بسمة صلاح الدين تكتب: مسمط الثورة يحييكم

أيوة جاااااى !
بيقولوا فى المثل الشىء اللى يزيد عن حده يتقلب لضده .. متفقين ؟؟ ولا فى حد هيعمل مليونية الجمعة اللى جاية لرفض الحِكم والأمثال القديمة من غير لا ضرب ولا شتيمة وهتبقى مليونية نضيفة مية المية !
طب هو حد كان يصدق إن مبااااااارك ذات نفسه وبشحمه وبلحمه "يتخلع" ولا كان يتلخلخ ولا يتلحلح حتى ؟؟؟ ولا حد كان ممكن يصورله خياله المريض ان ولاد الريس المتنحى ووزراءه ولاد العز الشرفا ل نظاف الحبايب المسرورين يكونوا من نزلاء سجن طرة لاند .. المزرعة سابقاً ؟!
ده حلم ولا علم ؟؟ ده يعتبر انجاز ما بعده انجاز وحصرى على ثورتنا المصرية وبس .. وباعتراف أعتى الدول الاوروبية والعربى بالموسكى وبورسعيد وشبرا !
وبالرغم من أن نزلاء طرة جروب راحوا فخبر كان وسابولنا الجمل والحصان وابو جلابية وابو رجل مسلوخة عشان يخوفونا ويطلعولنا لسانهم ف الضلمة !.. نقوم نخاف ونكش ونسلم نمر ونجرى نستخبى فجحورنا رافعين شعار ولا يوم من ايامك يا بابا حسنى .. يا مهنينا يا اللى حارسنا ومجوعنا ومفلسنا !!
وتخلص الحدوتة وأبوك يروح عند اخوك وتبقى دى نهاية فرقة ثورة الشباب المسرحية بقيادة فلول الحزب الوطنى واذناب النظام وكدابين الزفة ونبقى لا طولنا عنب اليمن ولا بلح الشام .. و كأنك يابو زيد لا اتنيلت ولا غزيت " واللى كلناه كنتاكى كنتاكى يطلع علينا يوروهات يوروهات .. ويافرحة القلة المندسة وشماتة الاجندات الخارجية فينا .. ويا دم الشهداء اللى راحوا "فطيس" وغطينى وصوتى عليا ياما .. !!
ويبقى مقدمناش غير حل واحد .. نقفل بلدنا "مصر" ونروح ندورلنا على مصر تانية .. آه .. مهوعلى رأى المثل اللى جوزها يقولها يا عورة تشمت فيها العارجة والحولة .. والسودا والكودا والهبلة اللى مسكوها طبلة ..داحنا العالم كله قاعد ومترصد ومفنجل لنا عنيه ع الاخر .. ومستيلنا الغلطة .. عشان مصر بلد مش عادية فوق التيبيعى بشوية ..والبلدى يوكل .. اومال قيمة وسيمة وموقع استراتيجى .. بلد لها شنتها ورنتها وهيبتها فى المنطقة وفششششر "الجزيرة"المحيطة .. وزى مالكل راسى ع الدور ان فى بلاد كده عمالة تضرب ف أسافين و"نيران" مش صديقة من تحت الحزام .. وبلاد تانية عمالة تفرقع فبمب وفشنك امريكانى اشكال والوان والعملية مش ناقصة .. هنلاقيها منين ولا منين ؟؟؟
دى الطماطم المجنونة بقت ب5 جنيه وانبوبة البوتوجاز سعرها عدا العشرون لحلوحاً وقزح .. يعنى كلها كام شهر ومش هنلاقى مم نوكله لعيالنا ونبقى شمتنا فينا الأعادى اللى لابدين لنا فالدرة من ناحية مرصد حلوان وانت داخل على أيدك اليمين .. عارفهم؟!!
عجايب.. بدل ما نلتيفت لمصالحنا ونشوف الاقتصاد اللى باظ والسياحة اللى ضربت من كل حتة نروح سايبين اشغالنا واللى ورانا واللى قدامنا وننزل نجرى ع التحرير .. ونقول أبصر مليونية نشجب ومليونية نعترض .. واخوانا البعدا فى اوروبا والدول المتقدمة بتوع ناو ناو يقعدوا ع الشيسلونك بتاعهم ويضربوا التِفاح الامريكانى ويطرقعوا قزازة الكاكولا ويفتحوا قناة ال w c والجزيرة توداى ويتفرجوا علينا واحنا مدورين الضرب فبعضينا ومقضينها مليونيات و واضرابات واعتصامات ونخسر كل يوم مليارات قد كدهوك ؟؟؟..والسياح ما يكدبوش خبر ويروحوا واخدين ديلهم فسنانهم ويجروا من عندنا.. والمستثمرين الافاضل يروحوا يستثمروا فحتة ناشفة " يوه قصدى ف حتة هادية .. واحنا بعد ما عملنا مليونية الزيطة نقعد نغنى ظلموه جنب الحيطة وعوزنها تبقى خاضراااااااااا !!
طب إزاى ؟؟ مهو انا مديش عقلى لغيرى و يبقى ابنى فأيدى وأدور عليه؟؟ اللى خلانا يا مصريين صبرنا 30 سنة "عجاف" ف الهم والغم وكاتمين فقلبنا وصارين ولا نقدر نقول تلت التلاتة كام .. مش قادرين نصبر ونستحمل الحبة دول ده فاضل ع الحلو دقة .. ده كفاية مهرجان الأسطرة للجميع بتاع ماما سوزان ده لواحده من أكبر مكاسب الثورة .. ياه .. ده الواحد اتفقعت مرارته من الست آه .. حر؟؟؟.. .. مية .. ومن أجلك أنت !!
وبعدين .. ده الضرب ف الميت حرام .. والمجلس العسكرى حط صوابعه ف الشق م البلطجية وابو طاقية وابو بطانية وابو لحاف .. هيلاقيها منين ولا منين ؟؟ ده إحنا فاضلنا زلطة ونطلع برا .. ونبقى المصريين اهما ديموقراطيين ومتحضرييييين .. بس .. نتقل ع الرز لما يستوى وكفاية طلعات؟؟!! الخميس ومليونيات الجمعة الكائنة بميدان التحرير برعاية مسمط وكشرى الثورة... نكتفى بهذا القدر ولقاءنا فى مليونية الأدب فضلوه عن العلم .. والعقل زينة فى الفاترينا ..نلتقى بعد الفاصل ..!!