عبد المنعم حسين يكتب: زنا الحكومات

عشان المصرى المدفون
فى العشوائيات
عشان المصرى العليل
اللى لا عاش ولا مات
الى رضع السم
من بِز فساد
لحكومة عاهرات
خانت مصر على سريرها
مع شلة اغوات
سفله لابسه بهوات
قوادين .. مرابين
حكمونا فى ماخور
سنوات وسنوات
عشان شعب عاش بقره
تتحلب وتتسلخ
ولحمها يتفرق
على ولاد الذوات
وترجع تتعلف تانى
بالفُتات
عشان تندبح تانى
مرات ومرات
عشان ننفض توبنا
من اللى نابنا
لازم نرجع مصانعنا
نحرت مزارعنا
نعمرالبور والخرابات
نحمى مضاجعنا
واللى يضاجعنا
ندفنه
ونبطل سُكات
عشان نصلب طولنا
ومحد يطولنا
لازم نبطل شعارات
لازم بصوتنا
نمحى اللى فات
نغسل نجاسة امبارح
ونتوضى بعرق نضالنا
ونملا أرض مصر صلوات
وإذا كان سكوتنا عباده
صوتنا ح يصرخ
فى الإنتخابات
وننهى زمن حكام اللواط
وزنا الحكومات