أحمد عفيفي يكتب :فوازير رمضان

زعيم عصابة اى كلام .. غبي .. افراد عصابته ضحكوا عليه وأكًلوه الاونطة .. اصبح مثل خيال المآته .. لابيهش ولا بينش .. لحد ماوقع هو والاضيشه الوسخين .. جاب محامي " فريد" من نوعه زي " الديب " يلعب بالبيضة والحجر..اخذ موكله اعدام .. تأبيدة .. مش مهم .. المهم انه لهف الاتعاب .. وفي الاخر يقولك انا عملت اللي عليا .. زي ماعمل قبل كده في صاحبنا رجل الاعمال المشهور بطل قضية الفنانة الاشهر واخذ منه كام مليون وجابله اعدام .. عموما بشرة خير. اما زعيم العصابة فطلع منظر .. مش قد المواجهة .. زي الفار المبلول .. مستموت فيها بمشورة محاميه عشان يصعب علينا .. بس بعينه .. واللي خلق الخلق ماحد فينا حيسيب حقه ولو جرًوه جر.
جائزة حل الفزورة : اذا لاقدر الله واصابك مرض ممكن تتعالج ببلاش في المركز الطبي العالمي او مستشفى شرم الشيخ.
ليس له من اسمه اى معنى .. لاهو " حبيب " حد ولا يعرف " العدل " في حياته .. تصور انه بسلطانه وبحماية الكبير له سيكون بمنأى عن الخطر .. لكن ربك مفيش اكبر منه .. جابه على ملا وشه .. وبعد ماكانت النظرة منه ترعب الالاف ، اترمى في السجن زى الكلب ، واول القصيدة حكم بالسجن واللي جي اكتر بكتير.
الجائزة : لو لك ابن عايز يدخل كلية الشرطة حيدخل من غير مايدفع ال 100 الف .. الفيزيتا المقررة للباشا اللواء واتباعه.
اعلامي كان مشهور جدا .. صحفي كبير .. بس مش " أديب " .. وصاحب اشهر واسخف حديث مع زعيم العصابة .. كان بيقولها بالفم المليان : مفيش حد احسن منه ، واذا هو تعب عندنا ابنه .. هو الوحيد العالم ببواطن الامور .. هو اللي جنب فيشة الكهرباء لو النور قطع .. وعندما قامت الثورة قالك عندي معلومات مؤكدة بالاجندات الاجنبية ، وعندما نجحت فص ملح وداب .. راح فين الله اعلم.
الجائزة : اشتراك مجاني لمدة 100 سنة في شركة " جودنيوز"
والاعلامي السابق ذكره له قريب .. الخالق الناطق .. مذيع اشهر من النار على العلم وفلة شمعة منورة .. كان بيلعب على كل الحبال ، وسافر مرة مع زعيم العصابة هو ومذيعة متسواش تلاتة تعريفة لبلد عربي ، ورجع الاتنين وهاتك ياغزل في الزعيم وجماله وتواضعه وحنيًته .. وبعد الثورة عمل فيها مصطفى كامل ونزل ميدان التحرير يضحك على الثوار، فأخذ طريحة ما اخدهاش حرامي غسيل.
الجائزة : اشتراك مجاني في القناة بتاعته لمدة يومين فقط .. فمعروف ان صاحبنا ابخل من البخل نفسه.
اعلامية مشهورة على صلة قريبة جدا من اللي " فوقها " .. بس تقول ل " الحية " قومي وانا اقعد مطرحك .. والثعبان يشوفها يضرب لها تعظيم سلام .. كانت تطبل للنظام بطريقة بلدي ، خصوصا للولد .. بعدين تقولك " اتكلم " عشان تعرف ايه اللي في دماغك .. ومصممة انها " من قلب مصر " .. ودلوقتي عاملة فيها جميلة بوحريد .. والبنت الوحيدة اللي في " العاصمة " الكبرى .. واذا اردت ان تعرف منها الحقيقة لاتعطيك حتى نصفها .. لسان طول كده .. طردوها من التليفزيون المصري بعد ماكشفوها ، فراحت محطة تانية .. ثورجية محصلتش .. نازلة شتيمة في النظام السابق .. ركبت الموجة ودلدلت رجليها ، واهو رزق الهبل ع المجانين .
الجائزة : اشتراك سنة في الجريدة التي تعمل بها
صحيح اللي تحسبه " موسى " يطلع فرعون .. بيشتغل في جريدة قومية كبيرة .. وبعدين بقى مذيع .. مع ان وشه يقطع الخميرة م البيت .. لكنه كان مسنود ومدسوس من امن لدولة، وكل الناس عارفينه وكانوا بيخافوا منه .. وكان بيطلع في حلقات كتيرة مع المذيع " الموز موز موز " لحد ماغار في ستين مصيبة.
الجائزة : اتاحة الفرصة للراغبين ب " التف عليه " كلما طالعوا سحنته الغبية!
وزير سابق في حكومة نجسة كنا فاكرينه احسن واحد فيها ، وبعضنا حزن كثيرا عليه وقلنا مسكين " اتاخد في الرجلين " .. وعندما شعر بالخطر هرب على بلد عربي .. ولمًا سيرته جات ، عمل فيها انظف م الصيني بعد غسيله وانه على استعداد للمثول امام المحكمة اذا تم استدعاؤه .. وفي غمضة عين طار على بلد اللي يروح مايرجعش.
الجائزة : كيلو حلاوة من " رشيد " الميزان.
ابن عز وواخد طول عمره على اكل الوز .. تقوله من اين لك هذا
يرد : انا ابويا من اغنى الاغنياء .. قبل الثورة كان قلبه زي " الحديد " ولمًا وقع .. بقى الصفيح اقوى وانظف منه .. عليه خلقة عجيبة .. زي مايكون ابن " جنية " .. مش من اب وام طبيعين زيًنا .. قصير القامة نحيف الجسم .. وحرامي مفيش منه اتنين.
الجائزة : طن " حديد " للي يعرف هو مين
كان المسؤول الاول في جريدة اكبر منه بكتير .. لو تعرف اسماء اللي سبقوه في هذا المنصب .. تبكي بدل الدموع دم على حال الدنيا وتتذكر المثل اللي بيقول " الحظ لما يواتي يخلي الاعمى ساعاتي " .. .. ماكنش عنده " سرايا " يسكنها لحد مامسك المنصب وبقى عنده " سرايات " .. عندما فكروا فيه كان اهم شرط عندهم : واحد قفاه عريض يستحمل الضرب .. ويعرف يوطًي ويبوس الايادي والجزم ويمشي بالريموت كنترول .. اشتم ده .. حاضر يافندم .. افضح ده .. خدام سعادتك .. دلع ده.. طلباتك اوامر.
الجائزة : التعيين في الجريدة اللي كان فيها براتب خيالي.
ورئيس تحرير تاني .. متعرفش ايه اللي في دماغه بالضبط .. هو معاهم ولا عليهم .. قبل مايتعين في الجريدة ماكنش حد عارفه .. صحيح حقق طفرة كبيرة في التوزيع ، لكنه ماسك العصاية من النص قبل الثورة وبعدها .. متغركش المانشتتات بتاعته .. اقرا بين السطور و " انت وضميرك ".
الجائزة : ممكن تعينك في جريدته وتكون موالي له وتحقق " مجد " كبير.
ابن امه .. جميل " جمال " .. مالوش مثال .. افتكر ان العزبة عزبة ابوه فقالك اخدها .. مال ابويا وانا حر فيه .. عيًن الخفرا والمساعدين وخلًى الكبير فيهم تحت جزمته .. وفي الاخر رجعت العزبة لاصحابها الحقيقيين .. وهو لاطال عنب الشام ولا بلح اليمن ، واتسكع على قفاه ولبس البدلة البيضاء وقعد جنب اخوه.
الجائزة : زيارة متأنية للسجن والفرجة عليه لحد ماتزهق
" الفقي " لما يسعد يبقى مسؤول كبير .. كان الخادم المطيع للست هانم .. استاذ في تلوين وقلب الحقائق .. شغًال بكاميرا واحدة عشان ماحدش يشوف غير اللي هو واللي مشغلينه عايزنا نشوفه .. اخد خازوق مغريً طلع من نافوخه وقاعد دلوقتي في السجن من غير " انيس ولا ونيس "
الجائزة : الاحتفاظ مدى الحياة بالكاميرا بتاعته ذات الاتجاه الواحد.
اخر فزورة .. اجمع كلمة اسم يطلع اسمها .. " محفوظة " يارب من كل عين شافتها وماصلتش على النبي .. بنت بمليون راجل .. عقلها يوزن بلد ومن مواليد 6 ابريل
الجائزة : ممكن تتقدم لها وتطلب ايديها وشرطها الوحيد انك تكون مصري حتى النخاع.