوه .. مع إنه – لو بيفهم – لا يظهر أبدا في هذه القناة المشبوهة المعتوهة " قليلة الأدب " .. واللفظ أقصده وأعنيه .. فقد شاهدت أمس توفيق عكاشة اللي هو مدير كل الشلة دي .. واللي هما كلهم " شغالين " عنده .. كان يتكلم عن الانتخابات ويرد على من استهزأ بعدد الأصوات التي نالها .. وقرأ رسالة لفتاة تسخر من أصواته الضئيلة .. فبماذا رد عليها هذا العكاشة اللي المفروض يتعكش عكشة محترمة عشان يحترم نفسه والمشاهدين القليلين اللي بيتفرجوا عليه .. قال لها بالحرف الواحد : انتي يا حلوة لما بتطلعي فوق السطوح .. تعرفي كام سلمة طلعتيها .. فاهماني ؟ فوق السطوح .. وانت طالعة الأوضة إياها اللي فيها " ... " .. هه .. فاهماني طبعا؟ .. انتي بتتريقي عليا .. طيب عدي الأول كام سلمة للسطوح وانت طالعة ل " ... " في الأوضة إياها. بذمتكم .. وانا راضي ضميركم .. فيه راجل محترم يقول كده وعلى الهواء .. أمال " الولية الشرشوحة " تقول إيه .. فلاح إيه ونيلة إيه اللي انت فلقت دماغنا بيه .. اقسم بالله لو الفلاحين - اللي بجد - عندهم دم ، ليعلنوها صراحة أنهم " متبرين " منك ، ولو اتكلمت تاني باسمهم فسوف يقاضونك .. لأنك أسأت إليهم إساءة بالغة .. فليس من الأدب ولا الكياسة .. " والله ولا حتى قلة الأدب اللي لها برضه حدود " ، ان تشرشح لفتاة أرسلت إليك رسالة أيا كانت ، وترد عليها بكل هذه الوقاحة .. دكتوراه إيه وهباب إيه اللي معاك .. خدتها في إيه بالضبط ..وفين ..؟ .. وعلى رأى المثل " إذا كان رب البيت بالدف ضارب ، فشيمة أهل البيت الرقص .. ومن عندي .. والمسخرة كمان “.. عشان كده ، كل اللي شغالين معاك ، شاربين منك الصنعة التي لا علاقة لها من قريب او بعيد بالإعلام اللي الدكتوراه بتاعت سعادتك واخدها فيه .. وكلمة أخيرة عشان قرفت منكم كلكم : لِم نفسك .. والشلة اللي معاك .. مصر بلد محترم " على قولك " ، واللي يتكلم عنها وباسمها ، لازم يكون محترم ، وإذا اصر على عدم الاحترام .. يشوف أى داهية بعيد عننا .. هو واللي معاه .. حاجة تقرف!!