عبد المنعم حسين يكتب: السيرة الهيلهلية

ولا يحلا الكلام
الا بذكر النبى
عليه الصلاة والسلام
يا سيدات يا تمام
ويا ساده يا كرام
نبدأ بالتحيه والاحترام
ونستعيذ برب الأنام
من شر الوسواسين اللؤام
ولا كان ولا ياما كان
د فى حاضر العصر والأوان
على أرض تشبه أرضنا
لكن ما نعرف لها مكان
هليهلى أبن متواكل سلطان
نوع من أنواع الإنسان
زيه فى كل من زينا من الأوطان
راجل على قده
لاحاجه تقويه
ولا حاجه تهده
مهما عدى بيه الزمان
هو على شكله
وعلى عمره
وليس فى الإمكان
سبحانه من سواه

" فيه ناس تعدى .. تسيب معنى
وناس تفرقنا .. وناس تجمعنا
وناس تعدى كأنها ما عدت
يعنى لا هى مشيت ولا هى قعدت
لكن لو قريتها تلقلها ميت معنى "

عم هليهلى
قلبه طيب
دمعه قريب
شايل حمله
كاتم سره
وسايب كله على الله

يضحك
تبان اللوزتين
يبكى
يجرى دمعه نهرين
يحب
يزرع أرضه بساتين
يكره
أبداً
يغضب
يرق
يدوب فى حنين
وسايب كله على الله

ولا بيخطط
ولا بيزبط
تضحك الدنيا
ولا بيزأطط
تشح الدنيا
ولا بيأرط
لايحمل قرش
ولا يملا كرش
ما إلا وسيله للحياه
والباقى كله على الله

هليهلى جوه بيته
لا له ولا عليه
لا تسمع له صوت
ولا تحس حركة رجليه
لا هو العبد
ولا هو البيه
لا يسأل أمتى
ولا يعرف ليه
يعنى بدون تدقيق
هو لزوم الشئ
لكن كل شئ فى عنيه
بس مين يقراه
طب بس سيبها على الله

هليهلى فى شُغله
ولا شايل همه
ولا بيهمه
غير حافزه وراتبه
يعرف عمله
من غير ما يقول
أو حد يقول له
والكل من حوله
لايعرف عنهم
ولا سمعوا عنه
كما اللهو الخفى
ما يعرفوا غير أسمه
يظهر ويختفى
ما أدركوا غير رسمه
يعنى الرأى الصائب
الحاضر الغائب
هليهلى كما الفراغ
تعيشه ولا تحسه
كما هو يا ولداه
وخليها على الله

هليهلى يوم سعده
مات مدير مصلحته
دَّوروا فى الكشوف
مالقوش
لا قبله ولا بعده
وبدون لف ودوران
جاله اللى ولا كان فى الحُسبان
والحظ لقاه وقابله
وأصبح هليهلى المدير
مكتب وكرسى وسكرتير
والكل إنتباه عنده
حط نفسه فى بدله
خنق رقبته بكرافته
ومسك سبحه بيده
وفجأه اللى كان بيهاب
أصبح هو المُهاب
والشنبات تنحلق على عتبته
لسانه المتلعثم .. نطق
وإن قال كُفر .. صَدق
وقبل ما يؤمر يتنفذ أمره
شد ضهره وإنجعص
والفار اللى جواه إنفعص
وخرج الأسد من قفصه
لما شاف الدنيا .. تاه
وخليها يا ابا على الله

" آه يا بليه لعبتى
وآه يا دنيا ضحكتى
والقرد أصبح غزال
والهَطَل أصبح حِكَم
وأديكى دايره يادنيا
ضحكتى على نفسك وصدقتى "

هليهلى لابيتحور
ولا بيتغير
فى كل الأحوال هوه هوه
يبُص ولايشوف
يتكلم بالمكسوف
أبيض خالص من جوه

وكما الفراش والنور
الدبابير حواليه بتدور
ما أكتر دبانك يا حلوه

إتلم عليه المُلقاط
ولزق فيه الشفاط
والبلطجى الى واخدها فتوه

الأول سَوَاه الأخير
وكتر النوم والشخير
وهليهلى حطوه على ربوه

إتلخبط الصف
والميزان طف
والجامح مش بايناله كبوه

هليهلى عجبه سُلطانه
والنسوان حسسته بجماله
اسم الله عليه ياختى النوغه

احفظ السر واكتم
وخونا يبصم ويختم
ومحلى إمضته بالفورمه
زاط المولد والعيل تاه
سيبها يابنى على الله

عْلي صوت التصقيف
ارتفع حس الهتيف
وهليهلى أطرش فى الزفه

أصبح وَلىّ
لأ د نبى
وكل الإيدين نزلت فى الفته

كترت معاه الموائد
وزانت صورته الجرايد
اختل الميزان وطَبِت بناسه الكَفه

أسمه نار على عَلم
صاحب بيان وقلم
وألف ايد من الخفا تحركه بالفتله

آه يا مسرح العرايس
الكل فيك هايص
والمستخبى هو الأصل فى القصه

يا هليهلى مالك
لا فيه بجمالك
فى عين الحسود تمانين مليون ملحه

وبس هُس سكوت
لا نفس ولا صوت
اتفتحت أبواب النصيب والقسمه

كأنها لحظة سُطَّل
وفيضان من الهَطَّل
إتلخصت الفانتازيا فى جمله


ولأنه زمن عجيب
ولهليهلى نصيب
كما النمله السوده فى ليله ضلمه

صدر فرمان خطير
هليهلى ياخونا وزير
نظراً لكُتر النشاط وعلو الهمه

وليحيا عهد الحواه
متخليها يابنى على الله

هليهلى بعد السلف
أصبح مليونير
ومراته بعد القشف
جالها الكوافير
وولاده أول سنه ينجحوا بلا غش

البيت أصبح فيلا
وخبى فى التلاجه القُله
والهدايا إترشت عليه رش

الدولاب إترص بدل
والكرفتات جت بالهبل
وف كل أوضه تواليت ودُش

الأشيه معدن وتسُر
أى سلعه بلا سعر
زكايب داخله يحملها ونش

والوزاره إنتعشت
والتجاره إتسعت
ومن بعد الضنك غيرهم القرش

اللعب أصبح خد وهات
وتمن للكلام وتمن للسكات
الواد ينحرق والشايب هو اللى يقش

وهليهلى فى الجورنال
يوماتى فى الأخبار
لا سايب أرضى ولا سايب دش

الضحك وَسّع بُقه
السمع كَبَر ودنه
ولسه بنطلونه ساقط من الكرش
هليهلى تاه جوه غابه
الذئاب نَسُوه الغلابه
مدام وزيرك معاك الملك ما بيكش

زمن الروتين بيولى
ولسه القلم بيمضى
و القانون فى علم الجاهل ولا بينش

تزيد الأضواء
وأيدين من الخفاء
تحمى هليهلى ولغيره تعبى وتحش
وتعود القسمه من جديد
ومرحب بالحظ الحديد
اللى يفتح خزاينه وهليهلى يخُش

تصدق بأيه ..
أيوه .. بقى أه
والسترمن عندك يا الله

وأتكون حزب الهيلهليه
وصار حزب الأغلبيه
قيراط حظ
وفدان شطاره
وشلة عصابه
فى حزب المحسوبيه

شيلنى .. أشيلك
تنسانى .. أجننك
هادينى .. أديلك هديه

الحبال دابت
والتيران سابت
طاحت وهاجت
ما خلت حته سَّويه
الجراد انفتحله الباب
طلع أسراب أسراب
حط على كل اليابس
ولا خلْىَّ حته طريه
قفلوا كتاب المدرسه
وبدأت دروس الفهلوه
دروس التباته والغتاته
واللعب بالبيضه والحجر
قفلوا العقول
سَّكوا القلوب
جه زمن العضلات القويه
زمن الضهور المحميه

وربنا يخلى الزمن الرخيص
وتدوم علينا أرض التهجيص
د لسه ياما أجيال جايه
أجيال من سُلالة الهيلاهليه

مانا نسيت أقول أُس المشكله
إن أم هليهلى كانت أرنبه
فى البطن بتولد ميه

وأهى ماشيه
والله ماهى ماشيه
ويا عينى عليك
ياللى من سُلاله خارج الحاشيه

يا عينى عليك يابنى
لوفِضلت متربى
حيفضل راكبك هيلهلى
وقوات الجردل والمقشه
يارب ضهر البعير اتملى
يارب أغِتنا بالقشه
وتقولى هى دى الحياه
أقول لك سبها برمتها على الله

" ياعينى .. ياعينى ع البلد
البلد أبو نهر أسمر .. ميت من العطش
والوادى أبو توب لخضر .. استورد قمح وبكش
والواد اللى متربى .. سابنا وهج وطفش
والواد أبو قلب قاسى .. قعد عبا وكبش
ويا عينى .. ياعينى ع البلد "

يا عينى ع البلد
اللى قدرت وسط الضلمه
تفتح طاقة نور وحريه
قدرت بصرخة حضارة مدويه
بأيد الشباب الناعمة
تمسح سيرة الهليهليه